1 ፂሞቶሳ 1
1
1ኑና ኣሺያ ፆሳይኔ ኑኒ ቤዓና ጊዴ ናሼቻን ናጊያ ዬሱሲ ኪሪስቶሲ ኣዛዜዳ ኣዛዙዋዳን፥ ዬሱሲ ኪሪስቶሲ ኪቴዳዋ ጊዴዳ ታኒ ጳዉሎሲ፥ 2ኣማኑዋ ባጋና ታ ቱሙ ናዓው፥ ፂሞቶሳው ሃ ዳቢዳቢያ ፃፋይ።
ዎርዶ ቲሚርቲያፔ ናጌቱሳ
ፆሳ ኑ ኣዉዋፔኔ ኑ ጎዳ ኪሪስቶሳ ዬሱሳፔ ኣ ኬካቴይ፥ ማሮቴይኔ ሳሮቴይ ኔው ጊዶ።
3ታኒ ማቂዶኒያ ባዴ ኔው ጌዳዋዳን፥ ኔኒ ኤፌሶኔን ጋሚዓና ማላ ኮያዲ። ኢቲ ኢቲ ኣሳቱ ዎርዱዋ ቲሚርቲያ ታማሪሲኖ፤ ሄዋንቱ ታማሪሴና ማላ፥ ኣጊቴ ጋዴ ኦዳ። 4ኡንቱንቱ ቶሳ ኦዲያዋኔ ባሬንቱ ዛሪያ ጋይሪያዋ ኣጋናዳን ኦዳ። ኣዪሲ ጎፔ፥ ሄዋ ማላባይ ፓሉማ ካሌ፤ ቃሲ ፆሳ ቆፋ ኣማኑዋን ኤሬቲያዋ ኦኪኖ። 5ሃ ኣዛዞ ዋና ቆፋይ ጌሻ ዎዛናፔ፥ ሎዖ ሱሬ ዎዛናፔ፥ ኣሳይ ቤዖ ጊያባይ ባይና ኣማኑዋፔ ቤቲያ ሲቁዋ ዴንናሳ። 6ኢቲ ኢቲ ኣሳቱ ሃዋ ኣጊዴ፥ ማዴና ሃሳያኮ ሲሜዲኖ። 7ኡንቱንቱ ኣያ ሃሳዪንቶኔ ዎይ ባሬንቱን ኣማኔቲዴ ኦዲያባይ ኣዬንቶ ኤሪኪኖ፤ ሺን ፆሳ ሂጊያ ታማሪሲያዋንታ ጊዳናው ኮዪኖ።
8ኣሳይ ቤሲያዋዳን ሂጊያን ጎዔቶፔ፥ ሂጊ ሎዓ ጊዲያዋ ኑኒ ኤሬቶ። 9ኢቲባ ኣኬካናው ኮሼ። ሂጊ ሎዖ ኣሳው ሜቲቤና። ሺን ሂጊያ ሜንያዋንቶ፥ ኣዛዜቴናዋንቶ፥ ማካላንቻቶ፥ ናጋራንቻቶ፥ ጌሻቴይ ባይናዋንቶ፥ ቱናቶ፥ ባሬንቱ ዳዮ ዎይ ኣባ ዎያዋንቱሲ፥ ሼምፑዋ ዎያዋንቱሲ፥ 10ዎሹማናው ካጄሊያዋንቶ፥ ኣቱማ ኣሳይ ኣቱማ ኣሳና ዎሹሚያዋንቶ፥ ኣሳ ዛሊዒያዋንቶ፥ ዎርዳንቻቶኔ ዎርዱዋን ጫቂያዋንቶ፥ ዎይ ቱሙ ቲሚርቲያና ጋኬቴና ኣይ ኦሱዋ ጊዲናካ ኦያዋንቶ ኬሴዳ። 11ሄ ቱሞ ቲሚርቲ ኣንጄቴዳ ፆሳይ ታኒ ኣዋጃና ማላ፥ ታው ሃዳራ ኢሜዳ ቦንቾ ዎንጋላ ጊዱዋን ዴዔ።
ጳዉሎሲ ፆሳው ሺሼዳ ጋላታ
12ታኒ ኦያ ኪታን ታው ዎልቃ ኢሜዳ ኑ ጎዳ ኪሪስቶሳ ዬሱሳ ጋላታይ። ታና ባሬ ኦሳንቻ ሱንዴ፥ ታና ሄ ኦሶ ቤሲያ ኣማኔቶዋ ጊዴ ፓይዴዳ ዲራዉካ ኣ ጋላታይ። 13ታኒ ሃዋፔ ካሴ ኣ ቦሪያዋ፥ ኣ ዬዴርሲያዋኔ ቱጋዪያዋ ጊዶፔኔ፥ ታው ሃዋ ኢ ኦዳ። ሺን ታኒ ኤሬናን ኦዳ ዲራዉኔ ኣማናቤና ዲራው፥ ፆሳይ ታና ማሬዳ። 14ቃሲ ኑ ጎዳይ ዛዋይ ባይና ባሬ ኣ ኬካቴ ታ ቦላን ጉሲዴ፥ ኪሪስቶሳ ዬሱሳ ባጋና ኑባ ጊዴዳ ኣማኑዋኔ ሲቁዋ ታው ኢሜዳ።
15ኪሪስቶሳ ዬሱሲ ናጋራንቻቱዋ ኣሻናው ሃ ሳዓ ዬዳ ጊያ ሃሳያይ ኣማኔቴዳዋኔ ኣሳይ ኡባይ ቱማ ጊዴ ኣካናው ቤሲያዋ። ኡባፔ ኣያ ናጋራንቻይ ታና። 16ሺን ሜና ዴዑዋ ኣካናው ኣኒ ኣማናናው ቤሲያ ኣሳው ታኒ ሌሚሱዋ ጊዳናዳን፥ ኡባፔ ኣያ ናጋራንቻው ታው ዬሱሲ ኪሪስቶሳ ዳሮ ዳንዳያዳን፥ ፆሳይ ታና ማሬዳ። 17ኣይፊያን ቤቴና ሜና ፆሳው ኢቱዋሲ፥ ሜና ካቴው፥ ሜናፔ ሜና ጋካናው ጋላታይኔ ቦንቹ ጊዶ። ኣሜንዒ!
18ታ ናዓ ፂሞቶሳ፥ ካሴ ኔባ ቲምቢቲያ ኦዴዳዋዳን፥ ሄ ኦዴዳዋዳን ሎዖ ኦላ ኔኒ ኦሌታና ማላ፥ ሃ ኣዛዙዋ ኔው ሃዳራ ኢማይ። 19ኣማኑኔ ሎዖ ሱሬ ዎዛናይ ኔው ዴዖ። ኢቱ ኢቱ ባሬንቱ ሱሬ ዎዛና ዬጊ ኣጊዴ፥ ላጊያዌ ባይና ማርካቢ ባዪያዋዳን፥ ባሬንቱ ኣማኑዋ ባዪዜዲኖ። 20ፆሳ ቦሪያዋ ኣጋና ማላ፥ ሄዋ ታማራናው ታኒ ሴፃናው ኣ ኢሜዳ ሄሜኔዮሲኔ ኢስኪንዲሪ ኡንቱንቱ ጊዶን ዴዒኖ።
Currently Selected:
1 ፂሞቶሳ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn more about Ooratha Caaquwaa