Lucas 14
14
Chinoto tahuëri anoyatantarinsoꞌ
1Aꞌna huaꞌani Quisoso amatërin coshatapacaso marëꞌ. Parisio quëmapi inasoꞌ. Amatohuachina, inaquë paꞌnin. Chinoto tahuëri niꞌton, aꞌnapitarintaꞌ niꞌsapi shaꞌhuirapicaiso marëꞌ. 2Naporoꞌ aꞌna caniaꞌpi Quisosoquë huëꞌnin, panca pomatërinsoꞌ. 3Cotio maistroꞌsaꞌ, parisioroꞌsaꞌ, inapita notëërahuaton, Quisosori itërin:
—¿Noya chinoto tahuëri caniaꞌpi anoyatacasoꞌ ti? ¿Maꞌtaꞌ tënamaꞌ canpita? itërin.
4Natanahuatonaꞌ, taꞌtápi. Co mantaꞌ topihuëꞌ. Co aꞌpanitohuachinaraihuëꞌ, caniaꞌpi sëꞌhuarahuaton, aꞌnaroáchin anoyatërin. —Noya paquë huachi, itërin. 5Ina quëran piyapiꞌsaꞌ pënëantarin.
—¡Huiꞌnamaꞌ posoquë paꞌitohuachina, chinoto tahuëri nipirinhuëꞌ, aꞌnaroáchin ocoiramaꞌ! Mora tërantaꞌ paꞌitohuachina, ocoiramaꞌ. ¿Co ocoiramahuëꞌ nica? itërin.
6Parisioroꞌsaso nipirinhuëꞌ tapanatonaꞌ, co nanitopihuëꞌ aꞌpanitacaisoꞌ.
Pita pochin nininsoꞌ
7Yacoshatohuachinara, naꞌa piyapiꞌsaꞌ huaꞌan pirayan yahuënsëpi. “Huaꞌan pirayan huënsëhuato, chiníquën nanantonaꞌpi pochin niꞌsarinaco,” taꞌtonaꞌ, inaquë huënsëconpi. Ina niꞌsahuaton, Quisosori itërin:
8—Natanco iyaroꞌsaꞌ piꞌpian pënëinquëmaꞌ. Quëmapi yasaꞌapachina, nipayarinsopita amatërin coshatapacaiso marëꞌ. Inaquë amatohuachinquën, ama huaꞌanoꞌsa pirayan huënsëquësohuëꞌ. Taponaꞌ aꞌna quëmapi chini chiníquën nanantërinsoꞌ huëꞌsarin. 9Huëꞌpachin, huaꞌan itarinquën: “Poꞌshaquëꞌ, iso quëmapi huënsëꞌin. Pasëquë tërantaꞌ huënsëconquëꞌ,” itohuachinquën, tapanaran. 10Napoaton amatohuachinquën, coꞌinquë huënsëquëꞌ. Huaꞌan huëꞌpachin, noya nontarinquën. “Huëquëꞌ iyasha, isëquë noya huënsëiquëꞌ,” itohuachinquën, yaꞌipi piyapiꞌsaꞌ noya niꞌsarinquën. 11Inapochachin “Casoꞌ noya noyaco,” topatamaꞌ, Yosë atapanarinquëmaꞌ. Nipirinhuëꞌ, sano piyapi nipatamaꞌ, Yosë noya noya acoarinquëmaꞌ, itërin.
12Ina quëran pëiꞌ huaꞌanën pënënaton, itantarin:
—Caꞌpainënquënso marëꞌ piyapi amatohuatan, ama quëmopinënpita, amiconënpita, inapitaráchin amatëquësohuëꞌ. Maꞌhuanoꞌsaꞌ amatohuatan, inapitantaꞌ amataantahuachinënquën, iꞌhuërëtarinënquën. 13Saꞌahuaroꞌsaꞌ, apiaroꞌsaꞌ, sonpacharoꞌsaꞌ, somaraya nininsopita, inapitantaꞌ nosoroaton, amatëquëꞌ. 14Ina quëran noya cancantaran. Inapitasoꞌ co nanitopihuëꞌ amatantaꞌinënquënsoꞌ. Co iꞌhuërëtopirinënquënhuëꞌ, Yosësoꞌ iꞌhuërëtarinquën. Noya ninan niꞌton, ayaroꞌ tahuëri ananpitaantahuachinquën, acanaarinquën huachi, itërin.
Yosëri amatërinsopita
(Mateo 22.1-10)
15Inaquë coshatasoiꞌ, aꞌnasoꞌ natanahuaton, Quisoso itapon:
—Yosë chachin huaꞌanëntohuachinpoaꞌ, nóya coshatarihuaꞌ. Noya noya cancantarihuaꞌ, itërin.
16Napotohuachina, pënënto nanan shaꞌhuitërin.
—Aꞌna quëmapiri naꞌa piyapiꞌsaꞌ amatërin caꞌpacaiso marëꞌ. 17Tahuëri nanihuachina, inpriatonën aꞌparin shaꞌhuitantacaso marëꞌ. “Huëco huachi. Nani cosharoꞌ taparin,” itërin. 18Nani amatopirinhuëꞌ, co huachi nohuantopihuëꞌ. “Coꞌchi nanitëraihuë paya,” toconpi aꞌnaya aꞌnaya. “Noꞌpaꞌ paꞌanahuësoꞌ nicapo paꞌsarahuë. Napoaton co nanitërahuëꞌ,” tënin aꞌnaꞌ. 19“Shonca toro paꞌanahuë asacataꞌhuaso marëꞌ. Inapita tënipo paꞌsarahuë. Napoaton co ipora nanitërahuëꞌ,” tënin aꞌnantaꞌ. 20“Iꞌhuara saꞌarahuë. Napoaton co cantaꞌ nanitërahuëꞌ,” tënin aꞌnantaꞌ. 21Napotohuachinara, inpriatoso ayanahuaton huaꞌanën shaꞌhuitiirin. “Co huachi nohuantopihuëꞌ,” itërin. Natanahuaton, noꞌhuitërin. “Manóton paantaquëꞌ. Cachiquë tërantaꞌ paaton, piyapi maconquëꞌ. Saꞌahuaroꞌsaꞌ, apiaroꞌsaꞌ, somaraya nininsopita, sonpacharoꞌsaꞌ inapita maconquëꞌ,” itërin. Itohuachina, paꞌsahuaton, macontarin. 22Huënantarahuaton, shaꞌhuitiantarin. “Nani maconpirahuëꞌ. Ipora huantaꞌ pahuanarin piyapiꞌsaꞌ nanicasoꞌ,” tënin inpriatonën. 23“Ninano quëran pipirahuaton, macoantaquëꞌ. Nisha nisha ira paꞌtaton, shaꞌhuitonquëꞌ huëꞌinaꞌ. Iminoꞌsaquë huarëꞌ paaton, maconquëꞌ. Naꞌa piyapiꞌsaꞌ nohuantërahuë. 24Yaꞌnan amatërahuësopitasoꞌ, co huachi caꞌpainacosoꞌ nohuantërahuëꞌ niꞌton, inapocoꞌ,” itërin huaꞌani, tënin Quisoso.
Sacaiꞌ imacasoꞌ
(Mateo 10.37-38)
25Ina quëran Quisoso paantarin. Naꞌa piyapiꞌsari imasapirinahuëꞌ, tahuërëtahuaton, itapon: 26“Yaimapatamaco, ca naꞌcon naꞌcon nosoroco. Tatamaꞌ, mamamaꞌ, inapita co onpopinchin nosorocasoꞌ yaꞌhuërinhuëꞌ. Saꞌamaꞌ, huiꞌnamaꞌ, iyaparimaꞌ, oshiparimaꞌ, inapitantaꞌ co onpopinchin nosorocasoꞌ yaꞌhuërinhuëꞌ. Canpitaora nohuantëramasontaꞌ naniantatomaꞌ, casáchin imaco huachi. Co naꞌcon naꞌcon nosorohuatamacohuëꞌ, co tëhuënchachin imaramacohuëꞌ. 27Imapatamaco, aꞌnapita aparisitarinënquëmaꞌ. Yatëpapirinënquëmaontaꞌ, imamiatoco. Corosëquë chiníquën parisitërëꞌ. Inapochachin canpitantaꞌ imapatamaco, aparisitarinënquëmaꞌ. Co ahuantohuatamahuëꞌ, co tëhuënchachin imaramacohuëꞌ. 28Niꞌcoꞌ iyaroꞌsaꞌ. Aꞌna quëmapi panca tori yanipachin, co aꞌnaroáchin nininhuëꞌ. Yaꞌipi paꞌtërinsoꞌton yonquirin. 29Ina quëran coriquinën nanihuachina, pëiarin huachi. Co coriquinën nanihuachinhuëꞌ, co pëirinhuëꞌ. Patomaíchin aꞌcanin naporini, aꞌnapitari tëhuaitonahuëꞌ. 30‘Niꞌcoꞌ. Panca yapëipirinhuëꞌ, co nanitërinhuëꞌ aꞌcanacasoꞌ,’ ichitonahuëꞌ. 31Isontaꞌ yonquicoꞌ. Aꞌna copirno yaꞌhuërin, shonca huaranca sontaroꞌsaꞌ camairinsoꞌ. Inimiconënso nipirinhuëꞌ, cato shonca huaranca sontaroꞌsaꞌ camairin. Ina napoꞌ huëꞌpachinara, co aꞌnaroáchin ahuëapon paꞌsarinhuëꞌ: ‘Sacaiꞌ minsëcasoꞌ,’ taꞌton, yonquirárin. 32Co nanitochináchinhuëꞌ nipachina, comisionën aꞌparin nanan anoyatacaso marëꞌ. 33Inapochachin pënënanquëmaꞌ. Sacaiꞌ imamancosoꞌ, tënahuë. Napoaton noya yonquiatomaꞌ, imaco. Casáchin yonquihuatamaco, tëhuënchachin noya imasaramaco,” tënin Quisoso.
Yamora pochin nininsoꞌ
(Mateo 5.13; Marcos 9.50)
34-35Ina quëran taantarin: “Yamora noya acashicasoꞌ niponahuëꞌ, chiminpachinaso co huachi cashirinhuëꞌ niꞌton, co huachi maꞌmarë tëranta noyatërinhuëꞌ. Topinan tëꞌyatërëꞌ. Huëratëhuanpatamaꞌ, noya natanatomaco, yonquicoꞌ,” itërin Quisosori. (Canpitantaꞌ co noya cancantohuatamahuëꞌ, co Yosë nohuantarinquëmahuëꞌ tapon naporin.)
Currently Selected:
Lucas 14: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.