Jn 7
7
Li Jesus koho Jerusalén sa' li ninq'e ut kixtzoleb' li tenamit
1Chirix chik a'in li Jesus ki'ok chi b'eek Galilea, ut ink'a' naru taab'eeq Judea xb'aan naq eb' laj Judiiy yookeb' chi xsik'b'al chan raj ru te'xkamsi.
2Ak taanach'oq chaq li xninq'eheb' laj Judiiy, a' li xNinq'eheb' li Muheb'aal#7,2 A'an li ninq'e najultikamank wi' li xwanjikeb' laj Israel sa' li chaqich'och' (cf. Lv 23,33-43; Nm 29,12-39; Dt 16,13-16). neke'xye re. 3Kiyehe'k ut re xb'aaneb' li rech'alal:#7,3 Chirix eb' li riitz'in li Jesus: cf. Mt 12,46.
—Elen arin ut ayu Judea re naq te'ril ajwi' eb' laatzolom li xninqal ru b'aanuhom nalajaab'aanu, 4xb'aan naq maajun naxb'aanu xk'anjel sa' muqmu, wi a'an naraj taanawe'q ru. Wi nakab'aanu a'in, k'ut aawib' chiru li ruuchich'och'.
5Xb'aan naq chi moko eb' li rech'alal neke'paab'ank re. 6Toja' naq kixye li Jesus reheb':
—Toj maji' nawulak linhonal, a'ut leehonal laa'ex junelik wank cheruq'. 7Li ruuchich'och' ink'a' naru xik' nekexril; a'ut laa'in xik' nikinril xb'aan naq nink'ut naq ink'a' us li xb'aanuhomeb'. 8Taqenqex#7,8 Naxye: Taqenqex, xb'aan naq li tenamit Jerusalén k'ojk'o chaq taqe'q. laa'ex sa' li ninq'e; laa'in ink'a' tintaqe'q sa' li ninq'e a'in xb'aan naq maji' natz'aqlok linhonal.
9Naq kixye a'in, toj kikanaak Galilea. 10Ut naq ke'taqe'k li rech'alal sa' li ninq'e, kitaqe'k ajwi' li Jesus: ab'an moko chi k'utk'u ta naq koho, chi muqmu b'an. 11Eb' laj Judiiy yookeb' chi xsik'b'al li Jesus sa' li ninq'e, ut neke'xyehatq: “B'ar wank a'an?”. 12Ut q'axal neke'hashotk eb' li poyanam chirix a'an. Wan te'yehoq: “Chaab'il winq a'an”. Wankeb' chik neke'xye: “Ink'a', naxb'alaq'iheb' b'an li tenamit”. 13Ab'anan maa'ani na'aatinak chirix chi kutankil xb'aan xxiweb' chiruheb' laj Judiiy.
14Sa' xyiitoq li ninq'e kitaqe'k li Jesus sa' rochoch li Yos ut ki'ok chi xtzolb'aleb' li tenamit. 15Ut eb' laj Judiiy neke'xyehatq chi sachsookeb' xch'ool:
—Chanru naq li winq a'in naxnaw chi us chi moko tzolb'il ta?
16Kichaq'ok li Jesus ut kixye reheb':
—Li k'aru nink'ut laa'in moko we ta, re b'an li kitaqlank chaq we. 17Wi junaq traj xb'aanunkil li rajom li Yos, tixnaw ma re li Yos li nintzoleb' wi' malaj yal injunes wib' nin'aatinak. 18Ani na'aatinak yal xjunes rib', a'an naxsik' naq taak'eemanq xloq'al; ab'an li naxsik' xloq'al li kitaqlank chaq re, a'an paab'ajel ut maak'a' b'alaq'ik rik'in.
19“Ma maawa' tab'i' laj Moisés li kik'ehok eere li Chaq'rab'? Ut maajun eere napaab'ank re li Chaq'rab'. K'a'ut naq teeraj inkamsinkil?”.
20Ke'chaq'ok li tenamit:
—Aj tza wank aawik'in! Ani taa'ajoq aakamsinkil, chankeb'.
21Li Jesus kixsumeheb' ut kixye:
—Jun ajwi' xnimal inb'aanuhom xinb'aanu ut chejunilex sachso leech'ool xexkanaak. 22Laj Moisés kixk'e eere li sirkunsisyon (moko xchalk ta a'in rik'in laj Moisés, rik'ineb' b'an leexe'toonil yuwa') ut laa'ex sa' sábado nekeb'aanu li sirkunsisyon. 23Wi nab'aanumank li sirkunsisyon re junaq winq sa' sábado re naq ink'a' taaq'etmanq li xChaq'rab' laj Moisés, k'a'ut naq nekexjosq'o'k wik'in naq xink'irtasi chi xjunxaqalil jun li winq sa' sábado? 24Mexraqok aatin a' yaal chanru nekeril, chexraqoq b'an aatin sa' tiikilal.
Ma a'an a'in li Kriist?
25Wankeb' aj Jerusalén ke'yehok:
—Ma maawa' tab'i' a'in li neke'raj xkamsinkil? 26K'ehomaq reetal: yo chi aatinak chi kutankil ut maak'a' neke'xye re. Malaj ut eb' li xb'eenil xe'xnaw chi tz'aqal naq a'an li Kriist? 27Ab'anan a'in naqanaw b'ar nachalk chaq, a'ut naq tol'elq li Kriist, maa'ani taanawoq re b'ar ta taachalq.
28Toja' naq li Jesus, naq yo chi xtzolb'aleb' li tenamit sa' rochoch li Yos, kixye chi kaw xyaab' xkux:
—Yaal naq nekenaw wu ut nekenaw b'ar xinchalk chaq, ab'an ink'a' xinchalk injunes wib', wank b'an li tz'aqal kitaqlank chaq we, a' li ink'a' nekenaw ru laa'ex. 29Laa'in ninnaw ru xb'aan naq rik'in ninchalk chaq ut a'an kitaqlank chaq we.
30Ke'raj raj xchapb'al, ab'an maa'ani kixtaqsi li ruq' sa' xb'een, xb'aan naq toj maji' nawulak li xhonalil.
Li Jesus kixye naq xik re
31Naab'aleb' sa' xyanqeb' li tenamit ke'paab'ank re, yookeb' chi xyeeb'al:
—Naq taak'ulunq li Kriist, ma tixb'aanu naab'al chik xninqal eetalil chiru li xb'aanu a'in?
32Eb' laj Pariseey ke'rab'i naq eb' li tenamit neke'xyehatq a'in chirix li Jesus; jo'kan naq ke'xtaqla eb' li xtaql chi xchapb'al. 33Kixye ut li Jesus:
—Toj tinwanq chik kach'inaq eerik'in, toja' naq tinxik rik'in li kitaqlank chaq we. 34Tineesik' ut ink'a' tineetaw, ut b'arwi' wanqin laa'in ink'a' texruuq chi xik laa'ex.
35Toja' naq eb' laj Judiiy ke'xye chirib'ileb' rib':
—B'ar anchal taaxik a'an naq ink'a' tooruuq xtawb'al? Malaj taaxik ta rik'ineb' laj Griego li xe'xcha'cha'i rib'eb', re naq tixtzoleb'? 36K'aru xyaalal li aatin kixye: «Tineesik' ut ink'a' tineetaw, ut b'arwi' wanqin laa'in, ink'a' texruuq chi xik laa'ex»?
Li Jesus kixyeechi'i li ha' nak'ehok yu'am
37Sa' roso'jik li ninq'e, sa' xnimal xkutankil,#7,37 A'an li xNinq'eheb' li Muheb'aal (cf. 7,2). kixye li Jesus chi xaqxo ut chi kaw xyaab' xkux:
“Li taachaqiq re, chalqaq wik'in,
ut li napaab'ank we, chi'uk'aq.
38Jo' naxye li Santil Hu:
Xnima'il yo'yookil ha' te'elq rik'in”.#7,38 Cf. Sal 78,15-16; 105,41; Pr 18,4; Is 58,11; Zak 14,8. Li Jesus naxb'oqeb' chaq chixjunileb' rik'in jo' kixb'aanu li Choxahil Na'leb' (Sabiduría xk'ab'a' sa' kastiiy) sa' li Najter Chaq'rab'. Rik'in li Jesus taa'elq xnima'il yo'yookil ha' (cf. Ex 17,1-6; Is 58,11; Zak 14,8; 1 Ko 10,4), a'an reetalil li Santil Musiq'ej (1,33; 4,7; Hch 1,4-5; Ap 21,6). Wan ajwi' neke'yehok re naq li xnima'il yo'yookil ha' taa'elq sa' xch'ool li taapaab'anq re li Jesus.
39Kixye a'in chirix li Musiq'ej li te'xk'ul eb' li te'paab'anq re: sa' li kutan a'an toj maak'a' li Musiq'ej xb'aan naq li Jesus toj maji' nanimaak xloq'al.
Ke'ok wi' chik chi xwech'b'al rix ani li Jesus
40Naq ke'rab'i eb' li aatin a'in, wan sa' xyanqeb' li tenamit ke'yehok:
—A'an tz'aqal li propeet.
41Wankeb' chik ke'yehok:
—A'an a'in li Kriist.
Ab'an wankeb' ajwi' ke'yehok:
—Ma aran tab'i' Galilea taachalq li Kriist? 42Ma ink'a' tab'i' naxye li Santil Hu naq li Kriist taachalq chaq sa' xyanqeb' li ralal xk'ajol laj David, sa' li k'aleb'aal Belén, b'arwi' kiwank laj David?#7,42 2 S 7,12-13; Sal 89,4-5; 132,11-12; Mi 5,2.
43Jo'kan naq kichalk jun jachok ib' sa' xyanqeb' li tenamit sa' xk'ab'a' li Jesus. 44Wankeb' ke'raj raj xchapb'al, ab'anan maa'ani kixtaqsi li ruq' chi xb'een.
45Naq eb' laj k'aak'alenel li ke'taqlaak chi xchapb'al li Jesus ke'sutq'iik rik'ineb' li Xb'eenileb' aj tij jo'wi' rik'ineb' laj Pariseey, ke'yehe'k re:
—K'a'ut naq ink'a' xek'am chaq?
46Ke'chaq'ok eb' laj k'aak'alenel:
—Maajun junaq winq na'aatinak jo' na'aatinak li winq a'an, chankeb'.
47Ke'sumeek xb'aaneb' laj Pariseey:
—Ma xexb'alaq'iik ajwi' chaq laa'ex? 48Ma wank tab'i' junaq reheb' li xb'eenil malaj junaq aj Pariseey li xpaab'ank re? 49A'ut eb' li poyanam a'in li ink'a' neke'xnaw li Chaq'rab', a'aneb' xb'alb'aheb' ru.
50Jun xkomoneb' a'an, a' laj Nikodemo li kiwulak rik'in li Jesus xb'enwa, kixye reheb':
51—Ma naraqok tab'i' aatin li qaChaq'rab' sa' xb'een junaq winq chi toj maji' na'ab'iik a'an ut maji' nanawmank li naxb'aanu?
52Ke'chaq'ok ut ke'xye re:
—Ma laa'at ajwi' aj Galilea? Tz'ili rix ut taak'e reetal naq maajun propeet na'elk chaq Galilea.
Li ixq li kixmux xsumlajik#7,53 Li raqal 7,53-8,11 moko tz'iib'anb'il ta xb'aan San Jwan.
53[Ut li junjunq koho sa' rochoch.
Currently Selected:
Jn 7: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.