Jl 1
1
Eb' laj saak' te'xsach li awimq
1A'an a'in li raatin li Qaawa' li kixye re laj Joel, ralal laj Petwel.
2Ab'ihomaq li aatin a'in, ex cheekel winq;
ab'inqex, chejunilex li wankex sa' li tenamit.
Ma eerilom a'in jun sutaq chiru leeyu'am?
Ma kik'ulmank a'in chiru li xyu'ameb' leexe'toonal?
3Seeraq'ihomaq reheb' leeralal eek'ajol,
eb' a'an te'xseeraq'i wi' chik reheb' li ralal xk'ajoleb'
ut chalen chik li xjar teepalileb' te'wanq moqon.
4Chixjunil ki'oso'k xb'aaneb' li motzo';
li k'aru ink'a' ke'xchoy eb' li motzo',
a'aneb' chik laj saak' ke'choyok re;
li ink'a' ke'xchoy eb' laj saak',
a'aneb' chik li chili' ke'choyok re;
li ink'a' ke'xchoy eb' li chili',
a'aneb' chik li raxq'een ke'choyok re.#1,4 Dt 28,38; Jl 2,2-11; Am 4,9; 7,1.
5Ajsiiq eeru, ex kalajenaq, ut yaab'anqex;
tz'uyinqex laa'ex li nawulak cheru li b'iin,
xb'aan naq ak xmaq'e'k cheru.
6Jo' jun teep chi aj puub' naq xe'chalk eb' laj saak',
q'axal naab'aleb' ut jwal kaweb' rib';
chanchaneb' chaq li kaqkoj#1,6 Ap 9,8.
naq xe'chalk chi reechaninkil lintenamit.
7Xe'xsach chi junajwa li uub',
xe'xjuk'i eb' li xche'el li iig:
xe'xmich' rix chixjunileb' li che'
ut saqeb' aj chik li ruq' xe'xkanab'.
8Tz'uyinqex, ex intenamit,
jo' li saaj ixq nayaab'ak xb'aan li xkamik li xsum'aatin.
9Maak'a' chik li mayejak triiw ut b'iin sa' rochoch li Qaawa' Yos;
jo'kan naq ra wankeb' laj tij, eb' laj k'anjel chiru li Qaawa'.
10Nakirnak aj chik eb' li k'aleb'aal;
rahil ch'oolej rilb'al li ch'och',
xb'aan naq x'oso'k li triiw,
xe'chaqik li uub' ut xe'tz'umaje'k li oliiw.
11Chimayoq eech'ool, ex aj awinel,
yaab'anqex laa'ex li nekex'awok uub',
xb'aan naq maak'a' chik li triiw ut li seb'aad,
x'oso'k chixjunil li awimq sa'eb' li k'aleb'aal.
12Xe'chaqikje'k eb' li xtoonal li uub'
ut xe'tz'umaje'k eb' li xche'el li iig;
jo'kan ajwi' xe'xk'ul chixjunileb' li xche'el li ki'il q'een ut eb' li kala'.
Xlaje'chaqik chixjunileb' li che'
ut maak'a' chik sahil ch'oolej sa' xyanqeb' li poyanam.#1,10-12 Os 4,3; Am 4,6-9.
Xb'oqb'aleb' chixjunileb' chi tijok ut ayuunik
13Ex aj tij, sotob'amaq eerib' chiru q'es ruhil t'ikr ut yaab'anqex!
Tz'uyinqex laa'ex li nekexk'anjelak chiru li artal.
Kimqex ut yo'lenqex rik'in rahil ch'oolej
laa'ex li nekexk'anjelak chiru linYos,
xb'aan naq maak'a' chik li mayejak triiw ut b'iin sa' rochoch leeYos.
14Ch'utub'omaq li tenamit
ut yehomaq resil li ayuunik.
Ch'utub'omaqeb' li cheekel winq ut chixjunileb' li poyanam
sa' rochoch li Qaawa' leeYos,
ut chextijoq chex'elajinq chiru li Qaawa'.
15Rahil kutan chalk re!
Nach' chik wank li xKutankil li Qaawa';
xiwajel rilb'al li sachok chalk re xb'aan li Nimajwal Yos.#1,15 Is 13,6; Ez 30,2-3; Sof 1,14-18.
16Sa' xnaq' qu ajwi' xmaq'e'k li qatzekemq
ut x'oso'k li sahil ch'oolej sa' rochoch li qaYos.
17Xe'q'aaje'k li iyaj sa' li ch'och',
maak'a' chik li triiw ut xe'juk'manje'k li xk'uuleb'aaleb'.
18K'ajo' naq neke'me'lok eb' li ketomq;
neke'saapank li ixqi wakax chi sik'ok raxpim,
ut yookeb' chi kamk eb' li karneer.
19At Qaawa', nintz'aamank nin'elajink chawu,
xb'aan naq li xam xsach li raxpim sa' li junesal na'ajej
ut xe'k'ate'k chixjunileb' li che'k'aam.
20A'anatqeb' li k'iche'il xul neke'elajink chawu
xb'aan naq xe'chaqik li roqha'
ut li xam xchoyok re chixjunil li pim chiru taq'a.#1,19-20 Am 7,4-5.
Currently Selected:
Jl 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.