Hechos 1
1
Ri ub'i'im lo ri Jesús puwi ri Ruxlab'ixel ri Dios
1Chupa ri nab'e nulibro, xintz'ib'aj pan che rilal Teófilo, puwi taq ri xu'an ri Jesús y taq ri xuk'utu chwi lo ri jeqeb'al re ruchak 2k'a chupa ri q'ij echiri' xk'ul chila' chikaj ruma ri Dios. Chwach k'u pan ri' rub'enam chila' chikaj, Rire ruma ri Santowilaj Ruxlab'ixel ri Dios xuya kan taqanik chike rutaqo'n#1:2 “Rutaqo'n”: Kil “apóstol” pa vocabulario. eb'ucha'om puwi taq ri chirajawaxik kaki'ano. 3Chwi k'u rukamik, xk'astaj lo chikixo'l ri ekaminaq y k'a xk'oji' cuarenta q'ij che ruwachulew. Chupa taq k'u la' la q'ij, uk'iyal laj e la' xuk'ut uwach chikiwach rutaqo'n y xch'a't kuk' puwi ri taqanik re ri Dios. Jek'ula' ri', lik xuk'utu paqatzij wi Rire k'aslik.
4Echiri' ri Jesús e la' k'a k'o kuk' rutaqo'n, xub'i'ij chike:
—Chixk'ola Jerusalem cha' kiwoy'ej rub'i'tisinik ri Nuqaw, ri nutzijom chi lo ri'in chiwe; wa' e ri bautismo re ri Ruxlab'ixel ri Dios. 5Paqatzij wi ri Juan xuya ri bautismo ruk' ya'; no'j ri bautismo kik'ul ri'ix e ruk' ri Santowilaj Ruxlab'ixel ri Dios; yey wa' ku'ana xa chupa taq wa' wa q'ij katajin loq —xcha chike.
Ri Jesús katzelej chila' chikaj
6Jun q'ij k'ut ri kimolom kib' ruk' ri Jesús jewa' xkitz'onoj che:
—Qajawal, ¿chupa taq wa' wa q'ij oj k'o wi, kayak tanchi nawi la ri taqanik re ri qatinamit Israel jela' pacha' ri u'anom lo ojertan?#1:6 Kakitz'onoj we ri Jesús ku'ana rey re Israel ruk' jun taqanik pacha' ri xki'an ri rey David y ri rey Salomón echiri' lik yakom uq'ij ri tinamit Israel. —xecha'.
7Y ri Jesús xuk'ul uwach:
—Ri'ix na ya'tal ta chiwe kiweta'maj ruq'ijol y ru'orayil echiri' ku'ana taq wa' ri Nuqaw, ma ronoje wa' xew puq'ab' Rire k'o wi. 8Pero kik'ul k'u ichuq'ab' ri'ix echiri' kaqaj lo ri Santowilaj Ruxlab'ixel ri Dios piwi' y kixu'ana k'u ix tzijol we'in chupa wa tinamit Jerusalem, chupa ronoje ri luwar re Judea y re Samaria y k'a che ronoje luwar re ruwachulew —xcha chike.
9Ek'uchiri' xuk'is ub'i'xikil taq wa', xk'am b'i chila' chikaj; y ek'u la' kakitzutza' rutijo'n xsach b'i chikiwach chupa jun sutz'. 10K'a kakitzutza' k'u pan chila' chikaj pa xk'am wub'i ri Jesús, echiri' xewinaqir keb' achijab' kuk' yey wa' lik saq ri kiq'u'.
11Wa'chijab' xech'aw k'u chike, jewa' xkib'i'ij:
—Achijab' ix aj Galilea, ¿su'b'e k'a kixtzutzu'n chikaj? Ma wa Jesús, ri xel b'i chixo'l ri'ix y xk'ul chila' chikaj, Rire kak'un tanchik. Jek'ula' pacha' xiwilo xe'ek, jela' kak'un tanchik —xecha chike.
Ri Matías kacha'ik re kak'oji' puk'axel ri Judas aj Iscariot
12Ek'uchiri', ri e taqo'n xeb'el b'i chwach ri juyub' Olivos y xetzelej Jerusalem. (Wa juyub' xa naqaj k'o wi lo che Jerusalem, laj jun kilómetro unajtijil; jek'ula' rike na xik'ow ta uwi' ri kakib'inib'ej che ri ya'talik e chirij ri kojob'al ke raj judi'ab' puwi ri q'ij re uxlanib'al.)#1:12 Chikiwach raj judi'ab', xew ya'talik kab'in junoq jun kilómetro chupa ri q'ij re uxlanib'al.
13Echiri' xeb'opon Jerusalem, xeb'aq'an chikaj pa ri kale' ja pa ejeqel wi ri Pedro, ri Jacobo, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo ruk'ajol ri Alfeo; ri Simón ri kab'i'x “ri Zelote” che y ri Judas ruchaq' ri Jacobo. 14E konoje rike lik xa jun kik'u'x kiya'om kib' pa oración, junam kuk' jujun ixoqib', ruk' ri María ruchu ri Jesús yey kuk' taq ruchaq' ri Jesús.
15Chupa k'u taq la' la q'ij, ri Pedro xtak'i' chikiwach ri hermanos kimolom kib', laj e ciento veinte chi konoje, y jek'uwa' xub'i'ij chike:
16«Hermanos, lik chirajawaxik wi e ku'ana na ri tz'ib'ital kan chupa Ruch'a'tem ri Dios puwi ri xub'i'ij ri Santowilaj Ruxlab'ixel ruma ri David echiri' xch'a't puwi ri Judas aj Iscariot. Wa' e ri xnab'ej chikiwach ri xechapaw b'i ri Jesús, 17tob' rire e jun qachb'i'il y xya' che xchakun junam quk' chupa wa chak re ri Dios» xcha'.
18(Xloq' k'u juch'aqap ulew ruk' ri puaq xya' che ri Judas ruma ri na jusuk' taj xu'ano echiri' xuk'ayij ri Jesús. Ek'u ri Judas xu'xulub'a' lo rib' chwi jun che' y echiri' xtzaq loq, xraqaro'b' rupa y ronoje ri rixkolob' xkich ka'nik. 19Wa' xketa'maj konoje ri ejeqel Jerusalem. E uwari'che, xkikoj “Acéldama” che wa jun luwar; wa' ke'elawi “Luwar re Kik'” pa ri kich'a'tem rike.)
20Xub'i'ij k'u ri Pedro:
«Jek'uwa' tz'ib'ital kan puwi ri Judas chupa ri libro re ri Salmos:
Ri luwar pa jeqel wi chu'ana jun luwar katz'intz'otik,
y na jinta junoq kajeqi' chiri'. Sal. 69:25
Y jewa' kub'i'ij tanchik:
Lik chirajawaxik katzukux jun chik aj chak cha' kak'oji' puk'axel Sal. 109:8
kacha'.
21»E k'o k'u jujun achijab' chiqaxo'l xex ojkachb'ilam echiri' k'a k'o ri Jesús quk', 22chwi lo echiri' xuk'ul ri bautismo ruma ri Juan y k'a echiri' xel b'i quk' y xk'ul chila' chikaj ruma ri Dios. Lik chirajawaxik k'ut kaqakoj junoq chike wa' wa'chijab' cha' junam kojtzijon puwi ruk'astajib'al ri Jesús» xcha ri Pedro chike.
23Xekicha' k'u ka'ib' achijab'. Jun e ri José, ri kab'i'x Barsabás che y kojom jun retzelal ub'i' “Justo” kecha che. Ri jun chik, Matías rub'i'. 24Y xki'an orar, jewa' xkib'i'ij: «Qajawal, Rilal eta'am la ri kik'u'x konoje ri tikawex. K'utu k'u la chiqawach chinoq chike wa ka'ib' achijab' cha'om la 25cha' kuk'am b'i wa chak y ka'an taqo'n la che; jek'ula' kak'oji' puk'axel ri Judas aj Iscariot, ri xroq'otaj kan ri chak xya' che y xe'ek k'u pa ri luwar taqal che» xecha'.
26Ek'uchiri', xki'an jun sorteo cha' kaq'alajinik china chike wa ka'ib' kakanaj kan puk'axel ri Judas; y wa' xtzaq puwi ri Matías. Chwi k'u ri', rire xu'ana e jun kuk' ri junlajuj chik e taqo'n.
Currently Selected:
Hechos 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.