Lm 1
1
Bit yet cusc'ulal yuj yailal Jerusalén
1Cusiltakxac'al max yuncan conob Jerusalén bay xiwil anima yet payxa. Lajanxac'al max yuncan jun miman conob ti', axca chi yuncan junok ix ix tol mayal camtok yichamil.
2A yet payxa, axca tol yajaw yayji xol nacionlak, axa tinani', chi ak'lay pural yoc yin mulnajil. Toxc'a chi t'ukbi c'ul yok' yet ak'balil; tol wal jilili yaytek yal sat yin tz'eyil-lak sat. A xol juntzan nación watx' yak'on yetok, c'amxa junok chi mimanc'ulneni. Masanilxac'al max meltzoj oc ajc'ulal yin.
3Caw wal ya' chi yab eb aj Judá yuj mulnajil tol yatak yoqui; ilab mayal ilaytok eb yin presoal. Ayxa ec' eb xol juntzanxa nación. C'am jabok xewilal chi yun eb. Ayxa ec' eb xol yatakilal; max michchaj eb yuj eb chi ukteni.
4Cusiltakxac'al yayji beal Sión tinani'. Tok ayto mactxel chi jayoc yet k'in. Tz'ininixac'al yayjican puertail conob. Asanxanej ok'il chi yun eb sacerdote. Eb k'opoj tacnakxac'al c'ul eb. A conob Jerusalén lanan yeq'uel yailal yiban.
5Mayal ayc'ay yuj eb yajc'ul; a eb ajc'ul oc yin tu', lanan yaj can eb. A Jehová max aon oc yailal yiban, yujtol yelxac'al miman is yobtakil max yaocok. Mayal ilaytok eb cajan bay tu' yin presoal yuj eb ajc'ul.
6Mayal c'ayaj is watx'ilal yili conob Sión. A eb is yajawil eb, lajanxac'al eb axca no' tx'ucchej c'amxa chi ilchaj is lobej, xan lanan pax yip. Toxac'al jutxbil yakan satak eb chi ukteni.
7A wal yet c'ual ayoc eb aj Jerusalén yaben yail yin etnejc'ulal, chi naontek eb masanil beyomal ay bay eb yet yalantok. A yet max ayc'ay eb yul k'ab eb ajc'ul, c'amxa mactxel max colon el eb. A wal yet chi il-lay oc eb yuj eb ajc'ul tu', chi buchlay eb yuj mayal ayc'ay eb.
8A eb aj Jerusalén, yelxac'al miman yobtakil eb max yaocok, xan moj wal yajlayi. A eb tol miman yelapnok jun conob tu' yul sat yet payxa, axa tinani', tolxa chi yaj eb, yujtol mayal il-lay is q'uixwiltakilal. Yuj tu' xan a eb aj Jerusalén, caw wal chi ok' eb, toxac'al chi makchej el eb sat yuj q'uixwilal.
9Caw wal miman txequel yayji is yobtakil eb cajyom bay Jerusalén tu', palta tokwal ay tzet chi na eb yuj tzet ok jayoc yiban. Caw wal c'ayubtakxac'al max yun yayc'ay is conob eb, tok ay mactxel chi mimanc'ulnen eb. Chi yal eb anima bay tu': Mamin Jehová, ilawal co yailal on, yujtol a eb jajc'ul on, mayal on yuch lajwok eb, ẍi eb.
10A eb ajc'ul mayal yican eb masanil is beyomal Jerusalén. Max yil wal jun conob tu' yoctok lemnaj eb tx'ok conobal bay yul is templo Dios, a ton juntzan anima tol max yal Cham, tol c'am chi je' yoctok.
11A masanil eb cajyom chi ok' eb, chi ec' eb sayon is lobej. Mayal yatok eb is beyomal q'uexelok is lobej, mimanokxac'al iquis ec' eb. Max yalon eb: ¡Mamin Jehová, ocan t'anan jin yin tzet max yun jayc'ayi! ¡Mamin Jehová, il wal oc a c'ulok jin yuj co yailal!
12A ayex lanan e toj yulak be ti', ocanek waanok che naoni, ¿ay mi wal yailal axca jet ti'? Yelxac'al chi ec' yiban jaben yail. A Jehová max yatek jun yailal ti' jiban yuj yowal is c'ul.
13Atac'al bay satcan max yatek Jehová jun k'ak'ej, yet chi yak' lajwok ay co bakil. Max watx'nej ay jun yal co satak, cay wal tu' max yun co meltzojtok jintak. Max on beklaycan yuj, junjunxac'al bek chi yaon oc yailal jiban.
14Mayal yil Jehová co yobtakilal, ac'al oc co yobtakil tu' max on c'alon ayok, axca wal junok ikatz caw wal al yayji oc jiban, caw wal tol chi pax jip yuj. Mayal con yaoc Cham Jajawil yul k'ab eb ajc'ul; satak eb tu' c'amxa chi je' co tec'ban co ba.
15Caw wal najat max yican el Jehová eb caw wal tec'an yin colwaj jetok. Max yatek jun miman bulan soldado yin yak'on owal jin, yet chi lajwi ay masanil eb jach'ej on. Mayal on tec'lay ay ayon aj Judá on ti' yuj Cham, axca wal chi yun tec'lay el yal an uva.
16Yuj wal juntzan ti' xan chon ok'i; caw wal chi el yal co sat. Tok ayto mactxel chon mimanc'ulneni; tok ayto mac chi je' yak'on co tec'anil. A xol yailal tu' max can eb juninal on, yujtol a eb ajc'ul tu' yelxac'al max je' yuj eb jintak.
17Max jiaj co k'ab yin tewilal, palta c'am mactxel chon mimanc'ulneni. A Jehová max wajbantek eb cajan co cawilal yet chi yak'on eb owal jin. A Jerusalén ti', intaknebilxac'al yayji yuj eb.
18Max yun wal Jehová axca wal is mojalil, yujtol tenomtak max jut co ba bay is chekbanil. Ex conob, abek wal tzet ok jala'; ilek wal co yailal. A eb juninal on, mayal ilaytok eb yin presoal.
19Max co k'an colwal juntzan nacionlak ayoc jetok yaloni, palta toc'al chon yetnej eb. A eb cham sacerdote, c'al eb cham icham winak, lanan yec' eb sayon is lobej, max cam eb yuj wajil yulak calleal conob ti'.
20Ilab wal xin Mamin Jehová, a wal yuj co yailal ti', xan caw wal ok nic'chaj txam co c'ul chi jabej. A wal yailal tu' chi oc pitz'itz'ok yin co c'ul chi jabej, yet chi co naontek co tenomtakil max el juneni. A bay yina tu' chi ak'lay cam eb juninal on yetok espada, axa bay yul conob ti', ay c'apax camich.
21A eb anima, chi yab wal eb yel jaw yuj co cusc'ulal, palta tok ay mactxel chon mimanc'ulneni. A masanil eb ajc'ul oc jin, yojtakxac'al eb co yailal, caw wal chi tzaloj eb yuj co yailal max aoc jiban. Jayokab oc jun c'u tol albilcan el oj yet payxa, yet watx' lajan ok yun eb axca chi jun ti'.
22Natek jantak is yobtakil eb. Ut c'apax eb yuj is yobtakil, axca wal chon ot yuj jet ti'. Caw wal mimanxa chon ok'i, chi pax yip janimail chi jabej, ẍi eb aj Jerusalén bay Jehová.
Currently Selected:
Lm 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989