Karatas 5
5
1Nẽ Kris kot mẽ pahte amnhĩ nhĩpêx tũm pê mẽ papytàr jakamã kwa ixkràmnhwỳjaja. Kêr ka mẽ arĩ ate amnhĩ nhĩpêx tũm kôt amnhĩ nhĩpêx kêt nẽ. Ra Kris kot ja pê mẽ papytàr nhũm mẽ paxàmnhĩx ri papa kênã.
Mẽ pahpê Tĩrtũm kra hprãm xàj tanhmã mẽ pahte amnhĩ nhĩpêx to
Juãw 8.32; 8.36; Korosẽ 2.20
2E mẽ inhma. Kot kaj mẽ atõ Tĩrtũm kot ato hkra hprãm xàj amnhĩ my kwrỳt kà krãhta hã kot kaj mẽ ãm amarĩ ã amnhĩ nhĩpêx anhỹr kaprỳ. Na hte Tĩrtũm ja hã mẽ omu nẽ ãm hã mẽ omu. Kot kaj ã amnhĩ nhĩpêx anẽ nhũm Krisja ãm ate amnhĩ tomnuj mỳrapê anê htyk kaprỳ pyràk o amnhĩ nhĩpêx. 3Hãmri nhũm Tĩrtũm tee ri ja hã mẽ apumu nẽ te kot ã mẽ amã kapẽr anhỹr pyrà nẽ mẽ amã kapẽr o:
—E ra amã apê Kris kwỳ hprãm xàj amnhĩ my kwrỳt kà krãhyr jakamã kot kaj mããnẽn Mojes kapẽr piitã hkôt amnhĩ nhĩpêx o ri apa.
Anhỹr o mẽ amã kapẽr pyràk.
4Nom kot kaj mẽ atõ amnhĩ kukamã ajamaxpẽr o:
—Nà kot paj Mojes kapẽr piitã hkôt amnhĩ nhĩpêx o ri ixpa nhũm Tĩrtũm ja hã ixpumu nẽ inhmex ã ijarẽ nẽ ixto hkra kãm ga. Anẽ.
No ãm ja kot anhỹr kêt. Na hte Tĩrtũm ã mẽ pahte amnhĩ nhĩpêx anhỹr ã mẽ pahpumunh kôt mẽ pahto hkra hkêt nẽ. Jakamã kot kaj mẽ ã amnhĩ nhĩpêx anẽ nẽ te ate Kris kutã amnhĩ xãm pyràk nhũm Tĩrtũm ato mex kêt nẽ. 5Nom kot ka mẽ axtem ajamaxpẽr o:
—Ra ixte amnhĩ kaxyw Kris kôt ijamaxpẽr nẽ hkôt amnhĩ xãm jakamã koja Tĩrtũm hã ixpumu nẽ inhmex ã ijarẽ. Karõ ra kot ã inhmã ja ho amnhĩrĩt anhỹr kênã.
Anhỹr o ajamaxpẽr. Ãm hãmri ã mẽ ajamaxpẽr anhỹrja. 6Jakamã mẽ pahpê Kris kôt amnhĩ xunhwỳr xwỳnhjê kamã ra mẽ kot amnhĩ my kwrỳt kà jakàr xwỳnhjaja nhũm mẽ pahkwỳjaja ã amnhĩ nhĩpêx anhỹr kêt nẽ. Tã nhũm Tĩrtũm ja hã mẽ pahpumu nhũm ja tanhmã kêp kute hkêt. Na hte mẽ pahte amnhĩ my kwrỳt kà jakàr ã mẽ pahpumu nẽ ãm hã mẽ pahpumu. No kot pu mẽ Jejus Kris kôt amnhĩ nhĩpêx mex o ri papa. Nẽ amnhĩ kaxyw hkôt pajamaxpẽr tỳx o ri papa. Nẽ mẽ pamã axpẽn kĩnh pê tãm ri axpẽn nhĩpêx o ri papa. Ja na kêt Tĩrtũm kãm hprãm.
7Ra mẽ ate Kris kôt amnhĩ nhĩpêx mex o ri apa htã nhũm mẽ hêx xwỳnhjaja mẽ awỳr mra nẽ tee ri ã mẽ ate amnhĩ nhĩpêx anhỹr ã mẽ apumu nẽ tanhmã mẽ amã Tĩrtũm kapẽr o hêx to. Ka mẽ ama nẽ axte Tĩrtũm kôt amnhĩ nhĩpêx mex hkêt nẽ. 8No ãm ã mẽ kot mẽ amã mẽ ujarẽnh anhỹr xwỳnhjaja na pre Tĩrtũm mẽ awỳr mẽ rẽnh kêt nẽ. Tĩrtũm kot amnhĩ wỳr mẽ awỳr xwỳnh kênã kot kêt axtem nẽ mẽ awỳr kapẽr o mẽ amã hêx o mẽ pa xwỳnhjê rẽ.
9Nẽ koja mẽhõ pixi nẽ tanhmã amnhĩ tomnuj to nhũm mẽ piitã ja hã omu nẽ uràk nẽ kãm tanhmã amnhĩ tomnuj to hprãm. 10No kêt mẽ apê Kris kwỳ na ka mẽ. Ixte ja hã mẽ apumunh mex. Kot kaj mẽ axte ixkapẽr ma nẽ akupỹm Kris kôt amnhĩ nhĩpêx mex o ri apa. Nà kot kaj mẽ ã amnhĩ nhĩpêx anẽ nẽ axte mẽ kot mẽ apê àmnàr xwỳnhjê kapẽr mar nẽ mẽ hkôt amnhĩ nhĩpêx kêt nẽ. Koja Kris mẽ atã mẽ homnuj tỳx kumrẽx nhũm mẽ rĩ amnhĩ pumu.
Pawre kot mẽ kot amnhĩ jakàr ã mẽ kãm karõ hkêt ã harẽnh
11Nẽ na hte Tĩrtũm kapẽr o mẽ hêx xwỳnhjaja tanhmã mẽ amã ixto hêx to ho pa. Ixte mẽ kãm Tĩrtũm kot mẽ ho hkra kaxyw mẽ kot amnhĩ my kwrỳt kà jakàr ã mẽ kãm karõ hã ixto ri hêx o pa. Nom ixte anhỹr kêt ixkràmnhwỳjaja. Kop apu ixte mẽ kãm ja hã karõ ho ixpa ronhỹx Ijaew krãhtũmjaja ja hã ijarẽnh ma nhũm ja mẽ kãm mex nẽ nhũm mẽ axte Kris ã tanhmã inhĩpêx to hkêt nẽ. Nom ixte ja hã mẽ kãm karõ hkêt. Ãm ixte mẽ kãm Kris kot mẽ panê pĩ kahpa hã htyk jarẽnh pix mỳrapê na htem ixkamã gryk nẽ.
12Hêxta waa nẽ. Mẽ kot mẽ amã hêx o pa pê mẽ ajamaxpẽr o pihkàr xwỳnhjaja kop mẽ ãm mẽ anhõ krĩ rũm hapôx nẽ ma nhỹhỹm hapêx ronhỹx pa ixkĩnh tỳx kumrẽx.
Mẽ pahte axpẽn to mex o papa hã mẽ pamã karõ
Wam Korĩt 13; Eprêw 13.3; 13.16; Wam Pêtre 1.22; Wam Juãw 3.11
13-14Kwa ixkràmnhwỳjaja. Nà na pre Kris amnhĩ kaxyw mẽ parê. Axte mẽ pahte amnhĩ nhĩpêx tũm kôt amnhĩ nhĩpêx kêt kaxyw. Ra kot ã mẽ pahte amnhĩ nhĩpêx anhỹr pê mẽ papytàr jakamã kêr ka mẽ amnhĩ tã ja ma nẽ axte atỳx ri amã hprãm xà hkôt tanhmã amnhĩ nhĩpêx to ho ri apa hkêt nẽ. Mẽ ãm amã axpẽn kĩnh pix o ri axpẽn kôt apa. Nẽ nhãm mẽ hipêx o te ka amã amnhĩ tã ma pyràk o mẽ hipêx. Jao mẽ piitã tãm mẽ hipêx o ri apa. Kot kaj mẽ ã amnhĩ nhĩpêx anẽ nẽ te mẽ ate wam Tĩrtũm kapẽr piitã hkôt amnhĩ nhĩpêx pyràk. 15No kot kaj mẽ axtem nẽ axpẽn kãm axoprê ho ri apa hãmri nẽ te ra mẽ ate axpẽn to ajapêx par o amõr pyràk o amnhĩ nhĩpêx. Te mry xoprê kot axpẽn par o pata pyràk. Kwa mẽ ã amnhĩ nhĩpêx anhỹr hkêt nẽ. Mẽ ãm axpẽn to mex pix nẽ mẽ axpẽn kãm axukaprĩ ho ri axpẽn kôt apa.
Mẽ pahte amnhĩ nhĩpêx nyw jarẽnh
Matêwre 26.41; Rõmãn 8.1-11
16Nẽ kwa kêr ka mẽ amnhĩ to Tĩrtũm Karõ wỳ kê mẽ amã mẽ ate amnhĩ nhĩpêx nyw jagjê ka mẽ axte ate amnhĩ nhĩpêx tũm kôt amnhĩ nhĩpêx hkêt nẽ. Ãm mẽ ate amnhĩ nhĩpêx nyw kôt pix mã mãn amnhĩ nhĩpêx o ri apa. 17Tĩrtũm Karõ kot amnhĩ nhĩpêxja nẽ mẽ pahte amnhĩ nhĩpêx tũmja wa kot axpẽn pyràk kêt. Te wa kot axpẽn kutã amnhĩ xãm nẽ wa pijapu pyràk. Jakamã kot puj mẽ pahte amnhĩ nhĩpêx tũm o amnhĩ nhĩpêx nẽ Tĩrtũm Karõ mã hprãm xà hkôt amnhĩ nhĩpêx hkêt nẽ. 18No kot puj mẽ Tĩrtũm Karõ hkôt amnhĩ nhĩpêx nẽ ra jar pika ja kamã mẽ kot amnhĩ nhĩpêx kôt ri amnhĩ nhĩpêx kêt nẽ. Ra axtem mẽ pahte amnhĩ nhĩpêx nyw o amnhĩ nhĩpêx. 19Jar mẽ kot amnhĩ nhĩpêx tũmta mex kêt. Ra mẽ piitã mẽ kot ja pumunh mex.
Na htem htỳx ri hkwỳjê kamã hpijaàm kêt o pa.
Jao mẽmyjaja hprõ kuhpa hã nhãm mẽnijê ho amnhĩkati.
Nhũm mẽ hprõjaja mẽ mjên kuhpa hã nhãm mẽmyjê ho amnhĩkati.
Nẽ mẽmy hkwỳjaja axtem nẽ mẽmyjê hkwỳ ho amnhĩkati.
Nẽ mẽni hkwỳ haxwỳja axtem nẽ mẽnijê hkwỳ ho amnhĩkati.
20Nẽ mẽ kãm mẽmoj mẽ hikukrêx japê htỳx o kãm Tĩrtũm kĩnh jakre.
Nẽ mẽmoj kaxyw ma wajaga hwỳr amnhĩ to pa.
Nẽ hkwỳjê kamã oprê ho ri pa.
Nẽ mẽmoj tã axpẽn kãm gryk pix nẽ.
Nẽ mẽmoj to axpẽn pê õxỳ nẽ.
Nẽ mẽmo mỳrapê axpẽn pê anhgrà nẽ amỳm ahpỹnhã ri pa.
21Nẽ mẽmoj tã axpẽn kamnhĩx rãhã ho ri pa.
Nẽ axpã nẽ mẽ grer kãm ri axpẽn kãm hpijaàm kêt o ri pa.
à na htem mẽ kot amnhĩ nhĩpêx tũm kôt amnhĩ nhĩpêx o ri mẽ pa xwỳnhjaja amnhĩ nhĩpêx anẽ. à mẽ kot amnhĩ nhĩpêx anhỹr xwỳnhjaja koja mẽ Tĩrtũm nhõ krĩ hwỳr gjêx kêt nẽ. Ra ixte mẽ amã ja jarẽnh tã pa axte mẽ amã harẽ. Mẽ ate hã ano htỳx rãhã ho ri apa kaxyw. 22No mẽ kot amnhĩ nhĩpêx nywja axtem na.
Tĩrtũm Karõ hkôt mẽ kot amnhĩ nhĩpêx nyw o amnhĩ nhĩpêx xwỳnhjaja na htem axtem kãm axpẽn kĩnh nẽ.
Nẽ hkĩnh nẽ ri hamakêtkati nẽ àmnhĩx ri axpẽn kôt pa.
Nẽ gryk tokyx anhỹr hkêt nẽ. Ãm axpẽn to mex pix o ri axpẽn kôt pa.
Nẽ tãm axpẽn nhĩpêx.
Nẽ kot mẽmoj tã amnhĩ jarẽnh xà hkôt tanhmã mẽmoj to.
23Nẽ axpẽn mã kapẽr mã hprĩ ho ri axpẽn mã kapẽr.
Nẽ mẽmoj punuj piitã nê amnhĩ to htỳx o ri pa.
à na hte mẽ kot Tĩrtũm Karõ hkôt amnhĩ nhĩpêx o mẽ pa xwỳnhjaja Karõ nhỹ hã amnhĩ nhĩpêx nyw o amnhĩ nhĩpêx anhỹr o pa. Jao mããnẽn Mojes kapẽr kwỳm ri amnhĩ nhĩpêx hkêt nẽ. Jakamã koja mẽhõ mẽ pahte amnhĩ nhĩpêx nyw nê tanhmã mẽ pahkurê hto hkêt nẽ. 24Tã mẽ pahpê Jejus Kris kwỳ jakamã na pu mẽ pahte amnhĩ nhĩpêx tũmja nhĩpêx o te mẽ pahte amnhĩ nê hpĩr pyrà nẽ axte hkôt amnhĩ nhĩpêx kêt nẽ.
Tĩrtũm Karõ hkôt mẽ pahte amnhĩ nhĩpêx ã mẽ pamã karõ
Epes 4.23-24; Korosẽ 3.10
25Tã ra Tĩrtũm Karõ kot mẽ pahto hkra jakamã kwa kêr pu mẽ ãm kôt pix mã amnhĩ nhĩpêx nyw o amnhĩ nhĩpêx o ri papa. 26Kot puj mẽ ã amnhĩ nhĩpêx anẽ hãmri nẽ mẽmoj tã mẽ pahkwỳjê mã amnhĩ to jarkrar o ri papa hkêt nẽ. Kot puj mẽ ã amnhĩ nhĩpêx anẽ nhũm mẽ pakamã gryk nẽ. Jakamã kêr pu mẽ ã amnhĩ nhĩpêx anhỹr o ri papa hkêt nẽ.
Currently Selected:
Karatas 5: apn
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.