YouVersion Logo
Search Icon

El Apocalipsis 3

3
Attho Juanpaꞌ kellkan carta añekop ñeñth ameꞌñetsa anetso Sardiso
1Allempoña ñeñth neserrpareꞌtateneꞌ ñapaꞌ alla oterrnerr:
—Theꞌpaꞌ oꞌch pekellkërrerr carta añekop ñeñth kowampeneꞌ ñeñth ameꞌñetsa all anetso Sardis, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth eꞌñe chorratena Yompor Poekamkëñ kanxherr ñeñthara kanxherr ñeñth sherbhaꞌyets. Ñetpaꞌ poꞌpoñeꞌttsokma sherbenet. Ñamha ñeñthara Cristo ñeñth orreneꞌ kanxherr ranto. Ñapaꞌ theꞌpaꞌ ateth otenes: ‘Napaꞌ neñotwennas ora allpon ñeñth sephaꞌyen. Ñamha neñotwennas attho sa acheñeneshaꞌpaꞌ ateth entensetañ ñerraꞌmrratheꞌ eꞌñe kowen sokrrena Yomporekop. Tharraña ñeñthpaꞌ ama attheyeꞌ sepeno xhaña sottena ñerraꞌmrratheꞌ xho serromoen, amaña es sesherbenoña Yomporekop. 2Amaꞌt attho sameꞌñenañ mameꞌ tharraña ñeñthpaꞌ alloꞌna sen wañwanmats. Napaꞌ nentwenes ama setsotenoña ñeñth eꞌñe pokteꞌ enten Nompor. Theꞌpaꞌ oꞌch notas, eꞌñechña señota, oꞌch alla setanterra Yomporekop. 3Xhokmachña seyerpoeña ñeñth attho aserrpareꞌtatarethes awañmoꞌchotheñ. Amach sepsatsche añ ñoñets ñeñth sameꞌñataya. Ñeñthoꞌmarña theꞌpaꞌ añ poktetsa oꞌch alla sokthapeꞌcherr kowen Yomporekop. Ñerraꞌm ama attheyeꞌ sepeno napaꞌ machayothach nowerrnasa ateth ñerraꞌmrratheꞌ eñethpaꞌ amach señoteñe esempopaꞌ machayothach waponasa. 4Tharraña amaꞌt attheñpaꞌ all anetso Sardiso eꞌñe poesheñaꞌttsaña ñeñth ama yexhenaye sosyaꞌtsañ ñeñth ama pokteyeꞌ enteno Yompor. Ñetpaꞌ ateth atmaꞌntatarethtenet amaꞌt paꞌshtamoetpaꞌ ama aꞌsosyateñeto. Ñeñthoꞌmar ñetpaꞌ eꞌñe pokteꞌ nentenanet ñamha atthochña nemnaterranet oꞌch yechopeꞌcherr eꞌñe parro tharroꞌmar ñet ñeñth neshtamtatenanetpaꞌ ama aꞌsosyateñeto, eꞌñe kowenarer orrtenet eꞌñe wallamaꞌthareret. 5Ñeñth metanaꞌtweꞌ allowen paꞌnamen topateñets ñeñth ama nepoerramperrayo, ñetpaꞌ neshtamtaterranet shetamoets ñeñth atarr wallamaꞌth. Ñetpaꞌ amach neꞌsherraneto paꞌsoꞌcheñ all akellkarethtenet Yompor poꞌlibro atthochña ñetpaꞌ korretsetach. Ñetñapaꞌ nechmeꞌtaterranetchaꞌ ñeñth na Nompor ñamha allowen poꞌmhllañotheñnaneshar. 6Ñeñth eꞌmhñoteneꞌ añ ñoñets xhapanetepaꞌch poeyoxhreto ñeñth ateth neñotatenanet na Nekamkëñoth ora allowen ñeñth pameꞌñeñothet xhokma apxhaꞌyenet allemeñ anetsoꞌmar.’ ” Arrpaꞌ allowa ñeñth ateth ot sardisoꞌmarneshakop.
Attho Juanpaꞌ kellkan carta añekop ñeñth ameꞌñetsa anetso Filadelfio
7Ñeñth neserrpareꞌtateneꞌ ñapaꞌ alla oterrnerr:
—Theꞌpaꞌ oꞌch pekellkërrerr carta añekop ñeñth kowampeneꞌ ñeñth ameꞌñetsa all anetso Filadelfia, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth eꞌñe Parets ñeñth eꞌñe poꞌñoxh allowen es oten. Ñeñthara Cristo ñeñth allsensareth ñach amhchaꞌtarethterrtsa eꞌñe ateth amhchaꞌtarethteꞌth David. Ñatoꞌ oꞌch netmaꞌntacha oꞌch not ñapaꞌ echenan David poꞌllave. Amaꞌt erraꞌtsenchaꞌ oꞌch torampenanet atthoch xhapanet Yompor poꞌkowenña amaꞌt eseshapaꞌ amach errothenoth alla epatareꞌterraneto. Ñamha ñerraꞌm ñach yottamperreꞌ amaꞌt eseshapaꞌ amach errothenoth torampereto. 8Cristopaꞌ theꞌpaꞌ ateth otenes sa: ‘Napaꞌ eꞌñe neñotwennas ñeñth ateth kowen es sephaꞌyen. Amaꞌt ama tama awamenkatheso Yomporekop, tharraña amaꞌt koñeꞌtha sewamenk sepen xhokma sameꞌñennana neñoñ ñamha xhokma saꞌmethen attho sameꞌñenna ama saꞌnasotenno. Ñeñthoꞌmar napaꞌ oꞌch netoramphsonas allchaꞌ saꞌpothennan neñoñ, ñamha amaꞌt eseshapaꞌ amach errothenoth alla yottamperrnaso. 9Ñamha añña ñeñth otetseñ ñetpaꞌ judioneshetoꞌ —ñewa, ñetpaꞌ ama Yomporeyeꞌ poeyochreshaꞌ penaweto tharroꞌmar ñetpaꞌ aña poeyochreshaꞌ penawet oneñeth, ñetpaꞌ attha shekareꞌtenset. Tharraña ñetña theꞌpaꞌ oꞌch nameꞌñatanet allochñapaꞌ oꞌch xhapanet poeyoxhreto sapaꞌ ñeñthes atarr nemorrentena. Ñeñthoꞌmarña ñetpaꞌ oꞌch wapoet sesho oꞌch konkorposet alloꞌtsenes. 10Sapaꞌ eꞌñe kowen akopha setsoton allpon neñoñ, ama saꞌypoꞌñenno na, ñeñthoꞌmarña napaꞌxhoꞌña amach naꞌypoꞌñaso. Oꞌch nekwamperres tharrempowa allempoch moeroxhteñtsopoterra ñeñthchaꞌ topaterreꞌ ora allowen acheñeneshaꞌ ñeñth yexhaꞌyetsa añe patsro. 11Oꞌch eꞌñe mamerrerrpaꞌ oꞌch nowerrnasa. Ñeñth attho allpon sameꞌñena oꞌch eꞌñe señotwanem amach sekexhpatsche. Allochñapaꞌ amaꞌt eseshapaꞌ amach errothenoth poerratamphsaso ñeñth noꞌpatatensa ñeñthchaꞌ atarr sokshaterreꞌ. 12Ñeñth metanaꞌtweꞌ allowen paꞌnamen topateñtsoxhno ñeñth ama nepoerramperrayo ñetpaꞌ amatheꞌ errothenoth awaporeꞌtarethterreto alloth, ñetpaꞌ eꞌñe atthet ñerraꞌmrratheꞌ all orratenet pokoll ñeñth paꞌpakëll pen Nompor ñeñth eꞌñe womenk echarr aphareth. Amaꞌt eseshapaꞌ amatheꞌ errothenoth waporeꞌche. Ñamha eꞌñe ñesheto napaꞌ oꞌch nekellkoñ Nompor paꞌsoꞌcheñ, allothpaꞌ oꞌch nekellkoñ ñamha Nompor paꞌnetser eꞌñe allara ñesheto, ñeñthara paꞌnetser ñeñth sochetsa Jerusaléñ, ñeñthchaꞌ sowerrtsa entoth eꞌñe etserrareꞌ. Allothpaꞌ oꞌch nekellkaꞌ ñamha nesoꞌcheñ all eꞌñe ñesheto ñeñth eꞌñe etserrareꞌ nesoꞌcheñ. 13Ñeñth eꞌmhñoteneꞌ añ ñoñets xhapanetepaꞌch poeyoxhreto ñeñth ateth neñotatenanet na Nekamkëñoth ora allowen ñeñth pameꞌñeñothet apxhaꞌyenet allemeñ anetsoꞌmar.’ ” Arrpaꞌ allowa ñeñth ateth ot filadelfioꞌmarneshakop.
Attho Juanpaꞌ kellkan carta añekop ñeñth ameꞌñetsa anetso Laodiceo
14Ñeñth neserrpareꞌtateneꞌ ñapaꞌ alla oterrnerr:
—Theꞌpaꞌ oꞌch pekellkërrerr carta añekop ñeñth kowampeneꞌ ñeñth ameꞌñetsa all anetso Laodicea, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth ama poenesho poꞌñoñ. Ñeñth ateth oteney Pomporekop ñeñthpaꞌ atethchaꞌ perrnay, ñamha ñeñth allpon oten, ñeñthpaꞌ eꞌñe poꞌñoxh ateth, ñamha ñeñthara Cristo ñeñth ñanom eñall, allothña Pomporpaꞌ yexhkatyesan allowen ñeñth allpon eñall. 15-16Cristoña theꞌpaꞌ ateth otenes: ‘Napaꞌ eꞌñe neñotwennas ñeñth ora allpon ateth sephaꞌyen. Tharraña sapaꞌ sekhllañothetsetsa sameꞌñenna, ama eꞌñe womenkayeꞌ sameꞌñenno. Ñerraꞌm ama semno oꞌch sameꞌñaꞌna womenkpaꞌ amachña sameꞌñatsetno amaꞌt mamesha. Tharraña sapaꞌ sekhllañothetsetsa sameꞌñenna. Ñatoꞌ oꞌch netmaꞌntacha ateth. Sapaꞌ ama attheyayso ñerraꞌmrratheꞌ oñ ñeñth atarr soseꞌ, ñamha ama attheyayso ñerraꞌmrratheꞌ oñ ñeñth atarr atserrsasen. Sapaꞌ attha sepena ñerraꞌmrratheꞌ oñ ñeñth mamesha shorrsastetsa ñeñth nanak netsenaꞌten. Ñeñthoꞌmarña napaꞌ eꞌñe ateth nentenes ateth ñerraꞌmrratheꞌ oñ ñeñth xha ayaꞌpesatañtena. Ñerraꞌm yorrpaꞌ xhach yaꞌpesatey oꞌch yaꞌtatstera. Ñeñthoꞌmarña sapaꞌ eꞌñe ateth nentenes xhach nemneñ oꞌch newaporeꞌtamperres. 17Sapaꞌ amaꞌt soteneñ añoꞌ es sepallteno eꞌñoꞌ sekwen ora ñeñth allpon poktetsa sokop eꞌñe sa setarwasoth. Tharraña ñeñth sherbets sekamkëñekoppaꞌ ama secheñe amaꞌt koñeꞌtha. Napaꞌ attha nentenes ateth ñerraꞌmrratheꞌ ñeñth nanak atsenaꞌtareth, atarrchaꞌ amoeroxhtatarethtena ñeñth eꞌñe wokchañ ñamha aporoꞌyeth atthach moelleꞌmkën. 18Ñeñthoꞌmarña na theꞌpaꞌ oꞌch nokthapeꞌchaterres sa oꞌch notas sapaꞌ ñeñth sepalltena. Oꞌch senamoen nesho ñeñth poꞌñoxh nanak sherbets sekamkëñekop. Allochñapaꞌ atthoch sekwerr shonteꞌ esokmañen ñeñth eꞌñe poꞌñoxh sherbets. Ñeñth ama sherbetsopaꞌ oꞌch saꞌypoꞌñer. Ñatoꞌ oꞌch netmaꞌntacha attho allempo atserrtatenet oropaꞌ oꞌch nowanña aꞌyo ñeñth ama sherbetso allempoñapaꞌ oꞌch eꞌñe orochayamha ñeñth nanak sherbets. Ñeñth atarr sherbets ateth ñerraꞌm oro ñeñthchaꞌña seꞌnenña nesho. Elloña napaꞌ oꞌch netmaꞌntatasa atethchaꞌ sepha, oꞌch serañtha nesho shetamoets ñeñth atarr wallamaꞌth. Allochñapaꞌ ñeñthchaꞌ sechorrerra atthoch oꞌwañchaꞌ sepenka ñeñth attho semoelleꞌmkën. Atthoch serañthena ñamha këlloꞌyeñtsopar alloch separterr seklleꞌ allochñapaꞌ atthoch sekwerr oꞌch senterra eꞌñe kowen. 19Ñewa, allowen ñeñth poꞌñoxh atarr nemorrentenapaꞌ xhokmach eꞌñe kowen nokthapeꞌchaterranet ñerraꞌm esempo athpareꞌtennet. Ñamha errotheno allowen ñeñth nemorrentena oꞌch nekoñchach mameꞌ, tharraña ñeñthpaꞌ eꞌñe ñokpoeta allochñapaꞌ atthoch oꞌch alla kothapeꞌcherret kowen nokop, oꞌch alla ameꞌñerrnet womenk. 20Señochepaꞌch ñeñthchaꞌ ateth netmaꞌntaterrsa. Napaꞌ atethchaꞌ nepena ñerraꞌmrratheꞌ eseshaꞌ ñeñth xhokma xhoreꞌtets yetarroth. Ñerraꞌm eseshas seꞌmapoerrnan neñoñ ñamha ñerraꞌm setorampenen, nañapaꞌ oꞌch nebeꞌthos all, allñapaꞌ oꞌch yerrallmeꞌchen parro. 21Ñeñth metanaꞌtweꞌ allowen paꞌnamen topateñtsoxhno ñeñth ama nepoerramperraye, ñetñapaꞌ nemnatanetchaꞌ oꞌch amhchaꞌtarethtapreterrnet eꞌñe all nekonaño. Eꞌñech atthet ñerraꞌmrratheꞌ na, napaꞌ eꞌñe nemhtanaꞌtwa allowen paꞌnamen topateñtsoxhno. Ñeñthoꞌmarña napaꞌ naꞌmhchaꞌtarethtapreteña Nompor eꞌñe all poꞌkonaño. 22Ñeñth eꞌmhñoteneꞌ añ ñoñets xhapanetepaꞌch poeyoxhreto ñeñth ateth neñotatenanet na Nekamkëñoth ora allowen ñeñth pameꞌñeñothet apxhaꞌyenet allemeñ anetsoꞌmar.’ ” Arrpaꞌ allowa ñeñth ateth ot laodiceoꞌmarneshakop.

Currently Selected:

El Apocalipsis 3: ame

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy