YouVersion Logo
Search Icon

San Lucas 9

9
Allempo Jesúspaꞌ llesensan poeyochreshaꞌ xharrasheña ñeñth poechetsa epsheña
(Mt. 10.5-15; Mr. 6.7-13)
1Allempo xhapaꞌmoen allempo Jesús agotaꞌmoenan poeyochreshaꞌ xharrasheña ñeñth poechetsa epsheña. Eꞌñe apxhaꞌwet ñeshopaꞌ ñañapaꞌ atarr awamenkath phaꞌyesanet, atthoña apanet ñamha llesens atthoch kaxhpatatyeret oneñeth acheñeneshaꞌ amaꞌt erraꞌtsena ñeñth atarr moeroxhtatyenawet. Ñamha awamenkath phanet atthoch aꞌkrratyeset acheñeneshaꞌ amaꞌt erraꞌtsena ñeñth osyenawet. 2Atthoña llesensanet atthoch awanemyeset paꞌnamen anetsoꞌmar serrpareꞌtyesnomoet Yompor poꞌkowenña attho atarr ayochreshathtena ña. Ñamha añekpaꞌnaña llesensenanet atthoch aꞌkrratyesoset acheñeneshaꞌ. 3Ñamha ateth otapanet:
—Amach es sanmatsto amaꞌt koñeꞌtha allchaꞌ sechopeñeꞌchyes —amaꞌt sekarra, amaꞌt sebolsa, amaꞌt ñeñthchaꞌ serraꞌyesnom amaꞌt sekhllayora amaꞌt eꞌñe epma seshtampaꞌ amach sanmatsche sechopeꞌchpayo. 4Alla oterraneterr:
—Amaꞌt errach pokollro sexhap allach sommosa allponmat esempowach awerrserr poꞌpoñ anetso. 5Ñerraꞌm erra anetsro ñeñth alloꞌmarneshaꞌña ama kowenayeꞌ agapasetopaꞌ oꞌch semhterrerr ñamha alloth. Ñerraꞌm allempo semhterrerrña ñamha alloth ñeñthña setkoꞌtsaꞌyen pañeꞌteꞌ patspaꞌ xhoch sepaꞌshetkaꞌtyesnomña setak. Atthochña alloꞌmarneshaꞌpaꞌ oꞌch señotatnomanet ñetpaꞌ amakaꞌye pokteyeꞌ entenanetoña Yompor.
6Eꞌñe ñeñtha otarethetwetpaꞌ ñetñapaꞌ allentha awanmoet oꞌch chopeñeꞌchyeset errakmañen anetsoꞌmar. Allñapaꞌ añ serrpareꞌtyesnomoet kowen ñoñets alloch yekeshperra. Ñamha all chopeñeꞌchyeset errakmañenpaꞌ allña aꞌkrratyesnomet ñeñth atsnaꞌtyets.
Allempo eꞌñe kowen es orrtatyes Jesús, Herodesñapaꞌ xha otapañ Juanañtheꞌ oꞌ tanterra ñeñth apatayeꞌth acheñ Yomporekop
(Mt. 14.1-12; Mr. 6.14-29)
7Amhchaꞌtarethña Herodespaꞌ ñañapaꞌ ateth eꞌmareꞌtenan Jesús ora ñeñth allpon ateth phaꞌyena. Ñañapaꞌ xha atarr llekëna tharroꞌmar patantaꞌtets acheñeneshaꞌpaꞌ ateth otyenet theꞌpaꞌ oꞌ orrterra Juanañ, oꞌ tanterra rromoth. (Herodespaꞌ añña atarr llekateneꞌ tharroꞌmar ñapaꞌ ña pechateꞌ Juan awaña.) Ñeñthoꞌmarña ñapaꞌ ñeñtha nen poeyoxhro attho acheñeneshaꞌ otenet awoꞌ tanterra Juan rromoth. 8Poꞌpotantaññapaꞌ ateth otyenet:
—Elíasoñkaꞌye oꞌ orrterra.
Poꞌpotantaññapaꞌ ñetpaꞌxhoꞌña ateth otyenet:
—Añpaꞌ ñeñthkaꞌye aꞌmhtayeꞌth Yompor poꞌñoñ awath, theꞌñapaꞌ oꞌ tanterra rromoth.
9Amhchaꞌtarethña Herodespaꞌ ateth ot:
—Napaꞌ neñotena nakaꞌye pechateꞌña Juan awaña. Eseshaꞌwañakaꞌyeña ñeñth orrtateneꞌ ñeñth amaꞌt awathapaꞌ ama yentare ñeñth ateth atarr neꞌmareꞌten.
Ñeñthoꞌmarña ñapaꞌ atarr moeneñ oꞌch entan ñeñth Jesúsotets ñeñth orrtatyeneꞌ ñeñth ama poentare acheñeneshaꞌ.
Allempo Jesúspaꞌ rratenan shonteꞌ acheñeneshaꞌ; ñeñthña acheñeneshaꞌpaꞌ alloꞌtsen amnaroch mil
(Mt. 14.13-21; Mr. 6.30-44; Jn. 6.1-14)
10Allempo waxherra Jesús poeyochreshaꞌ ñeñth llesensaꞌyes awaña. Ñetñapaꞌ oꞌ xhaxherret Jesúsesho, serrpareꞌtatyesweret Jesús allowen allpon ateth phaꞌyeset allemeñ anetsoꞌmar. Allempoña Jesúspaꞌ awanman poeyochreshaꞌ eꞌñe ñapthochayet, xhapoet all ama acheñempañoyaye all allameꞌtets anetso, ñeñth anetspaꞌ añ paꞌsoꞌcheñ Betsaida. 11Tharraña acheñeneshaꞌñapaꞌ allempo eꞌmareꞌchet oꞌ awanmoet all, ñetpaꞌxhoꞌña allentha awanmoet ñamet. Xhaxhaꞌtet Jesúsesho ñañapaꞌ eꞌñe kowen agapanet. Allñapaꞌ serrpareꞌtatyesapoerraneterr ateth penaña Yompor poꞌkowenña attho atarr ayochreshathtena ña. Ñamha allpaꞌ aꞌkrratyesapoerranerr ñeñth atsnaꞌtyets.
12Attheñapaꞌ oꞌ ellerren. Añña poeyochreshaꞌ xharrasheña ñeñth poechetsa epsheña ñetñapaꞌ oteñetaꞌ Jesús:
—Theꞌpaꞌ oꞌch pemoeñwer acheñeneshaꞌ awanemyerretepaꞌ anetsoꞌmar allampaño allchaꞌ mayeswerret allchaꞌ entyeswerret poerrar ñeñthchaꞌ rraꞌyeswerret. Tharroꞌmar theꞌpaꞌ arroꞌtseney all ama acheñempañoyaye.
13Tharraña Jesúsñapaꞌ otan poeyochreshaꞌ:
—Sachkaꞌye apaꞌyesawet ñeñthchaꞌ rret.
Ñetñapaꞌ ateth ochet:
—Ya arrpaꞌ amakaꞌye es yecheno amaꞌt koñeꞌtha. Yapaꞌ eꞌñe amnara pan yechen ñamha epatholl kak. Ñatoꞌ yapaꞌ oꞌch awey anetso allchaꞌ yerañthenaꞌ rreñets ñeñthchaꞌ yerrach allowen shonteꞌ acheñeneshaꞌ.
14Ñewa, alloꞌtsen shonteꞌ acheñeneshaꞌ amnarochtheꞌ mil yakmaneshaꞌ. Allempoña Jesúspaꞌ ateth otan poeyochreshaꞌ:
—Theꞌpaꞌ oꞌch soch acheñeneshaꞌ anorrxhaꞌtyesetepaꞌ eꞌñe ñopaꞌttsokmoet, eꞌñech amnarocheꞌttsokma xharrapaꞌtets anorrxhaꞌtyeset.
15Poeyochreshaꞌñapaꞌ atethxhoꞌ pet, anorrxhaꞌtatyeset acheñeneshaꞌ allowenet. 16Allempoña Jesúspaꞌ agapan ñeñth amnar pan ñamha epatholl kak, kowaꞌ enoneth parasyosoꞌtamphsan pan. Allempoñapaꞌ shotaꞌtan pan, shetseꞌtan ñamha kak. Apanatyesan poeyochreshaꞌ, ñetñapaꞌ epatyeset allowen acheñeneshaꞌ ñeñth anorrxhaꞌtyets all. 17Oꞌña epaꞌwet allempoña oꞌ rrallmeꞌchet allowenet, eꞌñe yetrraꞌtwawet. Oꞌña yetwawetpaꞌ xha aꞌpchatyeset ñeñthñapaꞌ aꞌyapaxheret. Ñeñthña aꞌyapaxherretpaꞌ xhepaꞌtchaꞌ chorrats xharraꞌ poechena epa kañther eꞌñe thamoꞌyareꞌ.
Attho Pedropaꞌ otan Jesús phapaꞌ phaña Yompor Poechemereph ñeñtheph Cristotosets
(Mt. 16.13-19; Mr. 8.27-29)
18Allempoña pamtharrpaꞌ alloꞌtsen Jesús all maꞌyochena eꞌñe ñapthochayet poeyochreshaꞌ epoet alloꞌtsen. Allñapaꞌ ateth otan poeyochreshaꞌ:
—¿Errothenaꞌt otyenenña allowen acheñeneshaꞌ napaꞌ eseshantheꞌ?
19Ñetñapaꞌ ateth otyeset:
—Patantarr acheñeneshaꞌpaꞌ atethkaꞌye otyenpet phapaꞌ Juanañphoꞌtheꞌ ñeñthephoꞌ apatañtatseꞌth Yomporekop. Poꞌpotantaññapaꞌ ateth otyenpet, phapaꞌ Elíasophoꞌtheꞌ. Poꞌpotantaññapaꞌ ateth otyenpet phapaꞌ ñeñthephoꞌ ñeñth aꞌmhtayeꞌth Yompor poꞌñoñ awath. Theꞌñapaꞌ awoꞌ alla petanterra perromñoth.
20Allempoñapaꞌ alla aꞌphthoꞌterraneterr:
—Sañapaꞌ ¿errothenaꞌt sotenenña sa?
Pedroñapaꞌ eñoratsapaꞌ ateth och:
—Phapaꞌ ñeñthephkaꞌye Parets Poechemereph ñeñtheph Cristotosets.
Attho Jesúspaꞌ eñotatan poeyochreshaꞌ ñapaꞌ amtsarethterrach
(Mt. 16.20-28; Mr. 8.30–9.1)
21Jesúsñapaꞌ alla oterraneterr:
—Amaꞌt poesheñarrotha amach eseshaꞌ sotaphsaꞌtatsto napaꞌ ñeñthen Yompor Poechemeren ñeñthen Cristotets. Eꞌñe poꞌñoxh notenes amach eseshaꞌ sotaphsaꞌtatsto.
22Elloñapaꞌ alla oterraneterr:
—Napaꞌ Ñeñthen Acheñetosets, ateth anareth nokop, nanakchaꞌ naꞌmoeroxhtatarethterra. Amach eseshaꞌ pokteyeꞌ nenterraye —amaꞌt ñeñth pomporneshaꞌ pen allowen judioneshaꞌ, amaꞌt ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar, amaꞌt ñamha ñeñth etsotayenayeñ ñoñets ñeñth ateth anareth judioneshakop. Amaꞌt ñetpaꞌ amach eseshayeꞌ neyemterraye. Atthachña napaꞌ moetsataterrnetchaꞌ. Tharraña pomaꞌpamtañopaꞌ oꞌch alla tantaterren Nompor.
23Elloñapaꞌ alla oterraneterr allowenet:
—Ñerraꞌm eseshaꞌ moeneneꞌ oꞌch kotherrnet na eꞌñe poꞌñoxh atthoch neyochreshaꞌ neperranet, añ poktetsa sewanmoetepaꞌña ñeñth ateth moenenet eꞌñe ñokpoeta. Atthochña ñetpaꞌ oꞌch eꞌñe tomaꞌnteret ñeñth chechneneꞌ poꞌkorsoch amaꞌt patheꞌtets yeth allchaꞌ moeroxhtet ñamet. Atthochña kotherrnet eꞌñe poktakma. 24Tharroꞌmar ñerraꞌm eseshaꞌ eꞌñe aña moenenet oꞌch korrena atomat atthoch eꞌñe koshenet arr patsro, ñetñapaꞌ xhach aꞌchenkatet ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch sowanmoet ñeñth ateth moenenet ñeñth eꞌñe ñokpoeta arr patsro atthochña ñetpaꞌ añach maꞌyoxhret ñeñth kowentetsa nokop, ñeñthña acheñerpaꞌ korretsach poksheñeshokmañen thayotheñ eꞌñe errponañowen. 25Amaꞌt errponenapharen esokmañen es yeyoratsetyes ora allpon ñeñth yentyen añe patsro, tharraña ñerraꞌm ñeñthach eꞌñe yaꞌchenkaterreꞌ yekamkëñowen ñeñthñapaꞌ amaꞌt koñeꞌthapaꞌ amach es sherberrye. 26Tharraña ñerraꞌm erraꞌtsenchaꞌ nepenkënaya na theꞌ neñoñpaꞌxhoꞌña xha apenkoxhen entennanet, napaꞌxhoꞌña nepenkaꞌwerranetchaꞌ esempoch nowerra. Poꞌñoxh napaꞌ Ñeñthen Acheñetosets nowerrach eꞌñe na nekowenñoth, ñeñthara Nompor poꞌkowenña epan ñamha poꞌmhllañotheñnaneshar ñeñth eꞌñe thorraꞌyetsa Partsokop. 27Poꞌñoxhkaꞌ theꞌpaꞌ oꞌch notas: Patantaꞌttsos ñeñthes arroꞌtsaꞌyenes theꞌña amaꞌt ama serromwenaꞌpaꞌ oꞌch senterrñañ Yompor poꞌkowenña attho atarr ayochreshathterra ña.
