Juan 11
11
Lázaro y'il p'ante
1Iche hin'o tä lhey Lázaro tä t'inhayaj ilän. Lham häpe hupuy tä Betania lhele, lhäy'e lechitalis María lhäy'e Marta.#Luc 10.38-39 2Häpe t'at María tä paj p'ante lham itsäype Lhawuk lepach'ol häp hal'ä t'i tä lenij akäjche wet äp ilejej lew'ole.#Juan 12.3
3Wet atsinhayna María lhäy'e Marta lhamel iwo chenekaye Jesús wet ifwenho tä yok:
–Iwuk, elh tä wuj tä lehumin t'inhayaj ihi.
4Tä Jesús iläte, wet yok:
–Häp n'ot'inhayajna tek itäyhthila hin'o, mat häpkhilek tamenej chik n'äl Dios lewujyaj lhäy'e Dios Lhäs lewujyaj.
5Jesús wuj tä ihumin p'ante häp Marta lhäy'e lech'inhä lhäy'e Lázaro, 6mat tä ihanch'oye tä Lázaro t'inhayaj ihi, ihi ayej ifwalas täkwfwas häp honhat tä ihi. 7Pajtha ifwala elh wet nech'e tahuyej lechufwenkay wet yok:
–Mäh n'äple Judea.
8Mat lhamel yok:
–Maestro, pajichet'a tä Judío lhayis tä ihi t'unajläk ilän amej tuntey. Mat ¿chipte tä let'uhläk lhäple?
9Mat Jesús nichulho lhamel wet yok:
–Lhek yahinya, iche doce horas tä ihi ifwala. Tä mälhyejtso, chik hin'o ilunlhi tä ifwala, tek tanhäphänlhi tsi iche isi tä hin'älitpe honhat. 10Mat häp elh tä ilunhilhi honatsi, häp tä tanhäphänlhi, tsi isi ihiyejt'a.
11Jesús iwoye lhämetna, tä ileyej wet äp y'isej tä yok:
–Häp n'aelh Lázaro imä t'at, mat oyik tä ohoye yämthilek on'omhatlhi.
12Lechufwenkay nichulho wet yok:
–Iwuk, chik Lázaro imä, tä mälhyejtso kalelhäj tä ichesla.
13Jesús yäme tä pajche Lázaro y'il t'at, mat lhamel yenek yäme nahati. 14Tä mälhyejtso, Jesús nech'e ikalelhtho lhamel m'ak tä yäme wet yok:
–Lázaro pajche y'il t'at. 15Mat okäjyaj ihi tä n'am newej naji, häpkhilek amel aisayej wet lewoyay achayaja. Mäh n'ekhen, n'ahoye.
16Wet häp Tomás tä äp õyen lheya Täkwhiyis, tahuyej iyhäj Jesús lechufwenkay wet yok:
–¡Häte n'amel n'ekche Lhawuk häpkhilek y'atn'isej t'at chik õ'nailänhen!
Jesús häpe elh tä iwo n'ow'atshancheyaja wet äp inuhatchephä n'op'itseyhay
17Tä Jesús nichäte, õ'fwenho tä nech'e cuatro ifwalas tä tajyäme tä õtjänch'oye Lázaro. 18Wet tä Betania tott'aho Jerusalén, etp'i media legua p'iya, 19wujpe Judío lhayis t'isiyakaye häp Marta lhäy'e María yämlek iwo t'unfwaya lhamel tä lech'inij ileyej honhat.
20Tä Marta ihanch'oye tä Jesús näm, yik tä yistejlä, mat häp María imälhehi lew'et. 21Tä Marta nichutej Jesús, ifwenho tä yok:
–Iwuk, chik lhehin'aj kana, tek y'inhi n'aji och'inij. 22Mat ohanej t'at, tej tä mälhyejtso, kamaj Dios hiw'enlat amho m'ak at chik häpe chik let'alheje.
23Jesús nichulho wet yok:
–Hach'inij inuhiphäla tä tälho lep'itsek.
24Marta yok:
–Matche, ohanej tä inuhiphäla chik nichäte ifwala tä lepes wet inuhikwephäla nilhokej n'op'itseyhay.#Dan 12.2
25Tä Jesús iläte tä Marta iwoyetso, tahuyej wet yok:
–Olham ohäpe elh tä iwo n'ow'atshancheyaja wet äp onuhatchephä n'op'itseyhay.#Rom 6.4-5; Col 2.12; 3.1 Elh chik häpe chik t'ekha n'oye, tej chik y'il, mat iläyhla t'at. 26Wet elh chik häpe tä iläy wet t'ekha n'oye, y'inhit'ala yämlek tiyäj'attsiy. ¿Hä let'ekhaye täjtso?
27Marta nichulho wet yok:
–Ey'a, Iwuk, ot'ekha ame tä ahäpe t'at N'ofwayhthi tä Dios Chenek, häp Dios Lhäs tä pajche toyhlä tä nämla honhatena.
Jesús tafwlhi tä iwhäye Lázaro lep'itsekw'et
28Tä Marta ileyej tä iwoyetso, wet yik tä t'äne lech'inhä María wet tasamsanej tä ifwenho tä yok:
–Lhawuk näm, ne'tek lehoye.
29Tä María iläte lechita, yofwajkwet nephä wet yik tä ihoye häp Jesús. 30Mat Jesús kamaj nichäthihot'a hupuy, ihi t'at häp n'äyij tä nichuteji Marta. 31Wet Judío lhayis tä ihi María lew'et tä iwo t'unfwaya, tä lhamel hiw'enche tä nephä wet nakeltshi tä yik, lhamel ihän tsi yenek ihoye n'op'itsekw'et yämlek tafwlhi.
32Tä María nichäte Jesús, takhoschufwi wet yok:
–Iwuk, chik lhehin'aj kana, tek y'inhi n'aji och'inij.
33Tä Jesús hiw'en María tä tafwlhi, lhäy'e Judío lhayis tä iwo t'unfwaya tä häte tafwchehchä, wet lham leyalh ithatphä wet wuj lelhakli. 34Wet nech'e tay'ätshane lhamel wet yok:
–¿Atsi lhip tä ihi tä õtjänch'oye?
Lhamel yok:
–Lhuu Iwuk, wet lew'enla.
35Wet Jesús tafwlhi, 36wet tä Judío lhayis hiw'en, wet yok:
–¡Lhek yahin, n'äl tä wuj tä ihumin Lázaro!
37Mat iyhäj yok:
–Lham hiw'enyenche n'aji honhat hin'o tä asnam. ¿Mat hä nhanhiyej iwoyneje m'ak chik iwoyeje Lázaro yämlek n'ila?
Lázaro inuphä tä tälho lep'itsek
38Jesús äp yachajo tä ithatphä leyalh, wet nech'e ihoye n'op'itsekw'et tä häpe n'ohi tä pajche õhp'oyeji tunte tä wuj. 39Tä nichäte, wet yok:
–Hutay kanhi tunte.
Mat Marta tä lech'inij häp hin'o tä y'il, yok:
–Iwuk, oyenek najut tsi athana nech'e cuatro ifwalas tä ihi.
40Jesús nichulho wet yok:
–¿Hä n'am fwelmat amho tä oyok, “Chik let'ekhaye, lew'enla Dios lewujyaj”?
41Wet nech'e wichi ihut kanhi tunte tä ihi lepe n'op'itsekw'et, wet Jesús iyahin puleye wet yok:
–Ijcha, owo graciasa amej tä letach'ahu n'oye. 42Ohanej tä lepes ihichet'a tä letach'ahu n'oye. Mat tä owo graciasa amej, ot'uhläk wichi tä ikana iläte, häpkhilek lhamel t'ekhaye tä am t'at tä achenekn'o.
43Tä ileyej tä iwoyetso, wet ifwitsenej lechos tä yok:
–¡Lázaro, lhuu, nuphä!
44Wet hin'o tä pajche y'il inuphä t'at, mat wesas tä õ'nayhtejchehen takweyey lhäy'e takäläy lhäy'e tate'pe kamaj iyej t'at. Wet Jesús tahuyej iyhäj tä yok:
–Lanche wet ch'anlhaye tä yik.
Niyatey tä Judío lhayis iwo lehuseya'pe yämlek itsoklhi Jesús
(Mat 26.1-5; Mar 14.1-2; Luc 22.1-2)
45Häp Judío lhayis tä t'isiyakaye María tä iwo t'unfwaya, tä lhamel hiw'en m'ak tä Jesús yenlhi, wujpe lhamel tä ichaye häp lham. 46Mat iche iyhäj tä yikhen wet ifwenho Fariseo lhayis m'ak tä Jesús yenlhi. 47Tä mälhyejtso, Fariseo lhayis lhäy'e sacerdotes tä len'ohyajay ihiche, lhäy'e hin'ol iyhäj tä ihi Judío lhayis laka Concilio tä Lhamya, lhamel lhaihutwek wet yok:
–¿Atsi m'ak tä y'awohiyela? Tsi hin'otso wuj letetnhay tä yenlhi. 48Chik y'atch'anlhaye, wet nilhokhiyeja wichi chik ichaye, wet Romano lhayis kaniyatey nämla wet iwasthihila Dios Lew'et lhäy'e wichi.
49Mat elh lhamel tä lhey Caifás tä häpe Sacerdote tä Lhamya häp nekchämtso, lham tahuyej iyhäj wet yok:
–¡N'äl tä m'ak kahantasayej! 50Wet lep'ethatayhlä tä amel aisej chik tefwajni hin'o chik õ'länpe wichi wet nofwit'ala nilhokej wichi.
51Mat tä Caifás iwoynejetso lhämtes, lhamhit'ak letichunhayaj, mat tä häpe Sacerdote tä Lhamya nekchämtso, häp tä Dios tä yämyenlhi tä yäme tä Jesús y'inhila'pe wichi tä Judío lhayis. 52Mat ts'ilakhit'a lhamel, mat häpkhilek hip'ajtitwek nilhokej Dios leles tä i'pe honhat wet yäm weihalhahchä.
53Tä mälhyejtso, tälhe ifwalatso niyatey tä Judío lhayis yok, “Is chik õ'län häp Jesús.” 54Häp tä tamenej tä Jesús nemhit lhain'ältej ayej häp Judío lhayis tä ihi honhat lhipeytso, mat yikch'oye tä ihoye hupuy tä lhey Efraín, häp lhip tä tott'aho ts'anis, wet ihi t'at, lhäy'e lechufwenkay.
55Tatäy p'ante lhimphaj chik nichäte lewhäy häp Judío lhayis lakäjyaj tä Pascua. Wet wujpe wichi tälhomche lew'etes, ihoye Jerusalén yämlek iwoye lakey tä lhamel ilej lhamchehen tä letetnek tä lhayen t'amajchetesa, tä kamaj nichätaye Pascua. 56Wet lhamel t'ukwepej Jesús wet tay'ätshaneje elhpej tä ihi Dios Lew'et wet yopej:
–¿Chiwoye? ¿Hä nämhiyela lhakäjyaj, wok kha?
57Mat Fariseo lhayis lhäy'e sacerdotes tä len'ohyajay ihiche, lhamel ifwenho lhämet wichi tä yok:
–Elh chik häpe chik ihanej ihi lhip tä Jesús ihi, is chik ifwel n'ohohen häpkhilek otsoklhi.
Currently Selected:
Juan 11: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.