San Juan 10
10
Attho Jesúspaꞌ añ tomaꞌntatanet all yottampeñet carnero
1Allempoña Jesúspaꞌ alla yexhaterraneterr, ñeñthpaꞌ ateth tomaꞌntaterraneterr:
—Poꞌñoxhkaꞌ notenes: All yottampeñet carnero ñerraꞌm eseshaꞌ ama beꞌthetso allothekma beꞌthenet ñerraꞌm poꞌpshemhtañotha aꞌtenet, ñeñthña poꞌñoxhpaꞌ eñethkaꞌye ñeñth aprratamphsañtetsa. 2Tharraña ñerraꞌm eseshaꞌ beꞌthets eꞌñe allothekma beꞌthenet ñeñthña poꞌñoxhpaꞌ ñeñth kowampeneꞌ carnero. 3Ñeñth kowampeneꞌ yetarrpaꞌ ñerraꞌm esempo waxherra ñeñth kowampeneꞌ carnero ñapaꞌ xhokmach toramphsapoerranet. Carneropaꞌ eꞌñe eñoteññañet pamoꞌmteꞌ poꞌñoñ. Ñañapaꞌ oꞌch xhoreꞌtyesan poꞌcarneror paꞌsoꞌchñopaꞌ oꞌch xhaꞌnmaxhaꞌtatan poꞌcarneror. 4Allempoña xhaꞌnmatwe allowen aꞌyothpaꞌ ñañapaꞌ oꞌch ota. Poꞌcarnerorñapaꞌ allenthach kothaꞌwanemh chentaꞌ. Ñetñapaꞌ eꞌñe chemeꞌteññañet pamoꞌmteꞌ poꞌñoñ. 5Tharraña awapñapaꞌ ama kotheñe, xhach matampesya tharroꞌmar ama eñotenano awapña poꞌñoñ.
6Ñeñthpaꞌ ateth oterranerr fariseoneshaꞌ tomaꞌnteñtso tharraña ñetñapaꞌ ama eñotoñeto ñeñth otenanet.
Attho Jesúspaꞌ añ tomaꞌntena ñeñth eꞌñe kowen kowampeneꞌ poꞌcarneror
7Allothñapaꞌ alla oterraneterr Jesús:
—Poꞌñoxhkaꞌ notenes: Napaꞌ na yetarrotets allothchaꞌ beꞌthen carnero. 8Allowen ashkañneshaꞌ ñeñth wapyestseꞌth allempo ama nowenaꞌ na, ñetpaꞌ eñethareret ñeñthet aprratamphsañtetsa, tharraña ñetpaꞌ ama eꞌmhñotenanetoña carnero. 9Napaꞌ na yetarrotets. Ñerraꞌm eseshaꞌch beꞌthets nesho ñeñthpaꞌ keshperrach, beꞌtherretchaꞌ ñamha xhaꞌnerretchaꞌ enterretchaꞌ eꞌñe kowen poerrar.
Ñewa, ñeñthpaꞌ añ otenanet: Ñerraꞌm eseshaꞌch ameꞌñaya ña ñetñapaꞌ keshperretchaꞌ. Ñachña kowamperrawet eꞌñe kowen amach es pallterreto.
10Jesúsñapaꞌ alla oterraneterr:
—Eñethpaꞌ amakaꞌye wenoña eꞌñe attha, añekopña wena oꞌch etyes, oꞌch es moetsa, oꞌch es aꞌchenkatwa. Tharraña napaꞌ añekopña nowapa atthochña sapaꞌ korretsasach soksheñeshokmañen eꞌñe thayotheñ errponañowen. 11Napaꞌ na ñeñthen kowen kowampeneꞌ carnero. Ñeñth eꞌñe kowen kowampeneꞌ carnero ñapaꞌ eꞌñe ñañeña aꞌrroyerrtsa oꞌch rroma poꞌcarnerorekop. 12Tharraña poꞌpsheñeñ ñeñth atsaꞌtarethtatsa atthoch kowampenan carnero ñeñthpaꞌ ama pamoꞌmtayeyaye; ñañapaꞌ ñerraꞌm entapan maꞌyarrpaꞌ xhach mata oꞌch saꞌnmanña carnero. Maꞌyarrñapaꞌ oꞌch rromaꞌyesosan carnero, patantarrña carneropaꞌ oꞌch attha aꞌparratseꞌtach. 13Ñeñth attha atsaꞌtarethtetsapaꞌ poꞌñoxhpaꞌ ama llekaꞌpenanoña carnero amaꞌt mamesha. Ñeñthoꞌmarña xhach saꞌnmanña carnero.
14‘Napaꞌ na ñeñthen kowen kowampeneꞌ carnero. Napaꞌ eꞌñe nechmeꞌteñ ñeñth necarneror. Ñeñthña nopaꞌ eꞌñe chemeꞌtenen namha. 15Ateth pena Apa eꞌñe eñotenen, nañapaꞌ eꞌñe neñoteñ namha Apa. Napaꞌ eꞌñe nañeña oꞌch naꞌrroyerra atthoch nerroma necarnerorekop. 16Eñall poꞌpoñexhño ñeñthchaꞌ necarneror neperr, ñetpaꞌ ama parrokmateneto arr alloꞌtsen ñeñth necarneror nepen theꞌ. Añ poktetsa oꞌch nerranetaꞌ atthoch eꞌmhñoterrnanet neñoñ, allochñapaꞌ oꞌch eꞌñe parrokmaterret. Poesheñarrana ñeñthenchaꞌ kowamperrawet.
17‘Apapaꞌ ello atarr morrentenna tharroꞌmar napaꞌ naꞌrroyena nañeña oꞌch nerroma acheñeneshakop, elloñapaꞌ oꞌch alla netanterra. 18Amaꞌt eseshapaꞌ amach poerratampesnoña nokrreña, napaꞌ na ñeñthen aꞌrroyetsa eꞌñe nañeña. Napaꞌ anarethen atthoch naꞌrroya oꞌch nerroma; anarethen ñamha atthoch ellopaꞌ oꞌch alla netanterra. Ñeñthpaꞌ Apaña noteneꞌ atethchaꞌ nepha. Arrpaꞌ allowa ateth tomaꞌntatenanet allowen ñeñthchaꞌ ameꞌñerraya ñeñthña poꞌcarneror pen ñeñthchaꞌ atarr kowen kowampen.
19Ñeñth attho serrpareꞌtatenanet Jesús, allña judioneshaꞌpaꞌ ellopaꞌtetstatenet pokthaphña Jesúsokop. 20Shonteꞌ acheñeneshaꞌ ñeñth ateth otyesets:
—Añmapaꞌ xhakaꞌye chorreña oneñeth, xhakaꞌye mospoena. Esoꞌmareꞌtña seꞌmhñoteñ.
21Poꞌpotantañexhnoñapaꞌ ñetpaꞌ ateth otyenet:
Ñerraꞌm xho chorreña oneñethpaꞌ amatheꞌ errothenoth eñosoña ateth eꞌñe kowen. Oneñethpaꞌ amatheꞌ errothenoth kowaterranoña aporoꞌyeth.
Allempo judioneshaꞌpaꞌ achmhareꞌteñet Jesús
22Allempoñapaꞌ xherrerr allempo alla kosherrerr judioneshaꞌ Jerusaléño allempoch yerpoerret ñeñth attho neteꞌth awath Parets paꞌpakëll ñokop. Allempo alla kosherreterrpaꞌ allempopaꞌ wapo. 23Jesúsñapaꞌ alla chopeñen Parets paꞌpakllo all oteñet Salomón poechaꞌpetaro. 24Allñapaꞌ arrotampesya judioneshaꞌpaꞌ ateth ochet:
—Esempowachñakaꞌye peꞌnwaña ñeñth attho pemoññeꞌtatenya. Ñerraꞌm poꞌñoxhtheꞌ pha Cristotetspaꞌ photeyñakaꞌye eꞌñe poꞌñoxh.
25Jesúsñapaꞌ ateth otanet:
—Amaꞌt notatstas sapaꞌ amachkaꞌ sameꞌñaꞌno. Napaꞌ eꞌñe neyemteñoth Apa ateth es nephaꞌyen. Ñeñth norrtatyenpaꞌ ñeñthchaꞌña señotateꞌ napaꞌ ñeñthen Cristotets. 26Tharraña sapaꞌ ama sameꞌñenno tharroꞌmar sapaꞌ ama necarneroreyayso ñeñth ateth oꞌ notwas. 27Ñeñth poꞌñoxh necarnerorpaꞌ eꞌmhñotennanet neñoñ, nañapaꞌ neñotenanet. Ñetñapaꞌ kothennet. 28Nañapaꞌ napoerranetchaꞌ atthochña ñetpaꞌ korretsetach thayotheñ errponañowen, ñetñapaꞌ amaꞌt awathapaꞌ amach chenkërreto. Amaꞌt eseshapaꞌ amach poerraterrnetoña eꞌñe na nototh. 29Nomporpaꞌ ña napoeneꞌña ñeñth nameꞌñenaya. Ñapaꞌ atarr awamenkatheshaꞌ. Ña poꞌwamenkpaꞌ ama eseshayeꞌ metanenaye. Amaꞌt eseshapaꞌ amatheꞌ errothenoth poerratamphsetoña Nompor eꞌñe ña pototh. 30Napaꞌ eꞌñe parro atthekman epan ña.
31Ñeñthoꞌmarña allempo judioneshaꞌ ñetpaꞌ chetet mapoeꞌ alloꞌch rrolleꞌchet. 32Jesúsñapaꞌ ateth oterraneterr:
—Shonteꞌ koxhneshaꞌ norrtatyesonas Nompor poꞌwamenkoth. ¿Erraꞌtsenotheꞌtña añ ñeñth eꞌñe koxhnesharoth sapaꞌ semneñ oꞌch sarrollaꞌn?
33Judioneshaꞌñapaꞌ ateth otereterr:
—Ama phorrtateñotheyeꞌ koxhneshaꞌ yemneñe oꞌch yarrolleꞌtaph. Yapaꞌ añekopña yemneñ oꞌch yarrolleꞌtaph attho phapaꞌ atarr phachmhareꞌteñ Parets. Phapaꞌ acheñothakaꞌye pemneñ oꞌch pepartsokoptarta.
34Jesúsñapaꞌ alla oterraneterr:
—Ñoñets ñeñth ateth anareth awathotheñ sokop allpaꞌ atethkaꞌye anwareth añekop ñeñth eꞌñe ñenmath aꞌpotheꞌ Yompor poꞌñoñ, ñeñthpaꞌ ateth otaneteꞌth Yompor: “Sapaꞌ atethchaꞌ entenes acheñeneshaꞌ ñerraꞌmrratheꞌ yompores.” 35Yompor poꞌñoñ ñeñth anwareth awathotheñ ama poenesho. Ateth otaneteꞌth ñetpaꞌ yomporoꞌch entenanet acheñeneshaꞌ, 36naña ñeñthen oꞌ nerren Yompor ñeñthen oꞌ moeñerren arr patsro, sapaꞌ achmharñathach sepenen tharroꞌmarothña napaꞌ noten Yompor Poechemeren. 37Ñerraꞌm amatheꞌ añeyeꞌ norrtateno Yompor poꞌpartsoña ñeñthepñapaꞌ amach sameꞌñatsetno. 38Tharraña attho poꞌñoxh norrtateññañ poꞌpartsoña amaꞌt ñeñthapaꞌ sameꞌñya, amaꞌt napaꞌ ama ameꞌñoyen sentenno. Atthochña poꞌñoxh xhaponasa seyoxhro attho Apapaꞌ eꞌñe parrokmatenna, napaꞌxhoꞌña neparrokmaten epan Apa.
39Ellopaꞌ moeneñetañ oꞌch rromoet tharraña ñet allempopaꞌ xha aꞌkeshphachet.
40Allempoña Jesúspaꞌ awerr yomhtaꞌn Jordanaso all eꞌñe ñenmath apatyeseꞌth Juan Yomporekop. Allñapaꞌ alla aꞌpa. 41Shonteꞌ waxhaꞌtyestsa ñeshopaꞌ ñetñapaꞌ ateth otyesoset:
—Juanpaꞌ amaꞌt koñeꞌtha ama orrtatano partsoteñets, tharraña allowen allpon otyesyeꞌth Juan añekop ñeñthchaꞌ Cristoterrets ñeñthña theꞌpaꞌ eꞌñe poꞌñoxh ateth pena.
42Allñapaꞌ shonteꞌ acheñeneshaꞌ ñeñth ameꞌñaya Jesús.
Currently Selected:
San Juan 10: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.