YouVersion Logo
Search Icon

Yuuhanna 21

21
Al-Masiih baan jamb al-bahar
1Wa baʼadeen Isa baan battaan le talaamiizah jamb bahar Tibiriyaas. Wa daahu kikkeef hu baan leehum. 2Yoom waahid, Simʼaan Butrus wa Tuuma al-binaaduuh Chigg al-Toom wa Natanaayil al-min hillit Kaana fi daar al-Jaliil wa awlaad Zabadi wa talaamiiz itneen aakhariin gaaʼidiin fi bakaan waahid. 3Wa Simʼaan Butrus hajja leehum wa gaal : «Ana namchi nihawwit.» Wa gaalo leyah : «Namchu maʼaak.» Wa marago wa rikbo fi l-markaba wa laakin tuul al-leel ma karabo cheyy.
4Wa fajur badri, Isa ja wagaf fi khachum al-bahar wa l-talaamiiz ma irfooh kadar da Isa. 5Wa Isa saʼalaahum wa gaal : «Ya l-awlaad, karabtu huut walla ?» Wa raddo leyah wa gaalo : «La, ma karabna.» 6Wa gaal leehum : «Azgulu charakku fi l-nuss al-zeenaay hana l-markaba wa takurbu huut.» Wa zagalo charakhum wa karabo huut katiir lahaddi ma gidro karrooh foog fi l-markaba. 7Wa l-tilmiiz al-Isa yihibbah hajja le Butrus wa gaal : «Da Rabbina !»
Wa wakit Simʼaan Butrus simiʼ kadar da al-Rabb, hu gamma rabat khalagah fi sulbah achaan hu awwal sallaah le l-khidme wa natta fi l-bahar. 8Wa l-talaamiiz al-aakhariin jo waraayah be l-markaba wa gaaʼidiin yukurru al-charak al-malaan huut. Humman ma baʼiid min khachum al-bahar illa misil 200 duraaʼ. 9Wa wakit marago min al-markaba khalaas, chaafo kaanuun malaan jamur wa huutaay foogah wa khubza.
10Wa Isa hajja leehum wa gaal : «Jiibu waahidiin min al-huut al-dahaaba karabtuuhum.» 11Wa Simʼaan Butrus gamma wa karra al-charak fi khachum al-bahar wa l-charak malaan huut kubaar. Wa adadah 153. Al-huut katiir bilheen wa laakin al-charak ma angataʼ.
12Wa Isa naada al-talaamiiz wa gaal : «Taʼaalu afturu.» Ma fi naadum minhum haawal yasʼalah wa yuguul : «Inta yaatu ?» Achaan fi guluubhum, irfo da al-Rabb Isa. 13Wa Isa gamma chaal al-khubza wa antaahum minha wa sawwa nafs al-cheyy be l-huut. 14Wa di taalit marra Isa baan le talaamiizah min hu baʼas min ust al-maytiin.
Al-Masiih chajjaʼ Simʼaan Butrus
15Wa wakit fataro khalaas, Isa saʼal Simʼaan Butrus wa gaal : «Simʼaan wileed Yuuhanna, tihibbini mahabba chadiide ziyaada min al-aakhariin walla ?» Wa Simʼaan Butrus radda leyah wa gaal : «Aywa sayyidna, taʼarif nihibbak.» Wa Isa gaal leyah : «Asrah be humlaani.»
16Wa marra taaniye saʼalah wa gaal : «Simʼaan wileed Yuuhanna, tihibbini mahabba chadiide walla ?» Wa Simʼaan Butrus radda leyah wa gaal : «Aywa sayyidna, taʼarif nihibbak.» Wa Isa gaal leyah : «Asrah be khanami.»
17Wa marra taalta Isa saʼalah wa gaal : «Simʼaan wileed Yuuhanna, tihibbini walla ?» Wa bigi le Simʼaan Butrus gaasi bilheen achaan talaata marraat Isa saʼalah wa gaal : «Tihibbini walla ?» Wa Butrus radda leyah wa gaal : «Sayyidna, taʼarif kulla cheyy. Wa taʼarif nihibbak.» Wa Isa gaal leyah : «Asrah be khanami. 18Asmaʼ nuguul leek al-hagg, wakit inta sakhayyar, inta rabatt sulbak wa macheet misil dawwartah. Laakin wakit tabga kabiir, timidd iideenak wa naadum aakhar yarbutak wa yiwaddiik fi bakaan al-inta ma tidoor tamchi foogah.» 19Wa Isa gaal al-kalaam da achaan yiʼoori Butrus be tariiga al-beeha yumuut wa yimajjid Allah. Wa baʼad da, Isa gaal : «Taabiʼni.»
20Wa Butrus anlafat wa chaaf waraahum al-tilmiiz al-Isa yihibbah. Wa da bas al-tilmiiz al-takka wara lahaddi lihig sadur Isa wakit gaaʼidiin yilʼachcho wa gaal : «Sayyidna, yaatu al-naadum al-yidoor yukhuunak ?» 21Wa Butrus chaaf Isa wa gaal : «Ya sayyidna, tuguul chunu fi l-naadum da ?» 22Wa Isa radda leyah wa gaal : «Kan ana nidoor hu yagood lahaddi nigabbil kula, da ma lammaak. Inta taabiʼni bas !»
23Wa min al-yoom da, naas gaalo al-tilmiiz da ma yumuut. Wa l-kalaam da chattat fi ust al-akhwaan. Laakin Isa ma gaal le Butrus kadar al-tilmiiz al-aakhar ma yumuut. Hu gaal : «Kan nidoor hu yagood lahaddi nigabbil kula, da ma lammaak.» 24Wa da bas al-tilmiiz al-gaaʼid yachhad le Isa fi l-kalaam da. Wa hu bas al-katab kulla l-kalaam fi l-Kitaab da wa naʼarfu chahaadtah sahiihe.
25Wa Isa sawwa achya ziyaada ma maktuubiin fi l-kitaab da. Wa fi fikri ana, kan dawwaro yaktubu kulla l-achya dool, al-dunya kullaha ke ma tagdar tichiil al-kutub al-yaktubuuhum.

Currently Selected:

Yuuhanna 21: ADT19

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy