El Apocalipsis 10
10
Attho Juanpaꞌ entan poesheñarr mellañotheñ ñeñth orreneꞌ poꞌlibrotholl
1Allempoña napaꞌ oꞌ alla nenterrerr poꞌpsheñeñ mellañotheñ ñeñth atarr awamenkathtetsa. Ñañapaꞌ sowaꞌnena entoth, eꞌñe osoth sowampena. Poñothñapaꞌ añ arkaꞌtampesneneꞌ ayon. Paꞌklloyothñapaꞌ eꞌñe ateth poptena ñerraꞌmrratheꞌ atsneꞌ xhoyoꞌtetsa. Paꞌtak paꞌchepowen ora ateth orrtena ñerraꞌmrratheꞌ tsoꞌ wortets enoneth. 2Sowaꞌnenapaꞌ orraꞌnenan poꞌlibrotholl. Ñeñthña librothollpaꞌ eꞌñe kowen atorareth ñeñth rremoen pototh. Oꞌ xhap patsopaꞌ paꞌtakña poꞌkowenrothpaꞌ thomos oño, poꞌptekañña ñeñth poeꞌchkotherothpaꞌ thomos patso. 3Allempoña thomospaꞌ rranosa womenk. Poꞌñoññapaꞌ eꞌñe ateth eꞌmorrtosa ñerraꞌmrratheꞌ maꞌyarr thekoretsa. Attho rranosapaꞌ eꞌñe ateth eꞌmorrtena ñerraꞌmrratheꞌ thekoreꞌ anapoeneꞌ ñeñth kanxhrrocheꞌtats thekorena. 4Allempoña eꞌmorrta ñeñth kanxherr thekoreꞌ napaꞌ nemneñeñ oꞌch nekellkañ ñeñth ateth neꞌmh thekoreꞌ, tharraña na allempopaꞌ neꞌmoerrerr ñoñets all eꞌmorrtena ento. Ñeñthña ñoñetspaꞌ ateth otenen:
—Amach pekellkatsche ñeñth ateth peꞌmoeñ thekoreꞌ xhochña phaꞌnasocha.
5Allempoña añ mellañotheñ ñeñth thomosets oño ñamha patso, ñañapaꞌ echantosan pot enoneth poꞌkowenroth. 6Allña eñosospaꞌ eꞌñe womenk nosan poꞌñoñ Yompor paꞌsoꞌchño, ñeñthpaꞌ ateth otos:
—Yompor ñeñth ama arromñatheshayaye ñeñth yexhkateꞌ enet ñamha ora allpon ñeñth alloꞌtsaꞌyen poeꞌntaño, ñamha ñeñth yexhkateꞌ pats ñamha ora allpon ñeñth alloꞌtsaꞌyen poꞌpatsño, ñamha ñeñth yexhkateꞌ oñexhno ñamha ora allpon ñeñth alloꞌtsaꞌyen poeyexhkatareso, ñañapaꞌ entenen ñeñth ateth noten theꞌ ñeñthpaꞌ eꞌñech poꞌñoxh ateth perra. Theꞌpaꞌ amach alla yekwameꞌtereꞌthe atomatwanen. 7Ñerraꞌm esempoch poktorerrerr poꞌpsheñeñ mellañotheñ ñeñth poꞌkanxhrroñpaꞌ allempochña eꞌñe etsotwerra Yompor pokthaphña ñeñth ama eꞌñeyeꞌ eñotpawoyaye amaꞌt awathotheñ amaꞌt allempo ñanom eñotatyesaneꞌth ñeñthchaꞌ aꞌmhtaꞌyesayeꞌth poꞌñoñ ñeñthara ñeñth nanak thorraꞌyestseꞌth ñokop. Allowa ñeñth ateth eños mellañotheñ.
8Allempoña napaꞌ oꞌ alla neꞌmoerrerr ñoñets ñeñthara ñeñth ateth neꞌm ñorraꞌ ñeñth eꞌmorrtetsa poeꞌntañoth, alla oterrnerr:
—Theꞌpaꞌ oꞌch peponemhya mellañotheñ ñeñth thets oño ñamha patso oꞌch pechtosñañ pototh poꞌlibro ñeñth eꞌñe kowen atorareth.
9Nañapaꞌ awen alloꞌtsen mellañotheñ, nexhap ñeshopaꞌ notos:
—Theꞌpaꞌ oꞌch phapoen pelibrotholl.
Ñañapaꞌ ateth oten:
—Añkaꞌye peyore oꞌch perreꞌ. Penamothpaꞌ atarrchaꞌ nanak poetsarr peꞌmh ateth ñerraꞌm pets poꞌmoñ, tharraña ñerraꞌm oꞌch xhap phathopaꞌ atarrchaꞌ pesherr peꞌmh.
10Allempoña napaꞌ oꞌ nechtosñañ poꞌlibro potothpaꞌ oꞌ nerreꞌ. Allempo nerrwepaꞌ nenamothña atarr poetsarr neꞌmh ateth ñerraꞌm pets poꞌmoñ tharraña allempo xhap nathopaꞌ atarr pesherr neꞌmh. 11Allempoña napaꞌ oꞌ alla oterrneterr:
—Theꞌpaꞌ añ pokteꞌ oꞌch alla peserrpareꞌterrerr ñeñthchaꞌ ateth etsotaterr Yompor esempowañen. Añchaꞌ peserrpareꞌtyes ñeñthchaꞌ ateth perra shonteꞌ paꞌnamen acheñeneshaꞌ ñamha atethchaꞌ perra paꞌnamen anetsoꞌmarneshaꞌ ñamha atethchaꞌ perra paꞌnamen mereñtsorexhno ñeñth eñosyets poꞌpoñeꞌttsokma ñoñtso ñamha atethchaꞌ perra paꞌnamen amhchaꞌtarethexhno.
Currently Selected:
El Apocalipsis 10: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.