YouVersion Logo
Search Icon

FILIMONI 1

1
Sa reki ko Paula ni sa lotu dina ko Filimoni, 1-7. Sa masuti koya me lomani Onesimo tale e na vukuna, ni sa qai lotu dina, 8-21. Sa kaya ni na laki raici koya ko Paula, a sa tinia na nonai vola, 22-25.
1Koi au ko Paula, sa vesu tu e na vuku i Karisito Jisu, kei Timoci na wekada, vei Filimoni o koya keirau sa daulomana, kei na neirau i tokani, 2vei Afia talega na wekada yalewa, vei Akipo talega na neirau i tokani e nai valu oqo, vei ira talega nai soqosoqo lewe ni lotu era sa tiko e na nomu vale: 3Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.
4Au sa vakavinavinaka vua na noqu Kalou, ni'u sa cavuti iko e na veisiga e na noqu masu; 5ni'u sa rogoca na nomu loloma kei na nomu vakabauta vua na Turaga ko Jisu, kivei ira kece talega era sa lotu; 6me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu. 7Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakaceguya na lomadra era sa lotu.
8E dina ga sa rawa me'u doudou vakalevu e na vuku i Karisito me'u vakarota vei iko na ka e kilikili; 9ia e na vuku ni nodaru veilomani ga ka'u sa vinakata cake me'u vakamamasu ga, ni'u sa vakaoqo koi au ko Paula na qase, ia ka'u sa vesu talega edaidai e na vuku i Jisu Karisito. 10Au sa vakamasuti iko e na vuku ni luvequ ko Onesimo, o koya ka'u sa vakatubura ni'u sa vesu tu: 11(o koya sa sega ni yaga eliu vei iko, ia sa qai yaga vei iko, vei au talega:) 12au sa qai tala tale vei iko: o koya oqo mo vakacegui koya, ni sa vaka na lewequ dina sara: 13au sa via taura ga me tiko vei au, me kemui sosomi me sa qaravi au ni'u sa vesu tu e na vuku ni tukutuku-vinaka: 14ia ni'u sa sega ni kila na yalomu, au sa sega ni via cakava e dua na ka: me kakua ni vaka na ka ni vakasaurara na nomu loloma, me sa lomamu ga kina. 15Ni sai koya beka oqo sa lako tani vakalekaleka kina, mo tauri koya tale ka tawa mudu; 16me kakua ni vaka na tamata walega, me sa uasivi cake e na tamata walega, me wekamu lomani, e vakalevu vei au, ia ka vakaevei vei iko, e na ka vakavuravura, kei na ka ni Turaga talega? 17Ia oqo, kevaka ko sa vakasami au ni'u sai tokani, mo vakacegui koya me vakataki au. 18Kevaka sa vakacacani iko ko koya e na dua na ka, se sa dua na ka sa dinau kina vei iko, mo volai au kina; 19oi au ko Paula, au sa vola e na ligaqu dina, au na sauma; ia ka'u sa sega ni kaya vei iko ni sa dodonu ga mo noqu talega ko iko. 20Io, noqu i tokani, me'u rekitaki iko mada e na Turaga: vakaceguya na lomaqu e na vuku i Karisito. 21Ni ka'u sa vakadinata ko na talairawarawa, ka'u sa vola kina vei iko, ni'u sa kila ko na kitaka na ka ka'u sa kaya, ka uasivi cake kina.
22Mo vakarautaka talega e dua na vale me'u moce kina: ni'u sa dinata ka'u na soli vei kemudou e na vuku ni nomudou masu.
23Eratou sa loloma yani vei iko ko Epafira, keirau sa vesu vata kaya e na vuku i Karisito Jisu; 24kei iratou talega na noqu i tokani, ko Marika, ko Arisitako, ko Timasa, ko Luke. 25Me tiko kei na yalomudou na loloma ni noda Turaga ko Jisu Karisito. Emeni.

Currently Selected:

FILIMONI 1: FOV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy