1 San Pedro 1
1
Attho Pedropaꞌ kellkan carta allowenakop ñeñth ameꞌñetsa ñeñth attha aꞌparratseꞌtatareth
1-2Masheñneshachaꞌ ñamha noxhaneshachaꞌ ñeñthes aꞌyetaten ñeñth saꞌmoeroxhtateneꞌ. Oꞌ eꞌñe seswanom seney oꞌ attha aꞌparratseꞌtataset allemeña anetsoꞌmar, all anetso Ponto ñamha Galacia, ñamha Capadocia, ñamha Asia ñamha Bitinia. Sapaꞌ ñeñthes awathotheñ naseꞌth Yompor Parets eꞌñe ñokop. Ñapaꞌ eꞌñe eñotwaseꞌth sach aꞌkowentatarethterrtsa Partsokop. Eꞌñe ña Poekamkëñpaꞌ ñeñthña saꞌkowentaterreꞌña sa atthothña eꞌñe sameꞌñaꞌweraña Jesucristo. Atthoña ña poꞌrraspaꞌ ñeñthña oꞌ eꞌshowerrnasña soꞌchñar. Na Pedron sekellkëneꞌña añ carta, napaꞌ ñeñthen Jesucristo poellsensaren. Eꞌñe newomhchaꞌteñothes sa napaꞌ oꞌch notas: Yomporepaꞌchña atarr sebensareꞌtampeneꞌ, ñepaꞌchña sokshateneꞌña eꞌñe sa seyoxhro allowenes.
Eꞌñe yeyemteñoth Yepartseshar Jesucristo xhokmach yekwameꞌten ñeñth oꞌpatatarethey
3Theꞌñapaꞌ ayeꞌchoxhtaterrapoꞌch Yompor Parets ñeñth Yepartseshar Jesucristo Pompor ñeñthara ñeñth Poꞌyomporer pen, tharroꞌmar oꞌ yeꞌñalleterra etserra eꞌñe ña nanak poemoereñothey. Allempotheñña ya eꞌñe yeyemteñoth ña xhokmach yekwameꞌteñ esempowañen tharrempowa allempoch ama yaꞌrromñathterro. Attho Jesucristopaꞌ oꞌ tanterra, ñeñthoꞌmarña yapaꞌxhoꞌña yekwen yamha atthoch amach yaꞌrromñathterro. 4Ñamha yeyemteñoth xhokmach yekwameꞌten ñeñth oꞌpatatarethey poeꞌntañoth tharroꞌmar allpaꞌ allña aññoꞌtarethtenaña alloch yekeshperra. Ñeñthña keshpeñetspaꞌ amach awañañathterro, ñamha ama asosyatño, ñamha ama amhllashaꞌtño. 5Sapaꞌ eꞌñe seyemteñothña Cristo Yomporpaꞌ aꞌnatasepaꞌch. Aꞌnatasepaꞌch xhokma atthoch sekeshphaꞌwerra esempowañenchaꞌ mellapoterra. Yompor poꞌwamenkopaꞌ aꞌnatasepaꞌch atthoch eꞌñe señotwerr poꞌñoxh eꞌñech sekeshphaꞌwerra.
6Ñeñthoꞌmarña theꞌpaꞌ allowenespaꞌ sokshepaꞌch. Amaꞌt theꞌña attho semoeroxhtenapaꞌ ñeñthpaꞌ eꞌñe mamekpa. Tharraña amaꞌt oꞌ xhaponasa paꞌnamen topateñetspaꞌ sapaꞌ xhokmoepaꞌch soksheña Yompor. 7Tharroꞌmar nanak womenk echarr yenteñ, tharraña Yomporpaꞌ eñochchaꞌ ñerraꞌm poꞌñoxh eꞌñe yameꞌñeña ña. Ateth ñerraꞌm oropaꞌ xhoch ñanom atserrtachet womenk allochñapaꞌ oꞌch eñochet ñerraꞌm poꞌñoxh ñeñthpaꞌ eꞌñetheꞌ orocheꞌ. Ñeñthña amaꞌt oropaꞌ wañerrchaꞌ esempo. Amaꞌt nanak tsaꞌteꞌ oro, tharraña attho poꞌñoxh yameꞌñera Cristo, ñeñthña ello nanak sherbets. Ñerraꞌm poꞌñoxh yeyemteña ña, yeyemteñoth ñapaꞌ eꞌñech kowen entyeswerrey esempowañenchaꞌ werra Jesucristo, atthochña eꞌñe kowen yekowentapretera, eꞌñech kowen yaꞌmhchaꞌtarethtapretera.
8Jesucristo amaꞌt ama sentarñepaꞌ theꞌñapaꞌ oꞌ semorrentera. Amaꞌt ama senteñe, theꞌñapaꞌ oꞌ sameꞌñera. Eꞌñe soksheñeshokmañen oꞌ sameꞌñeña, ñeñthña kosheñetspaꞌ atarr nanak kowen. Theꞌpaꞌ amach erra yenerreꞌthe yeñoñ ñeñthchaꞌ ateth yoterrerr. 9Atthoña eꞌñe sameꞌñeñoth Cristopaꞌ saꞌkeshphaterrchaꞌ sekamkëñ.
10Ñamha oꞌch notas, amaꞌt ñeñth aꞌmhtaꞌyesayeꞌth Yompor poꞌñoñ awathpaꞌ ñeñthña serrpareꞌteteꞌth allempo atthoch orrtaterrnay Yompor poemoereña alloch yekeshperra. Tharraña ñetpaꞌ ama eꞌñeyeꞌ eñocheteꞌthe errothentheꞌña alloch yekeshperra. (Ñewa, allempopaꞌ amakaꞌye orrtenaꞌ Cristo arr patsro.) Ñetpaꞌ ñeñthña nanak eꞌnetañeꞌth errothentheꞌña ñeñthchaꞌ aꞌkeshphatañterrtsa. Ñetpaꞌ nanak aꞌphthoꞌtannaꞌtyeseteꞌth eꞌñe ñagattseta errothentheꞌkaꞌyeña Yompor poemoereña alloch eꞌñe yekeshperra. 11Ñetpaꞌxhoꞌña eꞌñe Cristo Poekamkëñña chorraweteꞌth ñeñthña eñotataweteꞌth oꞌch orrterra ñeñthchaꞌ Cristoterrets arr patsro. Oꞌch xhap añe patsropaꞌ elloñapaꞌ oꞌch moeroxhtateret. Oꞌch amoeroxhtatarethetwapaꞌ allempochña orrtaterranña poꞌkowenña. Tharraña ñeñth aꞌmhtaꞌyesayeꞌth Yompor poꞌñoñ awathpaꞌ oꞌ alla aꞌphthoꞌtannaꞌtyerreterr, taꞌ, ¿eseshaꞌchña Cristoterrets? ¿Esempoꞌtchaꞌña orrterra? 12Yomporpaꞌ eñotatanet ñeñthpaꞌ amachkaꞌye awenayeꞌ etsoterro; shonteꞌch char allempochña etsoterra ateth eñotatanet Yompor. Tharraña ñeñth eñotat allempopaꞌ ñeñthpaꞌ ama ñokpoetayaye, ñeñthpaꞌ eꞌñechkaꞌye yokop. Theꞌñapaꞌ ñeñth seserrpareꞌtateneꞌ kowen ñoñetspaꞌ ñeñthña señotateneꞌ eꞌñe kowen ñeñth ateth penaña ñeñth kothaphñats. Parets Poekamkëñ ñeñth wetsa poeꞌntañothpaꞌ ñeñthña eñotatenawetña atthoch serrpareꞌtataset samha añ kowen ñoñets. Amaꞌt Parets poꞌmhllañotheñnaneshar ñetpaꞌxhoꞌña atarr moeneñet oꞌch eñochet ñamet ñeñth oꞌ señotwerr sa.
Añ poktetsa oꞌch yepomwerra yañeña eꞌñe Partsokop
13Ñeñthoꞌmarña theꞌpaꞌ añ poktetsa eꞌñe sa señoteñothpaꞌ eꞌñech kowen sokthapeꞌchen. Eꞌñe seyemteñoth ñapaꞌ oꞌch sekwameꞌteñ esempoch werra Jesucristo. Allempopaꞌ ellochña nanak moeraꞌwerrsa, kowenchaꞌ es apwerres. 14Seꞌmhñoch Yompor ateth ñerraꞌm ñapaꞌ poechemereshaꞌch perres. Amach aña seyxhatsto ateth ñerraꞌm awath allempo ama señoteñaꞌ; allempopaꞌ aña semnatseꞌtyeseꞌth ñeñth ama kowenayaye. 15Yomporpaꞌ eꞌñe kowenareꞌ es pen. Ñeñthara Yompor ñeñth oꞌ waꞌñerrey ya. Ñeñthoꞌmarña yapaꞌxhoꞌña añ poktetsa oꞌch yepomwerra yañeña eꞌñe Partsokop. Ateth ñapaꞌ eꞌñe kowenareꞌ es pen, yapaꞌxhoꞌña añ poktetsa oꞌch yephaꞌ ateth es pen ña. 16Ateth oteney Yompor poꞌñoñoth ñeñth anwareth awathotheñ: “Ateth nepena na ñeñthen Seyomporer sepen, napaꞌ eꞌñe kowenareꞌ es nepen, sapaꞌxhoꞌña eꞌñepaꞌch kowenareꞌ es sepen.”
17Yomporpaꞌ ñach tsaꞌtaterrawet allpon yexhkatyeseteꞌth ñeñth ama kowenayaye. Amach eñalleña amaꞌt poesheñarra ñeñthchaꞌ keshphatsa ñeñth ama ameꞌñenaye ña. Attho yemaꞌyocheña Yompor ñeñthchaꞌ yetsaꞌtatwerraya, ñeñthepñapaꞌ theꞌpaꞌ amhchaꞌnaꞌtpoꞌch Yompor. Amaꞌt allponmat sokrrena arr patsro ñeñthpaꞌ ama saꞌnetsreyaye, eꞌñech thayotheñ semhchaꞌnaꞌtnomh Yompor. 18Sapaꞌ satañneshañpaꞌ apaꞌnmaset pokthaphña ateth peteꞌth eꞌñe orrena. Theꞌña sapaꞌ oꞌ señoter Yomporpaꞌ oꞌ tsaꞌtwonasa atthoch seswanom ñeñth awathnaneshañ pokthaphña. Ama kellayoyeꞌ tsaꞌtonaye. Kellepaꞌ awañaña. 19Añña attho tsaꞌtonaya poꞌrraso Poechemer ñeñth Cristo. Poꞌrraspaꞌ ñeñth nanak sherbets ateth ñerraꞌm carnerothollpaꞌ eꞌñech koxhneshaꞌ moetseteꞌth Partsokop. 20Amaꞌt ama ayexhkatarethtenaꞌ pats Yomporpaꞌ oꞌ nan Poechemer Cristo, ñach tsaꞌterraya yoꞌchñar. Amaꞌt awathotheñ anarethpaꞌ tharraña ama orrteno añe patsro. Theꞌñapaꞌ orrta eꞌñe yokop, tharroꞌmar theꞌpaꞌ oꞌ mellapoterrmocha. 21Yameꞌñeñoth Cristopaꞌ oꞌch yeyemterrñaña Pompor, tharroꞌmar Pomporpaꞌ oꞌ tantater amaꞌt oꞌ rromwa. Tantater atthoch alla eꞌñe kowentater Pompor. Ñeñthoꞌmarña theꞌ yapaꞌ oꞌch yeyemcha Yompor, oꞌch yekwameꞌtoñ ñeñth oꞌpatatenya.
22Sapaꞌ oꞌ sameꞌñaꞌwa ñoñets ñeñth eꞌñe poꞌñoxh Yompor poꞌñoñ. Ñeñthoꞌmarña eꞌñe Parets poꞌwamenkoth oꞌ seswanom allpon sosyaꞌtsañ ñeñth seyoxhroꞌtsen, atthothchaꞌ eꞌñe semorrentannaꞌta. Theꞌñapaꞌ semorrentannaꞌtepaꞌch poktakma eꞌñe seyoxhrokmañen. 23Eꞌñe yameꞌñeñoth Yompor poꞌñoñpaꞌ oꞌ yeꞌñalleterra etserra. Añ eñalleteñetspaꞌ ama attheyaye ñerraꞌm allempo eñalletatey yachor. Attho eñalletatey yachorpaꞌ ñeñthpaꞌ wañerrchaꞌ. Añña Yompor poꞌñoñothña yeꞌñalleterra ñeñthpaꞌ amach awañañathterro amaꞌt errponaña. 24Tharroꞌmar Yompor poꞌñoñ ñeñth anwareth awathotheñ ñeñthpaꞌ ateth oten:
Alloweney ñeñthey arromñatheypaꞌ atthey ñerraꞌmrratheꞌ taꞌteꞌ tharroꞌmar mamekpa yokrrena. Ñamha ñeñth kowen yentyen ya, ñeñthpaꞌ ateth ñerraꞌmrratheꞌ taꞌteꞌ poerorer. Taꞌteꞌpaꞌ oꞌch weyaꞌwa poeꞌchorpaꞌ poerorerpaꞌxhoꞌña amaꞌt koxhneshaꞌtenañpaꞌ shorxhaꞌtwach.
25Tharraña ñeñth Parets poꞌñoñpaꞌ amach awañañathto amaꞌt errponaña.
Ñeñth poꞌñoñpaꞌ ñeñthara kowen ñoñets ñeñth oꞌ serrpareꞌtatwaset samha.
Currently Selected:
1 San Pedro 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.