Zûu 1
1
Laa-ti-maa
1Ńyãa Zûu, ŋ́gaa a Zîsɛ Kôrai yée-mu-nuu, ŋ́gɛ ƃo a Zĩi ǹêɣe,
Diai Ɣâla è dítòli, nyíi-ŋai Ɣâla Nàŋ-nuui è díwɛli, nyíi-ŋai Ɣâla è díkɛ̀ naa Zîsɛ Kôrai mɛni mai.
2Maloŋ-kaa, lii-sêe, da wɛli-kɛ-maa díkɛ káyêei a dámaa.
Ǹɛ́ɛ-sɛŋ lɛ́-ƃelai dímɛni-ŋa-teɛɛi
3Ŋáwɛli-kɛ-maa ƃelai, berei ŋá ŋ̀wɛ̂lii kpɔ́ la a gbanaŋɔɔ a gɛɛ ŋá kɔlɔ pɔ̃yɛ̂ kápɔ naa kúƃalo-laa tɔnɔi mɛni mai, ŋá gàa a mɛni lɛ́lɛɛ a gɛɛ ŋá kɔlɔ pɔ̃yɛ̂ kápɔ naa ŋá kálôa-woo ƃo a gɛɛ ká ǹaa-laai maa-namu kɔ́ nyíi dí dɛ̀ɛ Ŋ̀âla-ƃelai pɔ́ nɔ́ zu tɔnɔɔi. 4Kpɛ́ni fêi, núu da-ni da lɔ́ kúsama loo-pere su nyíi-ŋai dítɔ̂ŋ-pu-maai maa-mɛni è ƃò nàa tuɛi. Maa-ƃelai díkaa a ŋwana-lɔ̂ɔ-ƃela nyíi-ŋai Kúɣâlai ŋɔƃɛlɛ-sêei pène wolii-kpɔlɔ su. Dí Kúmɛi-nuu tɔnɔi Kúnuu-namui Zîsɛ Kôrai maa-sia tòo.
5Ŋa ŋ̀wɛ̂lii ŋá mɛni tóo kákili ŋá, berei máŋ dí kákili ŋá pòno la a ǹáa fɛ́ɛ nɔ́ zu tɔnɔɔi, a gɛɛ ǹúui ǹûai ƃàlo é díkula Ize-lɔii sui, diai laa-la fé díyêei, é dísu kara nàa pôlu ma. 6Ǹyaŋ ŋ̀âla-taa-kela-ŋai nyíi-ŋai dífe lɛ̀ɛ ní díkpîŋ-tii-ŋai mɛi, kɛ́lɛ, dí kùla díkpîŋ-kwaa-ŋai diai, Ɣâla è dípu Dɛ̂ƃele-taa-kpinii sú a gɛɛ dí lɛ́ɛ naa mɛni-ŋa-tee-ɣele kɛ́tɛi é seri. 7Berei nɔ́ ƃe Sodɔŋ da Gomora da nàa kɔlɛ ma-taa-ŋai su-ƃelai dí tùa la máŋ a wulu-wulu kɛ́ pere dí díkpîŋ kɛ́ a tua-pere-nyɔŋ maa-sɛŋ wɛliɛ-ƃelai dai, ǹyaŋ díkaa a mɛni-kɔɔŋ-maa a tɔŋ-kpɛ́-maa sɔlɔ-ƃoɔɔ a wɔlɔ-wɔlɔ-ŋɔŋ.
8Kɛ́lɛ, é máŋ kɛ́ tí, bere-sii tɔnɔi ŋí su, ǹûai ŋí máŋ da núu kpono kara díkili-ŋa-sia nyɔ́mɔɔi su. Dífa díwoli tɔ̀ɔ ǹúu-tuɛ-ƃelai dîa, díkɛ lóno nyɔ́mɔɔ kɛ̀ gɛ́ pîlaŋ Kôrai ŋɔfólo-laai ma. 9Kɛ́lɛ, tãi ŋ̀âla-taa-kela kɛ́tɛi Makɔɔ da Dɛ̂ƃele dí kɛ̀ kɔ̂i la, díkɛ Mose kpono maa-sia tooi, vé kɔ́ ní a gɛɛ é ŋɔmɛni ŋá tée a lóno nyɔ́mɔɔ-ŋa, kɛ́lɛ, è mò, nyɛɛ, “Tɔɔ Kúnuu-namui é lóno yâ.” 10Kɛ́lɛ, ǹûai ŋí da lóno nyɔ́mɔɔ kɛ̀ é pîlaŋ mɛnii kélee ma dífa târe zui. Ǹyaŋ mɛni-ŋai da târe zu díkpîŋ kponôi yɛ̂ɛ sua-ŋa nyíi-ŋai târe fé díyêei, ǹya ƃa dísu kàra. 11Kpalo ƃélaâi dîa! Kpɛ́ni fêi, da sîa a Kîŋ ŋɔperei, díkɛ sɔnyɔ̂ŋ kɛ̀ sɛŋ-kao mɛni ma yɛ̂ɛ Beelaŋ. Dí tɔ̀ɔ mà yɛ̂ɛ berei Kora è gɛ̀ lai. Ǹyaŋ dí sàa nɔ́ yɛ̂ɛ berei è sàa lai. 12Ǹûai ŋí díkaa a kúwɛli-kɛ-maa kûu-ŋai kara-ƃela, yɛ̂ɛ berei da lɔɔ-kpele-kûu kɛ̀ la gîe ma pono ŋa, díkɛ kpaaŋ nɔ́ díkpîŋ mɛni mai. Díkaa nɔ́ yɛ̂ɛ ɣele-kɔlɔŋ kole nyíi tuna fé zui nyíi fãa a tɛ̂ɛ lai. Díkaa a wúru-ŋai nyíi-ŋai dífa ƃâi. Dí sàa gîe feerɛ, díƃuleŋɔɔ. 13Berei yúo a tôo la gɛ̀ fúle-fulei bere nɔ́ ƃe díkpîŋ a lɛ̂ la fíeŋ ŋá. Díkaa nɔ́ yɛ̂ɛ pɛmɛlɛŋ-kao-ŋa ƃe siâi, ǹyaŋ Dɛ̂ƃele-taa-kpinii káa naa dímɛni ma wɔlɔ-wɔlɔ da wɔlɔ-wɔlɔ.
14Ǹûai ŋí ƃe máŋ Inɔsi, nyíi kɛ̀ ŋɔsuui-seei mɛi feerɛ su é kúla Adaŋ mai, é dímaa-mɛni ƃò nàa tuɛ, nyɛɛi, “Ka gáa, Kúnuu-namui è pà a Ŋɔɣâla-taa-kelai ŋ̀wála támaa maa waai, 15a gɛ́ɛ é núu kélee ŋɔmɛni ŋá tée é tɔ̂ŋ pu ŋ̀wana-lɔ̂ɔ-ƃelai dîa díŋwana-lɔ̂ɔ-tuai kélee mɛni ma nyíi-ŋai dí gɛ̀ a ŋwana-lɔ̂ɔ-pere da ŋ̀óo kpanaŋ nyɔ́mɔɔ-ŋai kélee nyíi-ŋai zɔnyɔ̂ŋ-ƃelai nyíi-ŋai dífe Ɣâla-mɛni wɛ́li nii dí mò a ǹáai.” 16Ǹûai ŋí díkaa a mɛni-saa-ƃela. Dílii fa lâa, díkɛ pîlaŋ díkpîŋ tua-pere-nyɔŋ maa-sɛŋ-wɛliɛi pôlu. Díkɛ yoŋka tèe a díwoo su kɛ́tɛ, díkɛ lóno lɛ́lɛɛ kɛ̀ nûa pɔ́ a gɛ́ɛ dí sɛŋ sɔlɔ ƃo.
Lia-woo
17Kɛ́lɛ, ŋáwɛli-kɛ-maa-ƃelai, fɛ̂ɛ Kúnuu-namui Zîsɛ Kôrai ŋɔsia-ƃelai dímɛni-ƃoɔɔ nàa tuɛi maa-mɛni é lɛ́ɛ kákili ŋá. 18Dí mò kâa, díyɛɛi, “Ŋelei gbɛɛ ŋái da pâi kɛ̂i a ǹûai da ɣɛlɛ-maa kùla Ɣâla kponôi. Da pâi kɛ̂i a ŋwana-lɔ̂ɔ-ƃelai nyíi-ŋai da pîlaŋ díkpîŋ tua-pere-nyɔŋ maa-sɛŋ-wɛliɛi pôlui.” 19Ǹûai ŋí ƃa ŋa kɔlɛ kɛ̀. Díkaa a ŋ̀éniɛi ŋí su-ƃela, Mɔ̂leŋ fé díyêei. 20Kɛ́lɛ káa, ŋáwɛli-kɛ-maa-ƃelai, ka kákpîŋ tɔ̀ɔ kálaa-la kɛ́tɛ maa waai sârai. Ka Ɣâla fɛli M̀ɔlêŋ Maa Waai ŋɔwala-wala-laai su. 21Ka kákpîŋ kɛ́ Ɣâla ŋɔwɛli-kɛ-maai su. Ka Kúnuu-namui Zîsɛ Kôrai ŋɔmaloŋ kaai maa kpɛ́ŋ nyíi pâi wɔlɔ-wɔlɔ fulu-laa tɛɛ̂i kápɔi. 22Diai da sia tòoi, ka dílii pene. 23Ka da-ni ƃálo a díkulaa ŋɔŋ su. Ká da-ni malôŋ káa a yao-maa. Ká díseɣe-ŋai kpɔara máŋ nyíi-ŋai díkpono a díkarai.
Ǹaa maa tɛ̂ Ɣala fɛliɛɛi
24Ǹúui pɔ̂ri káa mì a gɛɛ é kákɛ káfe tooi, nyíi pɔ̂ri káa mi a gɛɛ é kálɛ ŋɔfólo-laai ŋ́ɛi-tuɛ a lii-nɛ̃ɛ, pɔ́ɔ kélee da fé kɛ̀ kâai, 25fólo-laa, kɛ́tɛ-laa, da kpanaŋ-laa, é pɛ́lɛ wala-wala-laa ma dí kɛ́ Ŋ̀âla tɔnɔi ma tãi kélee tuɛ da tãi ŋí su, é pɛ́lɛ wɔlɔ-wɔlɔ ma, Ŋ̀âla tɔnɔi nyíi gáa a Kúƃalo-nuui Kúnuu-namui Zîsɛ Kôrai sârai. É kɛ́ ti.
Currently Selected:
Zûu 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia