Tit 1
1
Pablo ichene len'okhayaj häp Tito
1Amtena ipuhfwa Tito,#2~Cor 8.23; Gál 2.1-3 olham Pablo ochen ame olhämetna tä ohäpe Dios lakawo wet Jesucristo laka apóstol, wok oyok, lakachenhay tä lhamenya elh. Häp Jesucristo ne'tek oyen lhämeta lhämtes yämthilek wichi tä Dios tatshupiye, iwo lechayaja wet nitäfwelej m'ak tä matche tä y'ahänlhi. 2Wet lhachayajna tälhe t'at lhanihayaj tä kalelhäj, häp lhanihayaj tä ichätyenla n'amhohen lhaw'atshancheyaj tä t'un. Lhaw'atshancheyajna häpe m'ak tä Dios ifwel p'ante tä kamaj honhat newache. Wet Dios häpkhit'a elh tä w'et yämlhi. 3Wet tä nichäte lewhäy, lham, tä häpe Lhafwayhthi, hin'älit wet t'ekhayej n'oye lhämet tä ne'tek oyen silätyaja.
4Wet am, Tito, tä ahätet iwoyek olhäs tä ohumnekej lhachayaj tä in'amejenna, is che Dios Lhajcha lhäy'e Cristo Jesús Lhafwayhthi iti amej lep'altsenyaj lhäy'e atamsek.
Tito lechumet tä ihi lhiletaj Creta
5M'ak tä tamenej tä one'tenaj che lemälhehi Creta, ot'unajläk lhäm wak'alh m'ak tä kamaj niwak'alha naji, wet äp one'tenaj che letshupyenehen elhpej lhamel tä ihiche lew'etes iyhäj, yämthilek häpehen líderes tä t'uye Dios leles. 6Häp hin'ol tä lechumet täjtso, iwatläk häpehen elhpej tä najit letesa, lhäy'e tä weihalha atsinha tä lech'efwa, wet leles ichaye Lhawuk wet tach'ahuye lhokwey, wet nehit katsik yen tesayej lhamel m'ak che ni'isa che iwoye.
7Tsi elh tä t'uye Dios leles, lechumet t'at tä itetshan m'ayhay tä Lewuk Dios. Häp tä tamenej tä iwatläk häpe elh tä najit letesa, tek lhaichäjlhi, tektshanhiyet'a tä tawäkwäy, w'oknajit'a, äkleyhtsajit'a, wet häpkhit'a elh tä t'uhläk ikalhi wuj lakaha tä iwoye lechumetna. 8Häte iwohiyet'ak kahäpeya hin'o tä ihuminlä elh che takastej ayej lew'et. Iwatläk häpe elh tä ihumin m'ak tä is, wet iwelkathiyet'a m'ak tä iwoye, wet häpe hin'o tä is alhoho, wet lhayen t'amajchetayej Dios, wet ifwon lhame. 9Häpe hin'o tä lhaip'ajtej Dios lhämet tä matche, mälhyej tä pajche õ'chufwenej, yämthilek ihanej iwoyneje che ikhajyenej iyhäj häp n'ochufwenyaj tä is tä tälhe Dios, wet ikalhi hin'ol tä fwetaj itayhtejlä lhämet.#1~Tim 3.2-7
10Tsi iche wujpe hin'ol tä y'ulhan m'ak tä is alhoho, lhamel iwoyepej lhämtes tä najit lahaya wet ikanejen wichi. Wet iyhäj tä lhäy'e lhip tä iwoye täjtso, häpe t'at Judío lhayis tä ihän Jesucristo mat yok, “Nilhokej Dios leles iwohiyet'ak n'otetnek tä n'olhijtsek newayej.”
11Olham oyok, ¡P'ohiche lak'as häp hin'oltso! Tsi tä iwatläk lakaha tälhe m'ak tä iwoye, häp tä yen chufwenyaja m'ak tä ni'isa alhoho wet ikänchi wujpey wichi tä ihiche lew'etes.
12Iche p'ante hin'o tä ahantsaj tä lew'et t'at Creta, tä yäme lew'etfwas wet yok, “Häp Creta lheley, lakey t'at tä w'et yämwethä, wet tet iwoye itshätäy tä fwitses, yalhk'alis wet katawolis.” 13Wet matche t'at lhämettso. Häp tä tamenej tä oyok, Äm äytaj afwonyaj tä letiyej hin'oltso, häpkhilek yäm is alhoho lechayaj 14wet nemhit tach'ahuye Judío lhayis laka p'alhalis, lhäy'e n'olhämtes tä tälhe hin'ol tä ileyej Dios lhämet tä matche.
15Häp wichi tä is letichunhayaj, yäme tä nilhokej m'ayhay isen t'at. Mat lhamel tä nit'ekhayache Lhawuk lhämtes wet letichunhayaj nits'ilaka, lhamel yäme tä nilhokej m'ayhay isihent'a.#Rom 14.14-20 Tsi y'aje letichunhayaj lhäy'e lehusek tä kok'aye. 16Fwetaj häpehen iyhäj tä nitäfwelej Dios, mat häp m'ak tä iwoye hin'älit tä mathichet'a. Hich'atej lakeyes wet tatayhlä Dios lhämet, wet ikalhihit'a che iwoye m'ak tä is.
Currently Selected:
Tit 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.