3 ዮሃኒሳ ኪታ 1
1
1ታኒ ኣማኒያዋንታ ካሌያ ጪማይ፥ ቱሙ ሲቂያ ታ ሲቁዋ ጋዮሳው ሃ ዳቢዳቢያ ፃፋይ። #ኪት 19፡29፤ ሮም 16፡23፤ 1ቆር 1፡14 2ታ ሲቆ፥ ኔኒ ፆሳና ዴዒያ ዴዑ ሎዓ ጊዲያዋ ታኒ ኤሪያዋዳን፥ ኔና ኣያዪኔ ዋዪሴና ማላኔ ቃሲ ኔ ኣሳቴይ ፓፃ ጊዳና ማላ፥ ፆሳ ዎሳይ። 3ኣዪሲ ጎፔ፥ ኣማሬዳ ኢሻቱ ዪዴ፥ ኡባ ዎዴ ኔኒ ቱማቴን ዴዒያዋኔ ኔ ቱማቴባ ማርካቴዳ ዎዴ፥ ታኒ ዳሮ ናሼታዲ። 4ታ ናናይ #4 ታ ናናይ፡ ጎዳ ኣማኒዴ ካሊያዋንታ ጉሳ። ቱማቴን ዴዒያዋ ሲሲያዋፔ ኣዴ፥ ታና ናሼቺያባይ ባዋ።
ጋዮሳባ ኣሳይ ማርካቴ
5ታ ሲቆ፥ ኑ ኢሻቱ ኢማ ጊዶፔካ፥ ኔኒ ኡንቱንቶ ኦያ ኦሱዋ ኡባን ኣማኔቴዳ ኦሱዋ ኦዳ። 6ቃሲ ኡንቱንቱ ኔ ሲቁዋባ ኣማኒያ ኣሳቶ ማርካቴዲኖ፤ ኡንቱንቱ ቃንፄናን ባሬ ኦጊያ ባና ማላ ፆሳይ ዶሲያዋዳን፥ ኔኒ ሎዖባ ኦዴ ኡንቱንታ ማዳሪኪ። 7ኣዪሲ ጎፔ፥ ፆሳ ኣማኔናውንቱፔ ኣዪኔ ኣኬናን፥ ኪሪስቶሳ ሱን ዲራው ኬሴዲኖ። 8ሄዋ ዲራው፥ ኑኒ ቱማቴ ኡንቱንቱና ኢቲፔ ኦና ማላ፥ ሃዋንቱ ማላ ኣሳቱዋ ማዳናው ቤሴ።
ዲዮቲራፊሴ ሴሬቴዳ፤ ዲሜፂሮሲ ሳቤቴዳ
9ታኒ ኣማኒያዋንቶ፥ ዳቢዳቢያ ፃፋዲ፤ ሺን ኡንቱንቱ ካፑዋ ጊዳናው ኮዪያ ዲዮቲራፊሴ ኑኒ ጊያዋ ኣኬና። 10ሄዋ ዲራው፥ ታኒ ያ ቢያ ዎዴ፥ ኢ ኑ ቦላን ሃሳዪያ ኢታ ሃሳያኔ ኢ ኦዳ ኦሱዋ ሂንቴንቶ ኦዳና፤ ቃሲ ኢ ሄዌ ጉፄዳ ጊዴ፥ ኑ ኢሻቱ ዪያ ዎዴ ሞኬና፤ ሃራይ ኣቶ ኡንቱንታ ሞካናው ኮዪያዋንታካ ዲጊዴ፥ ኣማኒያዋንቱ ጊዶፔ ኬሴ።
11ታ ሲቆ፥ ሎዖባፔ ኣቲን፥ ኢታባ ማላቶፓ። ሎዖባ ኦያ ኦኒኔ ፆሳ ኣሳ፤ ሺን ኢታባ ኦያ ኦኒኔ ፆሳ ኤሬና።
12ዲሜፂሮሲ ሎዓ ጊዲያዋ ኣሳይ ኡባይ ማርካቴ፤ ቱማቴይ ባሬ ሁጲያንካ ኣባ ማርካቴ። ኑኒካ ቃሲ ኣባ ማርካቴቶ፤ ኑ ማርካቴይ ቱማ ጊዲያዋ ሂንቴካ ኤሪታ።
ዉርሴ ሳሮታ
13ታኒ ኔው ፃፋናው ኮዬዳ ዳሮባይ ዴዔ፤ ሺን ዋራቃታኒኔ ቃላሚያኒኔ ፃፋናው ኮዪኬ። 14ሺን ታኒ ማታን ኔናና ጋኬታናው ቆፓይ፤ ሄ ዎዴ ኑኒ ጋኬቲዴ ሃሳያና።
15ሳሮቴይ ኔናና ጊዶ።
ኔ ዳባቱ ኔና ሳሮ ሳሮ ያጊኖ። ኑ ዳባቱዋ ኡባ ኡንቱንቱ ሱን ሱን ፄሳዴ፥ ታና ሳሮ ሳሮ ጌዳ ያጋ።
Currently Selected:
3 ዮሃኒሳ ኪታ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa