3 Juan 1
1
Imapisopita nosoroaton, catahuarinsoꞌ
1Ca ansianoco ninshitaranquën, iya Acayo. ¿Noya quëmantaꞌ yaꞌhuaran? Cantaꞌ noya isëquë yaꞌhuarahuë. Noꞌtën nanan imaran niꞌton, tëhuënchachin nosororanquën. 2Quëma marëꞌ iyasha, Yosë nontërahuë: “Catahuaquëꞌ Sinioro noya yaꞌhuëꞌin, ama canioinsohuëꞌ. Noya imarinquën niꞌton, catahuaquëꞌ noya yaꞌhuëꞌin,” itërahuë, Yosë nontato. 3Iꞌhuamiáchin aꞌnapita iyaroꞌsaꞌ canquirahuatonaꞌ, shaꞌhuitiirinaco: “Iya Acayo nóya cancantaton, noꞌtëquën imarin,” itiirinaco. Ina natanato, nóya cancantërahuë. 4Nani Quisocristo nanamën aꞌchintëranquëmaꞌ. Ina natëtomaꞌ, imaramaꞌ niꞌton, huiꞌnahuëpita pochin niꞌnanquëmaꞌ. Naꞌcon nosororanquëmaꞌ. Noꞌtën nanan imapatamaꞌ, nóya cancantarahuë. Ina naꞌcon naꞌcon nohuantërahuë.
5Ma noya iya imapisopita nosororan. Niꞌtoroꞌsaꞌ yaꞌnohuachinara, Quisocristo imapi niꞌton, oꞌshitaton, aꞌcaran. Co nohuitaponahuëꞌ, noya nontaton, catahuaran, natantërahuë. Yosë natëton iya inaporan. 6Inapitasoꞌ huënantahuatonaꞌ, niyontonaiquë shaꞌhuitiirinacoi: “Iya Acayo noya nosororincoi,” itiirinacoi. Naquëranchin quëmataquë cancoantahuachinaꞌ, catahuantaquëꞌ noya paꞌinaꞌ, tënahuë. Yosë marëꞌ sacatapi niꞌton, catahuaquëꞌ ama pahuanchinasohuëꞌ. 7Quisocristo noninsoꞌ aꞌchinápi. Ina marëꞌ paꞌsápi. Co Yosë imapisopitahuëꞌ aꞌchintaponaraihuëꞌ, co mantaꞌ ina marëꞌ maꞌpatopihuëꞌ. 8Napoaton canpoaꞌ inapopisopita catahuahuaꞌ ama pahuanchinasohuëꞌ. Inapitasoꞌ noꞌtën nanan aꞌchinapi. Cosharoꞌ, maꞌsha inapita pahuantopisoꞌ quëtohuatëhuaꞌ, canpoarintaꞌ aꞌnapita catahuarihuaꞌ Yosë nohuitacaiso marëꞌ. Catahuahuatëhuaꞌ, naꞌcon naꞌcon piyapiꞌsaꞌ imasapi.
Tiotripisë co noyahuëꞌ nininsoꞌ
9Yaꞌipi yaꞌhuëramaquë imaramasopita quirica nani ninshitëranquëmaꞌ. Tiotripisëso nipirinhuëꞌ, co yanatërincohuëꞌ. Inasoꞌ huaꞌan pochin yaninin. 10Napoaton yaꞌhuëramaquë paꞌpato, co noyahuëꞌ nininsopita aꞌninquëchin shaꞌhuitarahuë. Inasoꞌ naꞌcon pinorincoi, nonpinapirincoi. Naporahuaton, iyaroꞌsaꞌ aꞌchinacaiso marëꞌ canconpachinara, co noya nontërinhuëꞌ. Co pëinënquë ayaꞌconinhuëꞌ. Aꞌnapitari aꞌchinaꞌpiroꞌsaꞌ yacatahuapirinahuëꞌ, co ina tërantaꞌ nohuantërinhuëꞌ. “Ama pëinëmaquë ayaꞌconcosohuëꞌ,” itopirinhuëꞌ. Ayaꞌconpachinara, noꞌhuiton, inapitantaꞌ niyontonpi quëran yaocoirin. “Ama huachi canpita tërantaꞌ niyontonpiso pëiquë yaꞌconcosohuëꞌ,” toconin. Paꞌpi co noyahuëꞌ yonquirin inasoꞌ.
11Ama iya co noyahuëꞌ nipisopita nonanquësohuëꞌ. Noya nipisopita nonanquëꞌ. Noya nipatëhuaꞌ, tëhuënchachin Yosë imarihuaꞌ. Co noyahuëꞌ nipatëhuaꞌ, co Yosë nohuitarihuahuëꞌ.
Imitirio noya nininsoꞌ
12Imitirioso nipirinhuëꞌ noya imarin. Yaꞌipiya quëran napotërinco. Yaꞌipi cancanën quëran noꞌtëquën yonquirin. Quiyantaꞌ nohuitërai. “Inasoꞌ noya quëmapi,” tënai. Noꞌtëquën nontërainquën.
13Naꞌcon iya yashaꞌhuitopiranquënhuëꞌ, co aquëtëꞌ yaninshitëranquënhuëꞌ. 14Co huaꞌquiya quëranhuëꞌ nicaponquën paꞌsarahuë, topirahuëꞌ. Paꞌpato, niquënanpatëhuaꞌ noanhuaꞌ.
15Yosë asanocancainquën. Ina quëran noya cancantaton, noya yaꞌhuaran. Yaꞌipi imapisopita isëquë yaꞌhuëpisoꞌ yonquiatënënquën saludos aꞌpatarinënquën. Yaꞌipi nipayaraisopita inatohuaꞌ yaꞌhuëpisoꞌ yonquiarahuë. Saludos aꞌpatarahuë shaꞌhuitëquëꞌ. Nani huachi.
Currently Selected:
3 Juan 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.