Dn 1
1
Kaahib' chi ch'ajom aj Israel wankeb' sa' rochoch li awab'ej re Babilonia
1Sa' rox chihab' rokik chi awab'ejink laj Johakín aran Judá, laj Nabukodonosor, li awab'ej re Babilonia, kiwulak sa' li tenamit Jerusalén ut kixsut rix.#1,1 2 R 24,1; 2 Kr 36,5-7. 2Li Qaawa' kixq'axtesi laj Johakín, li awab'ej re Judá, sa' ruq' laj Nabukodonosor re naq taak'ame'q Senahar. Jo'kan ajwi' ki'uxmank reheb' li loq'laj sek' li neke'k'anjelak sa' rochoch li Yos: ke'k'ame'k ut ke'k'eemank sa' xyanq li xb'ihomal li rochoch li xyoseb' laj Babilonia.
3Toja' naq li awab'ej kixye re laj Aspenas, li xjolomileb' laj k'anjel, naq tixsik'eb' wiib' oxib'aqeb' li saaj winq sa' xyanqeb' laj Israel, a' yaal ma sa' xyanq li ralal xk'ajoleb' li awab'ej malaj sa' xyanqeb' li xninqaleb' ru winq. 4Eb' li ch'ajom a'an tento naq kawaqeb', chaab'ilaq rilb'aleb', seeb'aq xch'ooleb' ut wanqeb' xnawom, tzolb'ilaqeb' chi us ut kawal wanqeb' chi k'anjelak sa' rochoch li awab'ej, re naq te'xtzol li aatinak ut li tz'iib'ak sa' raatinob'aaleb' laj Kaldeha.#1,2-4 2 R 20,17-18; 24,10-16; 2 Kr 36,10; Is 39,7-8. 5Laj Nabukodonosor kixye ajwi' naq rajlal kutan taak'ehe'q junq wa'al xtzekemqeb', xkomon li naxtzeka jo'wi' li b'iin naruk' li awab'ej. Te'tzoloq chiru oxib' chihab' ut chirix a'an te'ok chi k'anjelak sa' li rochoch.
6Sa' xyanqeb' a'an wankeb' laj Daniel, laj Ananías, Misael ut laj Asarías, aj Judaheb' chixjunileb'. 7Li xjolomileb' laj k'anjel kixjal li xk'ab'a'eb': laj Daniel, kixk'e cho'q aj Beltsasar; laj Ananías, kixk'e cho'q aj Sidrak; laj Misael, kixk'e cho'q Misak ut laj Asarías, kixk'e cho'q aj Abdénago. 8Ab'an laj Daniel ink'a' kiraj xmuxb'al ru li xpaab'aal rik'in xtzekankil li xtzekemq ut li ruk'a' li awab'ej; jo'kan naq kixtz'aama chiru li xjolomileb' naq ink'a' tixmin ru chi xtzekankil a'an.#1,8 Jdt 12,2; Est (gr) 4,17x. 9Li Qaawa' kirusila ru laj Daniel ut kixk'e naq li xtz'aamahom taak'ulub'aaq xb'aan laj Aspenas, xjolomileb' laj k'anjel. 10Ab'an a'in kixye re laj Daniel: “Laa'in ninxiwa ru li awab'ej, linwa'chin. A'an xyehok naq teetzeka li xtzekemq ut li ruk'a' a'an. Ut wi texxtaw chi saqkirink ut b'aqex chik chiruheb' leekomon, relik chi yaal naq tixteneb' li kamk sa' inb'een”, chan laj Aspenas.
11Toja' naq laj Daniel ki'aatinak rik'in laj k'aak'alenel li kik'ehe'k xb'aan laj Aspenas chi xch'oolaninkileb' laj Daniel, laj Ananías, laj Misael ut laj Asarías: 12“B'aanu usilal -chan-; qayalaq xb'aanunkil a'in chiru lajeeb'aq kutan: k'e chiqatzeka junes xxe' li ichaj ut yal ha' taaquk'. 13Chirix chik a'an toohaajuntaq'eeta rik'ineb' li te'tzekanq re li xtzekemq li awab'ej, ut moqon chik b'aanu qe jo' chanru toohaawil”.
14Laj k'aak'alenel kixk'ulub'an li kixye laj Daniel, ut chiru lajeeb' kutan kixb'aanu li kiyeemank re. 15Ut naq ak xnume'k li lajeeb' kutan, jwal ch'ina'us li rilob'aaleb' li saaj winq ut ninqeb' chik li xtib'el chiruheb' li yookeb' xtzekankil li xtzekemq li awab'ej. 16Chalen chiru li kutan a'an, laj k'aak'alenel ink'a' chik kixk'e li tzekemq ut li b'iin kixye li awab'ej, ut junes xxe' ichaj chik ut ha' kixk'e reheb'.
17Li Qaawa' Yos kixk'e xchaab'il na'leb'eb' li kaahib' chi saaj winq a'an; kixk'e ajwi' xseeb'al k'a'uxeb' chirix li k'iila nawom. Laj Daniel naxtaw ru eb' li moy u jo'wi' eb' li matk'. 18Naq ak xnume'k li oxib' chihab' li xyehom li awab'ej, ke'k'ame'k chiru laj Nabukodonosor xb'aan li xjolomileb' laj k'anjel. 19Li awab'ej ki'aatinak rik'ineb' ut q'axal kisaho'k xch'ool: maajun junaq aj k'anjel kixtaw jo' laj Daniel, laj Ananías, laj Misael ut laj Asarías; jo'kan naq ke'kanaak chi k'anjelak chiru li awab'ej. 20Chirix chixjunil li chaab'il na'leb' malaj seeb'al k'a'uxej li naraj xnawb'al li awab'ej, eb' li kaahib' chi saaj winq a'an q'axal chik ke'tawe'k naq wankeb' xna'leb' chiruheb' chixjunil: lajeeb' wa chik neke'xq'ax ruheb' laj q'e ut eb' li neke'nawalink sa' chixjunil li x'awab'ejilal laj Nabukodonosor. 21Ut laj Daniel kikanaak chi k'anjelak aran toj sa' xb'een chihab' chi awab'ejink laj Siro.#1,21 Esd 1,1.
Currently Selected:
Dn 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.