Kɔlɔnikɔ Maa-ŋuŋ 4
4
Zuda ŋɔsuui su-ƃelai
1Zuda ŋɔsuui su-ƃelai ƃé kɛ̀ a: Peresi, Ezirɔŋ, Kaami, Uɔɔ da Sobaa. 2Sobaa ƃé kɛ̀ a Le-aiya ǹâŋ. Le-aiya ƃé kɛ̀ a Zaa ǹâŋ Zaa ƃé kɛ̀ a Aumai da Laa dínâŋ. Ǹûai ŋí ƃé kɛ̀ a Zora-ŋai dínuu-suui su-ƃelai.
3Itaŋ ǹônii-sinaai ƃé kɛ̀ a: Zariɛɛ, Isima da Idibasi. Dísaaƃɔlɔ láa ƃé kɛ̀ a Aseleponi. 4Pɛnuɛ ƃé kɛ̀ a Geedɔ ǹâŋ, Izɛ ǹyaŋ gɛ́ ƃò a Usaŋ ǹâŋ. Uɔɔ ƃé kɛ̀ a Kelɛ ŋɔnɛnîi Ɛfata ǹóŋ duɛ-tuɛi. Uɔɔ ŋí ŋɔsuui su-ƃelai ƃé Bɛpeleɣɛ̃ɛ taa-lêei tɔ̀ɔ.
5Asɔɔ ƃé kɛ̀ a Tekoa ǹâŋ. Nɛnî feerɛ ƃé kɛ̀ Asɔɔ yêei. Dílaa ƃé a Ɛla da Naara. 6Naara da Asɔɔ dínîa-pɛlɛɛi ƃé kɛ̀ a: Auzaŋ, Ɛfɛ, Temeni da Aa Asitari. Dia ƃé kɛ̀ a Naara ŋɔsuui su-ƃelai. 7Ɛla ǹônii-sinaai ƃé kɛ̀ a: Zere, Iza da Etinaŋ.
8Kozi ƃé kɛ̀ a Anu da Zoƃeba dínâŋ. È kɛ̀ máŋ a Aluŋ ǹóŋ Aaɛ ŋɔsuu su nuui da.
9Nalôŋ tɔnɔ è kɛ̀ naa ǹáa ƃé kɛ̀ a Zabɛsi. Ƃaa-kɛ-maa támaa è kɛ̀ ma ǹêɣe-sinaai da ǹîa-sinaai sáma. Ǹee è ǹáa sèe a Zabɛsi,#4:9 Zabɛsi: Ǹáai ŋí ƃoloŋɔ̂ɔi ŋ̀óoi ma da dòli a “mɛni sôli” Ibulu-wooi su, kpɛ́ni fêi, ǹee è mò ǹyɛɛi, “Ŋá mɛni sôli támaa kàa a m̀aa sɔlɔ ƃó tãi.” ǹyɛɛi, ŋá ǹáai ŋí sèe mà, kpɛ́ni fêi ŋá m̀aa sɔlɔ ƃò mɛni kpɔ̂lu su.
10Zabɛsi ŋí è wɔ̀lɔ Eezuɛ Ɣalai ma a ɣele tɔnɔ da ǹyɛɛi, “Óo ye lûwa láa ḿâ í ŋálɔii-kpiniŋ su kɛ́tɛ. Ǹɛɛ naa íyee é kɛ́ ḿɛi í ŋ́gula mɛni kpɔ̂lu su a gɛ́ɛ ḿve sɛŋ sôli maa sɔlɔ ƃô.” Nya ƃe Ɣâla è ǹyée sèe ŋɔfɛli-wooi mu.
Ǹúu-suui da ni-ŋa láa
11Selu è kɛ̀ a Sua ǹîa. Ǹóŋ-surɔŋ láa ƃé kɛ̀ a Mei. Mei è kɛ̀ a Ɛsitɔŋ ǹâŋ. 12Ɛsitɔŋ ǹônii-sinaai díkɛ̀ saaƃa: Berafa, Pasea da Teinaŋ. Teinaŋ ƃé Inasi ǹâŋ. Ǹûai ŋí ƃé kɛ̀ a Leka-ƃelai.
13Kenasi ǹônii-sinaai ƃé kɛ̀ a: Otiniɛ da Seraiya. Otiniɛ ǹônii-sinaai ƃé kɛ̀ a: Ata da Meonotai. 14Meonotai ƃé kɛ̀ a Ofura ǹâŋ. Seraiya ƃé kɛ̀ a Zoa ǹâŋ. Zoa è taa tɔ̀ɔ ǹyée loai. Daai su-ƃelai kélee díkɛ a yɛrɛ kɛ́-ƃela.
15Zefune ǹóŋ Kelɛ ǹônii-sinaai ƃé kɛ̀ a: Iru, Ela da Naaŋ. Ela ǹóŋ-surɔŋ ƃé kɛ̀ a: Kenasi.
16Zealelei ǹônii-sinaai ƃé kɛ̀ a: Zifi, Zifa, Tiriya da Asaree.
17Esira ǹônii-sinaai ƃé kɛ̀ a: Zetɛ, Mere, Efɛ da Zaloŋ. Mere ŋɔnɛnî dɔnɔ è kɛ̀ a Ize kaloŋ ǹóŋ-nɛnî. Ǹáa ƃé kɛ̀ a Betia. Da ǹyaa dí lóŋ-nɛni tɔnɔ da lóŋ sinaa feerɛ maa sɔlɔ ƃò. Dí díloŋ-nɛnii láa sée a Meriaŋ. Dílônii-sinaai láa ƃé kɛ̀ a Samai da Isiba. Isiba ƃé wɔ́lɔ Ɛsitemoa-taai tɔ̂ɔ. 18Merɛ è ŋɔ́nɔ Zûu-nɛni tɔnɔ kùla a ŋɔnɛnî. Da ǹyaa dí lônii-sinaa saaƃa maa sɔlɔ ƃò. Dílôloŋ dɔnɔ láa ƃé kɛ̀ a Zɛre. Zɛre ƃé kɛ̀ a Gedɔ-ǹâŋ. Veerɛi láa ƃé kɛ̀ a Ɛbɛ ƃé kɛ̀ a Soko ǹâŋ, Zekutiɛ ƃé kɛ̀ a Zanoa ǹâŋ.
19Odaya è Naaŋ zaaƃɔlɔ kùla a ŋɔnɛnî. Ǹɛnîi ŋí ǹônii-sinaai ƃé kɛ̀ a Gami suui su nuui Keila da Maaka suui su nuui Ɛsitemoa dísuui su-ƃelai dínâŋ ni.
20Simiɔŋ ǹônii-sinaai ƃé kɛ̀ a: Amɔŋ, Lina, Bɛŋ-Ana da Talɔŋ. Isi ŋɔsuui ƃé kɛ̀ a Zoɛ da Bɛŋ-Zoɛ.
Sela ŋɔsuui su-ƃelai
21Sela è kɛ̀ a Zuda ǹônii-sinaai dɔnɔ. Ɛɛ ƃé kɛ̀ a Leka ǹâŋ, Laada kɛ́ ƃò a Maresa ǹâŋ. Ŋɔsuui su ƃé Zeɣe kole fɛŋ-fɛŋ pala-ƃelai díkùla naa. Díseɛɛ è kɛ̀ Bɛ-Asibea-taa su. 22Zokaŋ é pɛ́lɛ ǹûai dîa nyii-ŋai kɛ̀ Kosiba-taai sui da Zoasi é pɛ́lɛ Sarafi nyii-ŋai Môa nɛyãai kùla dí sée Bɛpeleɣɛ̃ɛ. (Mɛni-ŋai ŋí káa a mɛni pɔ̂lɔ-pɔlɔ.) 23Dia ƃé kɛ̀ a gâloŋ ŋɔleɣi tɔɔ-ƃelai. Díseɛɛ è kɛ̀ Netaiŋ da Gedɛra taa-ŋai su.
Simiɔŋ ŋɔsuui su-ƃelai
24Simiɔŋ ŋɔsuui su-ƃelai ƃé kɛ̀ a: Nemuɛ, Zamiŋ, Zari, Zera da Sauɛ. 25Saluŋ è kɛ̀ a Sauɛ ǹóŋ, Saluŋ kɛ́ ƃò a Misaŋ ǹâŋ, Misaŋ ǹyaŋ kɛ́ ƃò a Misima ǹâŋ. 26Misima ŋɔsuui su-ƃelai ƃé kɛ̀ a: Amuɛ ƃê kɛ̀ a Zakɔ ǹâŋ, Zakɔ ǹyaŋ kɛ́ ƃò a Simei ǹâŋ. 27Simei ǹônii-sinaai díkɛ̀ puu káo lɔ́ɔlu mɛi da, nɛyãai dí ƃò lɔ́ɔlu mɛi-da. Kɛ́lɛ Simei ǹêɣe-sinaai dífe nîa-pɛlɛɛ támaa maa sɔlɔ ƃó ní. M̀ɛni ma, dínuu-suui fé kɛ́ ní a dámaa yɛ̂ɛ Zuda ŋ̀ɔi.
28Ǹûai ŋí seɛɛ è kɛ̀ daa-ŋai ŋí su é lɛ́ɛ la zu Deeƃé é kɛ́ a kâloŋ. Daa-ŋai kpîŋ ƃé kɛ̀ a: Bɛɛsiba, Molada, Aza Sua, 29Biia, Ɛzeŋ Tola, 30Bɛtuɛ, Ɔma, Zikila, 31Bɛ-Makabo, Aza Susiŋ, Bɛɛ-Biri da Saaraiŋ ma. 32Ǹûai ŋí da-ni díkɛ̀ daa-lêe lɔ́ɔlui ŋí su máŋ: Itaŋ, Aiŋ, Limɔŋ, Tokeŋ da Asaŋ. 33Kpânaŋ-ŋa díkɛ̀ naa kɔlɛ ma é lɛ́ɛ la zu é seri Bee taai su. Ǹɔii-kpiniŋ ŋí ƃé kɛ̀ a ǹûai ŋí dísuui ŋɔlɔii kpiniŋ. Dí wɔ́lɔ dínûai kélee láa sìɣe. Diai dí dílaa siɣei dia ƃé kɛ̀ a:
34-38Zinaai ŋí ƃé kɛ̀ a dínuu suui láa túɛ-ƃela: Mesoba, Zamilɛ, Amazaya ǹóŋ Zosa, Zoɛ, Zosibia ǹóŋ Zeu, Seraiya ǹóŋ, Asiɛ ǹóŋ, Ili-o-niɛɛ, Zaakoba, Zesoaiya, Asaiya, Adiɛ, Zesimiɛ, Benaiya, Sifi ǹóŋ Zina, Alɔŋ ǹóŋ Zidaiya, da Semaiya ǹóŋ Simiri. Ǹûai ŋí dísuui è wɔ́lɔ kɛ̀ a núu-suu su kɛ́tɛ. 39Dí tàa-taa kpɔ́ dí seri Gedɔ-taa kɔlɛ ma. Da kâa lì diŋ-tiŋ su vóloi ƃêlai-pere kala ŋûnu kɔ̂rii naa dítaa-tulɛ-ŋai mɛni ma. 40Dí kala ŋûnu lɛ́lɛɛ kàa naa. Gwaai ŋí ma è kɛ̀ a lɔii lɛ́lɛɛ, kpɛ́ni fêi, è kɛ̀ a lii-see lɔii, naa kɛ́tɛɛ dímaa mɛni ma. Aaŋ ŋɔsuui su-ƃelai ƃé kɛ̀ ǹɔii ŋí su a maa ŋuŋ.
41Ǹûai ŋí dí dílaa sìɣei, dí pà ǹɔii ŋí su Ɛsekaya ŋɔkâloŋ-laa koraŋ su Zuda lɔii mɛi. Dí kɔ́ pɛ̀lɛ Aaŋ ŋɔsuui su-ƃelai dîa da Meuniŋ-ŋai dîa díyee mɛi ɣále. Dí díyee mɛi ɣâle dí díkelee kpɛ dí ǹɔii ŋí síɣe a díƃala-ŋai mɛi kâai. Díkaa naa é tóo sâa ma. 42Simiɔŋ ŋɔsuui su-ƃelai ŋuŋ lɔ́ɔlu (500) dí lì Siɛ Yeei ma ǹyée lɔii su. Ǹúai ŋí láa túɛ-ƃelai ƃé kɛ̀ a: Pelatia, Niaria, Lefaya da Uiɛ. Ǹûai ŋí díkɛ̀ a Isi ǹônii-sinaai. 43Simiɔŋ ŋɔsuui è ŋɔ́nɔ lì é Amalɛ-ƃelai nyii-ŋai wɔ́lɔ pù dí sée ǹɔii tí sui díkelee dípaa. Díkaa naa é tóo sâa ma.
Currently Selected:
Kɔlɔnikɔ Maa-ŋuŋ 4: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia