Pr 1
1
Yichbanil k'anej
1Is k'anej cham Salomón, c'ajol David reyal Israel.
2Max tz'ibelaycanok, yet watx' chi al-lay el jelanilal, c'al cuybanilej, chi colwaji, yet watx' chi nachaj el juj juntzan k'anej tol ay wal yelapnok.
3Yuj xan chi je' co beybalnen jelanilal, watx'ilal, tojolal, c'al bay ijanilal.
4Yochwan cham Salomón tol chi aj can is nabal eb ach'ej tol c'am is nabal, tol chi ak'lay yojtaknej el eb, c'al yilontek ba eb.
5Yabokab eb aj nabal, yet watx' chi aj can yojtaknen eb; yabokab eb jelan, yet watx' chi aj can nachaj el yuj eb.
6A juntzan k'anej ti', chi colwaj yin co naon el tzet c'uan el yin is k'anej eb jelan, c'al tzetbil yayji juntzan k'anej pural chi nachaj el juj.
7A yichbanil acaw jelanilal, tol ayokab yelapnok Jehová yul co sat. A eb c'am is nabal, c'am chi yochej eb chi yi' is jelanil, c'al is cuybanil.
Nabalej chi al-lay bay eb ach'ej
8Ach in c'ajol, cha ab a cuybanil chi wala', cax manchak entaknej el a cuybanil chi yak' a txutx.
9A yuj juntzan nabalej ti', ok watx'jok oc a beybal yuj, axca chi yun watx'ji aj eli yuj junok uej, ma yuj junok corona.
10Ta a eb yobtakwom chi yochej chach montejtok yetok, manchak a cha abej.
11Tekan ok yal eb ayach axca ti': Ocan jetok, yet watx' chon makwaj yulak be yet chi co mak'on cam junok anima chi ec' bay tu', caxc'al c'am is mul ayon.
12Yul wal is cawil ok co mitx'oni, chi lajwi tu' ok co c'ayonxac'al elok.
13Catatu' ok jioncan masanil pojanil beyomal, cax ok jak'on noj co na yuj masanil tzet yetal tol ok jelk'anej.
14Sebach, ak' porobal a suerte jetok, ok jak'on et yin tzet yetal ok ji', ẍi mi eb.
15Ach in c'ajol, manchak ach toj yetok eb; a ti et, tol najat chach el yul is be eb.
16Yujtol yelc'ulal chi yak' eb yip yunen yobtakilal; toxac'al chi nanon eb yin mak'on cam anima.
17Tok ay yopiso junok yal chi ayi, tatol chi yil no tz'iquin tu'.
18A juntzan winak tu', is yalil eb chi yayok, ac'al oc eb chi mak'cam ba.
19A junok elk'om, bak'in mi ok camok; axca tu' ok yun cam eb chi yochej chi oc beyomal yuj yobtakil chi yunej.
Awtebal yin jelanilal
20-21A bay yulak calle c'al bay chi jayoc be, a bay txonbal c'al tzanc'al bay chi wajbaj ba anima, chon yawtej Dios, yuj yak'on co nabal.
22A wal ayex ti' ex ach'ej, ex tol c'amto e nabal, toc'al chex buchwaji: ¿bak'in wal ok e bek e camc'ulnen jun e c'am nabalil tu'? ¿bak'in ok e bekcan e buchwaji, c'al e yintaknen el ojtakbilal?
23Chaek e yab bay ok ex in tenchanej, axca tu' ok yun wak'on in c'ulbal ayex; ok wak' e yojtaknej el in k'anej.
24Ayin ti', chex wawtej, yet watx' chex tit ayin, palta c'am che yochej che cha e yabej.
25Axa chi yunej, tol che yintaknejcan el tzet chi wala', cax c'am che cha e yab in tenchebal.
26Axa ok yun xin, tol ok in tzewok e yin yet ok jayoc yatakilal e yiban. Toxac'al ok in buchwaj e yin yet ok ex camel yuj xiwilal.
27A wal yet ok jayoc xiwc'ulal, yatakilal, bilc'ulal, c'al cusc'ulal e yiban, axcaxac'al junok cakxuchum cak'ek' tol chi yak' lajwok masanil, caywal tu' ok e yunej.
28A yet jun c'ual tu', ok in e yawtej, palta manxa ok in tak'wok ayex; ok in e sayic'ok, palta manxa ok in ilchaj e yuj.
29Yujtol che buchcan el jelanilal, c'am che yochej tol ay welapnok yul e sat.
30C'am che yochej che cha e yab tzet chi wala', tol che yintaknejcan el tenchebal chi wak'a'.
31Ok e yab yail yuj e beybal tu', toxac'al ok ex caktzaj aj yuj e yobtakil tu'.
32A eb c'amto is nabal, ok cam eb yuj is c'am nabalil, ok lajwok ay eb yob nabal yuj c'am chi cha eb yabej.
33A pax mac tol chi cha yab tzet chi wal xin, a jun tu' ok ayjok ec' yin junc'ulal, c'am bay ok xiwok, ẍi Cham.
Currently Selected:
Pr 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989