Kɔlɔnikɔ Maa-ŋuŋ 23
23
1Gâloŋ Deeƃé kɛ́ɛ a pɔlɔi, è ŋɔlôloŋ Saloma lɛ̀ɛ bɔ́ɔ ŋá a Eezuɛ-ŋai díkâloŋ.
Liiva-ŋai dítii-ŋai
2Gâloŋ Deeƃé è Eezuɛ mɛi-ƃelai kélee, zâla láa-soŋ-ƃelai da Liiva-ŋai kélee ŋáa tɛ̀ gîe ma. 3È Liiva-ŋai díkoraŋ è kɛ̀ a kóraŋ buu-saaƃai é tɛ́ ǹaa mɛi perei lòno. Díkelee díkɛ̀ a kpakolo (38,000) wála buu saaƃa káo lɔ́ɔlu mɛi. 4È mò ǹyɛɛi, “Ǹûa (24,000) wála buu feerɛ káo naaŋ ŋí ƃé pâi kɛ̂i tíi kɛ̂i Yâwɛɛ ŋɔpɛ́rɛi mu. Dí (6,000) wála lɔ́ɔlu mɛi da ƃé pâi kɛ̂i a dílaa-ƃelai da mɛni-sâa ƃó-ƃelai. 5Dí (4,000) wála náaŋ ƃe pâi kɛ̂i ziɣãŋ lá-ƃerei mɛi kâai. Dí (4,000) wála náaŋ ƃé pâi kɛ̂i laa-maa tɛ̂ tɛɛ̂i Yâwɛɛ pɔ́ a ŋ̀ále sãai ŋá gbɛtɛ a gɛ́ɛ ŋa laa-maa tɛ̂ tɛ̀ɛ la bɔ́i tíŋ.” 6Nya ƃe Gâloŋ Deeƃé è díŋa-kɔ̀lɛ a díkpulu yɛ̂ɛ berei Liiva ǹônii-sinaai díkɛ̀ lai: Gɛsɔŋ, Koɣa, da Melali.
7Gɛsɔŋ ǹônii-sinaai ƃé kɛ̀ a: Ladaŋ da Simei. 8Ladaŋ ǹônii-sinaai díkɛ̀ saaƃa: Zeiɛ, nyíi kɛ̀ a dílaa-tuɛ nuui da Zɛtaŋ da Zoɛɛ. 9Simei ǹyaa máŋ ǹônii-sinaai díkɛ̀ saaƃa: Selomɔ, Aziɛ da Araŋ. Dia ƃé kɛ̀ a dínâŋ Ladaŋ ŋɔsuui su-ƃelai láa túɛ-ƃela. 10Simei ǹônii-sinaai díkɛ náaŋ: Zaɣa, Zina, Zeusi da Bɛria. 11Zaɣa ƃé kɛ̀ a dílaa túɛ-nuui, Ziza kɛ́ ƃò a gɔlɛ ma nuu. Kɛ́lɛ Zeusi da Bɛria dífe nîa-pɛlɛɛ támaa maa sɔlɔ ƃó ni. M̀ɛni ma dí dílòno nɔ́ a núu-suu tɔnɔ.
12Koa ǹônii-sinaai díkɛ náaŋ: Amaraŋ, Izaa, Iburɔŋ da Uziɛɛ. 13Amaraŋ ǹyaŋ ǹônii-sinaai ƃé kɛ̀ a Eelɔŋ da Mose. Dí Eelɔŋ siɣe zu a gɛ́ɛ gɛ́ zãa maa-waa-ŋai mɛi kâa. Dí ǹônii-sinaai siɣe zu a gɛ́ɛ díkɛ kéreŋ sɛŋ kúŋ-nɛ̃ɛ kereŋ Yâwɛɛ ŋɛ́i-tuɛ a ɣele kélee, díkɛ tíi kɛ mi, díkɛ ŋɔlûwai láa seri ǹûai dîa. 14Kɛ́lɛ dí Ɣâla ŋɔnuui Mose ǹônii-sinaai láa siɣe Liiva-ŋai dínuu-suui sáma. 15Mose ǹônii-sinaai ƃé kɛ̀ a Gɛsɔŋ da Ilieza. 16Gɛsɔŋ ǹyaŋ ǹônii-sinaai láa túɛ-nuui ƃé kɛ̀ a Sebuɛ. 17Ilieza ǹyaŋ ǹóŋ è kɛ̀ nɔ́ tɔnɔ. Ǹáa ƃé kɛ̀ a Leɣabia. Ǹônii-sinaai díkɛ̀ a dítamaa.
18Koɣa ǹóŋ-surɔŋ veerɛi, Izaa ǹóŋ-surɔŋ láa ƃé kɛ̀ a Selomi. Ǹyaa ƃé kɛ̀ a ǹúu-suui kpîŋ lláa túɛ-nuu. 19Koa ǹônii-sinaai zaaƃa ɣelei láa ƃé kɛ̀ a Iburɔŋ. Iburɔŋ ǹônii-sinaai díkɛ̀ náaŋ: Zeria, Amaria, Zaɣaziɛ da Zekameaŋ. 20Koa ǹóŋ surɔŋ ǹáaŋ ɣelei Uziɛɛ ǹóŋ-surɔŋ m̀aa-ŋuŋ ƃé kɛ̀ a Maka. Veerɛ ɣelei ƃé kɛ̀ ƃo a Isia.
