Zac 1
1
Chi yawtej Jehová is conob
1A yet waxakebxa xajaw yet is cab abilxa yoc Darío yin reyal, a yet tu' max yalon Jehová juntzan k'anej ti' bay Zacarías is chekbej, a ton is c'ajol Berequías, is yitxiquin Ido. Max yalon axca ti':
2-3Ayin Jehová in ti', Yajaw in yin Masanil, yelxac'al max tit wowal yin eb echmam, yuj tu' xan al tzet chi wal ti' bay in conob: Ayin wal caw Jehová in chi wala', meltzojanek ayin, cax ok in meltzoj c'apax ayex. 4Manchak e pitnej e ba, axca max yun pitnen ba eb e yichmam tu'. Max yal eb in chekbej yet payxa tu' bay eb: Axca wal ti' yalon Jehová Cham Yajaw yin Masanil: Naek wal e ba yin e yob beybalil, c'al yin e yob unbenal, ẍi Cham, ẍi eb in chekbej tu', palta maj cha' yab eb, tamwal max yikej eb. 5Palta axa tinani' xin, ¿baytal ayoc eb e yichmam tu'? Toltax eb in chekbej, tokwal iquistoc'al ec' eb tinani'. 6Axa pax in k'anej, c'al in chekbanil max wal bay eb in chekbej tu', max yun yin eb e yichmam tu', yuj tu' max na ba c'ul eb, cax max yalon eb: Mayal con yut Jehová, Cham Yajaw yin Masanil axca max yun naoni, atac'ala' is mojalil co yob beybalil, c'al co yob unbenal, ẍi eb, ẍi Jehová, cachi, ẍi Cham.
Max yil Zacarías juntzan ayoc yiban chej
7Ayin Zacarías in ti', is c'ajol in Berequías, is yitxiquin in Ido, max in cha' juntzan k'anej ti' bay Jehová, yet wal 24 waay yet 11 xajaw (a ton jun xajaw chi yik Sebat), yet-xa is cab abil yoc Darío yin reyal. 8A yet ak'balil, max tx'oxlay wil jun ti': Max wil jun axca junok winak ayaj yiban jun cakyin chej, max oc wanaj no' bay jun jobe, xol te arrayán, axa bay yintak jun tu' ay junxa bulan no chej ay mac ayaj yiban. A xol no' tu' ay no cakyin, ay no sakbujinak, ay c'apax no sakyin. 9Max in k'anlen axca ti': Mamin, ¿mactxel juntzan ayaj yiban chej tu'? quin chi. Max tak'wi jun ángel chi k'anjab wetok tu' axca ti': Ok in tx'ox ayach, mactxel eb, ẍi. 10Yuj tu xin, max yalon cham ayic' bay nan xol juntzan te arrayán tu' axca ti': A ton eb ti' max cheklaytok yuj Jehová yuj toj yilon eb bay masanil yulyibank'inal, ẍi.
11Max yalon eb ayaj yiban chej tu' bay Cham yángel Jehová ayic' xol te arrayán tu' axca ti': Mayal con ec' bay masanil yulyibank'inal. Watx'c'al max jila', caw wal ayc'al junc'ulal, ẍi eb. 12Max yalon Cham yángel Jehová tu' axca ti': Mamin Jehová, Yajaw ach yin Masanil, atax yet aytek owal yin Jerusalén, c'al yin Judá, ayxa 70 abil tinani'. ¿Jantakto wal ok mayjok, catawal tu' ok cus a c'ul yin eb? ẍi Cham.
13Cax max tak'wi Jehová bay jun ángel chi k'anjab wetok tu', cax max mimanc'ulneni. 14Yinxac'al aymanil max yal cham ángel tu', tol chi walil juntzan k'anej ti': A ton juntzan ti' max yal Jehová, Cham Yajaw yin Masanil: Ay wal in miman camc'ulal yin Jerusalén, c'al yin tzalan Sión. 15Yuj tu' xan max k'ak'bi tit wowal yin juntzanxa conob tu' tol c'am jabok chi oc eb il. A yet txennej wowal yin Jerusalén, yelxac'al max ec' eb yiban yak'on yatakilal yin in conob tu'. 16Yuj wal tu', ayin wal Jehová in chi wal axca ti': A tinani' ok in meltzoj bay Jerusalén, yin in tx'oxon in yabenc'ulal. Ok wak'on ca watx'nelay aj in templo bay tu', cax ok ca watx'nelay c'apax aj Jerusalén tu', ẍi Jehová, ẍi cham ángel. 17Maxtoc'al yal cham ángel tu' ayin axca ti': Al c'apax el juntzanxa ti': A Jehová, Cham Yajaw yin Masanil chi alon axca ti': Ok wi pax aj can juntzan in conob ti', ok in mimanc'ulnej Sión junelxa. Ok walil junelxa tol a Jerusalén ti', in conob tol sic'bil el wuj, ẍi Jehová, ẍi cham ángel.
Cab tzet yetal max tx'oxlay yil Zacarías
18Max in aj t'ananok, cax max wilon caneb yuc'a' no no'. 19Max in k'anlej bay jun ángel chi k'anjab wetok tu' axca ti': ¿Tzet wal chi yal elapnok caneb yuc'a' no' tu'? quin chi bay. Max yalon ayin: A juntzan yuc'a' no' tu', chi tx'oxtek yipalil juntzan nación max saklemnentok eb aj Judá, eb aj Israel, c'al eb aj Jerusalén, ẍi.
20Max lajwi tu', max tx'oxon pax Jehová wil canwan eb tenom ch'en. 21Max in k'anlen axca ti': ¿Tzet chi ul yun juntzan tenom ch'en ti'? quin chi. Max yalon ayin axca ti': A juntzan tenom ch'en ti', max jayoc eb ul xibteni, c'al yak'on lajwok yipalil juntzan nación max uchon ay conob Judá, cax max saklemnentok eb cajyom bay tu', ẍi.
Currently Selected:
Zac 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989