Khalaatiya 1
1
1Jawaab minni ana Buulus al-bigiit rasuul ma be izin al-naas wa la be niiyithum, laakin be izin Isa al-Masiih wa Allah abuuh al-baʼasah min ust al-maytiin. 2Al-jawaab da jaayi minni wa min kulla l-akhwaan al-maʼaayi wa hu le jamaaʼaat al-muʼminiin al-fi balad Khalaatiya. 3Aleekum al-salaam wa l-rahma min Allah abuuna wa Rabbina Isa al-Masiih 4al-gaddam nafsah dahiiye fi chaan zunuubna achaan yinajjiina min charr al-dunya di hasab niiyit Allah abuuna. 5Wa l-hamdulillah daayman wa ila l-abad. Aamiin.
Bichaarat al-Masiih hi waahide
6Ana ajjabt leeku bilheen. Allah naadaaku achaan tiʼiichu be niʼmat al-Masiih wa tawwaali intu gammeetu khalleetuuha achaan tidooru titaabuʼu bichaara aakhara. 7Wa be l-sahiih, ma fi bichaara aakhara laakin naas waahidiin gammo yibarjuluuku be kalaamhum wa yidooru yitallufu bichaarat al-Masiih.
8Wa laakin kan ayyi naadum minnina walla malak min malaaʼikat Allah yaji yiballikh leeku bichaara be l-Masiih chig min al-bichaara al-ballakhnaaha leeku di, khalli Allah yalʼanah. 9Awwal gulnaah wa hassaʼ ana nuguulah battaan, kan naadum yiballikh leeku be l-Masiih bichaara chig min al-bichaara al-awwal simiʼtuuha di, khalli Allah yalʼan al-naadum da.
10Chunu fikirku fi l-kalaam da ? Nidoor nalga beyah rida min al-naas walla rida min Allah ? Nidoor naʼajib al-naas walla ? Nuguul leeku kan ana lissaaʼ nidoor naʼajib al-naas, khalaas ana ma abd al-Masiih.
Bichaarat al-Masiih jaat min Allah
11Ya akhwaani, nidoor kadar intu taʼarfu al-bichaara al-ballakhtaha leeku ma jaat min al-naas. 12Wa naadum ma antaaha leyi wa ma fi naadum garraaha leyi. Laakin Isa al-Masiih bas bayyanha leyi. 13Akiid taʼarfu haali wakit ana lissaaʼ nitaabiʼ diin al-Yahuud. Simiʼtu ana taʼʼabt be chidde naas Allah ummat al-Masiih wa dawwart nidammirhum marra waahid. 14Wa fi diin al-Yahuud, ana faayit naas katiiriin al-umri maʼaahum sawa achaan ana munkarib bilheen fi aadaat juduudna.
15Laakin min ana fi batun ammi, Allah azalaani wa be niʼmatah, naadaani. Wa fi l-wakit al-Allah gataʼah leyi, 16hu bayyan Ibnah fi galbi achaan nibachchir beyah fi buldaan hana naas al-ma Yahuud. Wa ana ma chaawart ayyi insaan. 17Wa ma macheet lammeet maʼa l-naas al-bigo rusul gubbaali al-gaaʼidiin fi Madiinat al-Khudus. Laakin futt tawwaali fi daar al-Arab wa baʼadeen gabbalt fi madiinat Dimachkh.
18Wa baʼad talaata sana, khalaas macheet Madiinat al-Khudus achaan nilʼaarafo maʼa Butrus. Wa gaʼadt maʼaayah 15 yoom. 19Laakin ma chift naadum aakhar min al-rusul illa chift Yaakhuub akhu al-Rabb Isa. 20Wa kulla l-kalaam al-katabtah leeku da sahiih. Wa Allah yaʼarfah.
21Wa baʼad da, gammeet nuruukh fi Suuriya wa Kilikiiya. 22Wa fi l-wakit da, jamaaʼaat al-Masiihiyiin al-fi daar al-Yahuudiiya lissaaʼhum ma irfooni. 23Simʼo al-khabar al-buguul : «Al-naadum al-awwal taʼʼabaana, hassaʼ gaaʼid yiballikh le l-naas be l-iimaan al-awwal dawwar yidammirah.» 24Wa chakaro Allah fi chaani.
Currently Selected:
Khalaatiya 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.