Soponi 1
1
1Ta gə́ Njesigənea̰ ula Soponi, ŋgolə Kusi, gə́ to ŋgolə Gedalia, gə́ to ŋgolə Amaria, gə́ to ŋgolə Ejekias, mee ləb gə́ Jojias, ŋgolə Amo̰ to ne mbai gə́ Juda lé .
Tandəji gə́ wɔji dɔ tujije gə́ d’a gə ree lé
2Njesigənea̰ pana:
N’a gə tuji néje lai gə́ to dɔ naŋg nee lé.
3N’a tuji dəwje gə daje ləm,
Gə yelje gə ka̰jije gə́ dan baa-boo-kad’g ləma,
Gə nérɔkulje gə njémeeyèrje sə dee na̰’d ləm tɔ.
N’a kar dəwje gə́ d’isi dɔ naŋg nee d’udu guduru ya,
Njesigənea̰ ɓa pa bèe.
Tuji gə́ a koso dɔ Judaje’g lé
4N’a tuji Judaje
Gə dəwje lai gə́ d’isi Jerusalem gə ji neḛ,
N’a tuji ges magə-Baal gə́ nai lée’g neelé pugudu-pugudu ləm,
Gə ri njékulaje ləa gə njékinjanéməsje ləa sə dee na̰’d ləm tɔ.
5N’a tuji deḛ gə́ d’unda barmba dɔ kəije’d gə́ tar no̰ boo-néje gə́ dara’g ləm,
Gə deḛ gə́ d’unda barmba d’ubu ne rɔ dee gə ri Njesigənea̰
Esé gə ri mbai lə dee ləm tɔ lé
6Deḛ gə́ tel gir dee d’ar Njesigənea̰ ləm,
Gə deḛ gə́ ndolè Njesigənea̰ el ləma,
Gə dəjee ta el ləm tɔ.
7Maji kar sí sije gə ta sí gə́ mundu no̰ Mbaidɔmbaije gə́ Njesigənea̰’g!
Mbata ndɔ lə Njesigənea̰ nai dəb ba ŋga ləm,
Mbata Njesigənea̰ wa dɔ gɔl nékinjaməs ləma,
Yeḛ mbər njé gə́ yeḛ a gə ɓar dee lé ləm tɔ.
8Ndɔ kinja néməs kar Njesigənea̰ lé
N’a kar bo̰ néra dəwje gə́ boo
Gə ŋgalə mbaije ɔs ta dee’g ləm,
Gə deḛ lai gə́ d’ula kubu kula dəw-dɔ-ɓeeje rɔ dee’g ləm tɔ.
9Mee ndəa’g neelé n’a kar bo̰ néra deḛ lai gə́ tal dɔ loo-kandə-kəi’g asəna gə njépole-magəje bèe ləm,
Gə deḛ lai gə́ d’ar néra gə́ kərm-kərm
Gə nésukəmloo taa mee kəi lə ɓée deeje pəl-pəl ləm tɔ lé ɔs ta dee’g .
10Njesigənea̰ pana:
Mee ndəa’g neelé
D’a koo ndu kii tarəwkəi gə́ ɓaree Tarəw-ka̰jije ləm,
Gə no̰ sii mbigi-mbigi mee dəb loo gə́ mee ɓee-boo’g ləma,
Gə tuji-boo gə́ oso dɔdərlooje’g ləm tɔ.
11Seḭ dəwje gə́ síje Maktes lé
Gə́ no̰je tuma̰je ŋgururu-ŋgururu ya!
Mbata deḛ lai gə́ to njérab-néndogoje lé
D’wəi mba̰ ləm,
Deḛ lai gə́ to njételkəmlarje lé
D’udu guduru mba̰ ləm tɔ.
12Mee ndəa’g neelé n’a tən loo mee ɓee gə́ Jerusalem soo-soo gə pərndɔje lə neḛ ləm,
Dəwje gə́ d’isi lɔm to gə́ ɓi mán-nduú gə́ oso gelee’g bèe
Gə́ pa meḛ dee’g pana:
Njesigənea̰ lé ra né gə́ maji əsé né gə́ majel bèe el lé
N’a kar bo̰ néra dee ɔs ta dee’g ləm tɔ.
13Némajije lə dee d’a to nékunda banrɔ ləm,
Kəije lə dee kara d’a tuji pugudu-pugudu ləm tɔ.
Deḛ ra kəije ya
Nɛ d’a si keneŋ gogo el ləm,
Deḛ ma̰a kag-nduúje ya
Nɛ d’a kai manee el ŋga ləm tɔ.
Ndɔ lə Mbaidɔmbaije lé
14Ndɔ gə́ boo lə Mbaidɔmbaije to dəb,
To dəb ya, a teḛ kalaŋ ba ya,
Ndu gə́ wɔji dɔ ndɔ lə Njesigənea̰ lé ɓar
Ndá bao-rɔje kara no̰ wəl gə kəm ɓəl.
15Ndɔ neelé a to ndɔ oŋg-boo ləm,
Gə ndɔ nékəmndoo gə néɓəŋgərəti ləm,
Gə ndɔ tuji-boo gə ndɔ néurti ləm,
Gə ndɔ gə́ loo a ndul njudu-njudu gə loo a dəb rigim ləma,
Gə ndɔ gə́ ndi pélé dara gə mumje ləm tɔ.
16A to ndɔ gə́ bao-rɔje d’a kim to̰to̰ ləm,
D’a kur kò-rɔ ləm tɔ
Gə mba rɔ ne gə ɓee-booje gə́ siŋga dee to ləm,
Gə kəi-kaar-kɔgərɔje gə́ duu dɔ loo ləm tɔ.
17N’a kɔm dəwje dan néɓəŋgərətije’g ləm,
N’a kar dee njaa asəna gə njékəmtɔje bèe ləm tɔ
Mbata deḛ ra kaiya d’ɔs ne ta lə Njesigənea̰ rəw,
N’a saga məs dee naŋg to gə́ babur bèe ləm,
N’a kɔm dakasrɔ dee dɔ ɓiri-ɓisi’g ləm tɔ.
18Larnda lə dee əsé larlɔr lə dee kara
D’a kaskəm taa ne dɔ rɔ dee mee ndɔ oŋg-boo’g lə Njesigənea̰ lé el,
Pər boo-oŋg ləa a roo ɓeeje lai dula-dula,
Mbata yeḛ a tuji dəwje lai
Gə́ d’isi mee ɓee’g neelé pugudu-pugudu gə́ léegəneeya.
Currently Selected:
Soponi 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.