2 VEIGAUNA 1
1
Sa vakacaboi soro ko Solomoni mai Kipioni, 1-6. Sa kerea na vuku ko Solomoni; a sa vinakata ko Jiova na nona masu, 7-13. Nai yau kei na veivoli i Solomoni. 14-17.
1A sa vakataudeitaki e na nona matanitu ko Solomoni na luve i Tevita, a sa tiko vata kaya ko Jiova na nona Kalou, ka vakalevulevui koya vakalevu. 2Sa qai vosa ko Solomoni kivei ira kecega na Isireli, vei ira na turaga ni yayaudolu kei na yayadrau, vei ira talega na turaga ni lewa, kei na nodra turaga kecega na Isireli taucoko, ko ira sa qase turaga. 3A sa lako ko Solomoni, kei ira vata kaya nai soqosoqo taucoko, ki na tikina cecere mai Kipioni, ni sa tiko maikina na vale ni veitavaki kei na Kalou, ko koya ka cakava mai na lekutu ko Mosese nai talatala ni Kalou. 4Ia sa kauta mai Kiriaci-jiarimi na kato ni Kalou ko Tevita ki na yasana sa vakarautaka ko Tevita me tu kina; ni sa birika ko koya na kena vale laca mai Jerusalemi. 5Ia sa viritu ko koya e na mata ni vale i Jiova nai cabocabo-ni-soro parasa, ko ya ka cakava ko Pisalieli na luve i Urei ka tagane, na luve i Uri ka tagane; a sa lako kina ko Solomoni kei ira nai soqosoqo. 6A sa lako cake kina ko Solomoni ki nai cabocabo-ni-soro parasa, e na mata i Jiova, ka tu mai na vale ni veitavaki, ka vakacabora kina e dua na udolu nai soro kama.
7E na bogi ko ya sa rairai kivei Solomoni na Kalou, ka kaya vua, Mo kerea na ka me'u solia vei iko. 8A sa kaya vua na Kalou ko Solomoni, Sa levu na loloma ko ni a ia vei Tevita na tamaqu, ka sa lesi au me'u tui me kenai sosomi. 9Ia, kemuni Jiova na Kalou, me vakataudeitaki na nomuni vosa kivei Tevita na tamaqu: ni kemuni sa lesi au me'u tui vei ira na tamata era sa lewe vuqa me vaka na kuvu ni soso. 10Mo ni solia mai kivei au na vuku kei na yalomatua, me'u curu yani ka curu tale mai e matadra na tamata oqo: ni sa rawarawa vei cei me lewai ira na nomuni tamata oqo era sa lewe vuqa?
11A sa kaya vei Solomoni na Kalou, Ni sa tiko e lomamu na ka oqo, ia ko sa sega ni kerea nai yau, se na kamunaga, se na vakarokoroko, se na nodra mate na nomu meca, ko sa sega talega ni kerea na bula dede; ia ko sa kerea ga me nomu na vuku kei na yalomatua, mo lewai ira kina na noqu tamata, ko ira ka'u sa lesi iko kina mo nodra tui: 12sa soli vei iko na vuku kei na yalomatua; ka'u na solia talega vei iko nai yau, kei na kamunaga, kei na vakarokoroko, sa sega ni rawata me vakakina, e dua na tui sa bula eliu ena sega talega ni vakakina e dua sa muri iko. 13Sa qai lesu tale mai ko Solomoni, mai na tikina cecere mai Kipioni ki Jerusalemi, mai na mata ni vale ni veitavaki, ka sa lewai ira na Isireli.
14A sa vakasoqona vata ko Solomoni na qiqi-ni-valu, kei ira era sa dauvodo ose: ka sa dua na udolu ka va na drau na nona qiqi-ni-valu, ka sa le tinikarua na udolu era sa dauvodo ose, ko ira ka vakatikora ko koya e na veikoro ni qiqi-ni-valu, ka so me tiko kei koya na tui mai Jerusalemi.
15Ia na tui sa vakalevutaka mai Jerusalemi na siliva kei na koula, me tautauvata kei na veivatu, kei na sitari me vaka na kena levu na lolo e na buca. 16A sa kau tiko mai kivei Solomoni na ose eso mai Ijipita, sa taura na qele ni ose ko ira na nona tamata dauveivoli na tui, e na kedrai voli na qele yadua. 17A ra sa lako ka kauta e dua na qiqi-ni-valu mai Ijipita, sa kenai voli e ono na drau na sikeli siliva, ka sa kenai voli e dua na ose e dua na drau ka limasagavulu: a sa vakakina ni ra sa kauta mai vei ira kecega na nodra tui na Itaiti, vei ira talega na tui Siria.
Currently Selected:
2 VEIGAUNA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific