Jakari 1
1
NÉMḬDIJE GƎ JAKARI OO
Njesigənea̰ ɓar Israɛlje gə́ rəa’g
1Mee naḭ gə́ njekɔm’g jinaijoo’g, mee ləb ko̰ɓee’g lə Darius gə́ njekɔm’g joo lé Njesigənea̰ ula Jakari ŋgolə Berekia, ŋgoka Ido, njetegginta lé ta gə rɔtaje neelé pana : 2Mee Njesigənea̰ ḭ səa pu dɔ bɔ síje-je’g. 3Yeḛ pana: Ula dee pana: Njesigənea̰ gə́ njeboo-néje pa togə́bè pana: Gə́ tel reeje rɔ neḛ’g, Njesigənea̰ gə́ njeboo-néje ɓa pa bèe. 4Maji kar sí toje asjena gə ka síje-je gə́ njéteggintaje gə́ dɔtar d’ula dee ta pana: Njesigənea̰ gə́ njeboo-néje pa togə́bè pana: Maji kar sí ubaje goo panjaa sí gə néra sí gə́ majel lé ya̰je. Nɛ dee d’oo el ləm, dee d’ur mbi dee gə́ dɔ ta’g lə neḛ el ləm tɔ. Njesigənea̰ ɓa pa bèe. 5See ka síje-je lé d’əd ra ɓəi wa. See njéteggintaje d’askəm si kəmba saar gə no̰ wa. 6Lée togə́bè kara taje lə neḛ gə tornduje lə neḛ gə́ n’ar kuraje lə neḛ gə́ njéteggintaje lé see wa dɔ ka síje-je el wa. Deḛ d’ɔs badm tel ndá dee pana: Njesigənea̰ gə́ njeboo-néje ra sə sí to gə́ yeḛ wɔji gə goo panjaa sí gə néra síje lé ya.
Némḭdi gə́ dɔtar gə́ wɔji dɔ kundaje lé
7Ndɔ gə́ njekɔm’g rɔ-joo-giree-sɔ lə naḭ gə́ njekɔm’g dɔg-giree-kára gə́ to naḭ Sebat, mee ləb ko̰ɓee’g lə Darius gə́ njekɔm’g joo lé Njesigənea̰ ula Jakari ŋgolə Berekia, ŋgolə Ido, njetegginta lé ta gə rɔtaje neelé pana: 8Ma m’aa loo gərərə loondul’g ndá aa oo, dəw kára uba kunda-ndai ndá yeḛ aar mbuna bèmèje gə́ wəl-loo’g. Loo gə́ goo njekunda-ndai’g lé ndá kunda-ndaije gə kunda-ndulije d’aar keneŋ tɔ . 9Ma m’dəjee m’pana: Mbai ləm, see kundaje neelé wɔji dɔ ɗi wa.
Kura gə́ dara lé ulam pana: N’a tɔjim karm m’oo gin né gə́ wɔji dɔ kundaje neelé ya.
10Dəw gə́ aar mbuna bèmèje’g lé un ta pa pana: Ginee wɔji dɔ dee gə́ Njesigənea̰ ula dee mba kar dee d’aw gə looje lai-lai dɔ naŋg nee.
11Deḛ d’ula kura lə Njesigənea̰ gə́ aar mbuna bèmèje’g lé pana: Aa oo, jeḛ j’awje gə looje lai dɔ naŋg nee ndá naŋg to lɔm ləm, to gə́ majee ləm tɔ.
12Yen ŋga kura lə Njesigənea̰ lé un ta dəji pana: Njesigənea̰ gə́ njeboo-néje, see saar ndɔ gə́ ra ɓa i a lal koo kəmtondoo lə njé gə́ Jerusalem gə ɓee-booje gə́ Juda, dee gə́ i ar məəi ḭ səi jugugu dɔ dee’g as ləb rɔ-siri mba̰ lé wa.
13Njesigənea̰ tel gə taje gə́ maji gə́ to ta gɔl mee ula kura gə́ dara gə́ njekwɔji səm ta lé.
Njesigənea̰ a tel ra meemaji gə njé gə́ Jerusalem gogo
14Kura gə́ dara gə́ njekwɔji səm ta lé ulam pana: Maji kam m’ra né wəl m’pana: Njesigənea̰ gə́ njeboo-néje pa bèe pana:
Mee neḛ aw taḭ-taḭ gə boo-kəmkəḭ
Gə mbata lə Jerusalem gə Sio̰.
15Neḛ lé oŋg ḭ sə neḛ al dɔ neḛ sula
Dɔ ginkoji dəwje gə raŋg’d gə́ to njébeeleje,
Mbata kédé lé n’ar oŋg ḭ sə neḛ lam ba ya,
Nɛ dee lé d’ar némeekonje lə dee ḭ dɔ maree’d gə́ kédé-kédé.
16Gelee gə́ nee ɓa Njesigənea̰ pa ne togə́bè pana:
N’a gə tel ree Jerusalem gə meemaji
Ndá d’a tel kunda kəi lə neḛ gogo ləm,
D’a kwɔji Jerusalem gə kúla ləm tɔ.
17Maji kam m’ra né wəl ya tɔɓəi m’pana:
Njesigənea̰ gə́ njeboo-néje pa togə́bè pana:
Ɓee-booje lə neḛ d’a tel kiŋga némajije
Gə́ a taa rɔ dee pəl-pəl ya ɓəi,
Njesigənea̰ a gɔl mee Sio̰ ya ɓəi ləm,
A tel kɔr kəm ɓee gə́ Jerusalem gə́ nékea̰ ɓəi ləm tɔ.
Currently Selected:
Jakari 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.