21Melali ǹônii-sinaai díkɛ̀ feerɛ: Malii da Musii. Malii ǹyaŋ ǹônii-sinaai ƃé kɛ̀ a Ilieza da Kesi. 22Ilieza fé lóŋ-surɔŋ maa sɔlɔ ƃó ní. Lônii-nɛyaa nɔ́ ƃe è dímaa sɔlɔ ƃò gɛ̀ sâa. Díkaayɔɔ-ŋai kɛ̀ Kesi ŋɔsuui sui ƃé díkùla a dínɛyâa. 23Musii ǹônii-sinaai díkɛ̀ saaƃa. Maali, Ɛdɛ da Zeremɔ.
24Liiva ŋɔnúu-suui su-ƃelai ká ŋí kɛ̀ yɛ̂ɛ berei díkôli-ŋai da káa-laa-ŋai díkɛ̀ lai. Dí díkelee dílòno dílaa ma é siɣe kóraŋ buu feerɛ-ƃela dîa tɛ́ ǹaa mɛi pere. Dí dílɛ̀ a gɛ́ɛ díkɛ a Yâwɛɛ ŋɔpɛ́rɛi lá tii kɛ́-ƃela da-ŋa.
25Deeƃé è mò ǹyɛɛi, “Eezuɛ-ŋai Díɣâlai Yâwɛɛ a lii-see tɛɛ ŋɔnûai pɔ́. A pâi seêi Zerusâlɛŋ wɔ́lɔ-wɔlɔ da wɔ́lɔ-wɔlɔ. 26M̀ɛni ma Liiva-ŋai dífa ŋɔ́nɔ zua-kɔlɔ-seɣe pɛrɛi siɣe kpaa máŋ mu sãa da siɣe dí lí la kpaa máŋ dí tíi tá kɛ́ m̀a.” 27É siɣe ŋ̀elei ŋí ma, dí Deeƃé wóo siɣe a gɛ́ɛ Liiva-ŋai da a sèri kóraŋ buu-feerɛ su é tɛ́ ǹaa mɛi pere, a pɔri tíi kɛ̂i Yâwɛɛ mi. 28Kɛ́lɛ, díi-ŋai da pɔri gɛ̂i ƃé kɛ̀ dí kpɔŋ Eelɔŋ ǹônii-sinaai dîa díkɛ tíi kɛ̀ Yâwɛɛ ŋɔpɛ́rɛi mu. Da pɔri kɛ̂i tíi kɛ̂i bɛ́rɛi lá-ƃerei díkɛ loŋpo-ŋai mu kɔ̀ɔ. È kɛ̀ dîa a kpa a gɛ́ɛ zãai nyíi kélee da tíi kɛ̀ lai é kɛ́ a m̀aa-waa Ɣâla ŋɔpɛ́rɛi mɛ̂ni ma. 29Gáa kɛ̀ a sɛŋ dí kpɔŋ mâa tɛ̀ɛ gbólo maa-waai kpɛtɛ mɛ̂ni ma da felaƃai nyíi kɛ̀ m̀ii-sɛŋ kpoloi kpɛtɛ mɛ̂ni ma da dɛ́-sɛŋ-fe zu kpoloi kpɛtɛ mɛ̂ni ma. Dítii-ŋai da ƃé kɛ̀ a gɛ́ɛ dí zama-sɛŋ kpoloi kpɛtɛ da zama-sɛŋ nyíi kɛ̀ a zumoɔ́ɔ a wúlɔi. Dîa ƃa da kâa zãai ŋí kélee kɔ̀ɔŋ. 30Dítii-ŋai da ƃé kɛ̀ a gɛ́ɛ díkɛ sɛɣɛ-fêi tɛ̀ɛ Yâwɛɛ pɔ́ díkɛ wule tòo m̀a a ɣele-wala da ɣele-wulii kélee. 31Da kâa wule tòo Yâwɛɛ m̀a da kɛ̀ kéreŋ sala kulâi m̀a a Vii-tɔɔ-ɣelei, Ŋ̀áloŋ Ninai da gúu-ŋai da kpɛ́ni-ŋai kélee ŋ̀ele yɛ̂ɛ berei m̀aa nɛ̃ɛ̂i kɛ̀ dí gɛ́ la a ɣele kélee Yâwɛɛ ŋɛ́i-tuɛi. 32Liiva-ŋai dítii ƃé kɛ̀ a gɛ́ɛ díkɛ zua-kɔlɔ-seɣe pɛrɛi da Ŋ̀âla-pɛrɛ Kɛ́tɛi mɛi kàa Yâwɛɛ ŋɛ́i-tuɛ. Díkɛ naa díkɛ̀ kpɔŋ mâa tɛɛ ŋ̀âla-fɛli mɛni-ŋai su díkaayɔ-ŋai kɛ̀ a Eelɔŋ ǹônii-sinaai yée mu.
Currently Selected:
Kɔlɔnikɔ Maa-ŋuŋ 23: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia