Lucas 13
13
Co noyahuëꞌ yonquipisopita naniantacasoꞌ yaꞌhuërinsoꞌ
1Naporoꞌ aꞌnaquën huëꞌsahuatonaꞌ, Quisoso shaꞌhuitiipi: “Caririaroꞌsaꞌ Yosë pëinënquë chinotatonaꞌ, maꞌsha tëparapirinahuëꞌ, Piratori sontaroꞌsaꞌ aꞌparin tëpacaiso marëꞌ. Inaquë chachin tëpapi,” itiipi.
2“Aꞌnapita caririaroꞌsa quëran naꞌcon naꞌcon oshahuanpi niꞌton, Yosë nohuanton, ¿tëpapi, topiramahuëꞌ ti? 3Co inapita naꞌcon naꞌcon oshahuanpihuëꞌ. Canpitantaꞌ co noyahuëꞌ yonquiramaꞌ. Co ina naniantohuatamahuëꞌ, anaꞌintarinquëmaꞌ. Chiminatomaꞌ, parisitomiataramaꞌ. 4-5Siroiquëntaꞌ aꞌna tori anotaton, shonca posa yaꞌpi tëparin: ‘Inapitantaꞌ naꞌcon naꞌcon oshahuanpi,’ ¿topiramahuëꞌ ti? Co naporinhuëꞌ, tënahuë casoꞌ. Naꞌa piyapiꞌsaꞌ Quirosarinquë inachachin oshahuanpi. Canpitantaꞌ co noyahuëꞌ yonquiramaꞌ. Co ina naniantohuatamahuëꞌ, chiminatomaꞌ, parisitomiataramaꞌ,” itërin Quisosori.
Nara co nitërinsohuëꞌ
6Ina quëran iso pënënto nanan shaꞌhuitërin: “Aꞌna quëmapi iminënquë iquira narantaꞌ shaꞌnin. Papotahuaton aꞌshinaponahuëꞌ, huaꞌquiꞌ co nitërinhuëꞌ. 7Ina quëran inpriatonën itërin: ‘Iso huayo napoonin. Nani aꞌshinaponahuëꞌ, cara piꞌipi co mantaꞌ nitërinhuëꞌ. Aꞌnëquëꞌ. ¿Maꞌmarëtaꞌ topinan huanirin?’ itopirinhuëꞌ, 8‘Ama sinioro ipora aꞌnëquësohuëꞌ. Aꞌna piꞌipiraꞌ tananpitëquëꞌ. Iso piꞌipi noya pacarapiarahuë. Apono acotarahuë noya nitacaso marëꞌ. 9Iso piꞌipi nitapon nimara. Co nitohuachinhuëꞌ, shaꞌhuitoco aꞌnëchinquën,’ itërin inpriatonëni,” tënin Quisoso.
Chinoto tahuëri apia anoyatërinsoꞌ
10Chinoto tahuëri nanihuachina, niyontonpiso pëiquë paꞌsahuaton, piyapiꞌsaꞌ aꞌchintarin. 11Inaquë aꞌna sanapi quënanconin, apia nininsoꞌ. Sopai nohuanton, nani shonca posa piꞌipi monconpirin. Co nanitërinhuëꞌ noꞌtëpicasoꞌ. 12Quisosori quënanahuaton, përarin. Huëcapaihuachina:
—Nani imoya noyatëran, itërin.
13Sëꞌhuapihuachina, aꞌnaroáchin noꞌtëquën huanirin. “¡Ma noyacha Yosësoꞌ niꞌton, anoyatërinco paya!” tënin. 14Niyontonpiso pëiꞌ huaꞌanso nipirinhuëꞌ, noꞌhuitërin. Chinoto tahuëri anoyatërin niꞌton, naporin. Napoaton piyapiꞌsaꞌ itapon:
—Saota tahuëri sacatacasoꞌ yaꞌhuërin. Naporoꞌ huëcoꞌ anoyatinquëmaso marëꞌ. Chinoto tahuërisoꞌ co noyahuëꞌ anoyatacasoꞌ, itërin.
15Quisosori natanahuaton, itapon:
—Canpitasoꞌ nonpintënquëmaꞌ. Co noꞌtëquën yonquiramahuëꞌ. Ohuacaꞌ, mora, inapita pëꞌtahuahuatamaꞌ, chinoto tahuërintaꞌ iꞌquiritëramaꞌ. Iꞌsha yaꞌhuërinquë quëparahuatomaꞌ, oꞌshitëramaꞌ. 16Iso sanapiso nipirinhuëꞌ Yosë piyapinën niponahuëꞌ, huaꞌquiꞌ parisitërin. Nani shonca posa piꞌipi Satanasëri aparisitopirinhuëꞌ, ipora huarëꞌ nichaꞌërahuë. Chinoto tahuërintaꞌ anoyatacasoꞌ yaꞌhuërin tënahuë. ¿Maꞌtaꞌ canpitasoꞌ yonquiramaꞌ? itërin.
17Natanahuatonaꞌ, inimiconënpitasoꞌ tapanpi. Aꞌnapitariso nipirinhuëꞌ, paꞌyatopi: “¡Ma noyacha Quisoso nanitaparin paya!” topi.
Mostasaraya pochin nininsoꞌ
(Mateo 13.31-32; Marcos 4.30-32)
18“¿Ma pochintaꞌ Yosë huaꞌanëntërinsoꞌ? topiramahuëꞌ. Aꞌna pënënto nanan shaꞌhuitantaꞌinquëmaꞌ canpitantaꞌ nitotacamaso marëꞌ. 19Mostasaraya pochin ninin. Yaꞌpirin huaꞌhuishin niponahuëꞌ, iminquë shaꞌpatëra, panca taꞌan ninin. Nani aꞌshinpachina, inairaroꞌsaꞌ huëcatonaꞌ, inaquë pëirin,” tënin. (Inapochachin yaꞌnan nipon, caraíchin piyapi Yosë imapirinahuëꞌ, aꞌna tahuëri huaꞌhuayátërahuë imasapi huachi.)
Pan ahuëpocatërinso pochin nininsoꞌ
(Mateo 13.33)
20Ina quëran itantarin: “¿Ma pochintaꞌ Yosë huaꞌanëntërinsoꞌ? 21Pan ahuëpocatërinso pochin ninin antaꞌ. Aꞌna sanapi pan nipachina, cato shonca quiro pochin trico noꞌmoꞌ manin. Masahuaton, piꞌpian tërantaꞌ pan ahuëpocatërinsoꞌ ayontohuachina, yaꞌipiya sëꞌcotërin, pan huëpocatërin huachi,” tënin Quisoso.
Yaꞌcoana pochin nininsoꞌ
(Mateo 7.13-14, 21-23)
22Ina quëran nisha nisha ninanoquë paꞌsahuaton, aꞌchintëraꞌpiarin. Quirosarinquë huarëꞌ paꞌsarin. 23Aꞌchintohuachina, aꞌna quëmapiri itapon:
—¿Onpo piyapitaꞌ chaꞌëponaꞌ? ¿Caraíchin nimara ti? itërin.
24—Yosë huëntonën pëi pochin ninin. Yaꞌcoananënsoꞌ yamianasha. Naꞌa piyapiꞌsasoꞌ yayaꞌconpirinahuëꞌ, co noyahuëꞌ cancantatonaꞌ, co nanitopihuëꞌ yaꞌconacaisoꞌ. Canpitaso nipirinhuëꞌ ipora chachin yaꞌconacamasoꞌ nohuantocoꞌ. Ama huaꞌquicosohuëꞌ. 25Aꞌna tahuëri huaꞌanëni yaꞌcoananën oncotarin huachi. Naporo huarëꞌ aipiran huanirahuatomaꞌ, yayaꞌconpiramahuëꞌ. “Iꞌsoatocoi Sinioro,” tosapiramahuëꞌ, co nohuantarinhuëꞌ. “Co nohuitëranquëmahuëꞌ. Co canpitasoꞌ piyapinëhuëpitanquëmahuëꞌ,” itarinquëmaꞌ. 26“Coꞌta nohuitërancoi. Quëmaroꞌcoi coshatërai, oꞌorai. Quiyataquë aꞌchinan,” tosapiramahuëꞌ. 27“Coꞌ mini nohuitëranquëmahuëꞌ. Co noyahuëꞌ ninamaꞌ niꞌton, co piyapinëhuëpitanquëmahuëꞌ. Paco huachi,” itahuatënquëmaꞌ, aꞌpaarinquëmaꞌ. 28Parisitopiquë paꞌsahuatomaꞌ, naꞌnëaramaꞌ, chiníquën parisitaramaꞌ. Apraan, Isaco, Cacopo, pënëntonaꞌpiroꞌsaꞌ, inapita Yosë huaꞌanëntërinquë yaꞌhuërapi, niꞌsaramaꞌ. Canpitaso nipirinhuëꞌ co yaꞌconamahuëꞌ niꞌton, sëtaramaꞌ. 29Nisha nisha parti quëran huëcatonaꞌ, Yosë yaꞌhuërinquë yaꞌconapi. Inaquë noya coshatërëso pochin nóya yaꞌhuërapi. 30Aꞌnaquënsoꞌ ipora co piyapiꞌsari noya niꞌpirinahuëꞌ, aꞌna tahuëri Yosëri nóya niꞌsarin. Aꞌnaquënso nipirinhuëꞌ ipora piyapiꞌsari noya niꞌpirinahuëꞌ, aꞌna tahuëri co Yosëri noya niꞌsarinhuëꞌ, itërin Quisosori.
Quirosarinquë yaꞌhuëpisopita yonquiaton, sëtërinsoꞌ
(Mateo 23.37-39)
31Naporoꞌ aꞌnaquën parisioroꞌsaꞌ Quisosoquë huëꞌpi.
—Aꞌnaroáchin taꞌaquëꞌ. Irotisë yatëparinquën, itiipi.
32—Inca. Co yapaꞌnahuëꞌ. Irotisësoꞌ paꞌpi nonpintëꞌ. Paaton, shaꞌhuitonquëꞌ. Nani Yosë shaꞌhuitërinco maꞌsha nicaꞌhuasoꞌ. Iporasoꞌ ina natëto, sopairoꞌsaꞌ aꞌparahuë. Naꞌa caniaꞌpiroꞌsaꞌ anoyatarahuë. Cara tahuëríchin pochin pahuanarin tiquiaꞌhuasoꞌ. Ina shaꞌhuitonquëꞌ nitochin. 33Inaso napotopirahuëꞌ, ipora tahuëri chachin pipito tashira aquëtëran Quirosarinquë nincanaꞌhuasoꞌ yaꞌhuërin. Iráca quëran huarëꞌ naꞌa piyapiꞌsaꞌ inaquë pënëntopirinahuëꞌ, tëpapi. Inaquë cantaꞌ, tëpainacoso yaꞌhuërin, tënin.
34Ina quëran itantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ. 35Napoaton Tata Yosë patarinquëmaꞌ. Co huachi catahuararinquëmahuëꞌ. Co huachi quënanaramacohuëꞌ. Oꞌmantaꞌhuasoꞌ tahuëri huarëꞌ quënantaramaco. Naporoꞌ: ‘¡Ma noyanquëncha quëmaso paya! Sinioro chachin aꞌpaimarinquën,’ itaramaco,” itërin Quisosori.
Currently Selected:
Lucas 13: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.