Zasua 1
1
Ɣâla è mò Zasua ma a gɛ́ɛ é lí é Kena lɔii kula yêei kɛ́
1Yâwɛɛ ŋɔtíi kɛ́ nuui Mose saá pôlu ma, Yâwɛɛ é mò Nuŋ ǹóŋ Zasua ma, nyíi kɛ̀ a Mose ŋɔkpɔŋ mâa nuui, ǹyɛɛ m̀ai, 2“Ŋátii kɛ́ nuui Mose a nâa saa. M̀ɛni ma, ímu síɣe ka Eezuɛ-ŋai ká lí Zɔdiŋ Ya-leei pôlu, ǹɔii ma nyíi ŋa pâi dɛɛ̂i kápɔi. 3Ǹɔii nyíi kélee ka sère m̀ai, ŋa pâi nàa tɛɛ̂i kápɔ yɛ̂ɛ berei ŋá ŋ́gono tèe la Mose yêei. 4É síɣe vɛ̃ɛ-kpâlaŋ su é lí Lɛƃanɔŋ lɔii su é seri ŋɔ́nɔ ǹya-lêe kɛ́tɛi ma nyíi da dòli a Yufeletii Ya-leei, ǹɔii kélee gáa Ita lɔii su é seri Mɛditɛrenia Yuoi ma vóloi lîi-perei, a pâi kɛ̂i a kálɔii-kpîniŋ. 5Núu da kélee yée fé pâi pɔrîi yâ ífulu-laai su. Ŋa pâi kɛ̂i íkɔlɛ yɛ̂ɛ berei nɔ́ ŋá kɛ̀ la Mose kɔlɛi. Ḿve pâi teêi ípôlu kpaa máŋ ŋá ḿbôlu tɔɔ yâ. 6Tɔɔ a gbanaŋɔɔ, í ílii kpele, kpɛ́ni fêi, yá ƃé pâi gɛ̂i ǹúai ŋí dí see ǹɔii ma ŋá ŋ́gono tèe la dínâŋ-ni yêei. 7Tɔɔ a gbanaŋɔɔ, í ílii kpéle, í dɔ̂ŋ-ŋai kélee mɛi káa nyíi-ŋai ŋátii kɛ́-nuui Mose è dɛ̀ɛ ípɔi. Ka dɔ̂ŋ-ŋai ŋí mɛi kâa, gɛ̀ ní ɣéniɛ a pâi nɛ̃ɛ̂i yâ. 8Ka tíi kɛ́ a dɔ̂ŋ-ŋai Ŋ̀âla-kɔlɔi ŋí sui a kpíni da fólo. Kà gɛ̀ tí, gɛ̀ ní ɣéniɛ a pâi nɛ̃ɛ̂i kâa, ká ƃûu ƃó. 9Fé m̀ó ní yâ? Tɔɔ a gbanaŋɔɔ, í ílii kpéle, ífe yao, ílii fé tòo pôlu, kpɛ́ni fêi, ńyãa Yâwɛɛ Íɣâlai, ŋa pâi kɛ̂i ípôlu ƃɛ́i kélee ƃa lî naai.”
Zasua è mò a ǹûai dîa a gɛ́ɛ dí lí Keena
10Nya ƃe Zasua è mò Eezuɛ ŋuŋ túɛ-ƃelai dîa ǹyɛɛi, 11“Ka lí m̀ûui su ká mó ǹûai dîa a gɛ́ɛ dí díkpiri-ŋai kpɛtɛ, kpɛ́ni fêi, fólo saaƃa à tɛ̀ɛ, ka pâi Zɔdiŋ Ya-leei tîyenii ká sée ǹɔii ma Yâwɛɛ ká Ɣâlai a dɛɛ̂i ká pɔi.”
12Zasua è mò Lubiŋ, Gâa da Manasɛ ŋɔsuui su-ƃelai kpéli-ŋai dîa ǹyɛɛi, 13“Ŋ̀óoi é lɛ́ɛ kákili ŋá nyíi Mose, Yâwɛɛ ŋɔtíi kɛ́-nuui e mò kâai, a gɛ́ɛ Yâwɛɛ Káɣâlai káa kwaa ma kpɛtɛ̂i kámɛni ma. Ǹyaŋ a pâi ǹɔii ŋí tɛɛ̂i kápɔ. 14Kánɛyâai, kánîa-pɛlɛɛi da kátaa-tûlɛ-ŋai da pâi lɛɛ̂i Zɔdiŋ Ya-leei vóloi-ƃêlai pere. Kɛ́lɛ gɔ́ kɔ́-ƃelai kásamai da pâi Zɔdiŋ Ya-leei tíyenii díƃarâai túɛ a gɛ́ɛ dí kpɔŋ mâa tɛɛ dípɔ 15é lɛ̀ɛ la zu Yâwɛɛ é ǹɔii tɛ́ɛ kánûai pɔ́ yɛ̂ɛ berei è wɔ́lɔ dɛ̀ɛ la kápɔi. Gɛ̀ ní ká lene pôlu kálɔii ma nyíi Mose Yâwɛɛ ŋɔtíi kɛ́-nuui è dɛ̀ɛ kápɔi.”
16Lubiŋ, Gâa da Manasɛ ni ŋɔsuui su-ƃelai kpéli-ŋai dí Zasua wóo su tòo dîyɛɛ m̀ai, “Kwa pâi m̀ɛnii kélee kɛ̂i ya mò kûai, ǹyaŋ kwa pâi liî ƃɛ́i kélee ya kútɛ̀ɛ naai. 17Kwa pâi íwoo mɛnîi yɛ̂ɛ berei kú Mose wóo mɛ̀ni lai. Tɔɔ Yâwɛɛ Íɣâlai é kɛ́ íkɔlɛ yɛ̂ɛ berei máŋ è kɛ̀ la Mose pôlui. 18Ǹúui nyíi kélee pâi tɔɔ̂i yâ, va íwoo mɛnii, kwa pâi maa nûui paâi. Kɛ́lɛ tɔɔ a gbanaŋɔɔ, ílii kpeléɛ.”
Currently Selected:
Zasua 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia