Esd 1
1
I. XSUTQ'IJIKEB' CHAQ LAJ ISRAEL UT XWAKLESINKIL LI ROCHOCH LI YOS (1-6)
Li xtaqlahom laj Siro
(2 Kr 36,22-23)
1Sa' li xb'een chihab' rokik laj Siro cho'q awab'ej re Persia, re naq taatz'aqloq ru li raatin li Qaawa' kixye chi xtz'uumal re laj Jeremías,#1,1 2 Kr 36,21; Jr 25,11; 29,10. li Qaawa' kixtoch' xch'ool laj Siro, awab'ej re Persia, re naq tixtaqla xpuktesinkil li chaq'rab' a'in chi yeeb'il ut chi tz'iib'anb'il, sa' chixjunileb' li na'ajej wankeb' rub'el li xwankil:
2“Jo'ka'in xye laj Siro, awab'ej re Persia: Li Qaawa', li xYos li choxa, xk'e rub'el linwankil chixjunileb' li tenamit sa' ruuchich'och'. Ut a'an xchaq'rab'ink we naq tinkab'la jun rochoch aran Jerusalén,#1,2 Is 44,28; 45,1-4. sa' xteepal Judá. 3Jo'kan utan, chejunilex li xkomonex li xtenamit li Yos naru texxik Jerusalén, sa' xteepal Judá, re xkab'lankil li rochoch li Qaawa', xYos laj Israel, a' li Yos li wank Jerusalén. A' taxaq li Qaawa' leeYos chitenq'anq eere. 4Ut yalaq b'ar wanqeb' aj Israel, eb' li rechkab'al che'tenq'anq taxaq reheb' rik'in plaat ut oor, sahil eechej ut ketomq, jo' ajwi' rik'in chixjunil li taa'alaaq sa' xch'ooleb' xk'eeb'al re li rochoch li Yos li wank Jerusalén”.
Li xsutq'ijikeb' chaq eb' laj Israel
5Toja' naq li xjolomileb' li junqkab'al aj Judá ut aj Benjamín, eb' laj tij, eb' laj Leví ut jo'k'ihaleb' ke'toch'e'k xch'ool xb'aan li Yos, ke'xchap xb'eheb' re xik Jerusalén chi xkab'lankil li rochoch li Qaawa'. 6Ut chixjunileb' li rechkab'al ke'okenk chi xtenq'ankileb' rik'in plaat ut oor, sahil eechej ut ketomq, jo' ajwi' rik'in naab'al li k'a'aq re ru jwal terto xtz'aq ut chixjunil li ki'alaak sa' xch'ooleb' xk'eeb'al reheb'. 7Laj Siro li awab'ej kixq'axtesi chixjunileb' li k'anjelob'aal re li rochoch li Yos, li ke'elq'aak ut ke'k'ehe'k sa' rochocheb' li jalanil yos xb'aan laj Nabukodonosor.#1,7 2 R 24,13; 25,13-16; 2 Kr 36,10.18. 8Laj Siro, awab'ej re Persia, kixq'axtesiheb' sa' ruq' laj Mitrídates, laj k'uulanel tumin, ut a'in kirajlaheb' ut koxk'e re laj Sesbasar, aj jolominel re Judá. 9A'an a'in li ajlanb'il: lajeeb' xka'k'aal li ninqi sek' yiib'anb'ileb' rik'in oor; lajeek'aal rox o'q'ob' (1,000) li ninqi sek' yiib'anb'ileb' rik'in plaat; b'eleeb' xka'k'aal li ch'iich'; 10lajeeb' xka'k'aal li sek' yiib'anb'ileb' rik'in oor; lajeek'aal rox o'q'ob' (1,000) li sek' yiib'anb'ileb' rik'in plaat; lajeeb' xkab' o'q'ob' (410) li sek' yiib'anb'ileb' rik'in plaat ink'a' jwal terto tz'aq; ut lajeek'aal rox o'q'ob' chik (1,000) li k'anjelob'aal. 11Chixjunil li k'a' re ru yiib'anb'il rik'in plaat ut oor, a'an a'in: oob' mil rik'in jun o'q'ob' (5,400). Chixjunil a'in kik'ame'k Jerusalén xb'aan laj Sesbasar naq ki'elk Babilonia rochb'eeneb' li wanjenaqeb' aran chi preexil.
Currently Selected:
Esd 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.