Joɛl 1
1
1Ta gə́ Njesigənea̰ ula Joɛl, ŋgolə Petuel.
Teḛ lə beedéje gə loo-tudu
2Seḭ ɓugaje lé urje mbi sí ooje ne ta neelé
Seḭ dəw-mee-ɓeeje lé oreeje mbi sí ndəŋ dɔ ta’g neelé to!
Né gə́ togə́bè lé see teḛ mee ndəa gə́ seḭ síje keneŋ lé
Esé mee ndəa’g lə bɔ síje-je ya wa.
3Ɔrje soree arje ŋgan síje ləm,
Arje ŋgan sí-seḭje kara d’ɔr soree
D’ar ŋgan dee-deḛje ləma,
Mba kar ŋgan deeje kara d’ɔr soree
D’ar njéboakojije lə na̰ gə́ d’orè goo dee ləm tɔ.
4Né gə́ beedé-ma̰daŋje d’ya̰ ndá
Beedé-booje d’o̰ lai,
Né gə́ beedé-booje d’ya̰ ndá
Baigo̰je d’o̰ lai,
Né gə́ baigo̰je d’ya̰ ndá
Lámje to̰ lém-lém tɔ.
5Seḭ njéra ɓər lə kidoje lé
Teḛje kəm sí no̰je gə mán-no̰ kəm sí’g!
Seḭ bao-kaikidoje gə́ mḭ lé
No̰je pénéné-pénéné
Mbata mán-nduú gə́ kul lé lal ta sí mba̰!
6Mbata ginkoji dəwje ree buŋga na̰ dɔ ɓee’g ləm.
Deḛ to njésiŋgamoŋje gə́ dum tura ya.
Ŋgaŋ deḛ to tana gə ŋgaŋ toboḭ bèe ləm,
Ka ta deeje kara to asəna gə ka ta ko̰ toboḭ bèe ləm tɔ .
7Deḛ tuji kag-nduúje ləm ləm,
Deḛ guru kag-kodé ləm rug-rug ləm,
Deḛ tusu ŋgɔyee ŋgəu-ŋgəu d’ɔm naŋg ləma,
Barkəm nduúje tel ndá pal-pal ləm tɔ.
8Maji kar sí no̰je to gə́ ŋgoma̰də gə́ ula kubu-kwa-ndòo rəa’g
No̰ ne mbata lə ŋgawkasee gə́ wəi kalaŋ ba!
9Nékarje gə́ to nduji gə́ ndá léréré ləm,
Gə nékarje gə́ ka̰ tər naŋg ləm tɔ lé
Godo mee kəi’g lə Njesigənea̰,
Njékinjanéməsje gə́ to kuraje lə Njesigənea̰ lé
D’isi dan kəmndooyoo’g.
10Mee ndɔje wa ŋgɔ njag-njag ləm,
Kəm dɔ naŋg to ndòo ləm tɔ,
Mbata kó tuji ləm,
Man-nduú gə́ kul yi tə-tə ləma,
Ubu kara godo ləm tɔ.
11Njḛ́dɔje lé ta igi dee sel ləm,
Deḛ gə́ ndɔ nduú kara
Tuma̰ ŋgururu-ŋgururu ləm tɔ
Mbata kó-blé gə kó-ɔrj tuji ləm,
Mbata koje lə dee gə́ kəm kinja kara tuji ləm tɔ.
12Kag-nduú tudu ləm,
Kag-kodé unda kuji ləma,
Kag-dḭ gə kag-tumbur gə kag-pɔmə
Kag-sɔje lai gə́ to mee ndɔje’g ndòlé ləm tɔ.
Rɔlel godo mbuna dəwje’g!
Ɓar-ɓar kwa ndòo rɔ tɔ
13Seḭ njékinjanéməsje,
Ɔmje kubu-kwa-ndòo rɔ sí’g no̰je ne!
Seḭ gə́ raje kula loo-nékinjaməs’g lé
Maji kar sí tuma̰je ŋgururu-ŋgururu to!
Gə́ reeje, seḭ kuraje lə Ala ləm,
Ulaje kubu-kwa-ndòo rɔ sí’g
Toje ne loondul’g saar arje loo àr ləm tɔ!
Mbata nékarje gə́ to nduji ləm,
Gə nékarje gə́ ka̰ tər naŋg ləm tɔ lé
Godo mee kəi’g lə Ala lə sí.
14Ilaje mbər kɔg-mee-ɓoo ləm,
Gə kwa-dɔ-na̰ gə́ to gə kəmee ləm tɔ!
Mbo̰je ɓugaje gə dəwje lai gə́ mee ɓee’g
Mee kəi’g lə Ala lə sí gə́ Njesigənea̰
Ndá raje né wəl arje Njesigənea̰!
Ndɔ ra oŋg lə Njesigənea̰ lé
15Ai, ndɔ nee a to ndɔ gə́ ban wa!
Mbata ndɔ lə Njesigənea̰ nai dəb ba.
Yee a ree asəna gə nétuji gə́ ḭ rɔ Bao-siŋgamoŋ’d .
16Nésɔje ɓa tuji kəm sí’g nee ləm,
Rɔlel gə kalrɔ sané pá mee kəi’g lə Ala lə sí ləm tɔ.
17Kandə koje tudu naŋg kurum-kurum ləm,
Mee damje to wəl ləm,
Kəi-ŋgəm-néje tuji pugudu-pugudu ləma,
Ko gə́ lam bèe kara godo ləm tɔ.
18Nékulje d’ula hè-hè ləm,
Maŋg-kosoje d’ila mbir-mbir ləm tɔ
Mbata mu sɔ dee godo.
Badə-kosoje kara kəm dee to ndòo yaa̰ tɔ.
Tamaji lə njetegginta lé
19Ǝi Njesigənea̰! I ɓa m’no̰ wəl gə́ rɔi’g,
Mbata pər roo ndag-looje gə́ dɔdilaloo’g dula-dula ləm,
Ndo̰ pər roo kagje lai gə́ mee ndɔ’g ləm tɔ.
20Daje gə́ wala kara no̰ wəl-wəl gə́ rɔi’g
Mbata kəm-rəw-manje d’yi tə-tə ləm,
Pər roo ndag-looje gə́ dɔdilaloo’g dula-dula ləm tɔ.
Currently Selected:
Joɛl 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.