Juan 7
7
Ruchaq' ri Jesús na kakikoj taj we Rire e Rucha'o'n lo ri Dios
1K'ate tanchi k'u ri', ri Jesús xb'in pa taq ri luwar re Galilea; na xraj taj kak'oji' Judea ma chila' raj judi'ab' kakaj kakikamisaj. 2Xa k'u naqaj chi k'o wi lo ruq'ijol ri kinimaq'ij raj judi'ab' echiri' kaki'an kirancho.#7:2 Ronoje junab' raj judi'ab' kaki'an wa nimaq'ij pa k'isb'al ruq'ijol ri molonik. Che wa nimaq'ij, raj Israel kakiyijb'a' kirancho 'anom ruk' uq'ab' che' y kejeqi' wuqub' q'ij chupa. Wa' e kuxtab'al re ri cuarenta junab' xeb'in chupa ri luwar katz'intz'otik echiri' na jinta kocho. Lv. 23:34; Dt. 16:13 3E taq k'u ruchaq' xkib'i'ij che:
—Matkanaj kan wara; jat Judea cha' ri jujun chik atijo'n e k'o chila' kakilo sa' taq ri ka'ano. 4Ma we junoq karaj keta'max uwach, ronoje ri ku'ano ku'an chiwachil. E uwari'che, cha'ana wa' chikiwach konoje ri tikawex —xecha che. 5Xkib'i'ij wa' che ma na kakikoj taj we Rire e Rucha'o'n lo ri Dios, tob' ne rike e uchaq' ri Jesús.
6Xub'i'ij k'u Rire chike:
—Ri nuq'ijol ri'in k'amaja' koponik; no'j ri'ix, xa tob' pachike q'ij utz chiwach. 7Ri tikawex re ruwachulew na tzel ta kixkil ri'ix; no'j ri'in lik tzel kinkilo, ma kanq'alajisaj chi utz ri kimak. 8Jix ri'ix che ri nimaq'ij; no'j ri'in na kin'ek ta wo'ora, ma k'amaja' kopon ri nuq'ijol —xcha'. 9Xub'i'ij k'u wa' y xkanaj kan Galilea.
Ri Jesús kopon pa ri nimaq'ij re taq ri rancho
10Ek'uchiri' eb'enaq chi ruchaq', ri Jesús xe'ek pa ri nimaq'ij, pero na xe'ek ta chiwachil cha' taq ri winaq na kakina'b'ej taj.
11Pa ri nimaq'ij raj judi'ab' lik kakitzukuj ri Jesús, y jewa' kakib'i'ij: «¿Pa nawi k'o wi la' la jun achi?» kecha'.
12Chikixo'l ri winaq lik e k'i ri kakich'a'tib'ej ri Jesús. Jujun kakib'i'ij: «La' la Jesús lik utz uk'u'x» kecha'. Yey e k'o jujun chik kakib'i'ij: «La' la Jesús lik na utz ta ri ku'ano ma xa keb'usok ri winaq» kecha'. 13Pero na jinta k'u junoq kach'a't puwi ri Jesús chiwachil; xa xe'laq'ay kech'a't puwi', ma kakixi'ij kib' chikiwach raj judi'ab' e aj wach.
14Ek'u ri' nik'ajarinaq chi ri nimaq'ij xopon ri Jesús pa ri Rocho Dios y xujeqo kak'utun chikiwach.
15Raj judi'ab' lik xkam kanima' che y jewa' xkib'i'ij: «¿Cha'taj lik k'o reta'am yey na jinta k'o k'utuyum chwach?» xecha'.
16Ri Jesús xuk'ul uwach:
—Ri kintajin che uk'utik na xa ta pa we ri'in kan'ano; ma wa' petinaq ruk' ri taqayom lo we'in. 17We k'o k'u junoq lik kuya rib' che u'anik ri karaj ri Dios, ri' kareta'maj we ri kank'utu ruk' ri Dios kape wi, o we xa pa we ri'in kinch'a'tik. 18Ma china ri xa pa re kach'a'tik, ri' xew karaj kayak uq'ij kuma ri winaq. No'j china ri karaj e kayak uq'ij ri taqayom lo re, ri' lik qatzij ri kutzijoj y na jinta k'ana raq'ub'al ku'ano.
19»¿Na qatzij ta neb'a la' e ri Moisés xya'w che alaq ri Tzij Pixab'? Na ruk' ta k'u ri', na jinta junoq che alaq ka'anaw re ronoje ri k'o chupa wa Tzij Pixab'. ¿Su'chak ka'aj alaq kinkamisaj alaq? —xcha'.
20Ek'u taq ri winaq xkik'ul uwach:
—Lal k'o puq'ab' jun itzel uxlab'ixel. ¿China ri karaj kakamisan e la? —xecha'.
21Ri Jesús xub'i'ij chike:
—Ri'in k'o jun k'utub'al re ruchuq'ab' ri Dios xin'ano, yey onoje ralaq lik kakam anima' alaq che ma xin'an wa' chupa ri q'ij re uxlanib'al.#Jn. 5:1-16
22»Paqatzij wi, ri Moisés xuya che alaq ri jun taqanik re ri retalil re circuncisión tob' na e ta rire xjeqow loq, ma e xejeqow lo re ri qati'-qamam ojertan.#7:22 K'amaja' ne kalax ri Moisés echiri' ri Dios xub'i'ij chike ri tinamit Israel kakikoj ri retalil re circuncisión chike konoje ri raltaq ko alab'o pa ri uwajxaq q'ij kalaxib'em. Gn. 17:10-12; Lv. 12:3 Yey ralaq kakoj alaq ri retalil re circuncisión che junoq tob' pa ri q'ij re uxlanib'al. 23Ka'an alaq wa' ma ri taqanik re ri Moisés kutaq che ka'ani' ri circuncisión pa ri uwajxaq q'ij ralaxib'em juna ralko ala. Ka'an k'u alaq ri', tob' wa' katzaq pa ri q'ij re uxlanib'al, cha' na kapalajij ta alaq wa taqanik re ri Moisés. ¿Su'b'e k'u ri' k'o oyowal alaq chwij ri'in ruma xinkunaj jun achi pa ri q'ij re uxlanib'al?
24»Makoj alaq umak junoq xa ruma kach'ob' alaq eta'am alaq ri u'anom; ri 'ana alaq e ch'ob'o alaq ruk' saqil na'oj puwi ri paqatzij wi u'anom, we k'o umak o na jintaj —xcha'.
Ri Jesús kuq'alajisaj pa petinaq wi Rire
25E k'o jujun chike ri e aj Jerusalem kakitz'onob'ej: «¿Na e ta achi wa' ketajin che utzukuxik re kakikamisaj? 26¿Su'chak k'u ri' kaya' luwar che kach'a't chiwachil yey na jinta ne junoq kaq'aten re? ¿Kikojom chi nawi raj wach re ri tinamit rire e ri Cristo, Rucha'o'n lo ri Dios? 27Ma ri'oj qeta'am chi utz pa kape wi wa'chi; no'j we xk'un ri Cristo, ri' na jinta junoq eta'mayom re pa kape wi» kecha'.
28Ri Jesús kak'utun pa ri Rocho Dios echiri' xuta wa'. Lik ko k'u xsik'in che ub'i'xikil:
—Kab'i'ij ralaq lik eta'am alaq nuwach y lik eta'am alaq pa kimpe wi. Pero lik cheta'maj k'u alaq wa': Ri'in na in petinaq ta xa pa we ri'in, ma intaqom lo ruma ri Jun lik ub'e ronoje taq ri ku'ano. Yey ralaq na eta'am ta alaq uwach Rire. 29No'j ri'in weta'am uwach, ma ruk' Rire in petinaq wi y e Rire taqayom lo we'in —xcha'.
30Ek'uchiri', raj wach xkaj e ri' kakichap b'i ri Jesús; pero na jinta junoq x'anaw re, ma k'amaja' kopon ruq'ijol. 31Na ruk' ta k'u ri', chikixo'l ruk'iyal winaq, lik e k'i xkub'i' kik'u'x ruk' ri Jesús y kakib'i'ij: «Chiwach ralaq, echiri' kak'un Rucha'o'n lo ri Dios, ¿ku'an kami más k'utub'al ri' re ruchuq'ab' ri Dios chwa wa ku'an wa'chi?» kecha'.
Ri fariseos kakaj kakiya ri Jesús pa cárcel
32Ri fariseos xkita ri kakib'i'ij ri winaq puwi ri Jesús. E uwari'che, rike kuk' ri nimaq e aj chakunel pa Rocho Dios xekitaq b'i ri e chajinel re ri Rocho Dios cha' kakichap lo ri Jesús.
33Xub'i'ij k'u ri Jesús:
—Ri'in na naj ta chi kink'oji' uk' alaq, ma kintzelej ruk' ri taqayom lo we'in. 34Kopon na k'u ri' ri q'ij echiri' kintzukuj alaq; pero na kinriq ta alaq, ma na kopon ta alaq pa kine'k'ola wi ri'in —xcha'.
35Ek'u ri e aj judi'ab' xkijeq kakitz'onob'ej chikiwach: «¿Pa nawi ke'ek wi wa'chi yey na ke'qariqa ta ri'oj? ¿Ke'ek nawi kuk' ri e aj judi'ab' ejeqel chikixo'l ri e aj griegos y ke'k'utuna chikiwach? 36¿Sa' ke'elawi wa xub'i'ij chiqe: “Kintzukuj alaq; pero na kinriq ta alaq, ma na kopon ta alaq pa kine'k'ola wi ri'in”?» kecha'.
Taq ri ak'al re ya' k'aslik
37Che ri k'isb'al re ri nimalaj nimaq'ij, ri Jesús xtak'i' chikiwach ri winaq y ko xsik'in che ub'i'xikil:
«We k'o junoq katzajin uchi', petoq y chutija re ri ya' k'o wuk', 38ma e pacha' kub'i'ij Ruch'a'tem ri Dios: Ri kakub'i' uk'u'x wuk' ri'in, ku'ana pacha' kajuljut taq lo ak'al re ya' k'aslik pa ranima'»#Zac. 14:8 xcha'.
39Ruk' wa' ri Jesús e kach'a't puwi ri Ruxlab'ixel ri Dios ri kakik'ul na janipa ri kakub'i' kik'u'x ruk'. Yey k'amaja' k'u kak'un ri' ri Ruxlab'ixel ri Dios ma k'amaja' ne ke'ek ri Jesús chila' chikaj pa kaq'alajisax wi runimal uchomalil.
Ri winaq kech'a't puwi china ri Jesús
40E k'o k'u jujun chike ri winaq, echiri' xkita wa', jewa' kakib'i'ij: «Paqatzij wi wa'chi e ri jun q'alajisanel re ri Dios qoye'em kak'unik» kecha'. 41Jujun chik jewa' kakib'i'ij: «Wa' wa'chi e ri Cristo, Rucha'o'n lo ri Dios» kecha'. Yey jujun chik jewa' kakib'i'ij: «¿Galilea neb'a kape wi lo ri Cristo? 42Na Galilea taj, ma tz'ib'ital kan chupa Ruch'a'tem ri Dios, ri Cristo kalax lo chikixo'l ri ratz-uchaq' kan ri rey David pa ri tinamit Belén, rutinamit ri David» kecha'. 43Jek'ula' ri' ri winaq jachatal kipa ruma junwi taq ri kakich'ob' raqan puwi ri Jesús. 44E k'o ne jujun chike ri winaq xkaj kakichap b'i ri Jesús, pero na jinta junoq x'anaw re.
Raj wach re ri tinamit kakik'aq b'i uq'ij ri Jesús
45Ri e chajinel re ri Rocho Dios xetzelej pa e k'o wi ri xetaqaw lo ke, wa' e ri fariseos y ri nimaq e aj chakunel pa Rocho Dios, yey rike xkitz'onoj chike raj chajinel:
—¿Su'chak na xik'am ta lo ri Jesús? —xecha'.
46Ri e chajinel jek'uwa' xkik'ul uwach:
—¡Na jinta junoq jela' ch'a'tinaq pacha' kach'a't wa' wa'chi! —xecha'.
47Ek'u ri fariseos xkib'i'ij chike:
—¿Xixsokotaj kami ri' ri'ix ruma rire? 48¿K'o neb'a junoq chike raj wach re ri tinamit o chike ri fariseos xkub'i' uk'u'x ruk' wa' wa'chi? 49No'j wa winaq eteran chirij ri Jesús, lik itzel kiwachlib'al ma na kakimaj ta k'ana usuk' ri Tzij Pixab' —xecha'.
50Ek'u ri Nicodemo, ri jun fariseo xopon julaj chaq'ab' ruk' ri Jesús, jewa' xub'i'ij chike:
51—Kub'i'ij ri Tzij qe'oj, na utz taj kaq'at tzij puwi junoq, we na kata' ta uchi' nab'e y we na keta'max ta nab'e we k'o juna mak u'anom —xcha'.
52Xkik'ul k'u uwach ri Nicodemo:
—¿Lal kami aj Galilea rilal? Chajilaj la chi utz Ruch'a'tem ri Dios y jela' keta'maj la we k'o juna q'alajisanel elinaq lo chikixo'l raj Galilea —xecha'.
53Ek'uchiri', chikijujunal xeb'ek chikocho.
Currently Selected:
Juan 7: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.