Luc 24
24
Jesús inuphä tä tälho n'op'itseyhay
(Mat 28.1-10; Mar 16.1-8; Juan 20.1-10)
1Häp ifwala tä ichunpe semana atsinhaytso yikhen tä nech'e fwamlafwaj tä yäple n'op'itsekw'et, wet ichäj m'ayhay tä lenij akäjche tä pajche lhamel iwaklhat. 2Tä nichäte, hiw'en tunte tä nemhit ihi lepe tä pajche õhp'oyeji. 3Wet lhamel tiyäj lech'oye, mat hiw'enhit'a Lhawuk Jesús lep'itsek. 4Wet wuj tä iseltej, kalelhäjit'a letichunhayaj. Mat nech'e hiw'en hin'ol täkwfwas tä takasthen tä iwhäye lhamel, lew'uyis isiche t'at. 5Wet tä lenowayhyaj tapokwe, wet t'upeyhchä, mat häp hin'oltso tahuyej lhamel wet yok:
–¿Chipte tä lehoyaye n'op'itseyhay tä let'ukwe hin'o tä iläy? 6Ihit'a kana, inuphä tä tälho n'op'itseyhay. Tichunache lhämet tä ifwelnaj amhohen tä kamaj ihi Galilea tä yok, 7“Häp Hin'o Lhäs iwohiyet'ak õknachajaye wichi tä ni'isahen takweyey, wet lhamel hip'ajthiyeja cruz, wet chik ifwalas tä ihi tres inuhiphäla chik tälho n'op'itseyhay.”#Luc 9.22; 18.31-33
8Wet nech'e atsinhay lehusekch'oye Jesús lhämtestso. 9Wet yäpil tä tälhe n'op'itsekw'et wet ifwenho nilhokej m'ak tä hiw'en häp apóstoles tä ihi once lhäy'e nilhokej iyhäj. 10-11Matkat apóstoles lhamel yok:
–Aisukis t'at, mathichet'a.
Häp atsinhaytso häpehen María Magdalena, lhäy'e Juana, lhäy'e María tä Santiago lako, lhäy'e atsinhay iyhäj.
12Mat häp Pedro yik, inu alhoho tä ihoye n'op'itsekw'et. Tä nichäte, t'upeyejchä tä iyahin lech'oye, mat tajlhama wesas tä hiw'en tä ikatsi. Wet nech'e yäpil, wuj tä iseltej m'ak wit'äyna.
Jesús lhain'ältej täkwfwas wichi tä ihoye Emaús
(Mar 16.12-13)
13Ifwalatso täkwfwas lhamel tä ihänlhi Jesús yikhen tä ihoye hupuy tä niwuja tä lhey Emaús, once kilómetros p'iya tä tälhe Jerusalén. 14Tä yikhen, yäme t'at häp m'ak wit'äyhyajn'aj iche. 15Wet tä yäm'atwethä, Jesús lhayämte lhamel wet yikche. 16Wet tej tä lhamel hiw'en, mat hätet iwoye chik lep'ot ihi letäfwnhayaj wet tek nitäfwelej elh tä häpe. 17Wet lham tay'ätshane lhamel wet yok:
–¿Atsi m'ak tä lhämaye tä lenekche n'äyij?
Wet takasthen wet n'äl tä lefwitajayaj ihi, 18wet elh tä lhey Cleofás yok:
–¿Hä tajlhamat am tä lhehi Jerusalén tä kahanayej häp m'ak wit'äyhyajnaj iche?
19Wet lham tay'ätshane lhamel wet yok:
–¿Atsi lewit'äyhyajn'aj tä häpe?
Lhamel yok:
–Häp m'ak tä õ'woyeje naji Jesús tä Nazaret lhele, häp profeta tä takhajay. Dios wuj tä akäjejlhi m'ayhay tä lham yenlhi lhäy'e lhämtes tä iwoye, wet nilhokej wichi matche tä ihumin. 20Mat häp sacerdotes tä len'ohyajay ihiche, lhäy'e lhaka niyatey, ne'tek õ'tiyej letes wet õ'län, wet häp tä õhp'ajtej cruz. 21Olhamel ofwetajnaj häpkhila lhamtso chik ifwayhthila Israel lhayis. Mat athana nech'e tajyäme tres ifwalas tälhe ifwalanaj õ'län. 22-23Mat atsinhay tä iyej olhamel, iyhäj ihoye lep'itsekw'et täjm'at nech'e fwamlafwaj, wet tä yäpil wuj tä iselkat n'oyejen tä yäme tä niw'ena lep'itsek. Wet ifwen n'ohohen tä iche ángeles tä lhain'ältej lhamel, wet häp tä iwo silätayej tä Jesús iläy. 24Wet iyhäj olhamel yikhen tä ihoye n'op'itsekw'et. Tä lhamel nichäte, hiw'en tä mälhyet iwoye tä atsinhay yäme, mat hiw'enhit'a Jesús.
25Wet nech'e Jesús tahuyej lhamel wet yok:
–¡Ahusey t'unhen amel! Kamaj tek let'ekhayaye m'ayhay tä profetas yen p'ante lhämeta. 26¿Hä nit'uhawetayej chik N'ofwayhthi tä Dios Chenek iteläytej m'ayhaytso wet tiyäjo lewujyaj?
27Tä iwoyetso, nech'e y'ithatho lhamel nilhokej Dios lhämtes tä ihi Lehi tä yen lhämeta lham. Ichunkat Moisés lesaynek p'ante pajtha nichäte nilhokej profetas lesaynhay.
28Tä nichäte hupuy tä ihoye, wet Jesús hätet iwoye chik lham tujlhache t'at len'äyij. 29Mat lhamel tahuyej tä yok:
–Woye t'at tä olhamel oyok, yej lhek, tsi athana honaj, honatsihila.
Tä mälhyejtso, Jesús ihochufwi lew'et wet iyej t'at lhamel. 30Wet tä iwhäye mesa, lham tachuma pan wet iwo graciasayej Dios, wet hich'esaj wet hiw'enho lhamel. 31Häpet tä mälhyejtso, nech'e tafwoype lhamel letäfwnhayaj wet nitäfwelej tä häpe Jesús. Mat tatäy, wet lhamel nemhit hiw'en. 32Wet yämwethä lhamho tä yok:
–Tä y'anekche n'äyij, tä lham yämlhi n'amhohen oläte ohusek tä lakäjyaj ihi tä lham y'ithat n'amhohen Dios lhämtes tä ihi Lehi.
33Tä lhamel iwoyetso, wet yikhen tä yäple Jerusalén. Tä nichäte, wet apóstoles tä ihi once tä lhaihutwek, lhäy'e t'unfwas iyhäj, 34ifwenho lhamel tä yok:
–¡Matche t'at tä inuphä Lhawuk, lhain'ältej Simón!
35Wet nech'e häte iyhäj täkwfwastso lhamel ifwenho iyhäj häpet hin'o tä lhaichutyenej lhamel tä inukwe n'äyij, lhäy'e tä paj wet nitäfwelej tä häpe Jesús, tä lham hich'esaj pan.
Jesús lhain'ältej lechufwenkay
(Juan 20.19-23)
36Tä kamaj lhamel yämejwethä tähestso, Jesús lhain'älit tä ihi lechowej wet n'okwiyej tä yok:
–Atamsekis ihi.
37Mat lhamel wuj tä inuhat lhamhohen wet y'ilejen lenowayhyaj, fwetaj Lewuk husek t'at tä hiw'en. 38Mat Jesús yok:
–¿Chipte tä lenuhat amhohen wet akachuhanyaj ihiche ahusey? 39Lhek yahinay otkwech'ol lhäy'e opach'ol, chas n'oye wet lehanhiyeja tä olham t'at. Tsi ot'isan ihi wet olhile ihi, tek ohäte iwoye n'ohusek tä t'isan newahi wet lhile ihihit'a.
40Tä iwoyetso, wet ipäyne lhamel häp takwech'ol lhäy'e lepach'ol. 41Mat lhamel kamaj wujit'a tä imatitche, tsi nahayej leselthayaj lhäy'e lakäjyaj. Wet häp tä Jesús tay'ätshane lhamel wet yok:
–¿Hä lew'enay m'ak chik otufw?
42Wet lhamel hiw'enho w'ahat tä n'op'okwe lhip, 43wet lham tachumlä wet tufw tä ihi tä lhamel tatache. 44Tä ileyej wet yok:
–Häp m'ak tä inaj n'oyej, häpe t'at tä ofwel amhohen täjnaj kamaj oi'amejen tä oyok, Iwohiyet'ak lhaknäma matche nilhokej m'ak tä Ley p'ante tälhe Moisés yämej n'oye, lhäy'e tä ihi profetas lesaynhay, lhäy'e tä ihi Salmos.
45Wet nech'e ifwoyenche lhamel letäfwnhayaj yämlek ihanej Dios lhämtes tä ihi Lehi, 46wet yok:
–Ihi N'olesaynek tä yäme tä N'ofwayhthi tä Dios Chenek iwohla leteläythayaja yäk y'il, mat inuhiphäla chik tres ifwalas. 47Wet lham lhämetej laka wichi yämlek iwohla silätayej iyhäj wet yok, “Woyay ahusey iyhäja, häpkhilek Dios itäyhat amejen asukyajay.” Wet Dios lhämet ne'tek ichunkat Jerusalén lheley tä yen silätyajayej m'ayhayna, pajla'tha ichätyene häp wichi tä ihiche nilhokej honhates. 48Amel ahäpkhila silätwosej m'ayhayna, 49wet ochenla wet nichätla atapehen m'ak tä pajche Ojcha ifwel amhohen.#Ap.Lh 1.4 Mat yej lhekaych'oye ayej Jerusalén, pajla'tha lekatayej akhajyhayaj tä tälh puleye.
Õ'chäj puleye Jesús
50Wet nech'e Jesús yikchufwi lhamel tä tälho hupuy yäk tott'aye Betania. Tä yäm kanhi, itiphä takweyey wet itiyej lhamel lakäpfwayaj tä is. 51Häpet tä mälhyejtso, wet yikch'oye wet õ'hän puleye.#Mar 16.19; Ap.Lh 1.9-11
52Wet lhamel n'okwiyej. Tä ileyej, wet yäple Jerusalén wet wuj tä lakäjyaj ihi. 53Wet ihipej Dios Lew'et tä iwunit Dios.
Currently Selected:
Luc 24: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.