YouVersion Logo
Search Icon

NA TIKO MAI NA LEKUTU 1

1
Sa vakaroti Mosese ko Jiova me wilika na tamata, 1-4. O ira era sa vukei koya, 5-16. Ai wiliwili ni mataqali yadua, 17-43. A nodra i wiliwili na veimataqali kecega, 44-46. Sa sega ni wili na mataqali i Livai, 47-54.
1A sa vosa vei Mosese ko Jiova mai na lekutu loaloa mai Saineai, e na vale ni veitavaki, e nai matai ni siga e nai karua ni vula, e na kenai karua ni yabaki ni nodra lako tani mai na vanua ko Ijipita, ka kaya, 2Mo wilika nai soqosoqo taucoko ni Isireli, mo wilika vakamataqali, ka vakaveivuvale ni nodra qase, ka mo wilika na yacadra yadua na tagane kecega; 3ko ira era sa yabaki ruasagavulu se toro cake, o ira kecega vei ira na Isireli sa yaga enai valu: oi kemudrau kei Eroni, drau wiliki ira e na nodra matai valu. 4Ia me tiko kei kemudrau e dua na tamata mai na mataqali yadua, ko koya sa turaga e na vale ni nona qase.
5Ia oqo na yacadra na tagane era na tiko kei kemudrau: Maivei ira na Rupeni; ko Ilisuri na luve i Siteuri: 6maivei ira na Simioni; ko Silumieli na luve i Surisatai: 7maivei ira na Juta; ko Nasoni na luve i Aminatapi: 8maivei ira na Isakari; ko Nicaneli na luve i Suari: 9maivei ira na Sepuloni; ko Iliapi na luve i Eloni: 10maivei ira na luve i Josefa: maivei ira na Ifireimi; ko Ilisama na luve i Amiute: maivei ira na Manasa; ko Kamelieli na luve i Pitasuri: 11maivei ira na Penijamini; ko Epitani na luve i Kitioni: 12maivei ira na Tani; ko Eieseri na luve i Amisatai: 13maivei ira na Aseri; ko Pakieli na luve i Okirani: 14maivei ira na Kata; ko Eliasafi na luve i Tiueli: 15maivei ira na Nafitalai; ko Eira na luve i Enani. 16O ira oqo era digitaki vei ira nai soqosoqo, era turaga e na veimataqali ni nodra qase, era turaga ni veiudolu ni Isireli.
17Ia ko Mosese kei Eroni, erau sa kauti ira na tamata oqo sa tukuni na yacadra yadua: 18a rau sa vakasoqona vata nai soqosoqo taucoko e nai matai ni siga e nai karua ni vula, a ra sa tukuna na nodra i tubutubu vakamataqali, ka vakaveivuvale; a ra sa wilika na yacadra yadua, era sa yabaki ruasagavulu ka levu cake. 19Me vaka ka vakarota vei Mosese ko Jiova, sa wiliki ira vakakina ko koya mai na lekutu loaloa mai Saineai.
20Ia ko ira na kawa i Rupeni, na ulumatua i Isireli, e na nodra i tubutubu, e na nodra veimataqali, ka vakaveivuvale ni nodra qase, ka me wili na yacadra yadua, na tagane kecega sa ruasagavulu na nodra yabaki ka levu cake, ko ira kecega sa yaga e nai valu; 21ko ira sa volai mai vei ira na mataqali i Rupeni, era le vasagavulu ka ono na udolu ka lima na drau.
22Vei ira na kawa i Simioni, e na nodra i tubutubu, e na nodra veimataqali, ka vakaveivuvale ni nodra qase, o ira sa volai maivei ira me vaka nai wiliwili ni yacadra yadua, io na tagane kecega sa ruasagavulu na nodra yabaki ka toro cake, ko ira kecega sa yaga e nai valu; 23ko ira sa volai maivei ira na mataqali i Simioni, era le limasagavulu ka ciwa na udolu ka tolu na drau.
24Vei ira na kawa i Kata, e na nodra i tubutubu, e na nodra veimataqali, kei na veivuvale ni nodra qase, vaka nai wiliwili ni yacadra yadua, ko ira sa ruasagavulu na nodra yabaki ka toro cake, o ira kecega sa yaga e nai valu; 25o ira sa volai maivei ira na mataqali i Kata, era le vasagavulu ka lima na udolu ka ono na drau ka limasagavulu.
26Vei ira na kawa i Juta, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, ko ira kecega sa yaga e nai valu; 27ko ira sa volai maivei ira na mataqali i Juta, era le vitusagavulu ka va na udolu ka ono na drau.
28Vei ira na kawa i Isakari, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 29ko ira sa volai maivei ira na mataqali i Isakari, era le limasagavulu ka va na udolu ka va na drau.
30Vei ira na kawa i Sepuloni, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 31ko ira sa volai maivei ira na mataqali i Sepuloni, era le limasagavulu ka vitu na udolu ka va na drau.
32Vei ira na kawa i Josefa: io, Vei ira na kawa i Ifireimi, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 33o ira sa wili maivei ira na mataqali i Ifireimi, era le vasagavulu na udolu ka lima na drau:
34Vei ira na kawa i Manasa, e na nodra i tubutubu, e na nodra veimataqali ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 35ko ira sa volai maivei ira na mataqali i Manasa, era le tolusagavulu ka rua na udolu ka rua na drau.
36Vei ira na kawa i Penijamini, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 37ko ira sa volai maivei ira na mataqali i Penijamini, era le tolusagavulu ka lima na udolu ka va na drau.
38Vei ira na kawa i Tani, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, o ira sa ruasagavulu na nodra yabaki ka levu cake, ko ira kecega sa yaga e nai valu; 39ko ira sa volai maivei ira na mataqali i Tani, era le onosagavulu ka rua na udolu ka vitu na drau.
40Vei ira na kawa i Aseri, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 41o ira sa volai maivei ira na mataqali i Aseri, era le vasagavulu ka dua na udolu ka lima na drau.
42Vei ira na kawa i Nafitalai, e na nodra i tubutubu, e na nodra veimataqali, ka vakaveivuvale ni nodra qase, vaka nai wiliwili ni yacadra, ko ira sa ruasagavulu na nodra yabaki ka levu cake, ko ira kecega sa yaga e nai valu; 43ko ira sa volai maivei ira na mataqali i Nafitalai, era le limasagavulu ka tolu na udolu ka va na drau.
44Ko ira oqo sa wili, io, sa wilika ko Mosese kei Eroni, kei ira na turaga ni Isireli era lewe tinikarua na tamata, na tamata yadua mai na vale ni nona qase. 45Ia ko ira kecega era sa wili maivei ira na Isireli, ka vakaveivuvale ni nodra qase, ko ira sa ruasagavulu na nodra yabaki ka levu cake, ko ira kecega sa yaga e nai valu vei ira na Isireli; 46io ko ira kecega era sa volai, era sa le ono na drau ka tolu na udolu ka lima na drau ka limasagavulu.
47Ia ko ira na kawa i Livai e na mataqali i tamadra, era sa sega ni wili vata kei ira.
48Ia sa vosa vei Mosese ko Jiova, ka kaya, 49Na mataqali i Livai ga mo kakua ni wilika, ia mo kakua ni wiliki ira vata kei ira na Isireli: 50ia mo lesi ira ga na Livai me lewa na vale ni Kalou sa tu kina na vunau, kei na kenai yaya kecega, kei na kena ka kecega: era na colata na vale ni Kalou, kei na kenai yaya kecega; ia me ra qarava tiko, ka me volita na vale ni Kalou na nodra veivale laca. 51Ia ni sa kau ki liu na vale ni Kalou, me qai sereka ko ira na Livai: ia ni na duri tale na vale ni Kalou, me ra vakaduria ko ira na Livai: ia kevaka sa torova e dua tani, ena vakamatei. 52Ia ko ira na Isireli, me ra daubirika na nodra veivale na tamata yadua e na nonai tikotiko, kei na tamata yadua me voleka ki na nona kuila, e na nodra veivavakoso. 53Ia ko ira na Livai, me volita na vale ni Kalou sa tu kina na vunau, na nodra veivale laca, me kakua ni ra cudruvi kina nai soqosoqo ni Isireli: ia sa nodra i tavi na Livai, me vakatawa na vale ni Kalou sa tu kina na vunau.
54A ra sa kitaka vakakina na Isireli: io, me vaka na ka kecega ka vakarota vei Mosese ko Jiova, era sa kitaka vakakina.

Currently Selected:

NA TIKO MAI NA LEKUTU 1: FOV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy