Ester 1
1
Rey Asuero yenlhi lakäjyaj
1Häp ifwalas tä pajche rey Asuero niyatej ciento veintisiete (127) honhates, tälhe honhat tä India pajtha nichäte Etiopía. 2Wet lew'et tä lhamya ihi t'at hupuy tä lhey Susa.
3Tä nichäte tres nekchämis tä lham ihi leniyatyaj, iwo lakäjyajayej nilhokej leniyatfwas, lhäy'e sip'äl kaniyatey tä ihi Persia lhäy'e Media, lhäy'e iyhäj gobernadores tä tälhomche honhates, lhäy'e leniyatfwas, 4yämthilek lhamel hiw'en lakäywet tä wuj, lhäy'e leniyatyaj tä wuj, lhäy'e lakhajyhayaj tä iyej. Wet seis iwel'as tä iwo lakäjyaja. 5Wet tä tajyäme täjtso, yenlhi elh lakäjyaj, pajtha siete ifwalas tä iwo lakäjyaja, ihi lhip tä n'okäs ihi tä iwhäye rey lewukwe. Wet nilhokej wichi tä ihi Susa, häp hin'ol tä len'ohyajay ihiche lhäy'e iyhäj tä p'elitses, tä niyat t'äneje lakäjyaj. 6Wet häp lhip tä õ'tihi n'okäjyaj, õhp'oyejlhi cortinas tä isis tä ipelas lhäy'e tä y'it tä õyäytejen wesaj lhipey tä lino tä ifwak'an. Wet õ'tihiche argollas tä plata wet õyäytejen ch'utey tä häpe tuntey tä talesay tä lhey mármol. Wet häp wichi tä tatachephä, lew'etes oro t'at, lhäy'e plata. Wet häp piso õ'ti'pe tuntey tä isis tä wuj laha, häp m'ak tä lhey nácar lhäy'e tuntey tä ipelas lhäy'e tä ichalas. 7Wet wichi iyähiche n'olhäthis tä oro wet nilhokej w'enhache lhamej. Wet wuj hat'es tä niyat hiw'enho lhamel, mälhyej tä lham ihuminche. 8Mat ifwenho niyatey häp lhämet wet yok:
–Isit'ak elh chik häpek inityenej hat'es häp elh chik nit'uyahläk iyäyej. Elh tä ot'äneje okäjyaj lham t'at tä iyäyej m'ak tä iwatlä.
9Häte reina tä lhey Vasti yenlhi lakäjyaj tä ihi rey lewukwe, wet t'äne atsinhay.
Reina Vasti iwohiyet'a rey lhämet
10Wet tä nichäte siete ifwalas häp n'okäjyaj, rey wuj tä yen käjyaja tä iyäyej hat'es. Wet t'äne siete hin'ol tä lham wuj tä t'ekhaye tä lheyis Mehumán, Bizta, Harbona, Bigta, Abagta, Zetar, lhäy'e Carcas. 11Wet ifwenho lhamel tä yok:
–Mähen uyaykwe reina Vasti. Fwenho tä is chik iti'pe lhetek häp laka corona wet chäj alhoho.
Rey iwoynejetso lhämet tsi t'uhläk leniyatfwas lhäy'e wichi hiw'en lesilatyaj häp reina, tsi matche tä isilataj. 12Matkat reina iwohiyet'a rey lhämet tä lakachenhay ifwenho. Tä mälhyejtso, rey wuj tä fwitsaj, matche tä lewäk ihi. 13Wet tay'ätshane häp hin'ol tä iyej tä ihanej leyes, tsi häp tä lakey t'at. M'ak at chik häpek rey iwoye, chunkat hin'ol tä ihanej leyes häp tä itetshan m'ak tä is alhoho yämthilek rey iwoye. 14Wet hin'ol tä iyej t'at rey, lheyis Carsena, Setar, Admata, Tarsis, Meres, Marsena, lhäy'e Memucán, siete hin'ol tä kalelhäjiche tä lew'et Persia lhäy'e Media. Wet lhamelna häpe t'at rey lech'otfwas tä lhamenya, wet wuj tä len'ohyajay ihiche tä ihi leniyatyajtso. 15Wet rey tay'ätshane lhamel wet yok:
–Ochene mathi reina Vasti olhämet, ochenchufwi oka silätwos, mat lham iwohiyet'a. ¿Atsi m'ak tä ley yäme tä t'uhawetej chik õ'woyeje?
16Wet Memucán nichulho rey tä ihi tä leniyatfwas tatache, wet yok:
–Iwuk, ats'ilakhit'a tä reina Vasti iwoyej ame m'ak tä ni'isa. Mat nilhokej t'at aniyatfwas, lhäy'e nilhokej wichi tä ihiche honhates tä ihi aniyatyaj. 17M'ak tä iwoye reina nilhokej atsinhay ihanhiyeja, wet itenla wet yenla w'et m'ayeka lech'efwas. Tsi lhamel yohlak, “Lhaka reina Vasti ihohiyet'a n'aji häp rey Asuero tä fwetaj t'äne.” 18Wet häp aniyatfwas tä ihi Persia lhäy'e Media, lhamel lech'efwas ihanhiyeja häp m'ak tä reina iwoye, wet ifwenhihola lech'efwas. Wet atsinhay yenla w'et m'ayeka hin'ol tä lech'efwas, wet hin'ol nichuwethiyepeja atsinhay tä lech'efwas. 19Tä mälhyejtso, ika niyat, chik lehuminche, is chik lhenlhi ämet wet is chik õ'lesayen tä ihi Persa lhayis laka ley, lhäy'e Medo lhayis, häpkhilek nittäya. Lesayen ämet tä yok, “Nemhit len'äyij ihi reina Vasti chik t'uhläk ihoye rey, tälhe ifwalana lhäy'e ifwalas tä tatache.” Wet is chik let'ayhet leniyatyaj tä häpe reina, w'enho elh atsinha tä lhäy'e lhip tä t'uhawetej, inu'pe lham Vasti. 20Wet ämettso is chik lechene nilhokej wichi tä ihi aniyatyaj tä wujna, häpkhilek atsinhay tek yenla w'et m'ayeka lech'efwas, häp lhamel tä len'ohyajay ihiche lhäy'e iyhäj tä p'elitses.
21Tä rey lhäy'e leniyatfwas iläte Memucán letichunhayaj, lhamel ihuminche. Tä mälhyejtso, rey yenlhi t'at lhämet. 22Wet tä wak'alh, ichene nilhokej honhates tä ihi leniyatyaj. Itihi wichi lhämtes tä w'enhache lhamej, lhäy'e lelesaynhay tä w'enhache lhamej, ne'tek hin'ol t'at tä niyatej lew'etes.
Currently Selected:
Ester 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.