Allempo Jesúspaꞌ poꞌpoñetamphana poeyochreshaꞌ
(Mt. 17.1-8; Mr. 9.2-8)
28Allempo met allponmat ñatoꞌ poꞌpsokmatño Jesúspaꞌ awanman poeyochreshaꞌ; añ anem Pedro ñamha Juan ñamha Jacobo. Arr anmanet aspentho allchaꞌ maꞌyochenaꞌ Jesús. 29Allña maꞌyochosapaꞌ machayothepaꞌtchaꞌ poꞌpoñetamphsosanet. Paꞌklloyothpaꞌ xha poꞌpoñ orrtosanet. Paꞌshtamowen atarr wallamaꞌtho poptosa. 30-31Allñapaꞌ machayothepaꞌtchaꞌ orrtanet Moisés ñamha Elías. Ñetpaꞌxhoꞌña atarr kowen orretyenet. Allñapaꞌ serrpareꞌtoset epoet Jesús. Ñetpaꞌ añ serrpareꞌtenet attho oꞌ xhapmoch atthoch rroma Jesús oꞌch awerr poeꞌntaño. Ñetpaꞌ ateth otyenet, arrchaꞌ ateth peret Jerusaléño. 32Ñewa, Pedro ñamha ñeñth epoet alloꞌtsen, ñetñapaꞌ amaꞌt atarr moñeꞌtenetañpaꞌ alla eꞌñe achñeswerret, atthoña entoñet Jesús poꞌkowenña amaꞌt ñeñth parro thomxhen. 33Oꞌ maꞌnaterrmocha Moisés ñamha Elías atthoch saꞌneret Jesús. Pedroñapaꞌ allentha eñora, ateth otan Jesús:
—¡Atarrwakaꞌye Maestrochaꞌ kowenoꞌtseneytheꞌ arr! Amaꞌt pokteꞌ penteñe oꞌch yathomatonas maꞌppawa kërpachet, poepawarrpaꞌ phokopchaꞌ, poꞌppaweñpaꞌ Moisésokopchaꞌ, poꞌppaweñpaꞌ Elíasokopchaꞌ.
Pedropaꞌ poeyorñoth attha moeneꞌ otatseꞌt, ama eñoche errothenchaꞌ ot. 34Allempo eñorena Pedropaꞌ xha orrtosawet os xhepaꞌtchaꞌ aꞌpomamphsosanet. Attho aꞌpomamphsosanet ospaꞌ ñetñapaꞌ atarr nanak yorenet. 35Xha eꞌmorrtostsa ñoñets osoth; ñeñthña ñoñetspaꞌ Yompor otosawet; ñeñthpaꞌ ateth ot:
—Añmapaꞌ ñeñth no Nechemer ñeñth atarr nemoerena ñeñthchaꞌ eꞌñe kowen seꞌmhñoterr.
36Allempo oꞌwañ eꞌmorrta ñoñetspaꞌ oꞌ eꞌñe ñapthamerra Jesús. Poeyochreshaꞌña allempopaꞌ attha aꞌnasoteñet. Amaꞌt poesheñarrothetapaꞌ ama otwerreto ñeñth ateth oꞌ entwawet.
Attho Jesúspaꞌ aꞌkrraterran cheshachor ñeñth othaten oneñeth
(Mt. 17.14-21; Mr. 9.14-29)
37Tsapathña allempo waxhenet aspenthothpaꞌ allñapaꞌ shonteꞌ acheñeneshaꞌ ñeñth waxhaꞌttsa ñeñth pokterrawet. 38Alloꞌtsen poesheñarr yakma ñañapaꞌ ateth otosan Jesús:
—Maestro, napaꞌ atarr nemneñ oꞌch pentennanaꞌ nakñeꞌther. Napaꞌ eꞌñe ñeñthethollapa nepathrror. 39Ñapaꞌ ñerraꞌm esempo rromoeñ oneñethpaꞌ xhach rranareꞌta oꞌch othachpaꞌ oꞌch ataꞌtach patso xhach amtan paꞌpoꞌ. Atthoña atarr atserrphatseꞌtateñ. Ama moeno oꞌch aꞌrroyer. 40Napaꞌ oꞌ notwosnaphña peyochreshaꞌ oꞌch kaxhpatateret oneñeth tharraña ñetñapaꞌ ama erroth peto atthoch kaxhpatateret oneñeth ñeñth atarr moeroxhtateneꞌ.
41Jesúsñapaꞌ ateth ot:
—Sapaꞌ ñeñthes acheñres amaꞌt mameshapaꞌ ama ayemtenayeꞌ sentpenno, xhach poꞌpoñ sentwena seyoxhro nokop. Oꞌ allponmatwanen alloꞌtsenen arr patsro napaꞌ attha atarr naꞌwantennas, attha nekwenes ñatoꞌ atthothpaꞌ oꞌch sameꞌñerrna.
Allempoñapaꞌ ateth otan yakma ñeñth oteneꞌ oꞌch aꞌkrratoñ poechemer:
—Theꞌpaꞌ oꞌch phanmon pechemer arr.
42Allempo anemh Jesúseshopaꞌ oneñethñapaꞌ alla rromoerranerr cheshachor oꞌ alla othatererr alla ataꞌtatererr patso. Jesúsñapaꞌ ateth otapan oneñeth:
—Theꞌpaꞌ poꞌñoxh oꞌch notaph, pekaxhpaꞌnerñakaꞌyeña añ cheshachor.
Allempo aꞌkrrater Jesús oꞌ alla apoerrñañ pompor. 43Allowen acheñeneshaꞌpaꞌ attha kowanrrorteñet. Ñetpaꞌ eꞌñe eñoteñet Yompor poꞌpartsoña orrtetsa.
Arrpaꞌ attho Jesúspaꞌ eñotaterraneterr poepocheño ñapaꞌ xhokmach moetseret
(Mt. 17.22-23; Mr. 9.30-32)
Attha epayeꞌ kowanrrorteñet atarr kowen enteññañet poꞌpartsoña, tharraña Jesúsñapaꞌ alla yerpaterranerr poeyochreshaꞌ, ñeñthpaꞌ ateth otanet:
44—Theꞌpaꞌ seꞌmhñoten eꞌñe kowen, amach sepsatsterrnano neñoñ ñeñth ateth notenes theꞌ. Na Ñeñthen Acheñetosetspaꞌ pomataterrnetchaꞌ atthochña errothwanenchaꞌ perrnet.
45Ñeñthña ñoñetspaꞌ ñetñapaꞌ amaꞌt poesheñarrothetapaꞌ ama eshkayeꞌ eñotenayeꞌ enteñeto tharroꞌmar ama xhenaꞌ allempoch xhapanet poeyoxhreto. Ñetña poeyorñothetpaꞌ ama eseshayeꞌ aꞌphthoꞌtenaye estheꞌ otenanetña attho eñoranaꞌtenanet.
All eñotateney ñeñth acheñer eꞌñe poꞌñoxh atarr asherben enten Yompor
(Mt. 18.1-5; Mr. 9.33-37)
46Poꞌpocheñoña poeyochreshaꞌpaꞌ eꞌñe ñagattseta otannaꞌtyeset:
—Taꞌmkaꞌye erraꞌtsenotheytheꞌñakaꞌye ñeñthey atarr sherbets ñeñthey atarr amhchaꞌtarethoyen enteney acheñeneshaꞌ.
47Jesúsñapaꞌ eꞌñe eñotenanet ñeñth ateth kothapeꞌchatseꞌtyenet ñet poeyoxhreto attho eꞌñe kowen entyenet eꞌñe ñañeñeta. Ñañapaꞌ cheshatholla xhoreꞌtpaꞌ thomach eꞌñe ñesho, 48allempoñapaꞌ ateth otanet:
—Erraꞌtsenothes sa ñerraꞌm eꞌñe kowen sagëñ amaꞌt ñeñth ama asherbenayeꞌ enteneto ateth ñerraꞌm añ cheshatholl tharroꞌmar sapaꞌ na sameꞌñena, naꞌnaña eꞌñe kowen sagën. Elloña ñamha erraꞌtsenothes sa ñeñthes nagëneꞌ na, ama eꞌñe napthocheyeꞌ sagëno, añeꞌnaña sagënnan Nompor ñeñth nellsenseneꞌ. Tharroꞌmar ñerraꞌm erraꞌtsenchaꞌ pokteꞌ enteneꞌ oꞌch yenpoenan amaꞌt ñeñth ama esoyeꞌ enteneto, ñetñapaꞌ atarrchaꞌ poꞌñoxh asherben entenanet Yompor.
Attho eñotateney ñeñth ama xhoyeꞌ yepatareꞌtenaye ñeñthña poꞌñoxhpaꞌ eꞌñe parrokma yeyenpannena
(Mr. 9.38-40)
49Allempoña poeyochreshaꞌ ñeñth Juanpaꞌ ateth otan Jesús:
—Maestro, ya awañapaꞌ ateth yeñch poesheñarr yakma ñeñth kaxhpatateneꞌ oneñeth acheñ. Eꞌñe poexhoreꞌteñotheph pha pesoꞌchñopaꞌ oneñethpaꞌ kaxhpaꞌnerran acheñ. Yañapaꞌ ama pokteyeꞌ yeñche tharroꞌmar ñapaꞌ ama parroyeꞌ yeyemteno. Ñeñthoꞌmarña yapaꞌ yoch:
—Amach ateth pephatsto.
50Jesúsñapaꞌ ateth otanet:
—Amachkaꞌye sepatareꞌtatsche tharroꞌmar ñerraꞌm ama xho epatareꞌtenye yamha ñeñthña poꞌñoxhpaꞌ eꞌñekaꞌye parrokma yeyenpannena.
Allempo Jesúspaꞌ kothapeꞌchaterran kowen poeyochreshaꞌ epsheña, ñeñthpaꞌ Jacobo ñamha Juan
51Xhapmoch allempoch oꞌch alla awerr Jesús poeꞌntañopaꞌ ñañapaꞌ atarr sechena oꞌch awerr Jerusaléño. Ñeñthoꞌmarña moeñan poeyochreshaꞌ ñeñthchaꞌ otrraꞌtatsa 52oꞌch awet samarioꞌmarneshaꞌ paꞌnetsro oꞌch eꞌnoset moets allchaꞌ xhap ñamha Jesús allchaꞌ amesnom epoet poeyochreshaꞌ. 53Tharraña samarioꞌmarneshaꞌñapaꞌ ama moeneto oꞌch agaparethtet all paꞌnetsreto, tharroꞌmar ñetpaꞌ eñoteñet arr sechenet oꞌch awet Jerusaléño.#9.53 Ñewa, yapaꞌ yeñoteñ samarioꞌmarneshaꞌpaꞌ ama moeno oꞌch amoꞌtstana jerusaléñoꞌmarneshaꞌ ñeñthara judioneshaꞌ. 54Ñeñthoꞌmarña Jacobo ñamha Juan ñetñapaꞌ ateth ochet Jesús:
—Partseshachaꞌ ¿amaꞌt pokteꞌ penteñe yapaꞌ oꞌch yenam wapoepaꞌ tsoꞌ entoth? allochñapaꞌ ñeñthchaꞌ aꞌpoyatatwerrawet ñeñthchaꞌ eꞌñe aꞌchenkatwerrawet ñeñth ateth peꞌth Elías ñeñth aꞌmhtayeꞌth Yompor poꞌñoñ awath.
55Jesúsñapaꞌ attha kowanetpaꞌ ateth otanet:
—Ñeñth ateth sokthapeꞌchatseꞌtyenpaꞌ amaꞌt mameshapaꞌ ama pokteyaye. Amaꞌt señoteñeña Yomporpaꞌ ama attheyeꞌ kothapeꞌchatenyeña Poekamkëñoth. Ñeñth semnen sapaꞌ poꞌpoña kothaphñats. 56Na Ñeñthen eꞌñe Acheñetosetspaꞌ amakaꞌyeña añekop nowapo oꞌch naꞌchenkatos acheñeneshaꞌ. Napaꞌ añekopkaꞌyeña nowapa oꞌch naꞌkeshphatos allowen acheñeneshaꞌ.
Allempoñapaꞌ oꞌ metaxhaꞌtet allothpaꞌ awanmoet poꞌpoñ anetso.
Allempo Jesúspaꞌ yexhatan ñeñth moeneneꞌ oꞌch kother
(Mt. 8.19-22)
57Poꞌpocheñoñapaꞌ allempo oñemyenet thoñoꞌmar allñapaꞌ poktanet poesheñarr yakmapaꞌ ñañapaꞌ ateth otapan Jesús:
—Na theꞌpaꞌ nemneñ oꞌch nokthareꞌtyeseph amaꞌt errowanenchaꞌ pechopeñeꞌchyes.
58Jesúsñapaꞌ ateth och:
—Theꞌpaꞌ napaꞌ peñotenchaꞌ amaꞌt nepakllapaꞌ ama necheñe all neyxhenañ. Roꞌkëphpaꞌ xhokma eñall paꞌpon allekma yexhena.#9.58 Ñewa, Jesús añ tomaꞌntacha zorra ñeñth berrotets all paꞌnyo. Othexhnopaꞌxhoꞌña xhokma eñall paꞌmaꞌ allekma yexhaꞌyenet. Tharraña naña Ñeñthen Acheñetosetspaꞌ ama eñalle ñeñth eꞌñe nepakëll nepen allchaꞌ nephanena.
59Poꞌpocheñoña Jesúspaꞌ ateth oterranerr poꞌpsheñeñ acheñ:
—Theꞌpaꞌ oꞌch phokthaꞌn atthoch poꞌñoxh neyochreshaꞌ neperreph.
Tharraña ñeñthña acheñerpaꞌ ateth otan Jesús:
—Theꞌpaꞌ arrchaꞌña ñanom pemnaterren oꞌch awerren apoesho, oꞌchña nepampaꞌweraꞌ apañpaꞌ allempochña nowerrapaꞌ oꞌch nokthaph.
60Tharraña Jesúspaꞌ ateth och:
—Acheñeneshaꞌ ñeñth ama yerpaꞌpenaye Yompor, ñetñapaꞌ pampannaꞌtetepaꞌ parro arromñathekmoet. Tharraña phokoppaꞌ ñeñtheph oꞌ peyerpoera Yompor añ poktetsa oꞌch awyeseph serrpareꞌtyeseꞌ Yompor poꞌkowenña ñeñth attho atarr ayochreshathtena ña.
61Poꞌpocheño allempo serrpareꞌten Jesús epoet ñeñth ameꞌñenaya, ñeñthña acheñerpaꞌ ateth otan Jesús:
—Napaꞌ Ayochreshathe poꞌñoxhchaꞌkaꞌye nokthaph. Theꞌpaꞌ atoꞌt naswerraꞌ nepakllo atthoch nesoꞌteraꞌ namoꞌtseshaꞌ; allempochña alla nowerrerrpaꞌ oꞌch nokthaph.
62Jesúsñapaꞌ ateth och:
—Ñeñth ama eꞌñeyeꞌ maꞌyoxhrenaye atthoch thorrenet eꞌñe kowen Yomporekop, ñeñthña acheñerpaꞌ amach eꞌñe kowenayeꞌ sherbeno atthoch eꞌñe epatwan Yompor poꞌkowenña ñeñth attho atarr ayochreshathtena ña. Ñeñth acheñerpaꞌ atethchaꞌ netmaꞌntacha: Ñerraꞌm eseshaꞌ orreneꞌ etamapets atthoch etaman pats eꞌñe kowen paxharr paꞌmro, ñerraꞌm paꞌcheꞌñontha kowaꞌnom amaꞌt mameshapaꞌ amach etsotanoña etamapets atthoch eꞌñe paxharr etaman pats allchaꞌ nareꞌtatseꞌt paꞌmro.

Currently Selected:

San Lucas 9: ame

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy