1 Timoteo 1
1
Ri Pablo kuya pan rutzil uwach ri Timoteo
1Ri'in in Pablo, in taqo'n re ri Qanimajawal Jesucristo, intaqom lo ruma ri Dios Qakolob'enel y ruma ri Qanimajawal Jesucristo, ri qakub'am pana qak'u'x ruk'. 2Kantz'ib'aj pan wa' wa carta chawe ri'at Timoteo, ri paqatzij wi at nuk'ajol chupa rub'i' ri Cristo ma wuma ri'in xakoj rub'i' Rire. Chak'ulu k'u ri unimal rutzil k'u'xaj, ri relej k'u'xaj y ri utzil chomal re ri Qaqaw Dios y re ri Qanimajawal Jesucristo.
Pixab'anik puwi taq ri k'utunik na ub'e taj
3K'una chak'u'x ri ximb'i'ij kan chawe echiri' e ri' kin'ek Macedonia: E katkanaj kan chupa ri tinamit Éfeso ma chiri' e k'o jujun tikawex lik junwi ri kakik'utu chwa ri kaqak'ut ri'oj. Ximb'i'ij k'u kan chawe keb'ataq che na kaki'an ta chi wa'. 4Yey ximb'i'ij kan chawe kab'i'ij chike ri hermanos makiya ne kina'oj puwi taq ojer tzijob'al na petinaq ta ruk' ri Dios y taq ri kakib'ololej kib'i' kati'-kimam re ojertan, ma taq la' kuk'am lo sachib'al na'oj y na kato'b' ta che ri karaj ku'an ri Dios quk', yey wa' ku'ana xew ruma ri kub'ulib'al qak'u'x ruk' Rire.
5Ruk'u'xib'al ri kojutaq ri Dios che e wa': Lik k'ax kaqana' qib' chiqawach.#Ro. 13:8-10; Gl. 5:14 Yey cha' kaqa'an wa' chirajawaxik lik kalax pa qanima' kaqa'an ri utz, kaqamaj usuk' sa' ri utz yey e kaqa'ano, y paqatzij wi kakub'i' qak'u'x ruk' Rire.
6No'j e k'o jujun kiya'om kan ri karaj ri Dios; xkijalk'atij k'u ri kina'oj y wo'ora xew kech'a't chwi ri na jinta uchak. 7Rike kakaj kaki'an e aj k'utunel che kib' chwi Rutzij Upixab' ri Dios, tob' na kakimaj tane usuk' ri kakib'i'ij y na kakimaj tane usuk' ri k'utunik lik kakijikib'a' uwach.
8Pero ri'oj lik qeta'am lik k'o kutiqoj Rutzij Upixab' ri Dios we jusuk' kaqachapab'ej. 9Qeta'am k'ut ri Tzij Pixab' na xya'i' taj re kuq'at tzij pakiwi ri jusuk' kib'inik kisilab'ik; ma xya'ik re kuq'at tzij pakiwi ri e aj palajiy tzij y ri na e ta kojol tzij, ri na jinta xi'in ib' kuk' chwach ri Dios y ri e aj makib', ri na keb'ok ta il che kakiloq'nimaj uq'ij ri Dios y ri kakik'aq b'i uq'ij ri Dios; ri e kamisay kichu-kiqaw kuk' ri e kamisanel, 10ri kaketz'ab'ej uwa kiq'ij kuk' jujun chik na kik'ulel taj, rachijab' kaki'an kik'ulel chike kach achijab', ri kekichap winaq y na kekitzoqopij ta uloq we na kaya'i' ta puaq chike, raj raq'ul, ri k'o kakijikib'a' uwach chupa rub'i' ri Dios yey xa raq'ub'al ri kaki'ano, kuk' taq k'u konoje ri kakipalajij ri saqil k'utunik re ri Dios. 11E k'utunik wa' k'o chupa ri chomilaj Utzilaj Tzij re ri Dios. Yey ri Dios, ri lik nim uq'ij, e xya'w wa' panuq'ab' ri'in cha' kantzijoj.
Ri Pablo kutioxij ri rutzil uk'u'x ri Dios
12Ri'in kantioxij che ri Qanimajawal Jesucristo ma uya'om nuchuq'ab' cha' kan'an ruchak y ma xkub'i' uk'u'x wuk' echiri' xuya wa jun chak chwe, 13tob' rojertan ri'in lik xinmakun chirij ri Qanimajawal Jesucristo ma xeb'enuternab'ej ri kikojom rub'i' y lik xeb'enuya pa taq k'axk'ob'ik. Na ruk' ta k'u ri', ri Dios xjuch' ka'n uk'u'x chwe; ma echiri' xin'an wa', k'amaja' kakub'i' nuk'u'x ruk' ri Cristo y na xinmaj ta k'u usuk' we ri kan'ano na utz taj. 14Yey ri Qanimajawal lik xuk'ut ri unimal rutzil uk'u'x chwe y xuya chwe kakub'i' nuk'u'x ruk' y xuya chwe kank'ut ri rutzil uk'u'x Rire; y wa' xew ri Qanimajawal Jesucristo kaya'w re.
15Ek'u wa kamb'i'ij lik qatzij y lik taqal che kakikoj konoje ri tikawex: Ri Qanimajawal Jesucristo xk'un che ruwachulew cha' keb'olu'kolob'ej konoje raj makib'. Ek'u ri'in in jun chike wa'; yey chinuwach ri'in, in ne ri más k'o numak chikiwa rike. 16Ek'u ri Qanimajawal Jesucristo xuk'ut ri k'axna'b'al uk'u'x chwe ri'in ma xukuy numak tob' lik in aj mak. Jela' xu'ano cha' kaq'alajin ri rutzil uk'u'x chike konoje ri kekojow rub'i'. Ma ri xu'an wuk' ri'in e k'utub'al re ri ku'an kuk' ri kakub'i' kik'u'x ruk' Rire, kukuy k'u kimak y kuya kik'aslemal na jinta utaqexik.
17Ruma k'u wa', qaloq'nimaj uq'ij ri Dios waq'ij ora y chiqawach apanoq.
Ma ri Dios Qajawxel
na jinta utaqexik rutaqanik,
na jinta utaqexik ruk'aslemal,
na kilitaj ta uwach,
xew Rire e Dios
y reta'am ronoje.
Lik k'o yakb'al uq'ij y unimal uchomalil.
18Wo'ora Timoteo, kanya wa taqanik chawe ri'at at nuk'ajol chupa rub'i' ri Cristo: Chachuq'ub'ej awib' chupa ri chak ya'om paq'ab' e chirij ri xq'alajisax pawi' ri'at chwi rachak chwach ri Dios.#1 Ti. 4:14 19Chatikib'a' k'u ri kub'ulib'al ak'u'x ruk' ri Cristo y chamaja usuk' sa' ri utz y e cha'ana ri'. Ma e k'o jujun na xki'an ta wa', y ruma k'u ri' xsach ri kub'ulib'al kik'u'x ruk' ri Cristo y na kakikoj ta chi ne ri Q'ijsaq. 20Jenewa' xki'an ri Himeneo y ri Alejandro. Ruma k'u ri', xeb'enuya puq'ab' ri Satanás cha' kakitij k'ax y jela' kakimaj usuk' na utz taj kech'a't chirij ri Q'ijsaq re ri Dios.
Currently Selected:
1 Timoteo 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.