2 Samuel 1
1
Saúl naano Amalecita pushcon Davidqui chanini
1Ascan Saúl naano David fu rafuafo futan Amalecitafo rutuquin anaititan pushu rasi Siclag ano nasofuracani. Nanno osha rafuyonifo. 2Ascan iyoconaino nocofunu Saúl nanoashu David icano noconi. Ahuun sahuutifo fashnu fashnuatan ahuun mapoqui mai mapo ocani. Ascaquifin ato ismaniquin Israelifo shinancoinquin. Davidqui nocotan maiqui fuoshonpacucahuani David niaifo shara ismashquin. 3Ascaiton David yocani isca huaquin,
—¿Raniashu min oamun? —ishon yocaiton.
—Un Israeli ranushumuafo icanoashu nuno ichoaran, —ishon cumani.
4—Israeli ahuun ranushumuafoan ahua finoanmainquin ua yoihuun, —ishon David yocaiton.
—Filisteofoan ato rutuaino Israelifo ichonifo. Ichapacoinfo man naashu pacunifo. Niaifo Saúl yafi ahuun facu Jonatán arifi man naaforan, —ishon yoini.
5Ascaiton David nan pushco yocani isca huaquin, —¿Ahuuscashon min tapiamun Saúl yafi furu Jonatán naa? —ishon David yocaiton. 6Pushcopan cumani,
—Unfin nanno machi Gilboa anoshon oian Saúl ahuun ashin cocusamushon Filisteofo casho cuscaran taramutiyafo non caballofoyari aqui noco cuanaifoan. 7Saúl ifiacucahuan ua fuchishon ua cuna. Ascashon ua yoia isca huaquin, “Uqui ohuu,” ua hua. Ascan un cuma, “¿Un mia ahuua huashotiromun?” huaiton. 8“¿Min tsoamun?” ishon ua yocaiton. “Unfin Amalecitaquin,” ishon un cuma. 9“Mun omitsiscafiaicai un nataima. Ascacun ua rutuhuun un nariscanon,” ishon ua yoia. 10Mun tapifaita chai nipatiroma. Ascan ua yonoa cuscan mun rutua. Ascan ahuun niaifo maiti non ahuun muupi un fiia mia fushoshquin min uhuun niaiforan, —ishon Amalecita pushco yoini.
11Nicacashon David a fu icafoanri fasi shinancaquin aton sahuutifo fashnu fashnuanifo. 12Ascan fasi Saúl yafi furu Jonatán non Israeli ranushumua futsafo nanfo nocon Ifo Diosina. Filisteofoan nantifi Israelifo rutunifo David futan a fu icafo nicai manocani fasi uainifo shafatan piqui tununifo. 13Chipo David nan pushco aqui Saulhuunoa chanini yoca isca —¿Min tsoan yoramun? —ishon yocaiton. —Uncai Israelima. Unfin Amalecitafiashu min mai ano icaquin, —ishon cumaiton.
14—¿Ahuuscai ratutama nan nocon Ifo Diosin catoan niaifo inon min rutua? —ishon David yoini. 15Ascan David ahuun yora futsa cunashon yonoa isca huaquin, —Na pushco rutuhuun, —ishon yononi. Ascaiton nopun rutuni. 16Rutuataima David pushco Amalecita yoini isca huaquin, —Min chaca hua cuscahuunoa man min nai. Nan min tsainhuunshofin non mia rutuicai. Minfin noco tapimaquin isca hua, “Unfin nocon Ifo Diosin catoan mun rutua,” ishon min noco yoia. Ascan natian man min nairan, —ishon David yoini.
Currently Selected:
2 Samuel 1: mcd
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.