Juan 16
16
1Coꞌhuara maꞌsha onpochátërasënquëmahuëꞌ, shaꞌhuitaranquëmaꞌ ama paꞌyanatomaꞌ aꞌpoamacoso marëhuëꞌ. 2Niyontonpiso pëiroꞌsa quëran ocoiarinënquëmaꞌ. Aꞌna tahuëri yatëparinënquëmaꞌ. ‘Co noyahuëꞌ nipi niꞌton, tëpahuatoi, Yosë noya niꞌsarincoi,’ taꞌtonaꞌ, aꞌnaquëmaꞌ tëpaarinënquëmaꞌ. 3Co Tata Yosë nohuitopihuëꞌ. Cantaꞌ huiꞌninco nipirahuëꞌ, co nohuitërinacohuëꞌ niꞌtonaꞌ, aparisitarinënquëmaꞌ. 4Napoaton iyaroꞌsaꞌ, ama paꞌyancosohuëꞌ. Nani shaꞌhuitëranquëmaꞌ. Aꞌna tahuëri aparisitohuachinënquëmaꞌ, ina yonquiaramaꞌ. ‘Tëhuënchachin noꞌtëquën ninoton, shaꞌhuitërinpoaꞌ,’ tosaramaꞌ.
Ispirito Santo catahuarinpoasoꞌ
Yaꞌnan imapomaꞌ, co ina pochin shaꞌhuitëranquëmahuëꞌ. Canpitaroꞌco yaꞌhuato, catahuaranquëmaꞌ. 5Iporasoꞌ ‘Yosëꞌpaꞌ paantarahuë,’ itopiranquëmahuëꞌ: ‘¿Intohuataꞌ paꞌsaran?’ co itëramacohuëꞌ. 6Napotëranquëmaso marëꞌ chiníquën sëtapiramahuëꞌ. 7Noꞌtëquën itëranquëmaꞌ. Canpita marëꞌ paantaꞌhuasoꞌ noya, tënahuë. Co paantahuatohuëꞌ, Ispirito Santo co oꞌmarinhuëꞌ catahuainquëmaso marëꞌ. Nipirinhuëꞌ, paantahuato, ina aꞌpatimaranquëmaꞌ. 8-11Ispirito Santo isoroꞌpaquë oꞌmahuachin, oshahuanoꞌsaꞌ paꞌpi co noyahuë nipisoꞌ, Yosë noya coisë pochin nininsoꞌ, noꞌtëquën anaꞌintacaso yaꞌhuërinsoꞌ, inapita ayonquiarin: ‘Co Quisoso natëramahuëꞌ niꞌton, paꞌpi oshahuanamaꞌ. Inasoꞌ noꞌtëquënáchin Yosë natëton co tëhuërinhuë niꞌton, chiminpachina Tata Yosë yaꞌhuërinquë pantarin. Napoaton co huachi quënanaramahuëꞌ. Sopai huaꞌani huaꞌquiꞌ piyapiꞌsaꞌ huaꞌanëntopirinhuëꞌ, Yosëri minsërahuaton, anaꞌintarin,’ itarin piyapiꞌsaꞌ, ayonquiaton.
12Naꞌcon yaaꞌchintopiranquëmahuëꞌ, co ipora nanitaramahuëꞌ yaꞌipiya yonquicamasoꞌ. 13Nipirinhuëꞌ, Ispirito Santo oꞌmahuachin, yaꞌipi nanamëhuë aꞌchintarinquëmaꞌ. Noꞌtëquën anitotarinquëmaꞌ. Co inaora yonquirinsoꞌ aꞌchintarinquëmahuëꞌ. Yosë yonquirinso chachin aꞌchintarinquëmaꞌ. Aꞌna tahuëri maꞌsha onpocaisontaꞌ anitotarinquëmaꞌ. 14Ca nonahuëso chachin aꞌchintarinquëmaꞌ niꞌton, noya noya niꞌsaramaco. 15Yaꞌipi tatahuë yonquirinsoꞌ nitotërahuë. Ina pochin yonquirahuë cantaꞌ. Napoaton Ispirito Santo oꞌmahuachin, ca nonahuëso chachin aꞌchintarinquëmaꞌ.
16Piꞌpian pahuanarin pacaꞌhuasoꞌ. Paꞌpato, co quënanaramacohuëꞌ. Ina quëran co huaꞌquiya quëranhuëꞌ quënaantaramaco,” itërincoi.
Sëto inquitarinsoꞌ
17Caꞌtanoꞌsanënpitacoi ninontërai.
—¿Maꞌtaꞌ tapon naporin? “Piꞌpian pahuanarin pacaꞌhuasoꞌ. Paꞌpato, co quënanaramacohuëꞌ. Ina quëran quënaantaramaco,” tënin. “Tatahuë yaꞌhuërinꞌpaꞌ paantarahuë,” tënin antaꞌ. 18“Co huaꞌquiya quëranhuëꞌ quënantaramaco,” topachina, co nitotërëhuahuëꞌ. ¿Maꞌtaꞌ tapon naporin? tënai ninontatoi.
19Yanatanpiraihuëꞌ, co natanaihuëꞌ. Quisososo nipirinhuëꞌ nitotërin. Napoaton itërincoi:
“¿Maꞌtaꞌ tapon naporin?” taꞌtomaꞌ, yanatanpiramacohuëꞌ, co natanamacohuëꞌ. Tëhuënchachin piꞌpian pahuanarin pacaꞌhuasoꞌ. Paꞌpato co quënanaramacohuëꞌ. Ina quëran co huaꞌquiya quëranhuëꞌ quënaantaramaco. 20Noꞌtëquën itëranquëmaꞌ. Sëtatomaꞌ, naꞌnëaramaꞌ. Co natërinacosopitasohuëꞌ nipirinhuëꞌ: “Nani chiminin huachi,” taꞌtonaꞌ, capa cancantapi. Canpitaso nipirinhuëꞌ sëtapiramahuëꞌ, co huaꞌquiꞌ sëtaramahuëꞌ. Aꞌnaroáchin noya cancantantaramaꞌ. 21Niꞌco iyaroꞌsaꞌ. Sanapi yahuaihuachina, iquitaton co noyahuëꞌ cancantërin. Nani huaihuachina, aꞌnaroáchin nóya cancantërin. Co huachi iquitërinsoꞌ yonquirinhuëꞌ. “Huaꞌhuahuë nani huaꞌhuacharin,” taꞌton nóya cancantërin. 22Inapochachin canpitantaꞌ ipora sëtapiramahuëꞌ, naquëranchin quënaantaranquëmaꞌ. Naporoꞌ nóya cancantaramaꞌ. Co huachi insontaꞌ nanitarinhuëꞌ asëtainëmasoꞌ. Nóya cancantomiataramaꞌ.
23“Naporoꞌ co huachi natanaramacohuëꞌ. Noꞌtëquën shaꞌhuitëranquëmaꞌ. Ca pochin yonquiatomaꞌ, Tata Yosë nontocoꞌ. ‘Quisoso nanan quëtërincoi,’ taꞌtomaꞌ, maꞌsona nipatamaꞌ, acotarinquëmaꞌ. 24Ipora huantaꞌ co ina pochin Yosë nonchátëraramahuëꞌ. Iporaso nipirinhuëꞌ ca pochin yonquiatomaꞌ, maꞌsha nico quëchinquëmaꞌ. ‘Quisoso nanan quëtërincoi,’ taꞌtomaꞌ, nani tahuëri nontácoꞌ nóya cancantacamaso marëꞌ,” itërincoi.
Co noyahuëꞌ nipisopita Quisosori minsërinsoꞌ
25“Ma pochinsona nininsoꞌ nani aꞌchintëranquëmaꞌ. Aꞌna tahuëriso nipirinhuëꞌ co huachi ina pochin aꞌchintaranquëmahuëꞌ. Aꞌninquëchin tatahuë naporinsoꞌ shaꞌhuitaranquëmaꞌ. 26Naporoꞌ ca pochin yonquiatomaꞌ, tatahuë nontaramaꞌ. Ca pochin nontaramaꞌ niꞌton, noya natanarinquëmaꞌ. Co huachi canpita marëꞌ nontaꞌhuasoꞌ yaꞌhuërinhuëꞌ. 27Tatahuë chachin nosororinquëmaꞌ. Nosororamaco niꞌton, nosororinquëmaꞌ. Ina aꞌpaimarincosoꞌ natëramaꞌ niꞌton, nosororinquëmaꞌ canpitantaꞌ. 28Tatahuë quëran oꞌmato, isoroꞌpaquë yaꞌhuëpirahuëꞌ. Co huaꞌqui quëranhuëꞌ tatahuë yaꞌhuërinꞌpaꞌ panantarahuë,” itërincoi.
29—Iporasoꞌ co huachi ma pochinsona nininsoꞌ shaꞌhuitarancoihuëꞌ. Aꞌninquëchin nontarancoi niꞌton, aꞌnaroáchin natanai. 30Quëmasoꞌ yaꞌipi nitotëran. Yosë quëran oꞌmaran, tënai. Co huachi natanaꞌhuainquënso tërantaꞌ yaꞌhuërinhuëꞌ, itërai.
31—¿Nani natëramaco ti? Napoaponahuëꞌ, carinquëmaꞌ itaranquëmaꞌ. 32Ipora tashi chachin yaꞌipinquëmaꞌ taꞌananpiaramaco. Yanquëërahuatomaꞌ, pëinëmaquë paꞌsaramaꞌ. Patopiramacohuëꞌ, co caora yaꞌhuapohuëꞌ. Tatahuë caꞌtanarinco. 33Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.
Currently Selected:
Juan 16: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.