YouVersion Logo
Search Icon

3 Ja̰ 1

1
Lapia gə́ ra dee
1Ma ŋgatɔg lé m’ndaŋg maktub nee m’ar Gayus gə́ m’undá dan kəm’g gə goo kankəmta lé .
2I gə́ m’undai dan kəm’g lé ma m’ndiŋga rɔm mba kar i si gə́ majee dɔ néje’g lai ləm, mba kar darɔi to maji péd-péd to gə́ kankəmrɔi bèe lé ləm tɔ. 3Tɔgərɔ ya, loo gə́ ŋgako̰ síje gə́ d’ula dee lé tel ree rɔ sí’g d’ɔr goo ta ləi d’ar sí j’oo to gə́ i tia̰ dɔ kankəmta’g lé ɗigi-ɗigi ləm, d’ɔr goo panjaa gə́ i njaa keneŋ gə rɔkwɔilɔ pélé-pélé ləm tɔ ndá yee ɓa ar rɔm sa ne rəw am m’ndá ne məəm kaḭ. 4Koo ta lə ŋganəmje gə́ njaa dan kankəmta’g lé ar rɔm lelm ur dɔ rɔlelje’g lai ya.
Ŋgonkoji lə Gayus
5I gə́ m’undai dan kəm’g lé néje lai gə́ i ra mbata lə ŋgako̰ síje ləm, gə mbata deḛ gə́ to ŋgako̰ síje gə́ dɔ ɓee’g ləm tɔ lé i ra gə majikoji ya. 6Nojikwa gə́ i wa sə dee lé deḛ d’ɔr taree no̰ Eglisə’g. Mbá gə́ d’a gə kḭ kaw ɓasinè lé maji kari ar dee né gə́ lal dee, ra sə dee mba karee wa bea gə́ ka̰ Ala tɔ. 7Mbata mbá gə́ d’ḭ mba kaw neelé d’aw mbata lə ri Jeju Kristi ɓó d’iŋga né ji njépole-magəje’g el. 8Togə́bè ɓa, maji kar sí j’waje dəwje gə́ togə́bè lé gə́ rɔ sí’g mba kɔm ne sə dee na̰’d sad dɔ kula kankəmta’g neelé ɓəi.
Ta lə Diotrepə gə Demetriyus
9Ma m’ndaŋg maktub nee bəl m’ar Eglisə, nɛ Diotrepə gə́ ndigi kaar gə́ ŋgaw-ta dee kédé lé ɔs sí rəw. 10Gelee gə́ nee ɓa, ɓó lé m’a kaw ndá m’a kulá ne néreaje gə́ majel lé təsərə karee oo mbata ta meeyèr gə́ yeḛ ɔr ila dɔ sí’g lé. Yee gə́ nee ɓa gə karee el nɛ yeḛ ɔs ŋgako̰ síje gə́ raŋg ŋgərəŋ ləm, deḛ gə́ ndigi kwa dee gə́ rɔ dee’g lé yeḛ ɔg dee loo ra ləma, yeḛ tuba dee mee Eglisə’g ləm tɔ.
11I gə́ m’undai dan kəm’g lé néra gə́ maji ɓa maji kari ndoo ra ɓó i a ndoo néra gə́ majel el. Mbata yeḛ gə́ ra maji lé yeḛ to ka̰ Ala ya. Nɛ yeḛ gə́ njeramajel lé oo Ala nda̰ el ɓəi tɔ.
12Dəwje lai d’ɔr goo ta lə Demetriyus maji ləm, néreaje lai gə́ wa bua kankəmta lé ɔr ta ləa maji ləm tɔ. Jeḛ kara jeḛ j’ɔr goo ta ləa gə́ majee ya ndá i gər gao takɔr lə sí lé to kankəmta ya.
13Ma m’oo ta néje gə́ kəm kulai to bula ɓəi, nɛ ma m’ndigi ra taree gə mán ndaŋg maktub əsé kag ndaŋgee ɓa kulai ne taree el. 14M’unda məəm yel gə mba kar nai lam ba m’a kaw kooi ɓó gə kar sí j’wɔji na̰ ta gə ta sí ja̰-ja̰ ya ɓa.
15Maji kari si dan meelɔm’g ya.
Baokuraje ləi rai lapia. Ra baokuraje ləm lapia gə ŋgaŋgee-ŋgaŋgee am səi tɔ.

Currently Selected:

3 Ja̰ 1: SBA2015

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy