Romanos 1
1
Attho Pablopaꞌ kellkanet carta añekop ñeñth ameꞌñetsa anetso Romo
1Masheñneshachaꞌ ñamha noxhaneshachaꞌ ñeñthes allowenes yexhetsa anetso ñeñth añ paꞌsoꞌcheñ Roma ñeñthes Yomporpaꞌ awoꞌt nanak moererrsa, atthoña oꞌ waꞌñerres atthoch sapaꞌxhoꞌña oꞌch eꞌñe poktakma poeyochreshaꞌ perres. Na Pablon sekellkëneꞌña añ carta, ñeñthen nanak thorretsa Jesucristokop tharroꞌmar ñeñthekopña llesenserrenña Yompor, nach maꞌyoxhrerraya serrpareꞌtyeneꞌ añ kowen ñoñets ñeñth wetsa Yomporeshoth alloch poꞌñoxh yekeshperra.
2Añ kowen ñoñetspaꞌ ñeñthara ñoñtsor ñeñth amaꞌt awath Yomporpaꞌ eꞌñe eñotatwaneꞌth ñeñth aꞌmhtaꞌyesayeꞌth poꞌñoñ ñeñthchaꞌ ateth perrnay theꞌ añeñpo. Ñeñthoꞌmarña ñetpaꞌ kellkaꞌyeseteꞌth ñeñth ateth otaneteꞌth Parets. 3Ñamha añ kowen ñoñets alloch yekeshperra, ñeñthpaꞌ añ serrpareꞌten Jesucristo ñeñth Poechemer pen Yompor. Tharraña allempo acheñetos arr patsropaꞌ ñapaꞌ eꞌñe David poꞌmhrenñoth eñalleta, ñeñthara David ñeñth amhchaꞌtarethtatseꞌth awath. 4Tharraña Parets Poekamkëñothpaꞌ nanak awamenkathtacheꞌth añekop ñeñth kowenetyetsa Partsokop. Ñamha chemerrña allempo Pomporpaꞌ awoꞌt tantater poꞌrromñothpaꞌ allempoña eꞌñe eñotwarethta ñapaꞌ poꞌñoxh Yompor Poechemer ñeñthara Jesucristo ñeñth Yepartseshar yepen. 5Ñamha yameꞌñeñoth ñeñthara Jesucristo, Pomporña eꞌñe poemoereñotheypaꞌ awoꞌt apoey llesens, allochñapaꞌ yach ameꞌñatyenawet amaꞌt errapharen allowen anetsoꞌmar. Atthochña eꞌñe koshaꞌyeññañet Yompor Poechemer. 6Ateth ñerraꞌm sa ñeñthes yexhetsa Romo, sapaꞌxhoꞌña awoꞌt saꞌwaꞌñarethterra atthoch sokther Jesucristo.
7Theꞌpaꞌ eꞌñe newomhchaꞌteñothes sa, napaꞌ oꞌch notas: Yomporepaꞌchña sebensareꞌtampeneꞌ ñeñth nanak Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.
Attho Pablopaꞌ moeneñ oꞌch emoꞌtenanaꞌ romoꞌmarneshaꞌ
8Ñewa, eꞌñe ñanompaꞌ añchaꞌ notas, eꞌñe neyemteñoth Jesucristopaꞌ xhokma neparasyosoꞌteñ Yompor allowenakpas, tharroꞌmar ora allemeñ anetsoꞌmarpaꞌ xhokma serrpareꞌtyenet attho sapaꞌ awoꞌ eꞌñe kowen sameꞌñena. 9Yomporpaꞌ eꞌñe eñotenen, napaꞌ xhokma nemaꞌyochena sokop. Ñamha añ Yomporpaꞌ ñeñthña nanak nesherben, eꞌñe neyoxhrokmañen neserrpareꞌtateñoth poꞌñoñ, ñeñth ateth perrnay Jesucristo ñeñthara ñeñth Poechemer pen ña. 10Napaꞌ xhokma nenamoeñ Yompor atthoch amaꞌt esempopaꞌ oꞌch nabhchensaꞌ ñerraꞌm ñach moenats. 11Napaꞌ atarr nemneñ oꞌch nabhchensaꞌ, oꞌch neyxhatensaꞌ atthoch Parets Poekamkëñothpaꞌ allotheꞌ sesen womenktatsa ñokop. 12Ñewa, añ noten, eꞌñe yameꞌñeñoth parropaꞌ eꞌñe pokteꞌ oꞌch yeyxhatannaꞌta ñeñth kowentetsa Yomporekop atthoch yeyenpannena eꞌñe yameꞌñeñoth Yompor.
13Ñamha theꞌpaꞌ oꞌch masheñneshachaꞌ ñamha noxhaneshachaꞌ notas, amaꞌt awañmoꞌchotheñ nesechenañ oꞌch nabhchensaꞌ tharraña themeꞌttsenpaꞌ ama erroth nepeñe. Napaꞌ añekop nesechena ñamha atthoch seshopaꞌxhoꞌña oꞌtheꞌ nameꞌñateñaꞌ acheñeneshaꞌ ateth nephaꞌyena poꞌpoñ anetsoꞌmar. 14Tharroꞌmar ñeñth poktetsa nokoppaꞌ oꞌch neñotach allowen acheñeneshaꞌ añ kowen ñoñets atthoch yekeshperra, amaꞌt griegoneshaꞌ ñeñth nanak ayxhatarethtetsa amapaꞌ ñamha acheñeneshaꞌ ñeñth ama ayxhataretheyaye, amaꞌt ñamha acheñeneshaꞌ ñeñth nanak es eñotenet amapaꞌ ñamha ñeñth ama es eñotetso. 15Ñeñthoꞌmarña eꞌñe noksheñeshokmañen nemneñ oꞌch neserrpareꞌtatas samha añ kowen ñoñets alloch yekeshperra ñeñthes yexhetsa anetso Romo.
Eꞌñe añ yameꞌñeñoth ñeñth kowen ñoñets, ñeñthpaꞌ allochña Yomporpaꞌ aꞌkeshphaterrey
16Tharroꞌmar napaꞌ ama apenkaꞌpawoyeꞌ nenteno añ kowen ñoñets attho Jesucristo rroma yokop alloch yekeshperra, tharroꞌmar ñerraꞌm eseshaꞌ ameꞌñenaya añ kowen ñoñets, ñeñthpaꞌ ñeñthña Yompor poꞌwamenk alloch aꞌkeshphaterrey alloweney ñeñthey ameꞌñenaya ña, ñeñthey judioneshay eꞌñe yanom allothpaꞌ ñamha ñeñth ama judioneshayaye. 17Ñamha añ ñeñthara kowen ñoñetspaꞌ eñotateney, eꞌñe yeyemteñotha Jesucristopaꞌ Pomporñapaꞌ eꞌñech pokteꞌ enteney, allochñapaꞌ alloꞌnach yesen eꞌñe yemtenaya ña. Tharroꞌmar añpaꞌ ñeñthara anwareth awathotheñ eꞌñe Yompor poꞌñoño allowenakpay, ñeñth otets ateth: Ñeñthey ameꞌñenaya Yomporpaꞌ eꞌñech pokteꞌ entweney ñamha eꞌñe yeyemteñoth ñapaꞌ yañapaꞌ korretsayach, amaꞌt thayothen errponowañen.
Attho allowen acheñeneshaꞌ athpareꞌcheteꞌth Yompor
18Tharroꞌmar yapaꞌ yeñoteñ Yompor ñeñth poeꞌntañoꞌtsen eꞌñe poꞌyoroxhenñoꞌtsaꞌyena allowen acheñeneshaꞌ ñeñth ama pokteyeꞌ es peneto ñokop, ñeñth sosyaꞌtsañach eñotyenet. Ñamha eꞌñe ateth poephatseꞌteñothetpaꞌ ñeñthaña ama moenatenaweto oꞌch orrtanet Yompor poꞌkowenña ñeñth eꞌñe poꞌñoxh. 19Ñewa, amaꞌt sosyaꞌtsañach eñotyenetpaꞌ tharraña ñetpaꞌ eꞌñe eñotweñet ñamha ateth penaña Yompor, tharroꞌmar ñapaꞌ ñaña eñotatenawet eꞌñe poeyoxhreto ñeñth ateth penaña ña. 20Amaꞌt yeñoteñ Yomporpaꞌ ama entpawoyaye tharraña yenteññañ poeyexhkataroth poꞌpartsoña ñamha allothña yenteññañña poꞌwomenk atarr. Amaꞌt awathotheñ allempo eꞌñe errteꞌ yexhkateneꞌ pats, allotheñña yenteññañña poꞌñoxh poꞌpartsoteña ñeñthñapaꞌ errponowañen. Ñeñthoꞌmarña acheñeneshaꞌ ñeñth yexheneꞌ sosyaꞌtsañpaꞌ amatheꞌ errothenoth oteto amoꞌ eñoteñetoña ñeñth ateth penaña Yompor poꞌpartsoteña. 21Ñamha amaꞌt eñoteñetañ ñeñth ateth penaña Yomporpaꞌ tharraña ama mechaꞌnaꞌteñetoña Parets, ñamha ama koshateñeto ñeñth ora añekop. Atthoña oꞌwañchaꞌ kothapeꞌchenet ñeñth sherbets Partsokop. Ñeñthoꞌmarña poeyoxhretopaꞌ oꞌwañchaꞌ eñoteñet ñeñth kowentetsa Yomporekop; ateth ñerraꞌm poeyoxhretpaꞌ nanak aꞌchekmetamphsareth. 22Amaꞌt otenetañ atarroꞌ es eñotenet, tharraña poꞌñoxh ñetpaꞌ awoꞌt attha alloꞌna otatsñathetnenet. 23Oꞌwañchaꞌ kosheñet ñeñth poꞌñoxh Parets ñeñth ama arromñatheshayaye. Añachña eꞌñe koshenet ñeñth yexhkatyenet ñet. Tharraña ñetpaꞌ eꞌñe arromñathotha ateth es yexhkatyenet ateth ñerraꞌm acheñmaꞌth ñamha othmaꞌth, ñamha poꞌyallophmaꞌth ñamha es berrmaꞌth. Ñetñapaꞌ ñeñthach eꞌñe maꞌyochyenet ñeñthoꞌña eꞌñe poꞌyomporer penet.
Attho acheñeneshaꞌ alloꞌna senet moenatseꞌtyeseꞌ ñeñth nanak sosey enten Yompor
24-25Atthoña oꞌwañchaꞌ ameꞌñeñet ñeñth poꞌñoxh Parets, añachña ameꞌñenet ñeñth ama poꞌñoxhoyaye. Oꞌwañchaꞌ maꞌyocheñet ñeñth eꞌñe Yomporaꞌ, añachña maꞌyocheññañet ñeñth eꞌñe ña poeyexhkatwar. Ñamha oꞌwañchaꞌ sherbeñet ñeñth eꞌñe Yomporaꞌ, añachña sherbeññañet ñeñth eꞌñe ña poeyexhkatar. Tharraña Yomporepaꞌchña ñapoeth ayeꞌchoxhtatarethtatsa thayotheñ amaꞌt errponowañen. Ñeñthpaꞌ atthetepaꞌch. Tharraña attho aꞌypoꞌñeñet Yomporpaꞌ ñapaꞌxhoꞌña eꞌñe paꞌypoꞌñeñothanet ñamhapaꞌ awoꞌt moenatyesanet oꞌch alloꞌna senet moenatseꞌtyeset ñeñth nanak sosey enten Yompor. Ñeñth attho moenatseꞌtyenet attho oꞌch agapannenet, ñeñthothpaꞌ nanakchaꞌ apenkoxhen yexhenet.
26Ñeñthoꞌmarña Yompor eꞌñe paꞌypoꞌñeñothanetpaꞌ awoꞌt moenatanet oꞌch alloꞌna senet moenatseꞌtyestset ñeñth nanak apenkoxhen enten ña. Atthoña amaꞌt koyaneshaꞌpaꞌ oꞌwañchaꞌ agënan poerrollar attho ñeñth eꞌñe pokteꞌ ateth anaretheyeñ. Ñagattsetach moenannetset oꞌch agapannaꞌtyenet ñeñth eꞌñe parro pakmakmoet. Amaꞌt ñeñthpaꞌ ama attheyeꞌ anaretheye. 27Ñamha amaꞌt yakmapaꞌ atthekmach penet. Oꞌwañchaꞌ agënan poethapor attho ñeñth eꞌñe pokteꞌ ateth anaretheyeñ. Añachña atarr moenen oꞌch agënan pakma eꞌñe ñagattsa pakmakma, amaꞌt ñeñthpaꞌ ama attheyeꞌ anaretheye. Ñeñth ateth phannenet yakma parro yakmakmapaꞌ ñeñthpaꞌ nanak apenkoxhen enteñ Yompor. Ñañeñetach koñchatetset ñeñth ateth phatseꞌtyenet.
28Atthoña amaꞌt mamesha oꞌwañchaꞌ moeneñet oꞌch yerpaꞌpesyet Yompor. Ñeñthoꞌmarña Yomporñapaꞌ paꞌypoꞌñeñothanetpaꞌ awoꞌt moenatanet oꞌch kothapeꞌchatseꞌtyeset ñeñth ama pokteyeꞌ enteno ña. Añachña phatseꞌtyenet ñeñth ama aphapawoyaye. 29Añachña nenet poeyoxhreto ñeñth esokmañen ñeñth amaꞌt mameshapaꞌ ama pokteyaye ñeñthara paꞌnamen sosyaꞌtsañexhno. Ñeñthpaꞌ añexhno: agapanneñets ñeñth ama poerrollareyaye ñamha ñeñth ama poethaporeyaye, ñamha kothapeꞌchatseꞌtyeñets ñeñth ama kowenayaye, ñamha yeꞌchatseꞌtyeñets, ñamha yeꞌmoñeꞌtanneñothpaꞌ oꞌch erroth yephoñ poꞌpsheñeñ, ñamha yeyeꞌchapreteñothpaꞌ oꞌch yeꞌmoñeꞌch poꞌpsheñeñ, ñamha moetsannaꞌteñets, eñoseñeꞌcheñets, ñamha shekannaꞌteñets, ñamha atsrreꞌmoxhen entannaꞌtweñets, ñamha aꞌmethamphsareꞌtannaꞌteñets, 30ñamha sasareꞌtannaꞌteñets, amaꞌt Yomporpaꞌ ello eꞌmoñeꞌteñet, ñamha amaꞌt poꞌpsheñeñpaꞌ amach mechaꞌnaꞌteñeto amaꞌt mamesha, atthachña eꞌñe ñañeñapaꞌ kowen entetset, ellopaꞌ ommoꞌchenetchaꞌ. Añach eꞌnyenet ñeñth ama kowenayaye, atthothchaꞌña ama ameꞌñeñeto amaꞌt pomporet amaꞌt ñamha pachoret. 31Amach xhenaneto poeyoxhreto ñeñth kowentetsa Yomporekop, amach aꞌpoktateneto poꞌñoñ ñeñth ateth otenet. Amach es amorrentenayeꞌ enteneto amaꞌt mamesha, amach es aphretnenayeꞌ enteneto amaꞌt mamesha, ñamha amach es amoerenayeꞌ enteneto amaꞌt mamesha. 32Ñeñth phatseꞌtyetsa atethpaꞌ amaꞌt eñoteñetañ eꞌñe Yomporeshoth anarethetwa amaꞌt koñcheñets añekop ñeñth phatseꞌtyetsa atethpaꞌ tharraña ñetñapaꞌ ñeñtharach ateth phatseꞌtyesnenet. Amaꞌt pamoꞌtseshetpaꞌ ñerraꞌm eꞌñe atthekma phowenet ñametpaꞌ chemerrña allempopaꞌ ñeñthach erronayeꞌ koshapretannenet.
Currently Selected:
Romanos 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.