Yuuhanna 2
2
Al-almi bigi khamar
1Wa fi l-yoom al-taalit, naas waahidiin fi hillit Kaana fi daar al-Jaliil sawwo aazuuma hana iris wa amm Isa hidrat. 2Wa azamo Isa kula wa talaamiizah. 3Wa fi l-aazuuma, al-khamar kammal wa amm Isa hajjat leyah wa gaalat : «Khamarhum kammal.» 4Wa Isa radda leeha wa gaal : «Ya mara zeene, tidoori minni chunu ? Wakti lissaaʼ ma tamma». 5Wa ammah hajjat le l-khaddaamiin wa gaalat : «Sawwu ayyi cheyy al-hu yuguulah leeku.»
6Wa fi sitte dawaayin kubaar gaaʼidiin fi l-bakaan da. Wa dool dawaayin hana hajar wa yusubbu fooghum almi hana wadu al-Yahuud wa ayyi waahide minhum tichiil hawaale 100 liitir. 7Wa Isa hajja le l-khaddaamiin wa gaal : «Amlo al-dawaayin almi.» Wa khalaas maloohum tak. 8Wa Isa gaal leehum : «Hassaʼ chiilu almi chiyya wa wadduuh le siid al-aazuuma.» Wa khalaas waddooh leyah.
9Wa siid al-aazuuma daakh al-almi wa ligiih bigi khamar. Wa hu ma irif al-khamar ja min ween wa laakin al-khaddaamiin al-kharafo al-almi irfooh. Wa siid al-aazuuma naada al-ariis 10wa gaal leyah : «Naas aakhariin yantu diifaanhum al-khamar al-halu awwal. Wa baʼad al-diifaan chirbo katiir, yantuuhum al-khamar al-ma halu. Wa laakin inta akhkhart al-khamar al-halu wa hassaʼ bas anteetah leena.»
11Wa l-ajab al-Isa sawwaah fi hillit Kaana fi daar al-Jaliil, di awwal alaama al-Isa wassafaaha. Wa be misil da, hu wassaf gudurtah al-majiide le talaamiizah wa humman aamano beyah. 12Wa baʼad da, hu macha maʼa ammah wa akhwaanah wa talaamiizah fi hillit Kafar Naahuum wa gaʼado ayyaam.
Al-Masiih fi beet Allah
13Wa wakit iid al-Fisha hana l-Yahuud garrab, Isa macha fi Madiinat al-Khudus. 14Wa macha fi fadaayit beet Allah wa chaaf al-naas al-gaaʼidiin yibiiʼu bagar wa khanam wa hamaam wa l-naas al-gaaʼidiin yibaddulu gurus. 15Wa chaal hubaal waahidiin wa sawwa beehum soot. Wa tarad beyah kulla l-naas min fadaayit beet Allah maʼa l-bagar wa l-khanam. Wa rama taraabiiz hana l-naas al-gaaʼidiin yibaddulu gurus wa chattat gurushum. 16Wa hajja be hiss chadiid le l-naas al-gaaʼidiin yibiiʼu hamaam wa gaal : «Amurgu khumaamku min hini ! Khallu minku al-tijaara fi beet abuuyi !» 17Wa talaamiizah fakkaro fi l-kalaam al-maktuub al-buguul : <Hubbi le beetak bigi leyi misil naar haragatni.>#2:17 Al-kalaam da talgooh fi Zabuur 69:9.
18Wa kubaaraat al-Yahuud saʼalooh wa gaalo : «Antiina daliil al-yiwassif al-amal al-gaaʼid tisawwi !» 19Wa Isa radda leehum wa gaal : «Dammuru al-beet da wa ana nigawwimah fi talaata yoom.» 20Wa kubaaraat al-Yahuud raddo leyah wa gaalo : «Al-beet da gaaʼidiin yabnuuh min 46 sana wa inta tidoor tabniih marra taaniye fi talaata yoom ?»
21Wa laakin wakit Isa gaal al-beet da, hu ma hajja be l-beet al-banooh al-naas. Hu hajja be jismah. 22Wa wakit Allah baʼas Isa min ust al-maytiin khalaas, talaamiizah fakkaro fi l-kalaam al-gaalah da wa aamano be l-kutub wa be kalaam Isa.
23Wa wakit Isa gaaʼid fi Madiinat al-Khudus fi iid al-Fisha, naas katiiriin aamano beyah achaan chaafo al-ajaayib al-Isa gaaʼid yisawwiihum. 24Wa laakin Isa ma aamanaahum achaan hu yaʼarifhum adiil. 25Wa ma dawwar yiʼarrufu leyah al-naas achaan hu irif kulla cheyy al-gaaʼid fi guluubhum.
Currently Selected:
Yuuhanna 2: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.