Juan 14
14
Quisoso ira pochin nininsoꞌ
1Ina quëran aꞌchintaantarin: “Ama paꞌyancosohuëꞌ. Ama sëtocosohuëꞌ. Yosë natëcoꞌ. Cantaꞌ natëco. ‘Co naniantarincoihuëꞌ,’ taꞌtomaꞌ, nani tahuëri natëco. 2Tatahuë yaꞌhuërinquë naꞌa pëiꞌ yaꞌhuërin. Co yaꞌhuërinhuëꞌ naporini, nani shaꞌhuichitënquëmahuëꞌ. Inatohuaꞌ panantarahuë canpita yaꞌhuëcamaso marëꞌ tapachinquëmaꞌ. 3Inatohuaꞌ paꞌpato, tapatontahuatënquëmaꞌ, oꞌmantararahuë. Oꞌmantahuato, maquimaranquëmaꞌ. Carëꞌquëmaꞌ yaꞌhuapomaꞌ. Ina marëꞌ oꞌmantararahuë. 4Intohuasona paꞌsarahuësoꞌ nitotëramaꞌ. Irantaꞌ nani nohuitëramaꞌ,” itërin.
5—¿Intohuataꞌ Sinioro paꞌsaransoꞌ? Co nitotëraihuëꞌ. ¿Onporahuatoitaꞌ ira nohuichii? itërin Tomasëri.
6—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ. 7Nohuitohuatamaco, Tatahuëntaꞌ nohuitaramaꞌ. Ipora quëran huarëꞌ ina nohuitaramaꞌ. Nani niꞌnamaꞌ, itërincoi.
8—Tata aꞌnotocoi niꞌii. Ina niꞌpatoi, nóya cancantarai huachi, itopirinhuëꞌ Pinipiri.
9—Isonápoꞌ piꞌipi iyasha, canpitaroꞌco yaꞌhuëpirahuëꞌ, ¿co nohuichatërarancohuëꞌ ti? Niꞌpatamaco, tatahuëntaꞌ niꞌnamaꞌ. ¿Onpoatontaꞌ nipachin, “Tata aꞌnotocoi niꞌii,” itëranco? 10Caso Tata Yosë pochachin ninahuë. Tata Yosëntaꞌ ca pochachin ninin. ¿Co ina iyasha, natëyatëraranhuëꞌ ti? Aꞌchintohuatënquëmara, co caora yonquinëhuë quëran aꞌchinahuëꞌ. Yosë yonquirinso chachin yonquiato, aꞌchintaranquëmaꞌ. Ina nohuanton, nani maꞌsha nanitaparahuë. 11Caso Tatahuë pochinco. Inantaꞌ ca pochachin ninin. Napoaton yaꞌipinquëmaꞌ natëco. Naporahuaton, nani maꞌsha nanitaparahuësoꞌ yonquiatomaꞌ, natëco, itërincoi.
12—Natancoꞌ iyaroꞌsaꞌ noꞌtëquën shaꞌhuitaranquëmaꞌ. Tëhuënchachin imapatamaco, ca pochin nisaramaꞌ. Tata Yosë yaꞌhuërinꞌpaꞌ panantarahuë niꞌton, saca sacaiꞌ nininsontaꞌ nanitapaaramaꞌ. 13Ca pochin yonquihuatamaꞌ, nanan quëchinquëmaꞌ Tatahuë nontacamaso marëꞌ. “Huiꞌnan chachin nanan quëtërinco,” taꞌtomaꞌ, ina nontocoꞌ. Ca pochin cancantatomaꞌ, maꞌsona nipatamaco acotaranquëmaꞌ. Aꞌnapitantaꞌ Tata Yosë noya noya nicacaiso marëꞌ inapoarahuë. Ina naꞌcon nohuantërahuë. 14Ca pochin yonquiatomaꞌ, maꞌsona nipatamaco acotaranquëmaꞌ.
Ispirito Santo aꞌpatimarinpoasoꞌ
15Ina quëran taantarin: “Nani pënënanquëmaꞌ. Nosorohuatamaco, natëaramaco. 16Inápaquë panantahuato, Tata nontarahuë Ispirito Santo aꞌpatimarinquëmaꞌ. Inaso ca pochachin catahuarinquëmaꞌ, achinicancanarinquëmaꞌ. Co onporontaꞌ patarinquëmahuëꞌ. 17Ispirito Santosoꞌ noꞌtëquënáchin nonin niꞌton, Yosë nanamën noꞌtëquën anitotarinquëmaꞌ. Co imarinacosopitasohuëꞌ nipirinhuëꞌ co ina natëpihuëꞌ. Napoaton co nohuitapihuëꞌ. Canpitaso nipirinhuëꞌ nohuitaramaꞌ. Nani tahuëri catahuarinquëmaꞌ. Yaꞌcoancantarinquëmaꞌ.
18Co saꞌahuaroꞌsaꞌ pochin nitaranquëmahuëꞌ. Co patomiataranquëmahuëꞌ. Ca nohuanto, Ispirito Santo yaꞌcoancantarinquëmaꞌ. Ca pochachin catahuarinquëmaꞌ. 19Co huaꞌquiꞌ isëquë yaꞌhuapohuëꞌ. Paꞌpato, co imarinacosopitahuëꞌ co huachi quënanarinacohuëꞌ. Canpitaso nipirinhuëꞌ quënaantaramaco. Nanpiantarahuë niꞌton, Yosë nohuitatomaꞌ nanpimiataramaꞌ. 20Nani nanpiantahuato, noya noya nohuitaramaco. Tëhuënchachin Tata Yosë pochin ninahuësoꞌ nitotaramaꞌ. Imamiataramaco niꞌton, canpitarëꞌco aꞌnaíchin pochin nisarahuë. Yaꞌcoancantaranquëmaꞌ niꞌton, nóya ninohuitarihuaꞌ. 21Nani pënënanquëmasoꞌ nitotatomaꞌ natëhuatamaco, tëhuënchachin nosoroaramaco, tënahuë. Nosorohuatamaco, Tata Yosëntaꞌ nosoroarinquëmaꞌ. Carinquëmantaꞌ nosoroaranquëmaꞌ. Inápaquë panantaporahuëꞌ, cancanëma quëran nontaranquëmaꞌ. Noya noya nohuitaramaco,” itërin Quisosori.
22—¿Onpoatontaꞌ Sinioro, quiyariachin noyá nohuitarainquën? ¿Co yaꞌipi piyapiꞌsaꞌ nohuitarinënquënhuëꞌ ti? itërin Cotasëri. Aꞌna Cotasë inasoꞌ. Co Cotasë Iscariotihuëꞌ.
23Napotohuachina, Quisosori itërin:
—Co yaꞌipi piyapiꞌsaꞌ nanitopihuëꞌ nohuitinacosoꞌ. Insosona nosorohuachinaco, natëarinaco. Natëhuachinaco, Tata Yosëri nosoroarin. Inaroꞌco yaꞌcoancantatoi, inaquë yaꞌhuëarai. 24Coꞌsoꞌ nosorohuachinacohuëꞌ, co natëarinacohuëꞌ. Co caora yonquinëhuë quëran shaꞌhuitëranquëmahuëꞌ. Tata Yosë shaꞌhuitohuachincora, inachachin shaꞌhuitëranquëmaꞌ. Ina aꞌpaimarinco.
25Coꞌhuara pantayatërasocohuëꞌ, shaꞌhuitëranquëmaꞌ. 26Inápaquë pantahuato, tatahuë nontarahuë, Ispirito Santo aꞌpatimarinquëmaꞌ. Ca yaꞌhuërënamëhuë oꞌmararin. Inasoꞌ achinicancanarinquëmaꞌ. Yaꞌipi Yosë nanamën aꞌchintarinquëmaꞌ. Catahuaarinquëmaꞌ aꞌchintëranquëmasoꞌ ama naniantacamaso marëhuëꞌ. Catahuahuachinquëmaꞌ, nóya yonquiantaramaꞌ.
27Pantaporahuëꞌ, asanocancanaranquëmaꞌ. Tata Yosë natëto, co mantaꞌ tëꞌhuatërahuëꞌ. Catahuaaranquëmaꞌ ca pochachin cancantacamaso marëꞌ. Piyapiꞌsaꞌ inahuara co sano cancantopihuëꞌ. Aꞌnaroáchin paꞌyanpi. Carinquëmaso nipirinhuëꞌ catahuaaranquëmaꞌ sano cancantacamaso marëꞌ. Ama paꞌyancosohuëꞌ. Ama tëꞌhuacosohuëꞌ. 28Nani shaꞌhuitëranquëmaꞌ. Inápaquë pantaporahuëꞌ, yaꞌcoancantimaranquëmaꞌ. Tëhuënchachin nosororamaco naporini, Tatahuëtaquë panantarahuëso marëꞌ noya cancanchitomahuëꞌ. Inasoꞌ chini chiníquën nanantërin. 29Coꞌhuara pantayatërapohuëꞌ, shaꞌhuitaranquëmaꞌ. Inápaquë pantahuato, yonquiaramaꞌ. “Tëhuënchachin ninoton, shaꞌhuitërinpoaꞌ,” taꞌtomaꞌ, noya noya natëaramaco. Ina marëꞌ shaꞌhuitaranquëmaꞌ.
30Co huachi huaꞌquiꞌ nontaranquëmahuëꞌ. Sopai huaꞌan nohuanton, masarinaco. Inari camairin niꞌton, nani huëꞌsapi macainacoso marëꞌ. Co casoꞌ piꞌpian tërantaꞌ ina camaincosohuëꞌ nipirinhuëꞌ, 31co taꞌarahuëꞌ. Tata Yosë nosoroato, ina noꞌtëquën natëarahuë. Ina nohuanton, maꞌsha onpoarahuë. Piyapiꞌsaꞌ nicatonaco, “Tëhuënchachin Yosë nosoroaton, natërin,” tosapi.
“Huëcoꞌ paꞌahua huachi,” itërincoi Quisoso.
Currently Selected:
Juan 14: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.