Judas 1
1
Judas ichene len'okhayaj häp Dios leles
1Amtena ipuhfwas, olham Judas,#Mat 13.55 häp Jesucristo lakawo wet äp Santiago lech'inij, ochen amehen olhämetna häp amel tä ahäpehen Dios Lhajcha lehumnhay wet t'än amehen wet Jesucristo t'u amehen. 2Is chik lhäy'e lhip tä i'amejen Dios lep'altsenyaj, lhäy'e atamsek, lhäy'e ahumnhayaj.
N'ochufwenyajwos tä kamatachehen
(2~Ped 2.1-17)
3Ipuhfwas tä oalehumnhay, wuj tä ohumin chik ochen amehen olhämet wet oyämej amehen häpet lhafwayhyaj tä in'amejen. Matkat oyenek lhäy'e lhip tä t'uhawetej chik ochen amehen olhämet tä w'enha lhamej, wet olhaip'altsen amehen yämthilek lewoyay äkleyhyaja'pe n'ot'ekhahyaj tä pajche Dios hiw'enho leles wet wak'alh t'at. 4Tsi iche hin'ol tä ni'isahen tä lhaiskatwethä tä lhay'uytho amel. Lhamel yen lhektshanyaja lhaka Dios lep'altsenyaj yämthilek iwoye lenech'ethayajay tä ni'isachehen. Wet lhaifwonlä häp Jesucristo tä häpe t'at Lhawuk wet äp lhaka Niyat tä weihalha. Häp hin'oltso, N'olesaynhay tä N'ot'amajchetes pajche ikalelhät tä tiyäjihola letäyhyaj.
5Tä pajche amel lehanej, mat ot'uhläk otichunyen amchehen, tä tej p'ante tä Lhawuk itonphä Israel lhayis tä tälho honhat tä Egipto wet ifwayhthen,#Éx 12.37-42 mat tä paj itäyhthen iyhäj tä nit'ekhayaye.#Núm 14.29-30 6Häte iche p'ante ángeles tä y'ayhtejen m'ak tä Dios ne'tek lhamel iwoye, wet häp tä yikch'oye lew'et tä ihi.#Gén 6.1-4 Mat Dios yäytej chinhas yämthilek tiyäj'attsiy, wet ithatho honataj lechowej yäk Ifwala tä Wuj tä häpe N'okalelhthayaj. 7Häte häp wichi p'ante lew'etes Sodoma lhäy'e Gomorra, lhäy'e hupuy tä tott'ahomche, lhamel iten ángeles lakeyestso. Iwoye t'at lakain'oyaj wet t'isanis inityenej lenech'ethayajay tä hich'atej tä nit'uhawetayej. Häp tä tamenej tä lhamel nichätho t'at itäj tä n'oma, yämthilek nilhokej wichi hiw'en häp lewit'äyhyajtso wet nowaye.#Gén 19.1-25
8Mat tej tä mälhyej'attso thayej, häp n'ochufwenyajwos tä oyämene, lhamel ihän t'at lefwilhey, fwetaj tälhe Dios wet lhaiwit'äynejen, yen w'et m'ayeka Lhawuk Niyatyaj wet itiyej leläkwyhanyaj n'okhajyhayajay tä ikaphä. 9Mat tej tä Miguel tä häpe ángeles kaniyat,#Dan 10.13,21; 12.1; Apoc 12.7 iwohiyet'a täjtso. Tsi tä lham lhäy'e ahättaj inahutpe p'ante häp Moisés lep'itsek,#1.9 Judío lhayis lelesaynekhi elh p'ante lhey La Asunción de Moisés, häp tä yäme tä ahättaj t'uhläk lhayen lewuka Moisés lep'itsek, tsi yäme tä anikoy, ilän p'ante Egipto lhele (Éx 2.11-12). mat Miguel tek iwomejphä lhämet tä leläkwyhanyaj chik yäme ahättaj wet yok, “¡Ates ihi!” Tajlhame tä yok, “¡Lhawuk aifwon!” 10Matkat häp hin'ol tä oyämetso iwoyejepej lhämtes tä ni'isachehen häp m'ak tä nitäfwelayej. Wet m'ak tä itäfwelej tälhe t'at t'isanis lenech'ethayajay, tälhiyet'a lehusey. Tsi hätet iwoye itshätäy tä iche tayhi, lehusey ihihit'a, wet lakeyestso häp tä ichätyenho letäyhyaj.
11¡Lewit'äy ihihila lhamel, tsi ihän t'at Caín len'äyij p'ante!#Gén 4.3-9; Heb 11.4; 1~Juan 3.12 Lewetahayaj iyeji chinaj t'äj tä wuj tä iwatlä, hätet iwoye Balaam p'ante.#Núm 22.1-35; 31.16; Apoc 2.14 Wet lhayen äkleyhtsesa, hätet iwoye Coré p'ante,#Núm 16.1-35 wet tatäylhi. 12Tä amel letachufwiwek tä lewo akäjyajayej Lhawuk lehumnhayaj tä leti amejen, lhamel ifwunhiyet'a m'ak at chik häpe wet ain'äfwlhat tä tachufwi amejen. Hätet iwoye tson'ataswos tä nit'ekyenawethä leläy, mat lhamel t'at tä t'ekhen. Hätet iwoye pules tä inät newahiche, wet ihwok ichäj t'at. Hätet iwoye hal'äy tä niwoya lhaya chik nichäte lewhäy, tsi lew'atshancheyaj ihihit'a, wet chik õ'tonhiche lefwettsil, nech'e matche tä y'inhen t'at. 13Hätet iwoye inät tä äytesiche tä iwo lhetheya, wet hätet iwoye chik lakhofw m'ak tä lhamel iwoye tä lhäy'e lhip tä ni'isachehen. Hätet iwoye katetsel tä wey'ähen, mat Dios t'amajejo lew'et tä ihi honataj lechowej yämthilek tiyäj'attsiy.
14Häte Enoc p'ante#Gén 5.18,21-24 tä häpe Adán leles tä lepes lhele tä seis, häp tä Dios yämyenejlhi häp wichitso wet yok, “Ow'en häp Lhawuk tä nek, lhäy'e laka ángeles tä wujpey, 15yämthilek itiyej lakalelhthayaj nilhokej wichi. Wet itiyej letes nilhokej lhamel tä ni'isahen, wet yen tesayej nilhokej m'ak tä ni'isa tä iwoye lhäy'e lhämtes tä ni'isachehen tä lhamel tä n'och'isukyaj lhäytshay itayhtejlä.”#1.15 Häp n'olhämtesna tälhe Judío lhayis lelesaynekhi elh p'ante lhey Libro de Enoc.
16Häp hin'ol tä oyämetso häpehen ulhnhatses wet ayhthatses, wet ihän lhamel lenech'ethayajay. Lhaichäjwethä wet wuj lhämtes tä iwoye, wet fwetaj lhaikäntejwethä iyhäj yämthilek lhamel isej.
Yej tekm'ahatwethä, amel tä ahäpehen Dios leles
17Mat amel, ipuhfwas tä oalehumnhay, enay atichunhayaja tä Lhawuk Jesucristo laka apóstoles ifwel p'ante amhohen tä yok, 18“Häp ifwalas tä lepese ihichela wichi tä aläkwyhantses, lhamel iwohiyela lenech'ethayajay tä ni'isachehen.”#2~Tim 3.1-5; 2~Ped 3.3 19Häpe t'at hin'oltso tä tamenej tä nemhit w'awulhchä Dios leles letichunhayajay. Lhamel iwoye m'ak tä t'isanis lenech'ethayajay, wet Dios laka Espíritu ihiyejt'a lhamel.
20Mat amel, ipuhfwas tä oalehumnhay, at'untejichepej m'ak tä lhäy'e lhip tä n'ot'amajchet tä häpe achayaj. Wo alhyaja häp tä isej Espíritu tä Dios T'amajchet. 21Yej lhekaych'oye Dios lehumnhayaj tä i'amejen, mat eyayhi t'at tä leniwhihlä ifwala tä Lhawuk Jesucristo lep'altsenyaj ichätyenla n'amhohen lhaw'atshancheyaj tä t'un.
22P'altsen aiyhäj tä kamaj nikalelhäja lechayaj, 23wet iyhäj tä tataye letäyhyaj, fwayhtejen häp itäjtso, tonchephä lhamel. Wet iche iyhäj tä oyok, Tiyej hap'altsenyaj mat amaj amejenlä, y'aje lew'uyis tä iyej lhamel uhlä, tsi m'ak tä ni'isa tä lhamel iwoye, ihi t'at.
¡N'awunit Dios!
24-25¡N'awunit Dios tä weihalha, Lhafwayhthi, häp lham tä ihanej iwoyneje tä t'u amehen häpkhilek nikalha amhihen m'ak tä ni'isa, yämthilek newache hach'ohle mat wuj tä akäjyaj ihi chik lhehi tä lham lewujyaj tatache! ¡Is chik lesilatyaj, lhäy'e lewujyaj, lhäy'e lakhajyhayaj, lhäy'e leniyatyaj, iyej t'at, häp tä isej Lhawuk Jesucristo, tälhe tä nech'enyaya, wet athana, wet yämthilek tiyäj'attsiy! Amén.
Currently Selected:
Judas 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.