Job 1
1
Laj tza kixyal rix laj Job
1Sa' li tenamit Us kiwank jun li winq aj Job xk'ab'a',#1,1 Stg 5,11. tiik xch'ool ut chaab'il xk'a'uxl: naroxloq'i li Yos ut naxtz'eqtaana li ink'a' us. 2Kiwank wuqub' ralal ut oxib' xrab'in. 3Kiwank ajwi' wuqub' mil xkarneer, oxib' mil xkameey ut o'k'aal xkab' o'q'ob' (500) sumal xb'ooyx, ut numtajenaqeb' laj k'anjel chiru. A'an li winq q'axal b'ihom sa' xyanqeb' li wankatqeb' sa' xteepal li releb'l saq'e.
4Eb' li ralal laj Job k'aynaqeb' chi ninq'ehik sa' rochoch li junjunq reheb', chi tustu ru rajlal chichab', ut junelik neke'xb'oq li ranab'eb' chi wa'ak rik'ineb'. 5Sa' xraqik li junjunq chi ninq'e laj Job naxb'oqeb' li ralal ut namayejak re te'kuye'q li xmaakeb'. Nawakliik toj eq'la ut naxyeechi'i li xk'atb'il mayej chiru li Yos, sa' xk'ab'a' li junjunq chi ralal. Xb'aan naq naxye sa' xch'ool: “Mare eb' li walal xe'xmajewa li Yos sa' xch'ooleb'”. Ut junelik naxb'aanu chi jo'kan.
6Sa' jun kutan, naq eb' li ánjel koxe'ch'utlaaq rik'in li Qaawa', kichalk ajwi' laj tza#1,6-12 1 Kr 21,1; Zak 3,1; Ap 12,10. sa' xyanqeb'. 7Ut li Qaawa' kixpatz' re:
—B'ar xatchalk chaq?
Kichaq'ok laj tza ut kixye:
—Toja' xinraqe'k chi xb'eeninkil chixjunil li ruuchich'och', chan.
8Ut li Qaawa' kixye re:
—Ma xak'e reetal laj Job laj k'anjel chiwu? Maajun junaq jo' a'an sa' ruuchich'och'. A'an jun li winq tiik xch'ool ut chaab'il xk'a'uxl: naroxloq'i li Yos ut naxtz'eqtaana li ink'a' us.
9Laj tza kixsume li Qaawa':
—Ma maak'a' rajb'al naq laj Job naxxiwa aawu? 10Ma maawa' tab'i' xb'aan naq laa'at nakatk'aak'alenk re, li xjunkab'al jo'wi' chixjunil li k'aru wank re? Xawosob'tesi li xk'anjel, ut eb' li xketomq neke'xnujob'resi li ruuchich'och'. 11Ab'anan charahob'tesi ut chawisi jo'nimal wank re: ch'olch'o naq sa' junpaat tatxmajewa sa' xnaq' aawu!
12Toja' naq li Qaawa' kixye re laj tza:
—Us, maak'a' naxye. B'aanu li k'aru taawaj rik'in jo'nimal wank re, ab'anan laj Job maak'a' taab'aanu re, chan li Qaawa'.
Chirix a'an laj tza ki'elk rik'in li Qaawa'.
13Sa' jun kutan, naq eb' li ralal ut eb' li xrab'in laj Job wankeb' sa' rochoch li asb'ej chi wa'ak ut chi uk'ak, 14kiwulak jun li winq rik'in laj Job ut kixye re:
—Yooko chaq chi b'ekok ch'och' rik'ineb' laab'ooyx, ut eb' laab'uur yookeb' chi ichajib'k chi xk'atqeb', 15naq sa' junpaat xule'okaq eb' laj Sabá chi maak'a' sa' qach'ool, ut xe'relq'a chixjunil laaketomq. Xe'xkamsi ajwi' chi ch'iich' chixjunileb' laj k'anjel chawu. Ka'ajin wi' xinruuk chaq chi elelik re xyeeb'al resil aawe.
16Toj yo ajwi' chi aatinak li winq a'an, naq kiwulak jun chik ut kixye re laj Job:
—Xxerok li kaaq ut xkamsiheb' li karneer ut eb' laj ilol reheb'. Ka'ajin wi' xinruuk chaq chi elelik re xyeeb'al resil aawe.
17Toj yo ajwi' a'in chi aatinak, naq kiwulak jun chik ut kixye:
—Xe'wulak sa' qab'een oxib' ch'uutal laj Kaldeha: xe'xkamsiheb' chi ch'iich' laj k'anjel chawu ut xe'xk'ameb' laakameey. Ka'ajin wi' xinruuk chaq chi elelik re xyeeb'al resil aawe.
18Toj yo ajwi' a'in chi aatinak, naq kiwulak jun chik ut kixye:
—Eb' laawalal ut eb' laarab'in yookeb' chi wa'ak ut chi uk'ak sa' rochoch li asb'ej, 19ut sa' junpaat xchalk chaq li kaqsut-iq' sa' chaqich'och': xchiq'chiq'i xkaahichal li xxuk li ochoch, ut xt'an li kab'l sa' xb'eeneb' laawalal aak'ajol. Xe'kamk chixjunileb'; ka'ajin wi' xinruuk chaq chi elelik re xyeeb'al resil aawe.
20Toja' naq kixaqliik laj Job, kixq'ich li raq' ut kixjo li xjolom. Chirix chik a'an kiwiq'laak, kixchunub' rib' chiru ch'och' 21ut kixye:
“Chi t'ust'u xin'elk chaq rik'in linna'
ut kama'an ajwi' naq tinsutq'iiq aran.#1,21 Ek 5,15; 1 Ti 6,7.
Li Qaawa' xk'ehok ut li Qaawa' xmaq'ok chiwu.
Usilaatinanb'il taxaq xk'ab'a' li Qaawa'!”.
22Rik'in chixjunil li rahilal kixk'ul laj Job, ink'a' kimaakob'k ut maak'a' ink'a' us kixk'oxla chirix li Yos.
Currently Selected:
Job 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.