YouVersion Logo
Search Icon

1 Corintios 1

1
Pablonun Jesús icoinra huafo Corinto anoafo ato cunu fomani
1-2Uhuun yoramishtichin un mato cunu fomai. No futan Jesús tanamisi Sóstenes u futan mato cunu fomai. Upan Diosin ua catonpaiquin ua catonni Jesucristo fu rafunon ahuun tsain Jesucristohuunoa un yoifoanfafainon. Ascan Jesucristo ua nichini un ahuun tsain shara nantifi manifoti un ato yoifoanfafainon. Corinto anoafoan manfin Diospan yorafoquin. Man ichananfafainmisi Diospan tsain tapisharashquin. Diosin mato catonni Jesucristohuunoashu man ahuun yora sharafo inon. Ascacun un mato cunu fomai. Mato fustisima un futsafori cunushoni. Nocon Ifo Jesucristo Ifo huacun un atorifi na cunu un ato tapimapai. Nan nocon Ifofin aton Iforiquin.
3Un fasi mato shinain. Diosin matohuun ramapaicain, maton nomuran shinanmasharanon. Upa Diosin futan Furun Jesucristo nanfo mato ashoni.
Cristo ahuara sharafo noco ashotiro
4Mun tapian Jesucristo matohuun noiquin ahuarafo mato tapimani ahuun ointi cuscara shara man inon. Nanscara tapishon un Upan Dios cufinquin isca huafafainni, —¡Aicho! Upa Diosin, min Corinto anoafo ahuara sharafo Jesucristohuunshon min ato tapimanaran, —ishon un cufifafainni. 5Icon Cristo matofu rafuaino ahuunshon man tapisharacoian. Ascan ahuun shinanhuunshon shafacafi man yorafo Cristohuunoa yoisharatiro. 6Non mato Jesushuunoa yoini cuscan Diosin maton ointi fiananan huaa ahuun ointi cuscara shara man inon. Ascacun man Jesús icoinra huashon man oinmana.
7Ascashu Upa Diosin Yoshin Sharahuunshon mato imapaiyai cuscan man man iquina. Icoinra huaa futsafoan iquina cuscan marifi man man iquina maton nomuran Diosin shinansharamanon. Natianri nocon Ifo man fasi oinpai afanan oaiton. 8Aqui nocoaitian mato cushusharayoshquin. Ahuun curushu mato inanyoshquin man tanasharanon. Ascano nocoshon ratofomain afu ipacanicain yoifain ratofomain omitsiscapanacafo muran focanicai nantifi yoipacushquin. Nantiantari mato yoishquin isca huaquin, —Un maton chaca soashoni. Ascano tsoancai “Manfofin chacaforan,” mato huatiroma. Ua cuscara shara un mato imairan, —ishon Jesús mato yoishquin. 9Upa Diosin mato catonni Furun nocon Ifo Jesucristo fu man rafunon. Upan noco yoia cuscan man aicain.
Jesús icoinra huaa Corinto anoafoancai anorifosi shinancanima
10Uhuun yoramishtichin un mato yoisharapai. Nocon Ifo Jesucriston ua yonoaino un mato yoi nannorifosi man shinanon. Shinan futsacaquima Jesucristo mato shinanmapaiyai cuscan nannorifosi shinancahuun.
11Uhuun yoramishtichin Cloé ahuun yorafo uqui fucashon ua tapimanafo man fochishmanantananfafainaiton. 12Atirifoan yoiafo, —Nonfin Pablon tanamisifoquin non shinain cuscafin cayacaficoinquin. Futsafoancai cayacafi shinancanimaran, —ishon man yoia. Futsafoan yoiafori, —Nonfin Apolos tanamisifoquin, —ishon yoiaifono. Futsafoanri, —Nonfin Pedro tanamisifoquin, —ishon yoiaifonori. Futsafoanri, —Nonfin Cristo tanamisifoquin, —ishon man yoifafaini.
13Uhuun yorafoan ascacai sharama. Cristocai nocon ointi rananya imapaima futsa futsa huaquin non shinanon. Cristo tsain cayacafi fusti. Mato pashcanan huaima futsa futsa huaquin man shinanon. Uncai ihui coyan iquinanhuunoashu mato nashonima. Man unu muran iquimamupacunitian Jesús tanacoinshon man futsafo ismashquin chaca shatushon Jesús Ifo huashquin. Uncai tsoa unu muran iquimanama ua tanafain ua ifo huanon. 14Un unimai. Uncai tsoa futsa unu muran iquimanama. Crispo yafi Gayo nan rafusi un unu muran iquimani. 15Ascacucai tsoan yoitiroma isca huaquin, —Un unu muran iquimamua Pablo tanamisi ishquiran, —ishoncai tsoan yoitiroma. 16¡Aira! Nantian mun shinain. Estéfanas yafi ahuun yorafori un ato unu muran iquimani. Un shinanfin un tsoa futsa unu muran iquimanamaquin. 17Cristocai ua yononima un yorafo unu muran iquimapacunon. Ua yonoa un ahuunoa tsain shara yoinon. Ufin shinanfaincai un mato yoiama. Ufi shinanfaincai un mato Jesucristo icoinra huamatiroma. Uhuun shinanpan mato yoiaiton nancai Diosin ahuun curushma Jesucristo mato ihui coyan iquinanhuunoashu nashoni maton chaca soashoshquin. Nan tsain fustihuunshon Upa Diosin ahuun curushhuunshon mato numatiro.
Upan Diosin nantifi tapicoian ahuara futsa apaiquin atiro Cristohuunshon noco oinmapacumisi
18Ascashon Jesús ato nashoni nicacani a icoinra huaamafoan isca shinancani, —¿Tsoanco icoinra huatiromun Jesús ihui coyan iquinanqui noco nashoni nocon chaca soashoshquin? Na tsaincai ahuama, —ishon yoicani. Ascashu nanfo funocoincani. Omitsiscapanacafo muran focani. Ascan nonfin icoinra huaicai. Ascano noco nimapacunaca non afu ipanon. Diosin ahuun shinanhuunshon Jesús noco nashoni nocon chaca soashoshquin. Ahua futsacai noco nimapacutiroma non afu ipanon. 19Diosin tsain cunuquin isca huani,
“Nan ua icoinra huamafoan shinancaquin isca huacani, ‘Non tapicoian. Nocon mapon shinansharafain non ahuara huatiro nonfin tapisharaquin,’ ishon shinancani. Ascafiashon ahua tapiafoma. Unfin un ato oinmanicain. Afoan shinainfo cuscacai un ato huaimaima. Ipaitsi shinanforan,”
ishon Diosin yoini.
20Ascan cunu tapisharafiacashon Diosin shinain cuscacai huacanima. Nanfofin Diosin atoti oinmaniquin amaquiri shinainfo cuscan. —Nonfin ahuamamishti tapisharaquin, —ifiaifoan Diosin ato ismai afoancai ahuashta tapiafoma. 21Tsoanshtacai aton shinanpan Dios onantirofoma. Diosin fustitofin nantifi tapisharacoianquin. Icoinra huamafoan yoiquin isca huafo, —Jesús icoinra huafoan ahuunoa yoiafo fasi amaquiriran, —ishon yoifiafo Diosin nocon chaca soashona non afu nipanon nonfin icoinra huaicai. 22Ascano uhuun caifo Israelifo iscamisifo, —Diosin nai muranshon noco ahuamamishti oinmanaiton Jesushuunoa yoiafo cuscan non icoinra huatiroran, —ishon shinancani. Nan Israelimafori iscamisifo, —Noco Jesucristohuunoa yoiaifo cuscacai non tapitiroma. Ascacun non icoinra huatiroma. Nan ahuara non tapiafin non icoinra huatiroquin, —ishon yoimisifo. 23Anori ifiainfoanno non isca huamisi, —Jesucriston ihui coyan iquinanqui noco nashoni nocon chaca soashoshquin, —ishon non yoimisi. Ascafiacun uhuun caifo Israelifoan yoiquin isca huaafo, —Ihui coyan iquinanqui mastancai nocon Cristo itiromaran, —ishon shinancani. Israelimafoan Cristohuunoa nicacani aqui cashupaicani, —Tsoancai nanscara icoinra huatiroma. Futsan noco nashoni nocon chaca noco soashoshquin, —ishon yoimisifo. 24Ascafiainfono nan icoinra huafoti Diosin noco catonni. Israelifo yafi mani futsafo Cristohuunshon nocon chaca soashonano non afu ipanon. Non tapia Cristohuunshon Upa Diosin ahuamamishti huamisi. Ahuun curushhuunshon noco numani. Atofin nantifi tapicoianquin. Cristohuunshon noco numani non afu nipanon. 25Icoinra huamafoan yoiqui isca huafo, —“Jesucristo noco nashoni,” ishon noco yoifiacaquin fasi amaquiricoin icoinra huafo. Yora mapo sharayatoncai anori shinantiroma, —ishon icoinra huamafoan yoimisifoquin. Anori yoifiafono Diosin ahuun shinanhuunoashu Jesucristo noco nashoni. Diospan ahuun shinancai a icoinra huamafoan aton shinan cuscarama. Atonfin fasi cayacafi shinanmisiquin. Icoinra huamafoan yoimisifo isca huaquin, —Non fasi tapicoianran, —ishon yoifiacaquicai icon yoicanima. Fasi amaquiri shinancani. —Non ahuamamishti huatiroran, —ifiamisishacaquin afocai afin numatiroma. Ascafiatan aforicai afin chaca soamutirofoma. Upa Diosin fustiton ahuamamishti huatiro.
26Uhuun yoramishtichin shinancapon. Diosin mato catoantaima ahuu cuscaramain man iyomisiquin. Man fustirasiton man cunu tapiaino maton muranri niaifo fustirasi. Nan Jesús icoinra huamafoan yoiquin isca huafo, —Afocai ahuamaran, —ishon matohuunoa yoicani. 27Nanfoan shinancai man ahuama. Ascafia Diosin mato catoan tapicanashu chipo rafipaitirofo. Shinanfo isca huaquin, —Nonfin ahuamamishti huatiroquin. Jesús icoinra huafoan futsa futsa huaquin shinantiroforan, —ishon shinanfo. Ascatari yoiafo isca huaquin, —Non shinantiro cuscacai afoanri shinantirofoma, —ishon yoiafo. Anori shinanfiacashon chipo tapitirofo Dioshuunshon non ahuamamishti huatiro cuscan. Tapicanashu rafipaitirofo. 28Ascafiacatan shinancaquin isca huafo, —Afocai sharamafinquin non ato oinpaimaran, —ishon matohuunoa yoifiaifono Diosin mato catonni. Mancai ahuashtamaran mato huafiaifono Diosin mato catoan man ato oinmanon afocairoconfin ahuamaquin.
29Ascano tsoanshtacai Diosin ointaifi, —Un tsoa cuscaramaran, —ishon yoitiroma. 30Dioshuunoashu Jesucristo ahuun yorafo man inon. Cristohuunshon noco cayacafi tapimafain ahuun ointi cuscara noco imashquin noco nashoni nocon chaca soashoshquin non afu nipanon. 31Ascashon non Jesús icoinra huashucai non cacapaimisi itiroma. Diosin tsain cunuquin isca huani, —Tsoancai yoitiroma isca huaquin, “Un ahuamamishti un tapiaran,” ishoncai yoitiroma. Anori itamarocon, “¡Aicho! Nocon Ifo Jesús ua numa. Ascacun natian ahuunshon un tapisharatiroran,” —ishon yoitiro.

Currently Selected:

1 Corintios 1: mcd

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy