Efesios 1
1
Attho Pablopaꞌ kellkan carta añekop ñeñth ameꞌñetsa anetso Efeso
1Masheñneshachaꞌ ñamha noxhaneshachaꞌ ñeñthes allowenes poeyochreshaꞌ oꞌ perres Parets ñeñthes ameꞌñenaya Cristo Jesús all anetso Efeso. Na Pablon sekellkëneꞌña añ carta ñeñthen Jesucristo poellsensaren tharroꞌmar ñeñthpaꞌ ateth moenen Yompor. 2Theꞌpaꞌ eꞌñe newomhchaꞌteñothes sa, napaꞌ oꞌch notas: Yomporepaꞌchña sebensareꞌtampeneꞌ ñeñth nanak Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.
Attho Yomporpaꞌ eꞌñe paꞌnateñothey xhokma apoeney ñeñth atarr kowen sherbets yekamkëñekop
3Theꞌpaꞌ ayeꞌchoxhtatpawepaꞌch Yompor ñeñth Pompor pen Yepartseshar Jesucristo. Eꞌñe yeparrokmateñoth epay Cristo, Pomporñapaꞌ eꞌñe paꞌnateñothey xhokma kothapeꞌchateney ora allpon ñeñth esokmañen koxhneshaꞌtetsa all poeꞌntaño ñeñth atarr sherbets yekamkëñekop. 4Ateth awath paꞌmothrotheñ allempo ama ayexhkatarethtenaꞌ añe patserpaꞌ Yomporñapaꞌ allempotheñña akramperrey parro epay Poechemer Cristo atthoch yapaꞌ aꞌparrokmataterreychaꞌ epay Poechemer. Tharroꞌmar añekop akramperrey Poechemereshoth allochña yapaꞌ añach eꞌñe yemaꞌyoxhrena ñeñth kowentetsa Partsokop. Allochñapaꞌ atthochña eꞌñe pokteꞌ entweney Yompor, amach eñalle atthoch otteñeꞌcherrey amaꞌt eꞌñe mamesha. 5Ñapaꞌ atarr morrentenya; eꞌñe poemorrenteñotheypaꞌ oꞌ eꞌñe aꞌpoktatonay yokop amaꞌt awathotheñ. Ñeñthpaꞌ atthochña eꞌñe poechemer perrey. Ñeñthpaꞌ añña eꞌñe etsotatwerreꞌ Poechemer Jesucristo. Yomporpaꞌ eꞌñe ateth aꞌpoktatwonay tharroꞌmar ñeñth attho morrentya ñapaꞌ atethña moenen. 6-7Ayeꞌchoxhtatpawepaꞌch Yompor attho ñapaꞌ atarr nanak kowen moerenya. Attho ñapaꞌ awoꞌt moeñonay Poechemer Cristo ñeñth rromosets yokop. Attho ashatarethta poꞌrras ñeñthpaꞌ alloña tsaꞌtwerrnaya yoꞌchñar. Theꞌña ya eꞌñe yeyemteñoth Poechemer, Pomporñapaꞌ atthoña oꞌ eꞌshowerrnay ñeñth yoꞌchñar yepeꞌth. Ñeñthoꞌmarña yapaꞌ yeñoteñ ñapaꞌ atarr morrentenya. Attho atarr morrentenana Poechemer Jesúspaꞌ yapaꞌxhoꞌña atthekma atarr morrentenya eꞌñe yeparrokmateñoth Yompor Poechemer. 8-10Yapaꞌ yeñoteñ Yomporpaꞌ atarr morrentenya tharroꞌmar ña theꞌpaꞌ oꞌ eñotatwerrey eꞌñe ora ñeñth ateth kothapeꞌchen ña amaꞌt ñeñth ama eñotpawo awathotheñ. Ñapaꞌ oꞌ eꞌñe eñotaterrey yeyoxhro ñeñth ateth moenen ña. Ñeñthpaꞌ añña ateth moenen ña: Ñerraꞌm esempoch xhap allempoch etsoterra allempo onañcheꞌ awath Yomporpaꞌ, allempoña Cristo ñach etsotatwerreꞌ allowen ñeñth allpon eñall, amaꞌt ora allpon ñeñth poeꞌntañoꞌtsaꞌyen amaꞌt ñamha ora allpon ñeñth añe patsroꞌtsaꞌyen. Eꞌñech Cristesho aꞌyapaxhaꞌwerret allchaꞌña eꞌñe yeparrokmatwerr alloweney.
11Yomporpaꞌ atarr koxhneshaꞌ oꞌpatatenana Poechemer Cristo. Yaꞌnaña eꞌñe oꞌpatatena attho eꞌñe yeparrokmateñoth Cristo. Ñewa, ñeñthpaꞌ ateth kothapeꞌcheꞌth Yompor awath yokop. Ñeñthoꞌmarña theꞌpaꞌ atethña oꞌ perrnay ñeñth ateth kothapeꞌcheꞌth ña ñeñth eꞌñe pokteꞌ enteꞌth eꞌñe ña pomnenñoth. Tharroꞌmar Yomporpaꞌ ama poenesho poꞌñoñ, xhokmach eꞌñe etsotwerra ñeñth allpon ateth onañchen ña. 12Ñeñthpaꞌ ateth eꞌñe kowen phonay Yompor allochñapaꞌ atthochña yaꞌyeꞌchoxhtaterrñañ ora allowen ñeñth poꞌkowenña pen ña, alloweney ya ñeñthey yanom oꞌ yeyemterrñaña Poechemer ñeñthara Cristo. 13Sapaꞌxhoꞌña theꞌpaꞌ oꞌ seꞌmoerrñañ Yompor poꞌñoñ ñeñth ñoñets eꞌñe poꞌñoxh alloch sekeshperra samha. Atthoña sapaꞌxhoꞌña oꞌ sameꞌñera Cristo. Eꞌñe seyemteñotha sa, Yomporñapaꞌ oꞌ chorraterrsa Poekamkëñ ñeñthchaꞌ señotateꞌ poꞌñoxh oꞌ poechemer perres. Ñewa, ñeñthpaꞌ ñeñthara Parets Poekamkëñ ñeñth ateth oteꞌth awath Yompor ñeñthchaꞌ apwerrey esempo. 14Ñeñthara Poekamkëñ ñeñth apoeney ñanom ñeñthpaꞌ ñeñthchaꞌña yeñotateꞌ orameñ ñeñth oꞌpatatenya Yompor. Atthochña ñerraꞌm esempo aꞌkeshphaterrey poktakma ñeñthey oꞌpatatena, allempochña yagërr ñeñth allpon orameñ oꞌpatatenya. Ñeñthoꞌmarña añ poktetsa yaꞌyeꞌchoxhtatoñepaꞌch ora allowen ñeñth poꞌkowenña pen ña.
Arrpaꞌ attho maꞌyochampenanet Pablo
15Ñeñthoꞌmarña na theꞌpaꞌ oꞌch notas, napaꞌ oꞌ neꞌmareꞌtas attho sapaꞌ atarr sameꞌñeña Yepartseshar Jesús ñamha neꞌmareꞌtenes attho sapaꞌ eꞌñe kowen semoerannena allowenes ñeñthes poeyochreshaꞌ perres Parets. 16Ñeñthoꞌmarña napaꞌ xhokma neparasyosoꞌteñ Yompor allempo nemaꞌyochampensa. 17Ñamha nenamoennas Yompor ñeñth Pompor pen Jesucristo, ñeñthara Yompor ñeñth atarr kowen Partsotets. Añ nenamoennas, Yompor Poekamkëñothpaꞌ eñotatasepaꞌch ñeñth eꞌñe ateth pena ña pokthaphña. Atthochña sapaꞌ eshekchaꞌ señoterrña ñeñth atarr kowen sherbets ñokop ñeñth amaꞌt awatha sapaꞌ ama señoteñe. 18Ñamha ñapaꞌ xhapatonaschaꞌ seyoxhro atthochña señoterrñañ ora allpon ñeñth poꞌkowenña ñeñth yekwen ñeñthchaꞌ apwerrey Yompor esempo tharroꞌmar yapaꞌ ñeñthekopña xhoreꞌterrey awathotheñ. Ñamha oꞌch señoch atarr nanak kowen ñeñthchaꞌ apwerrey Yompor, ñeñthpaꞌ alloch yapaꞌ korretsayach errponañowen alloweney ñeñthey poeyochreshaꞌ pen. 19-20Ñamha theꞌpaꞌ oꞌch señoterrñañ Yompor poꞌwamenk atarr nanak womenk ama atpaꞌwapawo ñeñth ateth awamenkath peney alloweney ñeñthey ameꞌñenaya ña. Ñeñthpaꞌ ñeñthara poꞌwamenk ñeñth atarr womenk orrtatan allo tantaterran Poechemer Cristo allempo rroma. Oꞌ tantater ñeñthara poꞌwamenkoth atthoña xhapater ñesho allñapaꞌ anorrwerr Pompor poꞌkowenroth all poeꞌntaño allña eꞌñe partsotwerr epoet Pompor. 21Ña theꞌpaꞌ atarr amhchaꞌtarethtena nanak. Attho amhchaꞌtarethtena ñapaꞌ ñeñthpaꞌ eꞌñe metanaꞌtwenan ora allpon allowen ñeñth amhchaꞌtarethetyetsa ñamha ora allpon allowen allsensarethetyetsa ñamha ora allpon allowen ñeñth awamenkathetyetsa ñamha ora allpon allowen ñeñth ayochreshathetyetsa ñamha ora allpon allowen ñeñth kowen entyetsa amaꞌt allowen soꞌchñetsoxhno. Cristoña poꞌwamenkoth eꞌñe metanaꞌtwenanet allowenet. Ñamha ñapaꞌ ama mamekpayaya ateth peno, ñapaꞌ thayotheñña ñamha errponañowenchaꞌ ateth pena. 22Ñamha Yomporpaꞌ oꞌ nan Poechemer Cristo allochñapaꞌ ñach pomnaren peneꞌ ora allpon ñeñth esokmañen eñall. Ñamha allowen allpon ñeñth ameꞌñenaya, Yomporpaꞌ atthoña apanet Poechemer allochñapaꞌ ñach yochreshaꞌtenawet allowenet. 23Ñatoꞌ oꞌch netmaꞌntacha ateth: Alloweney allponey ñeñthey ameꞌñaꞌyenaya Cristo, Cristoñapaꞌ eꞌñe yeyoxher#1.23 Ñewa, poꞌñoxh Cristopaꞌ arr atmaꞌntatareth ateth ñerraꞌmrratheꞌ ñeñth yoñ yepen. yephoweñ alloweney, yañapaꞌ Cristo poꞌchets yepeneꞌ alloweney. Ñeñthoꞌmar ñeñthey ameꞌñenaya Cristo eꞌñe alloweney eꞌñe parrokmay, Cristoñapaꞌ eꞌñe ña yechorraꞌwenaya, tharroꞌmar ñapaꞌ eꞌñe poꞌchets phoweney alloweney.
Currently Selected:
Efesios 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.