Hab 1
1
Re' i Habacuc xupahqaaj ree Dios chi naa ruko'ljiik chuwach i ti' k'axik
1Re' wili xk'uhtjik reh parusaq wiriik i Habacuc, ruum i QaJaaw Dios. 2Re' Habacuc je' wili i xuq'or:
QaJaaw Dios, ¿Ko jarpech chik naanuk'erem nuchii'
chi naakooj atoob'eem, eh xama' kinab'iraj ta wo' hoq?
Eh ¿ko jarpech chik naanupahqaam aweh chi nee qoh ako'leej?
3¿Chib'ih reet noq xayeew q'ab' chi k'achi'
wilom i ti' k'axik, ruch'ihil i yiib' wach wili?
¿Chib'ih reet noq wilik ikaansanik iib',
wilik i josq'iil, wilik i peleto, wilik i wech'inik iib' chi qaxilak?
4Re' k'uhb'aal ma' nkiyeew ta chik rajaawriik i q'atal q'orik.
Re' i yiib' wach kina'ojb'al inki a'n i ti' k'axik reh i korik wach kik'ux,
eh xama' kiye'ariik ta wo'
chutojariik i kimahk, inki.
5Re' i QaJaaw Dios je' wili i xuq'or reh:
Chawilow reje i nimaq tinamit cha junsuut,
ma' k'isiin i sahchb'al k'uxliis naa nub'anam kuuk', naa ayo'jiik ruum.
Tokoom ta nee nq'orik reh chi naa nub'anam taqe i re' ma' nee ta naq inanimaj.
6Re' hin naa nutaq'aam taqe reje i aj Caldeo,
ma' k'isiin ta kijosq'iil, yiib' wach kib'anik.
Eh kichopom kik'ux chi ojik chi junsuut i wach ak'al
reh i ruchopariik kinaah taqe i ye'aab' tokoom ehchan reh.
7Re' keh q'e' kow kiib', ti yo'joq kuum.
Eh ma' kiyeew ta rajaawriik i k'uhb'aal,
xa re' inkiyeew rajaawriik inki a'n i keh.
8Eh re' i kikawayu kow ki ajiminik,
ma' xata je' kiajiminik i nimaq taq b'ahlam,
eh yohb'aal wach kijosq'iil, ma' xata je' kijosq'iil i xohjb'.
Eh xiik' naah kik'ihaal i kijohtik chikiij i kikawayu,
xa pan jumehq'iil kiooj chi peleto chikinaah i tinamit,
je' rukab' noq inrupinik i xihk.
9Eh naa kisacham wach chib'ih inaakirem
pan kib'eeh, eh naa rik'iik kiyohb'isam i tinamit.
Re' i tinamit naa kichopom naah,
ma' xata je' k'ihaal i saniib' tub'lik chichii' i palaw.
10Naakikaqse'laam panaq' kiwach taqe i reey,
taqe nimaq wach kina'ojb'al.
Eh ma' naa ta ruponiik panaq' kiwach inkiko'leej wii' kiib' i tinamit.
Eh naakik'otom aak'al kookb'aal, korehtaal inkichop naah i tinamit.
11Eh je' i nik'ik i kaq suut teew noq naa kisacham wach taq aatinamiit,
eh naakikapaam chi ruuk' i rajaawriik i kitiyoox naa kianam i re', inki i Dios.
Re' i Habacuc kow xupahqaaj chi tob'joq ruum i Dios
12Re' i Habacuc je' wili xuq'or:
QaJaaw Dios wilik i aSantohiil, ma' naa ta kimiik,
¿Mi ma' wilkaat chaloq re' hat noq komajaa' chii wilik?
Re' hat, hat waj ko'loom maayeew q'ab' chinee qoh kimik,
eh re' hat xat ye'wik q'ab' keh i aj Caldeo chi naa kianam qeh, tojb'al riij i qamahk.
13Re' hat saq wach awánima, ma' ponik ta chawach i yiib' wach na'ojb'al.
Eh ¿Chib'ih reet noq neen nawil i ti' k'axik neenkian qeh i yiib' wach kina'ojb'al,
eh chi xama' xta neena a'n chiriij?
Re' keh inkisach wach i korik wach kik'ux,
ma' je' ta kikab' i keh.
14Eh ¿Chib'ih reet noq qoh akanaa' chi qutkeel chi je' qakab' taqe i kar panha',
chi je' qakab' taqe i chikop kijukem kiib' noq kib'ehik, ma' xta ilil keh?
15Re' taqe i aj Caldeo ko ma' k'isiin i tinamit naa kichopom naah,
ma' k'isiin naa rusuuqb'iik kik'ux,
je' rukab' noq insuuqb'ik ruk'ux i aj kar noq i ruchop i kar ruuk' ya'l,
ruuk' lok lok naah ch'ihch'.
16Re' i karineel i ruyeew ruloq'il i ru ya'l,
i ruk'isa lok lok naah ch'ihch' b'amb'al rukaar,
i ruk'at rumayiij chikinaah, t'iosb'al reh chi ruuk' i re'
i rub'an ruwa' ruhaa' chi korik, eh suq i ruk'ux.
17¿Mi je' re' i naa kianam re' i aj Caldeo?
¿mi xa eliik je' inchoparik kar re' i tinamit naa kianam reh
i kikanteesjiik? ¿mi ma' naa kiketelaam wach re'?
Currently Selected:
Hab 1: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.