El Apocalipsis 20
20
Atthoch xherr allempoch mellapoterra
1Allempoña oꞌ alla nenterrerr poꞌpsheñeñ mellañotheñ ñeñth sowaꞌnetsa entoth. Ñaña potothpaꞌ añ orren llave alloch toramphsan arroroth ñeñth atarr oꞌpononeth arrorothtena pats. Potothñapaꞌ orrenan ñamha cadena ñeñth atarr añekmoen cadena. 2Ñeñthña mellañotheñpaꞌ rremosan añyañ. Añyañpaꞌ ñeñthara shecheph ñeñth awathotheñ ñeñthara yoten oneñeth ñamha ñeñth otenet Satanás. Attho rremoeꞌpaꞌ allempoñapaꞌ wankëꞌ. Ñeñth attho ewankarethtapaꞌ eꞌñech errponañowen char ñeñth otenet mil char, attherach ewankarethtena. 3Allempo wankaꞌwepaꞌ oꞌ waporeꞌch oꞌpono arrorotho. Allña yottampes oꞌ noñ alloch eꞌñe echarr phampes. Allochñapaꞌ amach alla shekareꞌterranerro allowen paꞌnamen acheñeneshaꞌ arr patsro. Ñewa, ñerraꞌm oꞌch xhap mil charpaꞌ allempoñapaꞌ oꞌch alla aꞌrroyeret. Tharraña ñerraꞌm oꞌch alla aꞌrroyeretpaꞌ ñeñthpaꞌ mamekpach aꞌrroyarethterra.
4Allempoña oꞌ alla nenterrerr ñeñth anorrxhaꞌtyets poꞌkonañoꞌmar. Ñetñapaꞌ allsensarethtet atthoch ñetpaꞌ oꞌch amhchaꞌtarethetyenet. Ñamha napaꞌ oꞌ eꞌñe nentwerrñañ poekamkëñexhno allowen ñeñth apechaꞌtanatarethtatseꞌth eꞌñe poeserrpareꞌteñothet Yepartseshar Jesús ñeñth attho aꞌpothoñeteꞌth Yompor poꞌñoñ. Ñamha ñetpaꞌ ama moeneteꞌthe oꞌch ayatoꞌmaꞌtarethtet maꞌyarrmaꞌth poeyotsaparo amaꞌt paꞌkoꞌmetothetapaꞌ ama ayakoꞌmhtaꞌtarethteteꞌthe. Ñetpaꞌ ama maꞌyochyeteꞌthe maꞌyarrmaꞌth amaꞌt ayexhkatareth ñeñth tomaꞌntenaya ña ama eseshaꞌ maꞌyochayeꞌthe. Ñamha ñetpaꞌ ama moeneteꞌthe oꞌch ayatoꞌmaꞌtarethtet maꞌyarrmaꞌth poeyotsaparo amaꞌt paꞌkoꞌmetothetapaꞌ ama ayakoꞌmhtaꞌtarethteteꞌthe. Ñetña allpaꞌ korretseta all amhchaꞌtarethtapreteñet Cristo shonteꞌ char allpon ñeñth otenet mil char. 5Ñetñapaꞌ ñanmoetchaꞌ atantatarethterret. Tharraña poꞌpotantañexhno arromñathneshaꞌ ñetña allpaꞌ ama alloꞌtseneto tharroꞌmar ñetpaꞌ ama atantataretheyayeto tharrempowach allempoch xherr mil char. 6Atarr kosheñtsoꞌtsen allowen ñeñth eꞌñe poeyochreshaꞌ pen Parets tharroꞌmar ñetpaꞌ ñanmoetchaꞌ atantatarethterret. Tharroꞌmar ñetpaꞌ amach alla rromoerreteꞌthe poꞌpocheño ñeñthchaꞌ ateth rromoerr poꞌpotantañ ñeñthchaꞌ chenkërrtsa eꞌñe poktakma. Tharroꞌmar ñeñthchaꞌ tanterrtsa ñanompaꞌ ñetpaꞌ amach errothenoth oꞌpataneto poꞌpocheño rromoeñets ñeñthara chenkëñets. Ñetpaꞌ añchaꞌña sherbenet Yompor epoet Poechemer Cristo. Ñetpaꞌ Yompor poꞌkorneshar penawet, amhchaꞌtarethtapreteretchaꞌ nanak aton shonteꞌ char ñeñth mil char.
Attho Juanpaꞌ entan oneñeth oꞌ awaporeꞌtarethta all parraren tsoꞌ errapharen
7Allempoch metwa añ mil charpaꞌ allempochña aꞌrroyeret oneñeth all ayottamphsarethtena mil charowa. 8Ñañapaꞌ oꞌch awyes ora errapharen paꞌnamen anetsoꞌmar arr patsro allchaꞌ shekareꞌtyerran paꞌnamen acheñeneshaꞌ. Oꞌch shekareꞌterran Gog ñamha Magog atthoch aꞌyapaxhaterranet oꞌch kellaraterranet. Ñeñth ateth yenteññañ ontap poꞌmñer atethchaꞌ shonterran ñamha paꞌnamen acheñeneshaꞌ arr patsro, ñeñth ama eꞌñotwapawoyaye. 9Ateth nentanet ñetpaꞌ awanmoet mopñareroꞌmar oꞌch parratseꞌtet errapharen allchaꞌ orretyeset. Ñetpaꞌ arrenthach awanenet Yompor paꞌnetsroneth ñeñth atarr morrentena tharroꞌmar allpaꞌ alloꞌtsaꞌyen ñeñth poeyochreshaꞌ pen ña. Oꞌ eꞌñe arrotampeswosyet atthoch rremanatoñet Yompor poeyochreshaꞌ. Tharraña Yompor poeꞌntañothpaꞌ eꞌñe allempokma aꞌshoranet tsoꞌ atthoch eꞌñe aꞌpoyatatwanet. 10Allempoña oneñeth ñeñth shekareꞌtenawetpaꞌ oꞌ waporeꞌteret ñamha all parraren tsoꞌ errapharen ñeñth wortets shemasher. Alloꞌtsaꞌyen ñamha maꞌyarrmaꞌth epoet ñamha ñeñth aꞌmhteneꞌ poꞌñoñ. Allñapaꞌ allempotheñ aꞌkoñchatarethetwerret eꞌñe parrokma, yethomeꞌtets, tsapomeꞌtets amaꞌt awatha ñeñthpaꞌ amach awañañathterro amaꞌt errponaña.
Ñeñth attho allowen arromñathneshaꞌpaꞌ thomxherretchaꞌ Yompor poꞌkonaño allñapaꞌ allchaꞌ entyesarethterret errothentheꞌ ñeñth ateth phaꞌyeseteꞌth eꞌñe poesheñaꞌttset
11Allempoña oꞌ nenterrerr atarr añekmoen konañ ñeñth atarr wallamaꞌth ñamha ñeñth anets all. Ñaña eꞌñe poꞌpartsoteñoth aꞌchenkatwan añ pats ñamha enet, oꞌ eꞌñe chenkaꞌwerra poktakma. Ñokpoet ama eñalle allchaꞌ aꞌpoet amaꞌt eꞌñe koñeꞌtha. 12-13Nent ñamha allowen arromñathneshaꞌ all thomxhenet Yompor poꞌkonaño. Amaꞌt allowen arromñathneshaꞌ alloꞌtsaꞌyenet amaꞌt ñeñth atarr sherbhaꞌyestseꞌth amaꞌt ñamha ñeñth ama asherbhoyenayeꞌ enteteꞌthe. Amaꞌt allpon omarrñathexhno ñeñth omarrxhaꞌtyestseꞌth awathpaꞌ ñetña amaꞌt oñothpaꞌ oꞌ alla tantrraꞌtwerret. Amaꞌt allowen arromñathneshaꞌ amaꞌt oꞌ xhapoet all oꞌpatenanet rromoeñets, allothña oꞌ alla tantrraꞌtwerret allowenet. Ñeñthoꞌmar ñet theꞌpaꞌ eꞌñe Yompor poꞌkonaño thomxhaꞌtwenet allowenet. Allempoña allpaꞌ toreꞌtet shonteꞌ libro, ñeñthña librorpaꞌ all akellkaꞌwareth ñeñthchaꞌ yerpaterrawet ñeñth allpon ateth phatseꞌtyeseteꞌth eꞌñe poesheñaꞌttset. Allempoña Yomporpaꞌ all entan ñeñth libro all akellkareth ñeñth ama kowenayeꞌ es petso. Ñeñthoꞌmarña ñapaꞌ atthoña otteñeꞌcherranet oꞌch moeñanet koñcheñtso. Allothñapaꞌ toreꞌtet poꞌpoñ libro ñeñth libropaꞌ all akellkareth añ paꞌsoꞌchñexhno atthochña ñetpaꞌ korretsetach. 14-15Allowen ñeñth ama enteññañeto paꞌsoꞌcheñ libro all akellkareth añ paꞌsoꞌchñexhno ñeñth korretsetach, ñetñapaꞌ asaprrotarethtet oꞌpono all parraren tsoꞌ errapharen. Ñeñthpaꞌ atthochña rromoerreterr poꞌpocheño ñeñth poepocheñ rromoeñets ñeñth eꞌñe poktakma chenkëñets. Ñamha añ rromoeñets ñeñth oꞌpatenaya arromñathexhno ñeñthara paꞌnetser pen rromoeñets, ñeñthpaꞌxhoꞌña awaporeꞌtarethta oꞌpono all parraren tsoꞌ errapharen.
Currently Selected:
El Apocalipsis 20: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.