Juan 19
19
Kaq'at tzij re kamik puwi ri Jesús
(Mt. 27:15-31; Mr. 15:6-20; Lc. 23:13-25)
1Ek'u ri Pilato xtaqan che kak'am b'i ri Jesús y kajich' upa. 2Yey ri soldados xkikoj che rujolom ri Jesús jun corona kipach'um ruk' k'iix. Y xkirip jun manta morato#19:2 “Morato”: Kil “púrpura” pa vocabulario. chirij. 3Tek'uchiri' xeqib' ruk' y kakib'i'ij:
—¡Nim uq'ij ri rey ke raj judi'ab'! —kecha'. Yey kakipach' q'ab' chupalaj.
4Ri Pilato xel tanchi uloq y xub'i'ij chike raj judi'ab':
—Chilape alaq, kanwesaj lo wa'chi chiwach alaq. Cheta'maj k'u alaq, ri'in na jinta juna umak kanriqo —xcha'.
5Ek'uchiri' xel lo ri Jesús, k'o ri corona re k'iix che rujolom y ripom ri manta morato chirij. Xub'i'ij k'u ri Pilato chike:
—¡Ri' rachi k'o chiwach alaq! —xcha'.
6Echiri' ri nimaq e aj chakunel pa Rocho Dios kuk' ri e chajinel re ri Rocho Dios xkil ri Jesús, xkijeq kesik'inik, jewa' kakib'i'ij:
—¡Kamisax chwa cruz! ¡Kamisax chwa cruz! —kecha'.
Ek'u ri Pilato xub'i'ij chike:
—We e ri', k'ama b'i ralaq y kamisaj alaq chwa cruz, pero ri'in na jinta juna umak kanriqo —xcha'.
7Raj judi'ab' xkik'ul uwach:
—Ri'oj k'o jun taqanik paqawi' y kub'i'ij k'u ri' taqal che rire kakamisaxik ma u'anom Uk'ajol Dios che rib' —xecha'.
8Echiri' ri Pilato xuta wa', xok más xi'in ib' ruk'. 9Xok k'u tanchi ub'i pa ri palacio y xutz'onoj che ri Jesús:
—¿Pa lal petinaq wi rilal?#19:9 Ri Pilato na kutz'onoj taj pa xalax wi ri Jesús; ri karaj kareta'maj e we ri Jesús xa e jun tikawex o we ruk' ri Dios petinaq wi. —xcha'. Pero ri Jesús na xuk'ul ta uwach.
10Ri Pilato xub'i'ij k'u che:
—¿E la' na kak'ul ta la uwach wa kantz'onoj che'la? ¿Na eta'am ta kami la panuq'ab' ri'in k'o wi kankamisaj la chwa cruz y panuq'ab' k'o wi kanyolopij b'i la? —xcha'.
11Ri Jesús xuk'ul uwach:
—Paqatzij wi kamb'i'ij che'la, na jinta k'ana paq'ab' la kataqan la panuwi' we tamaji e ri Dios chila' chikaj xya'w che'la. E uwari'che, china ri xinq'atisan paq'ab' la, e más k'o umak ri', chiwach rilal —xcha'.
12Chwi k'u ri', ri Pilato lik xutzukuj su'anik kuyolopij b'i ri Jesús. Pero raj judi'ab' ko kesik'in che ub'i'xik:
—¡We xyolopij b'i la, na lal ta chi ramigo ri' ri nimalaj taqanel re Roma; ma china ri ku'an rey che rib', ri' e tzel karil wa nimalaj taqanel! —xecha'.
13Echiri' xuta wa' ri Pilato, xutaq b'i resaxik ri Jesús y xtz'uyi' pa ri luwar re q'atb'al tzij “Tz'aqom Ab'aj” kecha che, yey pa ri ch'a'tem hebreo “Gabatá” rub'i'.
14E q'ij ri' kayijb'ax pan janipa ri kajawax pa ri nimaq'ij Pascua. Ek'uchiri' xu'an tik'il q'ij,#19:14 “Tik'il q'ij”: Kil “hora” pa vocabulario. ri Pilato xub'i'ij chike raj judi'ab':
—Ri' ri rey e alaq —xcha'.
15No'j raj judi'ab' ko kesik'in che ub'i'xik:
—¡Kamisax chwa cruz! ¡Kamisax chwa cruz! —kecha'.
Ri Pilato xub'i'ij chike:
—¿Kankamisaj kami ri' chwa cruz ri rey e alaq? —xcha'.
Pero ri nimaq e aj chakunel re ri Rocho Dios xkik'ul uwach:
—Ri'oj na jinta juna chik qarey, xew e qarey ri nimalaj taqanel re Roma —xecha'.
16Ek'u ri Pilato xuya b'i ri Jesús pakiq'ab' re kakamisax chwa cruz. Ewi xk'am b'i ri Jesús.
Rukamik ri Jesús chwa ri cruz
(Mt. 27:32-50; Mr. 15:21-37; Lc. 23:26-49)
17Ri Jesús utelem b'i rucruz echiri' xk'am b'i pa ri luwar kab'i'x che “Luwar re Ub'aqil Ujolom Anima'”, yey pa ri ch'a'tem hebreo, “Gólgota”. 18Chiri' k'u ri' xya' wi ri Jesús chwa ri cruz junam kuk' keb' chik achijab', jun pa taq utzal; y xk'oji' k'u Rire chikinik'ajal.
19Ri Pilato utaqom chik katz'ib'ax wa' y kaya' k'u lo chwi ri cruz: «jesús ri aj nazaret, ri rey ke raj judi'ab'.»
20Yey wa' tz'ib'ital pa ri ch'a'tem hebreo, pa ri ch'a'tem griego y pa ri ch'a'tem latín. E k'i k'u chike raj judi'ab' xkajilaj wa', ma ri luwar pa xya' wi ri Jesús chwa ri cruz xa naqaj k'o wi che ri tinamit. 21Yey ri nimaq e aj chakunel re ri Rocho Dios xkib'i'ij che ri Pilato:
—Na ub'e taj xtz'ib'aj la “Ri rey ke raj judi'ab'”. Jalk'atij la cha' jewa' kub'i'ij: “Rire xub'i'ij: Ri'in in rey ke raj judi'ab'” —xecha'.
22Pero ri Pilato xub'i'ij chike:
—Ri xintaq utz'ib'axik ri'in, jela' kakanaj kanoq —xcha'.
23Ri soldados echiri' kiya'om chi ri Jesús chwa ri cruz, xkimol uchi' ruq'u', xkijach upa cha' ku'an kajib' rajaw. Jela' xkaj kaki'an ruk' rukoton; pero wa' xa jun upa u'anom. 24Ruma k'u wa', ri soldados jewa' xkib'i'ij chikiwach:
—Maqarich'ij upa rukoton; qa'ana jun sorteo cha' jela' kaqilo chinoq chiqe kak'amaw b'i re —xecha'.
Ek'u xu'ana pacha' ri tz'ib'ital kan chupa Ruch'a'tem ri Dios:
Xkijach kib' puwi ri nuq'u',
ma xki'an sorteo ruk' Sal. 22:18
kacha'. Yey jek'uri'la' xki'an ri soldados.
25Chunaqaj k'u ri cruz e k'o ruchu ri Jesús, ruchaq' ruchu, ri María rixoqil ri Cleofas y ri María ri aj Magdala. 26Echiri' ri Jesús xril pan ruchu k'o putzal ri jun utijo'n lik k'ax kuna' Rire, xub'i'ij k'u pan che ruchu:
—Nuchu, chwi k'u wo'ora e alab' la la' —xcha'.
27Tek'uchiri' xub'i'ij che ri jun utijo'n k'o putzal ri María:
—Ek'u ri'at, chwi wo'ora e achu la' —xcha'. Chwi k'u ri', wa jun utijo'n ri Jesús xuk'am b'i ri María cha' ke'jeqela chirocho.
28Ek'u ri Jesús reta'am ya xuk'is u'anik ronoje ruchak; yey cha' e ku'ana janipa ri tz'ib'ital kan chupa Ruch'a'tem ri Dios, jewa' xub'i'ij:
—Katzajin nuchi'#Sal. 69:21 —xcha'.
29Chiri' k'o jun xaro nojinaq che vinagre. Yey e k'o jujun xkichuq' jun esponja chupa, xkixim k'u chutza'm jun vara re hisopo y xkiya pan chwa re' ri Jesús.
30Rire xutij ri vinagre, tek'uchiri' xub'i'ij:
—Xink'is k'u utza'm ri nuchak —xcha'.
Ek'uchiri', xuyuxub'a' rujolom y xuq'atisaj ri ranima' puq'ab' ri Dios.
Jun soldado kutoq' ruk'alk'a'x ri Jesús ruk' rulanza
31Ek'u q'ij ri' kayijb'ax pan janipa ri kajawax pa ri nimaq'ij Pascua. Ruma k'u la', raj judi'ab' na kakaj taj kak'oji' juna kaminaq chwa cruz pa ri q'ij re uxlanib'al, ma la' la jun q'ij lik nimalaj nimaq'ij. E uwari'che xkitz'onoj che ri Pilato kutaq uq'epik ri kaqan ri e k'o chwa cruz cha' jela' kekam tan y keqasax k'u uloq.
32Xeb'ek k'u ri soldados y xe'kiq'epa ri kaqan ri e k'o chwa cruz pa taq utzal ri Jesús. Xki'an k'u ri' che ri nab'e, tek'uchiri' jela' xki'an che ri jun chik. 33Pero echiri' xeqib' ruk' ri Jesús, xkilo kaminaq chik; ruma ri', na xkiq'ep ta ri raqan. 34Na ruk' ta k'u ri', jun chike ri soldados xutoq' ruk'alk'a'x ri Jesús ruk' rulanza y k'atetana chupa wa' xel lo kik' y ya'.
35Ri katzijon re ronoje wa' e xilow re; lik qatzij k'u ri kub'i'ij ma lik reta'am sa' ri xrilo. Yey kutzijoj k'u ri' cha' kakub'i' k'u'x alaq ruk' ri Cristo. 36Ma ronoje taq wa' xu'ano cha' e ku'ana janipa ri tz'ib'ital kan chupa Ruch'a'tem ri Dios, ma jewa' kub'i'ij:
Na kaq'ep tane junoq che rub'aqil. Nm. 9:12; Sal. 34:20
37Yey jewa' kub'i'ij Ruch'a'tem ri Dios:
Kakil na k'u uwach ri jun xkitoq' ruk'alk'a'x. Zac. 12:10
Ri Jesús kamuqik
(Mt. 27:57-61; Mr. 15:42-47; Lc. 23:50-56)
38K'isb'al re taq wa', ri José aj Arimatea xu'tz'onoj che ri Pilato cha' kaya' che kuk'am b'i rucuerpo ri Jesús. Yey ri José e jun chike rutijo'n ri Jesús tob' xa xe'laq'ay, ma kuxi'ij rib' chikiwach ri rach e aj judi'ab'. Ek'u ri Pilato xuya b'i che, y ri José xuk'am b'i rucuerpo ri Jesús.
39Ek'u ri Nicodemo, ri jun achi xe'ch'a'ta ruk' ri Jesús chaq'ab',#Jn. 3:1-2 xopon che uto'ik ri José. Ruk'a'am laj jun quintal kunab'al lik ki' ruxlab', wa' mirra uyijb'am ruk' áloes. 40Xkik'am k'u b'i rucuerpo ri Jesús y xkib'olq'otij pa jutaq rab'a'j k'ul kojotal ri kunab'al che, ma wa' lik xex kaki'an wi raj judi'ab' che kimuqik ri kekamik.
41Xa naqaj che ri luwar pa xkikamisaj wi ri Jesús chwa ri cruz, k'o jun luwar k'o chomilaj che' chwach. Y chiri' k'o jun muqub'al k'ak' 'anom, y na jinta junoq muqum chupa. 42Chiri' k'u ri' xkimuq wi rucuerpo ri Jesús, ma ri muqub'al xa naqaj k'o wi; yey xkaj kamuqi' ri cuerpo pa ri q'ij echiri' raj judi'ab' kakiyijb'a' pan janipa ri kajawax chike pa ri nimaq'ij Pascua, ma na utz taj ka'an muqunik pa ri nimaq'ij.
Currently Selected:
Juan 19: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.